Yesusag wana palirop nimi mamun tam piptangka karebanepne sembe
6
1 A'un Allahri wepsirop kelmabo me wamlom nimi mamun tam piptangtopne nhon lag tale tanena, ot Allahri wepsirop kelmabo me whingag, “Tam karebatsululom,” aro tam payanep. Allah yubu ka'erop kom nimi whingag, “Tam karebatsululam,” aro a'undi tam pabinepne sembe ali semban koma pabinep te? 2 A'un el uro wamnep nena, nu Allahri kelmabo me wepsirop nimiri amik sum mog so'oag wamang nimi sembe tam karebarelamsukap. A'undi amik mog so'oag wamang nimi sembe tam nubunge karebarelamsululom pagha tanena, wene tam waelbanepne o'ongkom saog wamla aghana, tam karebatsinepne a'un olog sunsunum kom te? 3-4 A'un olog ekon te? Allah arukna imagnang malaikat sembe nuri tam karebatsukap. Undop pagha tanena, wene sop-sop ul piropne sembe a'un mamun tam paiptangtopne nhon waelbale tanena, a'undam nimiri tam karebatsinep kom te? A'un Yesusag wana paliro winiptangtop nimi sembe yubu lemnep kom nimi saeag a'undi tam pairo, “Tam karebatsululom,” aro palamlomne sunsunum te? 5 Nari wene, “Undo-undo unulamlom,” aro yubu lemnange neneri a'un ali nembahinep. A'un Yesusag wana palirop nimi agha wana hektopne nhondi babe elkabo sembe tam karebatsinepne orog te? 6 Ot a'un Yesusag wana palirop nimi mamun tam paildalamlomdi, Yesusag wana palirop kom nimi whingag babe, “Tam karebatsi,” aro ulamlomne nene mali!7 A'un mamun tam palildalamlomne neneri a'undam nimi luknuptangkamlomne lag neneptangkamlom. Nimiri a'unag olog malia uanepne to, nimiri a'undinge haogha tomnepne to, ane olog hae limnep. 8 Aghana a'undam nimiri a'undam nimiag porog komne ulamlomdi, nimiringe haogha tolamlom. A'unkabo Allahri kelmabo meag babe undo unulamlom. 9 Olog ekon talom te? Allahri nia mangkina Saelba Ulamlange Eldi kelmabo meag tatsinepne porog urop kom nimiag tatsilul kom. Tam nene sembe a'undam nimi haing kunuptaheng kom. Sin salik-malik waleptangtop nimiap, phia phalamang nimiap, nimiri kelabo haogha torop nimiap, nengabo eldamne kelabo neneptangtop saog nimiap, nengaboap nengaboap waleptangtop nimiap, 10 haogha torop nimiap, aboap sembe ul pirop nimiap, mag yonge terogha nenek saelba urop nimiap, san tilipsirop nimiap, yonge urop nimiap Allahri Saelba Uropne Eldi kelmabo meag tatsinepne undop nimiag tatsilul kom. 11 A'un nimi nhon-nhon samenag undop saog nimi wamlum. Ot wenena, nu Saelba Uhiropne si Yesus Kristusap ma'aptaomneag agha Nuni Allah Yame Walingeri a'undi malia ulamlumne lubatsiog. Wenena “Naringe,” aro a'un wepsiogti, wana porog nimi nembahiog.
Nu nimi nong Allahringe wamapne sembe
12-13 Wana porog nimi nembahiog tanena, nuri nong nu Saelba Uhiropne ponekoringe wamap. A'undi seneraglamlom nena, “Nanag iriknen yubu orogti nia mangkina ulamnep,” aro seneraglamlom. Yo anena sik aghana, nimiri sa'a-sa'a nia mangkina uanepne nenekori eldamne yeptanep kom. Nanag iriknen yubu orogti nia mangkina ulamnep aghana, sa'a-sa'a nia mangkina wamlange nhondi babe na salero umag nembanelul kom sembamna. Nimiri lelamangnena, “Tenaba mon sembe wamlaba, mon babe tenaba sembe wamla,” alamang. Aghana nimiri teropne babe, mon babe Allahri ni phende kom nembalul. Nuri nongna salik-malik waleptangtopne sembe kom, aghana nu Saelba Uhiropne ponekoringe wamlaba, nu Saelba Uhiropneri nong o'olamsil. 14 Nu Saelba Uhiropne poneko samen tebaog aghana, Allahri el kamag nembaog saog uro nu babe El mikipne pere agha kamag nembahilul.
15-16 A'undi nong wamlom nena, Kristus ponekori nongag uropne wamlom aghana, ekon talom te? Kristus ponekori nongag uropne wamlom tanena, salik-malik walerop kelag ma'aptanepne sembe wela sembalom? Allahri samen nengaboap kelaboap ma'aptanepne sembe yubu lebogti, “Sin nong nhon sop nhon neneptangtop,” aro yubu lebog. Wene aro lebog tanena, nimiri salik-malik walerop kelag ma'aptandi, kel enekoap nong nhon sop nhon neneptarang. Kristus ponekori nongag uropne wamlom ane sembe, salik-malik walerop kelag ma'aptangkapmun tanena, sunsunum sembanep te? Undo sembaheng kom! 17 Nimi etne nu Saelba Uhiropneap ma'aptangto ulamla tanena, Eldi Yameap wana seneragna nhon neneldalamla.
18 Nimiap salik-malik waleptangtopne sembe laplobi agha koloptangto togtahut! Malia uropne ni mali wamla aghana, salik-malik waleptangtopne neneri andamne nong mali neneptanepti, mali sirik wamla. 19-20 Allah Yame a'undi nongag wamlange sembe ekon talamsil, te? Allah Eldamne Yame Walinge a'unag tatsiogpa, a'un kulomag wamlaba, a'undi nongna mem ae Allah Yame ua ulamlaag wamla. Yesus tebaogne pere agha a'un nimi sembe kamna toptaogpa, a'un nong wamlom nena a'undinge kom. Ane sembe a'un nong wamlomneag agha Allah paliag nenero kiplamlulom.