Santiago
1
1 Aku si Santiago ya migsulat. Sambuk aku na sugu-anen na Tyumanem aw si Jisus Kristu na kanaten matas na pangulu. Pigsulatan ku ya kadég na utaw na Judiyu * na nyangintu-u kan Jisus, kamu na nyakasabug adti kadakula' na banwa. * Manu la ya pagpakabetang mayu?
Ya pagtanda' sa pagpangintu-u tadun
2 Kay manga inulug ku na nyangintu-u, to-o kamu pagleya pangkay kinunu kamu datenga na madég na punganan na pagtanda'. * 3 Kay kyataga͡an da tadun na kun tanda-en kita aw ayin taman ya kasalig na pagpangintu-u tadun sa Tyumanem, aw kun dili' kitadun degen, yan ya sampetan nan na mabatug tadun ya magpadeleg pangkay unu ya kalug na dumateng kanaten. 4 Yanagaw dawaten mayu ya pagtanda' pada malingeb ya pagpangintu-u mayu sa Tyumanem aw dayaw maka-umba'.
5 Manang kun awun sambuk kamayu na wala' nan ka-ede-i kun unu ya madyaw nan imo-un, na, magsekat galu adti Tyumanem sa katadeng na unu ya madyaw imo-un, kay manimbet saba ya Tyumanem aw atag nan ya pigsekat na utaw adti kanan. Aw dili' sakanan mag-ilab. 6 Manang madyaw kun to-o nan pangintu-uwan ya Tyumanem aw dili' magduwaduwa. Kay ya utaw na magduwaduwa, masiling sakanan na baled na pigpalidpalid na samet na gayed migliku-liku'. 7 Ya maynan na utaw, wala' ya un nan imanen na atag kanan na Tyumanem, 8 kay migduwa ya anenganeng nan aw wala' ya nyabangal na imo-unun nan.
9 Na, awun manga inulug tadun na nyangintu-u na tagitu' na utaw asini tas na lupa', manang umba' silan magleya kay pigpamalli' da na Tyumanem aw yanagaw dakula' da silan na utaw adti kasakupan na Tyumanem. 10 Manang ya manga utaw na mayaman, madyaw galu kun magleya silan sa pagka-ede' da nilan na wala' ya guna na ka-unan nilan adti anenganeng na Tyumanem. Siling silan na bulak adti magalet na maksay datengan na pagkamatay. 11 Pagsilat da na sega na to-o mapasu', nyalanes ya tanem aw nyangkataktak da ya manga bulak aw wala' da ya kanenggeya nan. Aw maynan uman ya manga utaw na mayaman. Pangkay sa kenne' pa nilan migpakadyaw sa kanilan pag-eya', dumateng da ya pagkamatay nilan aw mabus nilan ayawan ya kadég na ka-unan nilan asini tas na lupa'.
12 Pakaganen na Tyumanem ya ginawa na utaw na wala' dega na pagtanda' sa pagpangintu-u nan. Siling sakanan na utaw na mig-abay nyalaguy aw nyakalos da adti datenganan, aw dun da nan dawata ya tandan kanan. Maynan uman, kun masalig ya pagpangintu-u tadun, un tadun dawaten ya ginawa na wala' ya katigkasan na pigpakang na Tyumanem adti manga utaw na dakula' ya ginawa nilan kanan.
13 Kun awun utaw na buyuwun na malatay, dili' galu sakanan maglong, “Ya Tyumanem yan ya migbuyu kanak adti malatay.” Kay ya Tyumanem dili' mabuyu na malatay aw wala' uman ya utaw na buyuwun nan adti malatay. 14 Yan baling ya makabuyu sa utaw ya degdeg na pagka-utawun nan. 15 Aw kun anenganengen nan ya malatay, madala sakanan adti malat na imo-unun. Aw kun gayed da nan imo-un ya malatay aw dili' nan selselan, sumampet adti ka-eletan silan ya Tyumanem na wala' ya katigkasan. *
16 Kay manga inulug ku na kanak pigginawa͡an, dili' kamu magka-agad-agad sa galu'. Beke' saba na Tyumanem ya magbuyu sa utaw adti malatay. 17 Alag madyaw ya pig-atag na kanaten Ama na Tyumanem, kay yan ya piglekatan sa kadég na matinaw. Yan saba ya mig-imo' sa sega aw bulan aw manga bitun. Manang dili' sakanan masiling kanilan, kay gayed magka-alin-alin ya silat nilan manang dili' saba ma-uman ya kadyaw na Tyumanem kanaten. 18 Aw asuntu sa pagbaya' nan dadan, pigpamalli' kitadun nan aw pig-imo' manga ise' nan magi sa pangintu-u tadun sa kanan tingeg na alag matinaw, pada kitadun pa ya matas sa kadég na pigpan-imo' nan.
Ya pagpakanyeg aw pagdalug sa tingeg na Tyumanem
19 Kay manga inulug na pigginawa͡an ku, betangan adti ginawa mayu ya piglong ku ini: Ya tagsambuksambuk kanaten dili' naten gelgelen ya kanaten tingeg, manang maksay galu magpakanyeg uman sa piglong na eped na utaw. Aw dili' galu kitadun maksay magkadaman, 20 kay ya kadaman na utaw dili' sumampet adti madyaw na imo-unun na pagkaliman na Tyumanem. 21 Yanagaw, ayawi mayu ya pangkay unu na punganan na malatay, aw pagka͡agadan da mayu baling ya tingeg na Tyumanem na pigtanem da nan adti anenganeng mayu na yan ya makapaluwa' kamayu lekat adti pagpa-emel-emel nan. 22 Aw yan ya betangan adti ginawa mayu ya pagdalug sa tingeg nan. Kay kun denggen olo' na utaw ya tingeg na Tyumanem manang kun dili' nan dalugun, liwan na piggawayan nan ya pagka-utawun nan. 23 Siling sakanan na utaw na nyamalunganan, 24 aw pagkatigkas nan mangalung, manaw da aw kalingawlingawan da nan kun unu ya giya nan. 25 Manang dili' galu maynan ya utaw na magbasa sa pigsugu' na Tyumanem. Kay dili' nan kalingawan ya pigbasa nan manang gayed da nan pigdalug ya pigsugu' na Tyumanem kay yan ya makapaluwa' kanan adti pagpa-emel-emel na Tyumanem. Aw ya utaw yan, pakaganen na Tyumanem ya ginawa nan.
26 Kun awun utaw na iman nan aw umba' da ya pagpangintu-u nan, manang kun dili' nan katagenan ya dila' nan aw gayed baling maglong sa malatay, na, piggawayan nan ya pagka-utawun nan, aw wala' ya guna na pagpangintu-u nan. 27 Manang ya pagpangintu-u na matinaw adti asdangan na Ama tadun na Tyumanem, yan ya kita͡en dun ni utaw na magtabang sa manga kyalugan siling na manga manélu aw manga balu, aw dili' na utaw yan pagka͡agadan ya malatay asini tas na lupa'.