Nancambelai sambaya todea nu Allatala
2
1 Paralou ntotona, ku-perapi si komi, sambayanimo sumawee tou. Perapimo ri Allatala nuanu to niparalou nu sumawee tou, pade posukurumo nancambelai-ra. 2 Pade sambayani mbii sumawee mbagou pade topoparenta-topoparenta. Perapimo ri Allatala bona ikita mamala matuwu maroo bo ma'ama, pade mamala matuwu mabebasi mantutu dota nu Allatala bo ante inggu to masipato ri pangkalioaa nu sumawee tou. 3 Sumawee sambaya ewa ee nabelo pade nampakawoe rara nu Allatala, Tonampakasalama-ta. 4 Ia madota bona sumawee tou rapakasalama pade manguncani pepatuduki to nakono nancambelai i Yesus Kristus. 5 Sabana, sadudua ngkola-da Allatala, pade kawule sadua ngkola mbii-da topopanoroi riolo nu Allatala ante manusia, ee-mo i Kristus Yesus. 6 Ia sadua manusia to nambeimo koro-Na majadi petolosi bona mampakabebasi sumawee tou lako ri jeko-jeko-ra. Ante eemo Allatala mopanotosi ri tempona to masipato, bakote Ia madota bona sumawee tou rapakasalama. 7 Pade eemo sabana yaku nitudu malou ri tou-tou to tado to Yahudi bona mampopowole si sira kareba nancambelai kaparisayaa to nakono. Nuanu to niuli-ku ei nakono-da, tado boa-ku. Pepatudukii nancambelai inggu nu baleilo pade bangkele ri rara penombaa todea nu Allatala
8 Yaku, i Paulus madota bona riumba-umba baleilo mosintobu menombaa ri Allatala. Isira kana mosambaya ante rara to magasa, tado maria sodo ba posisala ri rara-na. 9 Iwee mbii bangkele. Isira kana mowaru masipato bo moada. Nemo rapopengaya-ngaya mowia wulua. Nemo mampakaramba koro ante ramba-ramba ewa bulawa, mutiara bo powaru to nasuli-suli. 10 Bangkele kana mampakaramba koro-na ante inggu-inggu to nabelo to masipato napowia nu bangkele to nenomba ri Allatala. 11 Ri rara polibua todea nu Allatala, aginamo butu dua bangkele malino bona mamala mamparonge nuapa to nipepatudukii pade matundu ri pepatuduki ee. 12 Yaku, i Paulus tado moparikonoi bangkele mopatuduki ba moparenta baleilo, isira kana malino. 13 Sabana to nipajadi paramulana i Adam-da, naopu ee pade i Hawa-da. 14 Pade tado i Adam to nibagiu nu Mbagou Seta, agiana bangkele ee-da, nangkajadika-ya najeko. 15 Noudamo iwee, bangkele kana masalama mampoanaka ana-na, asala ia ante kagasa nu rara-na meparisaya oa si Kristus pade mampotowe oa tou ntani pade matuwu ante inggu nabelo bo masipato.