Sura ni Paulus to paramulana si Timotius
Tabe
1
1 Lako si Paulus, suro ni Kristus Yesus nantutu parenta nu Allatala, Tonampakasalama-ta, pade i Kristus Yesus, sarumakaa-ta. 2 Ku-pakatu sura ei si Timotius, to nireke-ku ewa ana dodo-ku, apaa ikita saongu kaparisayaa. Towe rara, asi rara pade kasanaa nu rara lako si Pue Allatala Tuama-ta bo Kristus Yesus, mamporoasi-ko. Nancambelai pepatuduki to mepakapusa
3 Yaku, i Paulus madota bona iko matida dodo ri ngata Efesus ewa to niuli-ku siko tempo-ku nalou ri propinsi Makedonia. Sabana, ri ngata Efesus naria basangkia dua tou to nampopowole pepatuduki to mepakapusa, pade iko to kana mampopeuntu-ra. 4 Uli si sira bona nemo oa mamparonge jarita to tado nakono pade tutura-tutura to tado naria kaputuana. Sumaweena ee kawule mampopeumba posisala, pade nantolawani-ta mantutu patuju nu Pue Allatala. Aga kawule peparisaya ngkola-ta, eemo to mantulungi-ta bona ikita mantutu patuju-Na. 5 Patuju nu petetesi-ku siko bona mampopeuntu-ra, mangkajadika sumawee todea nu Allatala mombepotowe mpuu-mpuu. Towe ewa ee kawule naria ande rara-ta napakarawa nu Allatala bo ikita mampesimbukui bona rara-ta mpuu-mpuu magasa, pade mpuu-mpuu meparisaya ri pepatudukii to nakono ante tado morandua pekiri. 6 Naria saganta tou to tadomo natuwu ewa ee, isira kawule nampololita jarita to tado naria lotuna. 7 Isira madota majadi topepatuduki isi nu Parenta ni Musa, bo ee isira dodo tado nanguncani lolita-lolita to niuli-ra, apaa isira nampekiri lolita to niuli-ra nakono mpuumo. 8 Nincanita-da bakote Parenta ni Musa nabelo, ande rapowia makono mantutu dalana. 9 Natantu kana ratora bakote Parenta ni Musa tado niweika tou nabelo, agiana niweika ri tou to tado natundu ri atura, sumawee tou daa, tou to tado nakono, tou to najeko, tou to tado noagama, tou to kawule nampekiri dunia, tou to nopatesi tuama-na ba tina-na, pade tou to nabiasamo nepatesi, 10 ri tou-tou to nakese, ri to nombepogou sore baleilo ba sore bangkele, tou to nosoko tou pade nibalu najadi batua, tou to naboa, to nanguli nuanu tado nakono, pade bayema-yema to tado nampowia pepatuduki to nakono. 11 Pepatuduki to nakono ee naria ri rara nu Kareba Belo to nituduka-ku bona ku-popowole, eemo Karebe Belo lako ri Allatala to nabete pade masipato raune.
Posukuru sabana towe rara nu Allatala
12 Yaku, i Paulus mosukuru si Kristus Yesus Pue-ta. Niweika-Na ku-mo karosoa bona mampowia bago-Na, pade niuli-Na yaku masipato mowia bago ee, 13 noudamo impia-ku nangkanene-Ya, pade noduasi tou-tou to neparisaya. Agiana Allatala na'asi rara-Na si yaku, apaa tempo ee tadopa neparisaya-ku, eemo pade tado nincani-ku nuapa to nipowia-ku. 14 Noudamo iwee, yaku nipeponui ante asi rara lako si Pue-ta bona mamparisaya-Ya pade mampotowe singkapada manusia, apaa yaku nosaongu rara ante i Kristus Yesus. Ia nambei-ku pampakule bona mamparisaya-Ya pade mampotowe singkapada manusia. Pampakule ee niweikaka pura si kita to nosaongu raramo ante i Kristus Yesus. 15 Nakono mpuu-da lolita ei: “I Kristus Yesus namei ri dunia ei bona mampakasalama tou to najeko.” Etumo sabana masipato-da ratarima pade raparisaya mpuu. Pade yakumo tou to najeko mpuu. 16 Agiana eloumoria sabana Allatala na'asi rara-Na si yaku, bona i Kristus Yesus mamala mantudoka-ku sumawee pancabara-Na si yaku, tou to neliu jekona ei. Pade ei to majadi jonjo ri sumawee tou ngoni to kana mamparisaya-Ya pade mantarima tuwu liu-liu. 17 Jadi, kamei-tamo mampabila pade mampemabose Allatala duuna masae-sae, apaa Ia-mo Mbagou to meparenta duuna masae-sae, to tado namala rakalio pade to tado naria karopuana. Aga sadudua ngkola-Na Allatala! Amin.
Bago ni Timotius
18 Timotius, ana-ku! Bago ei ku-parisayaka ko, mantutu petetesi nu Allatala to niparata nu nabi-nabi ri todea nu Allatala nancambelai-ko. Petetesi ee mampakaroso-ko mangewa tou-tou to nopatuduki nuanu to tado nakono. 19 Pobagomo ante mangkakamu kaparisayaa to nakono pade ante rara nagasa mpuu. Naria tou-tou to tado namparaduli dota rara-ra to nanoa, nangkajadika napusamo kaparisayaa-ra. 20 Riolona ee i Himeneus pade i Aleksander. Tou rodua ee nisuku-ku ramo ante nambei-ra ri Mbagou Seta, bona isira mampeguru meuntu mangkanene Allatala.