2
Ya palna-u na dili' kitadun magkibang sa utaw
1 Kay manga inulug ku, nyangintu-u la kamu sa matas na pangulu tadun na si Jisus Kristu na to-o syumiga ya katulus nan. Aw asuntu na nyangintu-u la kamu, dili' da kamu magkibang sa utaw. 2 Simpan na awun utaw na mayaman na bagu sumeled dun ni katipun mayu aw syumut sa madyaw na kadégkadég aw manga paningsing na alag bulawan, aw awun uman bagu sumeled na utaw na tagitu' na syumut sa palatpalat na kadégkadég na awun leneb. 3 Aw kun mamasa kamu sa utaw na syumut sa madyaw na kadégkadég aw long mayu kanan, “Ikaw, adi kaw ni tas ingkud,” manang kun utaw na tagitu' paglongun mayu, “Ikaw, adtu kaw sa kanmu ingkud ni bantal, aw kun dili', adtu kaw baling ni dalem.” 4 Na, kun maynan ya imo-un mayu, dun da kamu pagkibang sa utaw aw pamalli-en mayu ya un mayu basa͡an aw siling da kamu na manga mag-ukumay na baluk ya anenganeng.
5 Kay manga inulug na to-o ku pigginawa͡an, pakanyegi aku mayu. Enda', ya manga tagitu' na utaw asini tas na lupa' pigpamalli' saba na Tyumanem na un silan mangintu-u kanan? Aw asuntu sa pagpangintu-u nilan kanan, dakula' da silan na utaw adti anenganeng na Tyumanem, aw maka-akup silan adti kasakupan nan aw makatagtun sa kadég na pigpakang nan adti manga utaw na dakula' ya ginawa nilan kanan. * 6 Manang pigmulamula mayu baling ya manga utaw na tagitu'. Na, usipen ta kamu: Singan ka' ya nyamulayam kamayu? Aw singan ka' ya gayed migleges kamayu dyumala adti usayanan na maglimanda kamayu? Beke' saba na manga utaw na tagitu' manang manga utaw baling na matas pa kamayu. 7 Aw silan saba uman ya miglong sa makapagkalat sa dengeg na ngalan ni Jisus Kristu na yan ya pigsambukan tadun.
8 Matinaw saba ya pig-imo' mayu kun tumanen mayu ya to-o matas na sugu' na pigpasulat na Tyumanem asini muna na yan ya piglong uman na hari' tadun na si Jisus Kristu, law nan, “Ginawayi ya eped mu na utaw siling na kanmu pagka-utawun.” * 9 Manang kun magkibang kamu sa utaw, nyakasala' da kamu kay lyumakad da sa Uldin na Tyumanem aw dun da kamu katinawi. 10 Kay pangkay pigbetang na utaw adti ginawa nan ya Uldin aw dyumalug sa kadég na sugu' dun ni Uldin manang kun kyasala-an nan ya sambuk, kyalakadan da nan ya kadakula' na Uldin. 11 Kay sambuk da ya Tyumanem na mig-atag sa duwa ya sugu' ini: “Dili' kaw maglakadenen,” aw “Dili' kaw magpatay sa eped na utaw.” * Yanagaw pangkay dili' kaw maglakadenen manang kun magpatay kaw sa utaw, kyalakadan da mu ya Uldin na Tyumanem.
12 Dumateng ya allaw na tumubag kitadun adti asdangan na Tyumanem kun pigtuman tadun ya sugu' nan aw wala', na yan ya sugu' na pagginawa͡an tadun ya kanaten manga eped, aw yan uman na sugu' ya makapaluwa' kanaten lekat adti pagpa-emel-emel na Tyumanem. Yanagaw magpakatadeng kamu sa kadég na paglong mayu aw manga pig-imo' mayu. 13 Kun dili' kamu mallat sa eped na utaw, dili' kamu uman kallatan na Tyumanem kagaya moli na allaw na pag-ukum nan. Manang kun gayed kamu mallat sa eped na utaw, kallatan kamu uman na Tyumanem aw wala' ya kakallekan dun ni allaw yan.
Ya pagpangintu-u aw pig-imo' tadun
14 Kay manga inulug ku, ayin ka' ya untung kun maglong ya sambuk na utaw, “Nyangintu-u aku saba kan Jisus Kristu,” manang wala' ya pig-imo' nan na un magmatinaw sa pagpangintu-u nan? Unu ka', mabatug sakanan paluwa-en sa pagpa-emel-emel na Tyumanem asuntu sa pagpangintu-u nan na maynan? 15 Simpan na awun inulug ta na nyangintu-u, pangkay eseg aw bubay, aw migkapelek sa un nan masut aw un nan makan. 16 Aw sambuk kamayu maglong kanan, “Pakadyawun na Tyumanem ya panaw mu di dalan. Pagpakabiyag kaw aw atagan kaw galu na un mu sutun.” Manang kun wala' mu atagi na kapelekan nan, na, ayin ka' ya un nan ma-untung dun? 17 Yanagaw, wala' saba ya guna na pagpangintu-u kun wala' agadi na imo-unun na madyaw.
18 Na, simpan na awun utaw na maglong, “Dakula' ya kanak pagpangintu-u sa Tyumanem,” aw ya sambuk uman maglong, “Dakula' ya kanak imo-unun na madyaw.” Manang yeiy ya tubag ku kanilan, “Dili' kita͡en ya pagpangintu-u mu kun wala' ya imo-unun mu na madyaw. Manang pakita' ku kamayu ya pagpangintu-u ku magi sa imo-unun ku na madyaw.”
19 Ikaw nyangintu-u na sambuk da ya Tyumanem. Matinaw kaw san. Agen pa na manga busaw nyaka-ede' na sambuk da ya Tyumanem, aw migpanteneb silan sa pagpa-emel-emel nan kanilan. 20 Unu, wala' pa mayu kalabeti? Kinunu pa kamu pakalabet na wala' ya guna na pagpangintu-u kun wala' ka-agadi na imo-unun na madyaw?
21 Anenganenga mayu si Abraham na tyugbulan tadun. Pigdawat sakanan na Tyumanem siling na wala' ya sala' nan kay kya͡agadan nan ya sugu' na Tyumanem aw wala' nan demetan ya ise' nan na si Isa-ak manang pigdugsu' nan galu. 22 Yanagaw mabangal da mayu na ya pagpangintu-u nan kya-epedan na pig-imo' nan, aw dun ni pig-imo' nan dayaw da nyalingeb ya pagpangintu-u nan. 23 Aw kya-ede-an tadun ya pig-imo' nan, kay pigpasulat na Tyumanem asini muna, law nan: “Aw nyangintu-u si Abraham sa pakang yan. Aw ya Tyumanem * da ya pigsaligan nan. Yanagaw pigdawat da na Tyumanem * si Abraham kasiling na wala' ya sala' nan.” * Aw beke' pa nan olo', miglong uman ya Tyumanem na ubaybay nan si Abraham. * 24 Yanagaw, kya-ede-an da tadun na dyawat kitadun na Tyumanem kun ya pagpangintu-u tadun pig-agadan na manga imo-unun na madyaw.
25 Aw maynan uman si Rahab, pangkay miggalin sa pagkaka͡ubayan nan, manang pigdawat uman na Tyumanem asuntu sa pig-imo' nan na madyaw. Kay pigtagu' nan ya duwa ya manilibay * na utaw na Isra-él aw migpapanaw kanilan adti sambuk na dalan pada dili' silan kasaban na manga po-on nilan. Aw ya pig-imo' ni Rahab, yan ya migmatinaw sa pagpangintu-u nan sa Tyumanem, aw yanagaw pigdawat sakanan na Tyumanem.
26 Yanagaw, siling na lawas na utaw na nyatay da aw pig-ayawan da na ispiritu nan, maynan uman, wala' ya guna na pagpangintu-u na utaw kun dili' agadan na imo-unun nan na madyaw.