5
Pagpa-ede' adti manga mayaman
1 Na, pakanyegi mayu ya un ku paglongun, kamu na manga mayaman: Pagsugaw kamu aw pag-ulangag, kay madég ya un mayu kagamakan. 2 Un da malagak ya alaga' na kamayu ka-unan, aw pangkanen na tanga ya to-o mangkadyaw na kadégkadég mayu. 3 Aw dumateng ya allaw na wala' da ya alaga' na bulawan aw kuwalta na pigluduk mayu, liwan na putaw na pigkan na kalaling, aw yan ya magmatinaw na pigdemet mayu ya kamayu ka-unan. Aw siling uman na pagkan na kalaling sa putaw, maynan ya pagkan kamayu na atulun. Pangkay malapit da ya pag-ukum na Tyumanem, manang wala' ya katantanan mayu magluduk sa ka-unan. 4 Anenganenga pa mayu ya kamayu pigpan-imo'. Wala' mayu tumana ya pakang sa tandan sa manga mag-aniyay mayu. Pakanyegi kalaw ya pag-ulangag nilan! Dyengeg saba na Tyumanem na To-o Matulus ya kanilan pagpanganday.
5 Asini tas na lupa', to-o madyaw ya pag-eya' mayu, aw pangkay unu ya pagkaliman na pagka-utawun mayu, mabatug mayu kamangen. Manang siling kamu saba na ayep na pigpataba' na wala' nan imana na un tumben. Maynan uman kamu, kay pa-emel-emelen kamu uman na Tyumanem. 6 Tay kalaw sa kalat na pigpan-imo' mayu! Pigtanemtaneman mayu na sala' ya manga utaw na wala' ya sala', aw pigpapatay mayu silan, aw dili' nilan mabatug ya pag-atu kamayu. Yan da ya paglong ku sa manga mayaman dun ni kamayu.
Ya pagsalig tadun sa Tyumanem
7 Kay manga inulug ku na nyangintu-u, pangkay pigpamulayaman kamu na manga utaw na mayaman, manang tageni mayu ya pagkadaman adti kanilan aw tagadi ya allaw na lumiku' asini tas na lupa' si Jisus Kristu na kanaten matas na pangulu. Pagsiling kamu sa utaw na migtanem adti pawa' nan aw gayed tyumagad sa ulan. Pagdateng na ulan, tyumulin ya manga tanem nan taman sa ma-inug ya bunga, aw tigkas yan, mig-ani sakanan. 8 Aw kamu uman, magtibagseg kamu tumagad, kay dili' madugay lumiku' saba si Jisus na kanaten matas na pangulu.
9 Kay manga inulug ku, dili' kamu magpasala-ay, pagaw pa-emel-emelen kamu uman na Tyumanem. Kay dili' madugay mag-ukum da sakanan!
10 Kay manga inulug, imo-a mayu pundinganan ya manga propita na Tyumanem na pigsugu' nan asini muna. Pangkay pigpamulayaman silan na manga utaw, manang migpadeleg silan, aw wala' silan pagmalit manang gayed baling migtagad sa wan ya un imo-un na Tyumanem kanilan. 11 Yan ya umba' saya' ya manga utaw na migpadeleg pangkay unu ya kalug na dyumateng kanilan aw kenne' na kasalig na pagpangintu-u nilan. Dyengeg da mayu si Job asini muna, na migpadeleg sa pagpangintu-u nan. Pangkay to-o pyamulayaman, manang gayed syumalig sa Tyumanem. Aw asuntu na kenne' pa ni Job pyangintu-uwan ya Tyumanem, pigpakadyaw nan si Job, aw dun tadun ka-ede-i ya kallat na Tyumanem sa manga utaw.
12 Kay manga inulug ku, yeiy ya betangan adti ginawa mayu: Dili' da kamu magsapa'. Aw dili' mayu pagpatistigusun ya langit aw ya kadakula' na banwa aw pangkay unu. Ila' aw awun imo-un mu, paglong kaw, “E-e. Imo-un ku.” Aw ila' aw dili' mu imo-un, maglong kaw, “Dili' ku imo-un.” Pa-unawa͡a mayu ya kamayu paglongun aw imo-unun pada dili' kamu ukuman aw pa-emel-emelen na Tyumanem.
Ya pagpanawagtawag adti Tyumanem
13 Kun awun dun ni kamayu na kyalugan, madyaw silan manawagtawag adti Tyumanem. Kun awun magleya, madyaw nilan deyen ya Tyumanem magi sa pagkanta.
14 Kun awun dun ni kamayu na kyedelan, madyaw pa-angay nan ya manga pigsaligan dun ni simbahan na un nilan panawagtawagan adti Tyumanem. Aw talana nilan manawagtawag, asagan nilan uman na lana na olibo ya ulu nan dun ni ngalan na matas na pangulu tadun na si Jisus Kristu. 15 Aw kun mangintu-u silan na tubagen na Tyumanem ya pagpanawagtawag nilan, kaguli-an ya utaw na awun magkedel. Aw kun nyakasala' sakanan adti Tyumanem, un lanasen na Tyumanem ya manga sala' nan.
16 Yanagaw, kun nyakasala' kamu adti Tyumanem, pag-ubat-ubatay kamu, aw magpanawagtawagay kamu adti Tyumanem, pada kaguli-an kamu. Kay dakula' ya ma-imo' sa pagpanawagtawag na utaw na nyatibulluk ya anenganeng nan adti Tyumanem. 17 Anenganenga si Éliyas asini muna. * Pangkay utaw olo' sakanan siling naten, manang asuntu sa pagpanawagtawag nan adti Tyumanem na dili' da mulan, wala' saba paka-ulan dun ni banwa na Isra-él seled na tulung ka͡umay aw tenga'. 18 Aw tigkas yan, nyanawagtawag da uman adti Tyumanem migsekat na mulan da, aw yanagaw nyulan da, aw bagu piggiti-an uman ya lupa' na tanem.
Ya pagpaliku' sa utaw adti Tyumanem
19 Kay manga inulug ku, kun awun utaw dun ni kamayu na nyakasuway lekat adti matinaw na palna-u na Tyumanem, aw kun paliku-un na sambuk kamayu aw magselsel sakanan, 20 ka-ede-an mayu galu na asuntu sa pagpaliku' mayu sa utaw na nyakasala', dili' da sakanan ka-eletan adti Tyumanem manang lanasen baling na Tyumanem ya kadég na manga sala' nan.