Kolose 1

Kolose

Nimi Sembe

Paulusti Mome Toro Pibogne

Paulusti Kolose nimi kipsiogha

1-2 Nangkabo, na Paulusti a'un as Kolose wamlom nimi kiplamsin. Na Paulusna, Allahri yeng senenneag agha Yesus Kristus ponekori na wepto pogneog. Na Paulusap nungkae Timotiusapti kiplamsinam. A'un Allahri, “Namabo taukang,” aro a'un wepsiogpa, a'undi Allahri wepto poghogne Kristus ponekoag “Sikne” aro wana palilamlomdi, Elap ma'aldalamlomdi, Allah Elmabo taom. Na Paulusap, nungkae Timotiusapti a'un sembe molbarelamsinamnena, “Nuni Allah ponekori wana a'unag yorolamsileri, sa'a-sa'a wamleag a'un wana aingnilamsilul,” aro molbarelamsinam.

Paulusti Allahag “Wah Naba Naniong,” aro kibogha

3-4 Nuri ka'ebabongena, “Yesus Kristus ponekoag ‘Sikne,’ aro wana palilamangdi, Allah Elmabo wepsiog nimi ni o'ona senelamsiang,” alamonga ka'ebabo. Ka'ebabori nu Saelba Uhiropne Yesus Kristus poneko Ili Allahag molona molbarelamsiapne abeneko pere, a'un wali wamlomne sembe, “Wah Naba naniong, wali yeplamsilam,” aro Allah kiplamap. 5-8 A'un o'ona seneldalamlomne nenekona Allah Yame Walingeri senenneag agha o'ona seneldalamlom. Nuba nungkae wanaagne sol walinge Epafras ponekori a'undi o'ona seneldalamlomne sembe nunag yubu ambatsio. El ponekona, nuri sae tangom agha sol wali uro Kristus ponekori awe tolamla. El nunap nhon awe toropne ponekori samenag yubu walinge Yesus sembe a'unag ambatsioba, yubu sikne Allahri wana nimiag yorolamsilne sembe el taom. Yubu walinge sik yubu ambatsionge neneag agha, Allahri wali-waliaba imag wero pairoba a'unag tatsinepne sembe ka'ebaomdi, “Topsebe,” aro nang-nangalamlom. A'un, “ ‘Topsebe,’ aro nang-nangkamukap,” seneropne neneag agha Yesusag wana palilamlomdi, Allah Elmabo wepsirop nimi o'ona senelamsilom. A'un yubu walinge nene ik selek sum ka'ebaomdi, el taomne neneag agha a'undi wali-walia uroba maikno lag talamsil. Ane saog uro yubu walinge neneko sabo talamlaba, as tala-tala wamang nimiri ka'elamangdi, sik senelamangneag agha wali-walia ulamang.

9 A'undi Allahri Yame Walingeri senenneag agha o'ona seneldalamlom ane sembe, nuri ik selek sum a'un sembe ka'ebabongeag agha nuri a'un sembe Allahag molona molbarelamsiap. Nuri papna koma a'un sembe molbarelamsiapnena, Allah Eldamne Yameri wana hektopneag agha, “Undo undo unulamukang,” seneropne a'unag ambatsileba, ni kaupto seneraglapmundi, “Ni wali el talulom,” aro Allahag molbarelamsiap. 10 “El talulom,” aro molbarelamsiap andarina, Allahri a'un yeplamsileba, nia a'undi ulapmunneag agha ot Nu Saelba Uhiropne ponekori “Sunsunum” seneropne, El wana wali neneropne aghabog ulamlulom. Nia wali-walia undo unulapmunne taneko kal wana maulamloa saog uro lag talamleba, Allahri senenne nen ma'aro el talamlulom. 11 Allah Eldamne mikip phelektopne imang wareropne agha a'un mikip nenelamsilul andarina, ni seklenneag wana pailangkalapmundi, awi uro Allahri senenne sunsunum uro tipto ulamlulom. 12 Nuni Allah ponekori, “Nari imang wareropne agha nia mangkina saelbamsinne neneko Nari wepsirop nimiag pogto tatsinun,” aro a'un wali toro saelbanep nimi nembahiog. Ane sembe Elag, “Naba Naniong,” aro kipto omeklamlulom aro a'un sembe molbarelamsiap.

13-14 Samen nu wamubungena, inibinag wamububa, inibinne saelba uhiropne phia sikini nubunge nenekori nu saelbamsiog. Nu saelbamsiogpa, mali-malia ulamubu aghana, Nuni Allah ponekori Elme wanaagne pere agha nuri mali-malia ulamubunge neneko tam kom nenero wailag nembaog. “Naringe,” aro toro pelepto nu inibinag agha taulbahiogti, nu enero poa Elmeri saelba uhirobag ko'oro poa yahiog.

Allahri wepto poghogne Kristus poneko paliag sirik wamlange sembe ambatsiogha

15 Nimiri Allah haingdi imnep kom aghana, Elme ponekori Allah wela saogne sunuro nimi whingag lag neneptangkamog. Allahri nia mangkina anam sumban komag, Elme nhonogne poneko agha wamog. 16 Nia mangkina wamna komag Allahri Elme pere agha ni sumbaog. Ni imag wamlange babe, mog so'o paliag wamlange babe sumbaog. Lag wamlange babe, haingdi imnep komne wamlange babe el pere agha sumbaog. Yubu sia lenneap, mikipneap, nimi saelba uhiropneap, nubungeap, ni aneko Allah Elme El mori Eldamne sembe sumbaog. 17 Nia mangkina wamlange anam wamna komag, Allah Elme poneko agha samenag wamogti, el mori nia mangkina wamlange o'oro tiplamlari paiamsil. 18 Elna usog wamlaba, Elag wana paliro winiptangtop nimi El nong saog nembahiog. El mori alnibaogti, me yandonge sam mangaptaloa saog uro nimi teptobag agha sam kamag taog. “Elba, El agha nia ni sembe samne paliagne wamlul,” aro Allahri el kamag nembaog. 19-20 “El agha samne paliagne wamlul,” sembaogne tam nene sembe. Allah El mori seneraglamognena, “Nia Nanag yame mikipneap wana seneragnaap ni Nanag wamlange neneko samenag agha Na nameag ni to'opto wamla. El pere agha nia mangkina mog so'oag uropneap, imag uropneap sumbahisinge nen Nanap ma'abahinun. Name eneko kalag sipto obikpa, eneng lambalenge pere agha aingniro ma'abahinun,” aro wali sembaog.

21 “Ma'abahinun,” sembaogne nenena, a'undi samenag wana yo uro seneraglamlumdi, ulamlumne agha Allah wailag ibatto a'eptangkamlumdi, aisange nembamlum. 22 Aisange nembamlum agha wenena, Elme nimi nong tebaogne pere agha a'unap Elap nimi pali walinge nenero ma'amsil. “Nen ma'abahinun,” aro seneraglamognena, “Nimi tanekori Na Allahri seneropne sunsunum uro ulamikti, malinge uropne nhon sinag ipsinep komdina, sinag tam pimnep kom. Na whingag whi uro sekamukang,” aro a'un Elap ma'amsil. 23 “Na whingag sekamukang,” senelamlangena, a'undi tipto Allah Elmeag sikne aro seneraglapmundi, elag tapto wana pailapmundi, Yesus yubu walinge sae limna koma mikip uro salero “Sik uro yabilul,” aro tiboglapmun taneogna, Allah whingag wali uro sekamlulom. Yesus yubu walinge ka'ebalomne neneko tala-tala wamang nimiag ambatto tongolamsiap. “Yesus yubu walinge neneko ambatto tongolamsinun,” aro na Paulus nimi yepsinne tahiri, ambatto tongolamsin.

Yesusag seneragtop nimi sembe Paulusti whin seklero tolamogha

24 Wene a'un sembe na seklelamnange na awi ulamnel. Kristus poneko a'un sembe seklebaog aghana, Eldi nongag seklenne nen amik lag taluldiog. Eldi nong anena, a'un Yesusag wana paliro winiptangtop nimi Eldi nong wamlom, ane sembe a'un nimi sembe seklelamna. Nari nong kon og seklelamnange nenena, “Eldi nongag seklebanepne nanag taho,” aro nari babe tipto a'un sembe maiknoro seklelamna. 25 Allahri nanag, “Awe tolamlulam,” aro nari saeag pibog andarina, na nimi yepsinne tahiri, Allah yubu sunsunum uro nhin a'unag ambarelamsin. 26 “Yubu ambatsululam,” aro tatneog yubuna, samenag agha hengkun taibuka taubuka palamloba, nimi likna-likna palamloa yubu eneko tognoro wamog. Tognoro wamog aghana, wene Allah Elmabo wepsiog nimiag lag tangto palamogha palamla. 27 Allahri Elmabo wepsiog nimiag wali tup nembahineba tognoamog yubu eneko, “Lag nembanun,” sembaogpa lag taog. Allahri, “Yahudi sisa kom nimiag wali sirikne tup nenehiropne tatsinun,” seneropne tognoro wamog aghana, wene lag nembaog. “Tatsinun,” sembaogne lag nembaogne nenekona, Eldi wepto poghogne Kristus poneko a'un Yahudi sisa kom nimi kulomag wa'iogpa, Elap ma'aptangkamlom. Ane sembe, a'undi babe tiboghamlomdi, “Allah imang warero libango arobag wa'aukap,” aro nang-nang alamlom.

28 Allahri wepto poghogne Kristus poneko sembe ambarelamsiapnena, Allahri nu wana heksirop yubu niag agha nuri nimi ni wenero amolamsiapti, el nenelamsiap. Nuri ambarelamsiapnena, “Nimi ni Kristusap ma'aptahengdi, Allah whingag wali uro whi uro sekamseng,” aro Kristus poneko sembe ambarelamsiap. 29 Tam nene sembe Kristus ponekori elenge mikipneag agha na nong mikip nenelamnelba, whin seklero awe toro ambatto tongolamsin.