3
1 A'un Kristusap nhon ma'aptalumdi tebalumne agha Allahri elap nhon a'un kamag nembahiog. Kristus poneko kamag taogti, Allah sae sirik sip pulingkiog. Elap nhon ma'aptangto kamag talum ane sembe, el paliag sip pukamlange ponekori seneropne agha ero seneraglamlulom. 2-3 A'un samenag tebalumdi, nen kamag talumne Kristusap nhon ma'aptangto kamag talum. A'un wene Allah whingag kamag wamlomnena, Kristusag wali uro tognoro pipsiog. Ane sembe mog so'oag uropne sembe seneragna koma ot alikinag imag wamlange aghabog ero seneraglamlulom. 4 A'un kamag wamlomnena, ot Kristus poneko agha wamla. El nen lag tale sumeneko a'un babe elap nhon imang warerobaap lag talulom.5 Ane sembe mog so'oag nimiri uropne a'undam nimiag agha kom nembalulom. Mog so'oag nimiri ul piropne nenena, kelabo nengabo toptangkamna koma salik-malik tektangtopneap, Allahri senenne semban koma sembenga kaluro piptangka ul piropneap, wanaag bobonge walel ananba agto yaboho seneropneap, nimiag yoaba uahane seneropneap, aboap sembe uropneap, ni ane kom nembalulom. Nimiri aboap sembe urop tanena, nimiri Allah wailag nenelobi agha mema phalamlonga saog uropne ulamla. 6 Nimiri undo senero ul piropneri Allah wana yo nenelamlaba, “Opsinun,” aro yanual. 7 Samen a'un wamlumag babe a'undi mog so'oag nimiri, “Malia uahane,” senenne agha unulamlum. 8 Unulamlum aghana wenena ulamlumne neneko lilobi agha wail ibarelamlulom. Wana yo senenneap, nimi wahiropneap, nimiag korosekal nenehinneap, nimi san tilibahinneap, apna yubu pamag agha malinge leropneap ni aneko lilobi agha wail ibarelamlulom. 9-10 A'un samenag wanaag seneragto ulamlumne kwiripto lipsiomdi, nimi wendogne seneragna wendogne saelba ul pirop nimi wamlom. A'un nimi wendogne nenelamsilne ponekori senenne el talamlomdi, a'un sumbahiogne ponekori wana seneragna sunsunum uro nimi wendogne talamlom. A'un sumbahiogne poneko sikne agha wamla ane sembe, nimiag sik urop komne lelamsilomne lipsimundi, yubu sikne agha lelamsilulom. 11 A'un nimi wendogne nembahiog ane sembe wene, “El Yahudinge, el Yunaninge, el nimi sisa orange,” aro nhon paliag nenero a'eptangto wamap seneldalamseng kom. “El konteptopne, el konteptop komne,” aro a'eptangto wamap seneldamseng kom. Nimi sisa aghabog kom aghana, mo sektop nimi anabi, nimiri arukna nenerop nimi anabiag nhon paliag nenero a'eptangto wamap seneldalamseng kom. Kristus poneko mo o'omne wamlaba, elag “Sikne” aro seneragtop nimi ni Kristusap ma'aptangtop nimi wamlom.
12 A'un Allah Eldamneri wepsirop mabo taomba, “Nari wana,” aro Allahri a'un o'ona sembamsil. Ane sembe a'undi wanaag seneraglamlulom nena, wana walingeag agha yareag seneldalapmundi, wana mombolag neneldalapmundi, nimiag yubu arikal uro yubu lemna koma wana palilamlulom. 13 A'un-a'un yubu olog wamleba, “Nunkaboag yubu arikal uro yubu lebebeag,” aro wana mamleba wamlulom. A'un kaboag tam wamleba, yo palihinne wamle tanena, “Nun kaboag yonge pibukap kom” aro wailag nenelamlulom. Nu Saelbamsilne ponekori a'undi malia ulamomne babe wailag nembarelamsil. Ane saog uro a'undi babe a'un kaboag wana mali senehinne wailag neneldalamlulom. 14 Nari yubu ambatsinne nene sunsunum uro ul palapmundi, paliag sirikne anena o'ona seneldalamlulom. Nari yubu ambatsinne orange babe ni o'ona senehinne neneag tiptangkamla. Sik uro o'ona seneldalapmun tanena, nari yubu ambatsinne orange babe wali uro komopto uirilamlulom tiog.
15 A'undi, “Uahabe,” aro tam karepto ulapmunnena, Kristus ponekori a'undi wanaag aingnilamsilneag agha tam kareplapmundi ulamlulom. Kristus ponekori a'undi wanaag aingnilamsilnena, “A'un Kristusap ma'aptangto nong nhonog uro wamlulom,” aro Allahri a'un yoplamsilba, aingniro wamlulom. Aingniro wapmundi, “Naba Naniong” aro yeng uro Allah kiplamlulom. 16 A'un wamlulomnena, Kristus ponekori ambatsirop yubu walinge a'un wanaag to'opto seneraglapmundi, sunsunum uro wanaag agha saelba ul palamlulom. Wana hektopneag agha a'un-a'un ambatto sepna petap, welmotap sipto Allah omekto seplapmunne abeneko pere, “Naba Naniong,” aro wanaag agha kiplamlulom. 17 Nia mangkina a'undi ul palapmundi, saeri unne babe, pamag agha yubu lenne babe nia aneko, “Nu Saelbamsilne Yesus poneko si nubu talul,” aro ul palamlulom. “Yesus si nubu talul,” aro ul palapmundi, Yesus pere agha Nuni Allahag, “Naba Naniong,” aro kiplamlulom.
Ae lom nhonag nimi mamun uldalamnepne sembe ambatsiogha
18 Nanin yabo, a'un kelabo nengabo toamsilom kelabo wamlom tanena, a'una'ange yabo kiplamsimundi yubu ka'eamsululom. Nu Saelba Uhiropne Yesusap ma'aptangtop nimi sembe, a'un kelabori a'una'ange kipto el yubu ka'elapmunneog sunsunum wamla.
19 Nani yabo, a'undi kelabo toamsilom nang wamlom tanena, a'undi kelaboag wana yonge pimna koma o'ona sembamsimundi, sinag arikala lepseng kom.
20 A'un kelmabo me wamlom tanena, a'uni a'unin yubu ka'eamsimundi, sunsunum uro ulamlulom. Undo wapmunne agha nu Saelba Uhiropne poneko wana yeng sirik nembamlulom. Ane sembe, a'uni a'unin yubu ni wali uro ka'eamsululom.
21 Nangkabo, a'undi kelmabo me wamangba, a'un sikiniyabo wamlom tanena, a'un maboag wana yo nenehiropne lero ulamsiseng kom. A'undi sinag wana yo nenero uahimun tanena, a'un mabo wana tung mai senenne agha lolbahinep.
22-23 Nangkabo, a'un mog so'oag nimi arukna wamlom tanena, a'uni yabori a'unag, “Undo-undo ualulom,” aro aruksirop yubu ni ka'eamsululom. Sindi a'unag aruksirop yubu sunsunum uro ulapmunne, “Imneikti, wali sembanukang,” aro ulamseng kom. A'undi nia mangkina ulapmunneag agha, “Mog so'oag nimi sembe mo awe tolamna,” sembaheng kom. A'undi seneraglapmundi ulamlulomnena, “Imagne na Saelba Uneropne poneko sembe tolamnange saog uro awe tolamneba, El wana yeng nembanun,” aro nong ningkiri wanaag agha sol wali, wali uro awe tolamlulom. 24-25 Undo a'uniyabori awe a'undi tolapmunne pere, “Imagne nu Saelba Uhiropne ponekori elmaboag kamna tatsiroba nanag babe tatnelul,” aro el wapmundi, sol wali uro awe tolamlulom. A'un saelbamsilne Kristus poneko a'uni wamlaba, El arukna wamlomdi, awe tolamlulom. Nimi etneri malia ulamle tanena, elag taongoro malinge timbalul. Malinge nimiag timbanepne neneko nimi nubungeag babe, nimi ologneag babe timbanep ane sembe, Kristus poneko sembe sol wali uro awe tolamlulom.