Atura-atura ri topangkeni todea nu Allatala
3
1 Nakono mpuumo lolita ei: “Tou to madota majadi topangkeni todea nu Allatala, mampodota sangaya bago to nibila mpuu.” 2 Eemo sabana, to majadi topangkeni todea nu Allatala, tou to tado naria kasalaa-na, sadua ngkola bangkele-na, na-ncanida motahangi rara-na, mabija, pade tado mengaya nuanu napowia, madonu ande mantarima tou ri sou-na, pade mamala mopatuduki tou, 3 nemo tou to samata malangu, ba tou to samata mombewiko. Agiana tou to madole pade tou to mampobelo posingkabelo, ia mbii tado to nampodoko doi. 4 Ia kana manguncani moatoro to ri rara ncou-na ante mabelo, pade mopatuduki ana-ana-na bona matundu pade mampabila-ya. 5 Sabana ande tou tado manguncani moatoro to ri rara ncou dodo-na, beiwamo kamala-na moatoro todea nu Allatala? 6 Sadua topangkeni todea nu Allatala tado mamala tou to lako meparisaya si Yesus, sabana ia ngoni majadi malangko rara-na pade rasuku ewa Mbagou nu Seta impia. 7 Ia kana sadua to noinggu nabelo ri tongo ntodea, sabana ande tado iwee, ia kana nakanene nu tou, mangkajadika-ya manawu ri rara pesori nu Mbagou Seta.Atura-atura ri topampangawa topangkeni todea nu Allatala
8 Topampangawa topangkeni todea nu Allatala aginamo tou to nabelo pade nalingaa rara-na, tado nampodoko doi pade tado tou manginu anggur madea gaga. 9 Isira kana mangkakamu pepatuduki to nipopakaliomo nu Allatala ante rara mpuu-mpuu pade magasa nancambelai kaparisayaa nu Karasitee. 10 Agina raparesa ncala katuwu-ra bona rapanguncanii bakote tado naria nasalaa-ra, pade mamala-rada rapelisi. 11 Bangkele mbii-ra, kana tou to mabelo mbii, tado tou to nampobelo mampopombebua-bua lolita. Isira kana manguncani motahangi rara pade mamala raparisaya ri rara nu ngila ngayana. 12 Topampangawa topangkeni todea nu Allatala kana mobangkele sadua ngkola. Ia kana manguncani moatoro ana-ana-na pade to ri rara ncou-na ante mabelo. 13 Topampangawa topangkeni todea nu Allatala to nobago belo, kana rabila pade majadi mantambei kabia-na mololita manguli kaparisaya-ra si Kristus Yesus.
Todea nu Allatala, sarumakaa pade posuko kakonoa
14 Yaku, i Paulus nancarumaka tadomo masae-ku kana mampelei-ko Timotius. Noudamo iwee, ku-tulisi mbii sura ei siko, 15 bona ande mawewe-ku, mu-ncanimo beiwa pura-ta kana matuwu majadi todea nu Allatala, to nireke nu Allatala najadi ana-ana-Na. Apaa ikitamo todea to nenomba ri Allatala to natuwu. Todea nu Allatala eimo posuko bo to mampajagai pepatuduki to nakono lako ri Allatala ewa posuko pade tinja to mampakaroso saongu sou. 16 Nakono mpuuda bakote pepatuduki-pepatuduki nakono to nipanotosimo nu Allatala si kita neliu mpuu. Eemo sabana, mantutu dota nu Allatala ta-parisayaa mpuu bakote:
i Kristus Yesus narata bo natuwu ri dunia ei nowoto mpo manusia.
Inosa Gasa nu Allatala nopadupa bakote Ia-mo tou to nakono,
pade nikalio nu malaeka-malaeka nu Allatala.
Tempo ee tou-tou to tado to Yahudi namparongemo Kareba Belo nancambelai-Ya.
Ri sumawee dunia tou-tou neparisaya si-Ya.
Pade niongko-Yamo ri pearia-Na noroa ante Allatala ri rara nu pampemabose-Ya.