Kolose 2

1 Nari nubu uro a'un sembe whin seklero tolamnange el tahom senelamnari ambatsin. A'un mo sembe tolamna kom aghana, Laodikia nimi sembe babe, na whing ilinerop kom nimi ni sembe babe nari whin seklero tolamnange sembe el tahom senelamna.

2 Nari nimi ni sembe whin seklero tolamna andarina, sin o'ona seneldalamangneag agha ma'aptangto wana mikip taheng. Allah yubu Kristus poneko sembe tognoro wamog aghana, nimiri el taheng tanena, yubu nenekori nimi wali nenero tup nembahinep. Ane sembe, “Allah yubu Kristus poneko sembe samenag tognoro wamog yubu eneko to'opto seneraglamsengdi, sik tapto el taheng,” aro whin seklero tolamna. 3 Nimi el nembahinepneap wana hekahinepneap ot Kristus ponekoag nimi wali nembahineba eneko maikno uro tognoro pibog. 4 Nari undo a'un ambarelamsinnena, nimi nhondi babe yubu lilim walinge lelamikneag agha a'un wana toro sikne agha kilpahikag aro el nenelamsin. 5 Nanap a'unap nikag wamap kom ane sembe, nimiri a'un wana toro sikne agha kilpahikag aro yae togtangto wamlulom. Weag wamap aghana, wanaag nikag wamap. Nari a'un sembe ka'ebahinori, awi wamnelnena a'un wana seneragna nhonog uro wamlomdi, Kristus ponekoag wana palilamlomdi, khapto seneraglamlomne sembe awi uro wamna.

Kristusap ma'aptangtopne agha kamag ua uropne sembe ambatsiogha

6 Nangkabo a'undi Yesus Kristus ponekoag, “Nu saelbamsululam,” aro elag wana palilamlom ane sembe, eldi yubu saelba ulamlom saog uro nen tipto elap ma'aptangto ul palamlulom. 7 Elap nhon ma'aptangkamlomne yareng so'oag pelengero meptangkamloa saog talamlomne agha, elag pongkapmundi sekamlulom. Yesus yubu a'unag ambarelamsiang yubu sik senelamlomne nen mikip talamsileba, magti siriro la'inirop saog uro a'undi wanaag agha, “Naba naniong,” aro kiplapmunne pere agha mag siriropne saog uro la'imbalul. Undo unulapmundi, elap ma'aptangto ul palamlulom.

8 A'un wali uro yae togtangkamlulom. Mog so'oag nimiri ambarelamsiang yubuna, nimiri ul palamangneap mog so'oag nimiri ukuma pharopneap sunsunum uro seneraglamangdi, ina selepne toman pabihirop yubu kamolange ambarelamsiang. Sindi undo ambarelamsiang yubu enena, Kristus senenne agha ambarelamsiang kom, aghana mog so'oag nimiri senenne agha ambarelamsiang. Sindi ambarelamsiang yubu nene sembe a'unna, “Nari wana kiliro poa pineikag,” aro yae togtangkamlulom.

9 Kristus senenne agha saelba ul palamlulom sennena, nia Allahag yame mikipneap wana seneragnaap ni wamlange neneko Kristus nu nimi nong saog taogne ponekoag to'opto ua ulamla. 10 A'un babe Kristusap ma'aptangto ua ulamlom ane sembe, a'un wanaag teko uahinepne babe ni to'opto tatsiori, tarelamsil. Elna, mema niri so'oag nimi saelbamsiangdi, mikip wamangne aneko ni sembe, El agha paliagne wamlari, ni sembe usog wamla. 11 A'un Kristusap ma'aptangkamlomne sembe a'un kon teptop nimi saog taom. Ot a'un kon teptop nimi wamlomnena, nimi saeri a'un nongag karepto kon tepsiong kom aghana, a'unna Kristus ponekoap ma'aptangkamlomne sembe Kristus el mori a'un wanaag, “Mali uahane,” senenne kwiripto toboghatsiog. 12 A'un Kristusap ma'aptangkamlumba, maghag pelengelamsiek sumeneko a'un Kristusap nhon tebalumba, so'oag siksilonga saog uro maghag pelengelamsiek. Kristus tebaog aghana, Allahri kamag nembaog saog uro a'undi Allahag, “El Mikipneri kamag nembahinep,” aro seneragto wana palilamlomne pere agha Allahri a'un babe, “Wene Kristusap nhon ua ulamukang,” aro kamag nembahiog.

13 Allahri kamag nembahiognena, a'undi samenag Allah yubu ingisaplamlumdi, nengabo kon teptan koma elap ma'aptalum komdina, nimi teptop nimi saog wamlum. Undo wamlum aghana, wene Kristusap ma'aldalamapne sembe, nuri samenag Allah yubu ingisapto malia ulamubunge Allahri tam kom nenero wailag pibog. Wailag pibogti, a'un Kristusap nhon kamag nembahiog. 14 Allahri aruksirop yubu ingisaplamuburi, malia ulamubunge neneko sembe, nunag “Tam ikinne undo-undo a'unag timbanep,” aro mome toro palilamlonga saog taog. “A'unag timbanepne undo-undo,” aro mome toro pairopne wamog aghana, siptop kalag oro siplamekne abeneko pere mome toro pairopne nunag tam timbanepne neneko orog nembaogti, wailag nembaog. 15 Kristus kalag oro siplamekne abeneko pere, Allahri mema ni luknubahiog. Mema niri so'oag nimi saelbamsiangdi, mikip wamangne aneko ni Kristus kalag siptopne pere agha Allahri luknubahiog. Luknubahiogti, sinag mikipne wamsiogne kwiriplopsiogti, nimi whingag, “Luknubahindi paliagne wamna,” aro lag nembatsiog.

16 Undo uro yabiog ane sembe, a'undi kwaneng mag tero uropne sembe nimiri samenag aruksirop yubu nene kiliro, “Ane teheng kom,” aro nimiri a'unag tam pelengero karebatsinep kom. Apna, Yahudi nimiri tektek papto erop sum sembe to, wal wendogne kwelekanep sum seneragtopne sembe to, hengkun taibuka taubuka ulamogha Yahudi nimiri sani yorop sum sembe to, nimiri a'unag, “Undo-undo ulamlulom,” aro tam pelengero karebatsinep kom. 17 “Undo-undo ualulom,” aro aruksirop yubu nene tam o'omne kom aghana, ot amik yanepne poneko nong yame sunumna saog wamla. Samenag Kristus anam mog so'oag yan komag Allahri aruksirop yubu Musaag ambarog aghana, yubu ene lomag o'omnena, amik Kristus poneko mog so'oag yanepne sembe lebog. 18-19 Kristus poneko el usogne, paliag uropne wamla aghana, nimi nhon-nhon a'eptangkom agha usogne poneko lilobong. Sin nimi taneko nubunang kom aghana, sindamnang wanaag, “Paliagne wamna,” senelamangdi siksika tam wenehiro nimi whingag wana mombolag neneptangto ulamangdi, polanne ililamangne sembe nimiag ambarelamsiang. Sin nimi tanekori imagnang malaikatag phalamangdi, yubu kiki telekto, “Undo-undo uro yabioba imno,” aro nimi ambarelamsiang. Sin nimi tanekori a'unag tam pelengero, “Nuringe nelepto ulamlulom,” alamik tanena, a'undi sin yubu ka'ebahiseng kom. Sin undo saog nimi usogne paliagne poneko lilobi agha a'eptaong. A'eptaong aghana nimi yo'o kopkobap, yo'o luluagneap tiptangkamsori, usogap tiptangkamso taneogna, nimi nong mikip wamsoba, Allahri nubu nenelamsiso.

20-21 A'un Kristus ponekoap ma'aptangto elap nhon tebalum tanena, mog so'oag nimiri ukuma pharopne liloplum. Mog so'oag nimiri ukuma pharopneag agha, “Ane teheng kom! Ane po'obaheng kom! Ane sae saelbaheng kom!” aro nimi aruklamsiang. Mog so'oag nimiri ukuma pharopne liloplum kom te? A'un Kristusap nhon tebalumdi, mog so'oag nimiri ukuma pharopne liloplum tanena, sa'a sembe aruksirop yubu nene saelba ul palamlom? Undo unuheng kom! 22 Ni aruksirop yubu ene nimiri, “Saelbaheng kom, teheng kom!” aro amolamsiangne eneko, nimiri amohinne mo wamla. Aghana nimiri salero terop tanena, salero teroba aneko orog tanep. Nia ane ya'ag uropne kom. 23 “Saelbaheng kom, teheng kom,” aro aruksirop yubu ene nimiri ka'enag wana heksirop yubu sembanep. Yubu ene ka'ebiag agha nimiri wana mombolag neneptangto ulamloa saog ulamangdi, sindam nimi nong sekleptangto wanaag agha mema phalamang. Sindi undo mema phalamangne kembi agha ora nimiri, “Wana heksirop yubu saelba ul palamang,” sembanep aghana, aruksirop yubu neneri nimi wanaag, “Bobonge agto yaboho,” senenne kom nembanep kom. Ane sembe, aruksirop yubu eneri nimi yepsirop kom.