Yohanesti mome toro pibogha
Phendepne
1
1 Na sabalne Allah Elmabo wenehiropne wamna. Nari yubu ene an Allahri wepkerop kel nhon sembe babe, andi kelmaboap maboap sembe babe mome toro palilamna. Anap andi kelmabo meapti sikne salelamapneag agha nari a'un o'ona senelamsin. Na mori kom aghana, nimi etneri babe sikne neneko salero el wamang tanena, sin niri anap andi kelmabo meap sembe babe o'ona senelamsiang. 2 O'ona senehiropne nenekona, sikne neneko nunag sop-sop ua ulamlari, ya'ag uro nunag ua ulamlulne sembe o'ona senelamsiap.3 Sikne salelamapti, nu mamun o'ona seneldalamapneag agha Ili Allahap Elme Yesus Kristusapti wana nunag yorolamsirikti, yareag senelamsirikti, wana aingniro ma'abahurukang.
4 Samenag andi kelmabo meap ililamsinoba, Nuni Allahri, “Ulamlulom,” aro nunag ambatsiogne sunsunum uro sikne salelamongdi, ul palamongne ipsinori, yeng maikno ulamneo. 5 Wene nanin, anag wendog yubu agha, “Ulamlulom,” aro mome toro palilamna kom. Ot samenag agha salelamap yubu ambarelangkendi, “Nu mamun o'ona seneldalamukap,” aro ambarelamsin. 6 Nu mamun o'ona seneptangtopne nenena, Eldi nunag, “Ulamlulom,” aro ambatsirop yubu sunsunum uro ul palamap. Samenag agha nunag ambarelamsiogti, “A'un mamun o'ona seneldalapmundi, ul palamlulom,” aro ambatsiogpa, ka'elamlomne sunsunum uro ul palamlulom.
7 Wene aro ambatkennena, tam nene sembe. Mog so'o eneag haing kunuro ekel ina ambatsirop nimi maiknori ambatto tongolamsiangdi, “Yesus Kristus poneko mog so'oag nimi nongag taog kom,” aro ambarelamsiang. Nimi nhondi undo ambatsirop tanena, nimi enekori haing kunuro ambatsiropti, Kristusap aisa neneptangtopne wamla. 8 A'undam nimi yae uptangkapmun andarina, a'un sembe awe tol tongolamobonge neneko loba nembalulom kom. Loba nemban koma yae uptangkapmun andarina, kamna ni a'unag tanepne neneko toplulom. 9 Nimi etneri Kristusti ambatsirop yubu laplobi agha ina orangeag pirop tanena, nimi eneko Allahap ma'aptangtop kom. Aghana nimi etneri Kristusti ambatsirop yubu saelbamla tanena, nimi eneko Ili Allahap Allah Elmeap ma'aptangtopne wamla. 10 Nimi nhondi a'unag yubu ambarel alamsile aghana, Kristusti ambatsiog yubu eneko ambatto payalamsile kom tanena, nimi eneko a'undi aeag poa yaheng kom. Kristusti ambatsirop yubu toraptop nimi eneko a'unag yale tanena nimi enekoag, “Nangkae, wali yalam,” aro sae yangkatseng kom. 11 Kristusti yubu toraptop nimi enekori malia ulamla ane sembe, nimi etneri elag sae yangalamla tanena, malia urop nimi enekoap sae tiptangto malia ulamdang.
12 Mome eneag yubu maikno a'unag ambatsisene aghana, saeag agha mome toro palinne sunsunum kom wamla. Ot amik a'unag yaneba haiptaberi, a'un whingag agha yubu lebukap senelamna. Haiptahaberi yubu ambattangto lepsebe andarina, yeng maikno nuri wanaag loloptaho.
13 Nanin, anipsa'ela babe Allahri weptop kel wamla. Eldi kelmabo mabori babe an kiplangkeang.
Abenda.