Bago ni Timotius mampongayo topepatuduki to tado nakono
4
1 Inosa Gasa nu Allatala ante mpuu-mpuu nanguli bakote ri eo ngkapurina saganta tou kana mampesapuka i Kristus. Isira kana matundu ri wao-wao to nepakapusa pade mantutu pepatuduki-pepatuduki nu seta, 2 to niparata nu tou-tou to nabelo wongko to nobure boa-ra, pade tou-tou ee tadomo nampekiri mpuu-mpuu, umba nuanu to nabelo, umba nuanu to nadaa. 3 Isira nopatuduki tou bona tado moncamboko pade tado mangkondi kondia to nipetagii. Bo ee kondia ee nipajadi nu Allatala bona rakondi nu tou-tou to neparisayamo si Kristus pade to nanguncanimo pepatuduki to nakono lako ri Allatala ante mosukuru ri Allatala. 4 Sumawee ngila ngaya nuanu to nipajadi nu Allatala ee nabelo, pade tado namo sangayaa to tado mamala rakondi ande mosambayamo ri Allatala. 5 Sabana lolita nu Allatala nanguli sumawee ee nabelo pade sambaya-ta nowia sumawee kondia ee mamala-da rakondi.6 Ande iko mopatuduki sumaweena ee ri sarara-sarara saongu kaparisayaa, iko kana majadi batua ni Kristus Yesus to nobago ante nabelo. Pade iko nampake lolita nu Allatala ante pepatuduki to nakono, to nitutu-mumo sinungka ei, bona mampowia kaparisayaa-mu si Kristus mantambei ntotopa karosona. 7 Kawaosimo jarita-jarita to tado naria lotuna, pade iko kana mopaguru koro-mu bona matuwu mantutu dota nu Allatala. 8 Mampakaroso koro saodi ngkola lotuna, agiana ande ikita mampakaroso rara matuwu mantutu dota nu Allatala nadea lotuna ri katuwua tempo ei pade ri eo ngkapurina. 9 Nuanu ee nakono-da pade masipato ratarima bo raparisaya mpuu-mpuu. 10 Etumo sabana ikita mampesimbukui pade mobago ntomo, apaa ikita nesarumaka mpuu-mpuu ri Allatala to natuwu, Ia-mo to nampakasalama sumawee tou, nelabi-labi ntotopa tou-tou to neparisaya si Yesus. 11 Patudukimo sumaweena ee, pade tudumo tou-tou mantutu. 12 Nemo mu-palambaka namo saduaa tou mampoewewe-ko apaa iko nangura-dapako. Pegoliana, aginamo iko majadi jonjo ri tou-tou to neparisaya ri rara nu lolita-mu pade inggu-mu, ri rara pampotowe-mu singkapada manusia pade ri rara mpeparisaya-mu si Yesus Kristus, pade ante katuwu-mu to nagasa. 13 Rancana ee, duuna marata-ku ngoni, iko Timotius kana mpuu-mpuu mobasaka tou-tou Buku Nagasa, pade modederi bo mopatuduki-ra. 14 Nemo mu-kalingani mampake kuasa lako ri Inosa Gasa nu Allatala to niweikaka-ko tempo nu topangkeni-topangkeni todea nu Allatala nountu pale-ra ri woo-mu, pade noparata petetesi nu Allatala nancambelai koro-mu, sintou-mu niongko najadi topoparata lolita nu Allatala. 15 Powiamo sumawee bago ee ante rara mpuu-mpuu bona nakalio nu sumawee tou bakote nantambeimo pantutumu dota nu Allatala ri rara ngkatuwua-mu. 16 Jagaimo koro-mu pade jagai mbii pepatuduki-mu. Aginamo iko mowia oa sumaweena ee, sabana ante eemo iko kana mampakasalama koro dodo-mu ba tou-tou to namparonge-ko.