3
Ya pagpakatanaw tadun sa kanaten dila'
1 Kay manga inulug ku, pagaw iman mayu kun madég galu ya manga utaw na ma-imo' magpalna-uway, manang paglongun ta kamu: Madyaw pa baling na tabay kanaten ya ma-imo' magpalna-uway sa manga utaw na nyangintu-u, kay ya kadég nami na migpalna-u, dakula' pa ya kanami tubagenen adti asdangan na Tyumanem, pagaw baluk ya kanami pigpalna-u aw dili' matulid ya imo-unun nami. 2 Ya kadég tadun malikit magpakasala', labi la adti paglong tadun. Kun awun utaw na matadeng makatagen sa dila' nan, yan ya utaw na makatagen uman sa kadakula' na lawas nan. 3 Simpan kun betangan tadun na kakang ya baka' na kuda', mabatug tadun aking-akingen ya lawas nan pangkay ayin pasinana. 4 Siling uman na dakula' na barko adti tas na dagat. Pangkay pigpalidpalid na mabandes na samet, manang mabatug na utaw aking-akingen asuntu sa tagbi' na bansalan pangkay ayin pasinana. 5 Maynan uman ya dila'. Tagbi' sakanan dun ni lawas na utaw, manang magpalibantug sa dakula' na imo-unun nan.
Anenganenga mayu ya atulun. Pangkay kun tagbi', manang mabatug nan masangab ya dakula' na kagulangan. 6 Aw ya dila' na utaw siling saba na atulun na dili' mabatug patayan. Kay ya dila' yan ya pyunganan na malatay na gayed migtapuntapun aw magkalat sa kadakula' na pag-eya' tadun asini tas na lupa'. Aw ya atulun yan lekat saba adti impirno.
7 Kya-ede-an tadun na mabatug na utaw nalamen ya madég na punganan na ayep, aw manga mannanap na maglupad, aw manga magpananap, aw manga tagbanwa na tubig. 8 Manang ya dila', wala' ya utaw na un makanalam sa dila' nan pangkay sambuk, kay dili' katagenan aw gayed maglong sa malatay. Siling na bisa na kamugung na makamatay sa utaw.
9 Ya dila' tadun, yan ya pagdeyen tadun sa Ama tadun na Tyumanem na migdumala kanaten, manang yan uman ya pagpanullun tadun sa utaw na pig-imo' na Tyumanem siling na kanan pagka-utawun. 10 Lekat dun ni sambuk na baka' ya pagdeyen aw ya pagpanullun! Kay manga inulug ku, dili' galu maynan ya imo-un tadun. 11 Simpan ya tubig na matabang aw tubig na ma͡asin, unu, migsambuk ya tyugbulan nilan? Wala' saba! 12 Kun munga ya kawuy na igos, wala' ya un makadali' na olibo, aw kun munga ya balagen na paras, wala' ya un makadali' na igos. Aw beke' saba na dagat ya tyugbulan na tubig na matabang. Maynan uman galu ya paglong na dila' tadun, dili' tadun pagdali-an na malat na tingeg.
Ya katadeng na lekat adti Tyumanem
13 Singalan adti kamayu ya awun katadeng sa unu ya madyaw imo-un? Kun awun katadeng na utaw, kita-en galu ya imo-unun nan na madyaw aw dili' sakanan magpatastas sa imo-unun nan manang magpadalem sakanan kay yan ya magmatinaw na awun katadeng nan. 14 Manang kun mag-inga' sakanan aw yan olo' ya dalugun nan ya magpakadyaw sa kanan pagpakabetang, dili' galu sakanan magpalibantug sa katadeng nan, pada dili' sakanan makagalu'. 15 Kay kun maynan ya katadeng nan, wala' saba lekat adti Tyumanem, aw beke' uman na kana Ispiritu nan. Manang kana utaw baling asini tas na lupa', aw lekat saba adti busaw. 16 Kay kun mag-inga-inga-ay ya manga utaw aw yan olo' ya tud nilan ya magpakatas sa kanilan pagpakabetang, dun lekat ya gayed mag-ayil-ayil aw dun indeg ya dakula' na kawayit aw kadég na punganan na malatay.
17 Manang ya utaw na awun katadeng lekat adti Tyumanem, wala' ya malat. Kaliman nan magsambuk sa ginawa adti eped na manga utaw aw magpa-iyuli' sa manga utaw na magtanam. Aw dili' maksay magkadaman manang gayed nan baling pakadyawun ya eped na utaw. Dili' magkategel manang magpakanyeg uman sa eped nan. Gayed magkallat sa eped na utaw aw manimbet sakanan. Dili' magkibang sa utaw, aw dili' magduwaduwa sa pagpangintu-u nan. Aw dili' uman magtallalingu, kay lekat saba adti Tyumanem ya katadeng nan.
18 Anenganenga mayu ya utaw na magtanem sa pag-isambuk sa ginawa. Yan ya un nan aniyen ya dakula' na kadyawan.