4
Ya pagpalapit adti Tyumanem
1 Unu ya du-an nan na gayed kamu magpantanam aw gayed kamu magpan-ayil-ayil dun ni kamayu? Yan saba ya du-an nan, kay awun pagkaliman na pagka-utawun mayu na mag-atu sa Tyumanem. 2 Kay kun awun pagkaybegan mayu manang dili' mayu makamang, yanagaw syampu' da kamu aw mamantak kamu magpatay. Aw kun kaliman mayu ma-imo' dakula' na utaw manang dili' mabatug, yanagaw migpanugbuk kamu sa ayil asuntu na mig-agaw sa katas. Manang yan baling ya du-an nan na dili' mayu makamang, kay wala' kamu pagsekat adti Tyumanem. 3 Aw pangkay kun magsekat kamu adti Tyumanem, dili' kamu nan pag-atagan asuntu na beke' na matinaw ya tud mayu magsekat. Kay dagwasen mayu baling adti pagkaliman na pagka-utawun mayu. 4 Siling kamu kadi' na ka͡ubayan na miglakadenen, kay nya-uman da ya ginawa mayu sa Tyumanem. Wala ka' kamu paka-ede' na kun pagginawa͡an na utaw ya asini tas na lupa', ma-imo' sakanan po-on na Tyumanem? Yanagaw, kun ginawa͡an mayu ya asini tas na lupa', dun da kamu ka-imo' po-on na Tyumanem. 5 Unu, iman mayu aw wala' ya un ma-untung adti pigpasulat na Tyumanem asini muna? Kay dun da tadun ka-ede-i na to-o kitadun pigginawa͡an na Ispiritu na Tyumanem na pigpa-eya' nan adti ginawa tadun, aw ya Ispiritu magkadaway kun dili' kitadun matibulluk adti Tyumanem.* 6 Manang asuntu sa kadakula' na kallat na Tyumanem, to-o la kitadun nan pigtabangan na dili' kitadun degen na malatay. Aw yanagaw pigpasulat nan uman:
“Sumpu-un na Tyumanem ya utaw na magpatastas,
manang kallatan nan ya utaw na magpadalem.” *
7 Yanagaw, pagka͡agadan da mayu ya kaliman na Tyumanem. Manang pag-atuwan mayu ya busaw, aw malaguy sakanan lekat adti kamayu. 8 Pagpalapit kamu adti Tyumanem, aw ya Tyumanem magpalapit uman kamayu. Aw kamu na makasasala', ayawi mayu ya imo-unun na malatay. Aw kamu na migduwaduwa sa pagpangintu-u sa Tyumanem, tibulluka mayu ya anenganeng mayu kanan. 9 Kalata ya ginawa mayu sa manga sala' mayu adti Tyumanem. Dili' da mayu pag-ikelan ya manga pigpan-imo' mayu na malat manang kamulamulayi la aw sugawi mayu baling. Aw timbegata ya kamayu giya. 10 Pagpadalem kamu adti asdangan na Tyumanem, aw patasen kamu nan.
Ya palna-u na dili' kitadun mag-ukum sa eped na utaw
11 Kay manga inulug ku, dili' da kamu maglong sa tingeg na makapagkalat sa dengeg na eped tadun na nyangintu-u. Kay pangkay singan ya migpakalat sa eped nan dun ni paglong nan, siling na pigpasala' da nan ya sugu' na Tyumanem na ginawa͡an tadun ya kanaten eped, aw kyatinawan da sakanan na wala' nan daluga ya sugu' nan, manang nyasiling baling na mag-ukumay sa pigsugu' na Tyumanem. 12 Ya Tyumanem da olo' ya awun tulus sa pag-ukum, kay yan saba ya mig-imo' sa uldin. Aw yan olo' ya magbaya' kun singalan ya paluwa-en nan aw singalan uman ya pa-emel-emelen nan. Manang ikaw, singan kaw ka' na un mag-ukum sa eped na utaw?
Ya palna-u na dili' kitadun magpalibantug
13 Na, pakanyegi aku! Awun eped dun ni kamayu na magpalibantug maglong, “Un kami madti sambuk na lunsud adun, aw kun dili' adun, kunallaw, aw dun kami pag-eya' seled na sangka͡umay. Aw magnigosiyo kami, aw magtipun kami sa kuwalta!” 14 Manang dili' kamu maglong sa maynan kay dili' mayu saba ka-ede-an kun unu ya un dumateng kunallaw aw kun sangunu ya kadugay na pag-eya' mayu asini tas na lupa'. Kay siling kamu olo' na ebel-ebel na nyaksay nyalanas. 15 Yan baling ya madyaw mayu paglongun, “Kun kaliman na Tyumanem, mataw pa kami aw yan galu ya imo-un nami.” 16 Manang kenne' mayu baling migpatastas aw migpalibantug sa un mayu imo-un, aw yan ya malatay adti anenganeng na Tyumanem. 17 Aw kun kya-ede-an na utaw ya madyaw nan imo-un manang wala' nan imo-a, sala' da yan adti Tyumanem.