4
1 Nangkabo, a'un nimi arukna sikiniyabo wamlom tanena ka'eamlulom. El uro wamlomnena, a'un saelba uhiropne imagne babe wamla. Ane sembe sikiniyabo taom nimiri a'undi arukna wamangne sembe sikne porogne agha sinag ulamsilulom.Nen ma'aro, “Undo-undo ualulom,” aro ambatsiogha
2 A'undi solwali wali uro Allahag molona mololapmundi, yae togtangto wapmundi, wanaag agha, “Wah, naba Naniong,” aro Allah kiplamlulom. 3 Nu sembe babe molona Allahag molbarelamsumun andarina, Allahri ae ina walinge ibatsileba, Kristus ponekori yubu samen tognoro wamog yubu nene nuri nimiag ambatto tongolamsukap. Kristus ponekori yubu sabo nenero ambarelamsinonge sembe nimiri na salero kop aeag tobongkipneongba wamna. 4 Na sembe Allahag molona molbarelamnumun andarina, nari Kristus yubu ambatsiropne nene Allahri samenag nari saeag, “Ambatsululam,” aro pibogne sunsunum uro tibin uro ambarelamsinun. 5 A'un babe Yesusag sikne aro seneragtop nimi wamlom aghana, Elag seneragtop kom nimi nikag wapmun tanena, pa'asea sum enekoag wana hektopneag agha yubu lero wali uro ulamsululom. 6 A'undi sop-sop yubu pamag agha lanalamlenge wana walingeag agha emem arop yubu agha lelamlulom. Undo unulapmunne agha nimiri a'unag haibahiikpa, a'undi sindi hairop yubu ka'ebapmundi, nimi a'ero-a'ero ambarelamsimundi, “Yubu huropneag agha samoro ambatsisene,” aro a'unag el tahilul.
Paulusti komoptobag nimi kipsiropne mome toro pibogha
7 Tikhikus nungkae nuri o'ona sembamapneri nanag nia ni uro yabalamlange a'unag ambatsilul. El sol wali wali uro yeplamsildi, nu Saelba Uhiropne ponekori awe nunap nhon tolamapne wamla. 8 Nungkae Tikhikus poneko a'unag pogholalamnange a'unag yaleba, nu wamapne sembe eldi a'un ambatsileba, a'un wana mikip nembahilul. 9 Onesimus babe Tikhikusap nhon yarukangnena, elna Yesusag wana paliropne a'undi asagne poneko yalul. Eldi babe sol wali uro ulamlaba, a'unag poglamnaba, Onesimus nungkae o'ona sembamapne poneko babe a'unag yalul. Elapna Tikhikusap yarikti, na wamnaag ane sa'a-sa'a uro yabalamlange sembe a'un ambatsurukang.
10 Aristarkhus, el babe kop aeag nanap nhon wamnamneri a'un sembe, “Nangkabo,” aro kiplamsil. Barnabas elnik Markus ponekori babe a'un kiplamsil. Markus poneko sembe samenag ambatsinonge sunsunum uro, el a'unag yaleba, wali kipto toplulom. 11 Yesusa, si nhon Yustusti babe a'un kiplamsil. Ot sin tanekoog Yahudi nimi agha nanap nhon wana mikip nenero yeplamneang. Sin nimi tanekori, “Allahri Yesus wepto, ‘Taulbahimendi, saelbamsululam,’ aro poghog,” aro sik senelamangdi, nanap nhon yubu nene ambarelamsiap. 12 Epafras a'undi asagne ponekori babe a'un kiplamsil. El babe Kristus Yesus arukna wamlari, awe tolamla. Eldi a'un sembe sop-sop wana ningkiag agha Allahag molona molbarelamsil andarina, Allahri a'un sembe “Ulamukang” senenne sunsunum uro to'opto seneraglamlulom. Allahri senenne sunsunum uro to'opto seneraglapmundi, whi uro wapmundi, ni saelba ul palamlulom aro a'un sembe molbarelamsil. 13 Sikne agha lemna. Epafras poneko nari haingdi imnongena, eldi a'un Kolose nimiap, Laodikia nimiap, Hierapolis nimiap sembe awe mikip uro tolamlange imnori ambarelamsin. 14 Apna, nimi whesiropne nuri wanaagne Lukas ponekori babe, Demasti babe a'un sembe kiplamsirang. 15 Nungkabo Yesusag wana palirop nimi as Laodikia wamangne kiplamsiapne ambatsululom. Apna Nimfa babe, eldi aeag Yesusag wana palirop nimi winiltalamang nimi babe kiplamsiap yubu ene ambatsululom.
16 Mome ane a'un topmunba, nimiri a'un sembe, “Ka'ebaukang,” aro mome kemero lelamikpa ka'eamlulom. Ka'ebapmun tanena, mome ane Yesusag wana paliro winiltalamang nimi as Laodikia wamang nimiag babe, “Mome lilim wamlange ka'ebaukang,” aro tiplamlulom. Mome Laodikia nimiag pimnonge babe a'unag tipto ambatsiikpa, mome lilim sinag pimnonge babe a'undi ka'ebalulom.
17 Arkhipus ponekoag ambarelamlulomnena, “Nu Saelba Uhiropne ponekori awe an sa'oag pipkeonge wali uro yae paiapmendi, komopto awe tolamlulam,” aro elag ambatlulom.
18 Na Paulusti a'un kiplamsin. Yubu abene palilognangena, na Paulusti kipsiropne abene mo saeri toro palilamna. Na anam kop aeag wamnaba, a'undi na sembe molbarelamnululomne ekon taheng kom. “Nu Saelba Uhiropne ponekori wana a'unag yorolamsileri, yepto paiamsilul,” aro a'un sembe molbarelamsin.
Abenda.