Salik-malik waleptangtop nimi yag lambahinepne sembe
5
1 Nimiri tapto yubu lelamangpa ka'eamnaba, a'un nimi nhon iliri kelag walelamla. Walelamlaba ulamdangne nenena, Allah yubu ekon uro urop nimi tala-tala wamang nimiri babe undo unulamang kom. 2 Iliri kelag walerop nimi a'un nusamag wamlange sembe a'un wana ikin semban koma a'undam nimi maibildalamlom. Aghana el malinge urop nimi eneko a'un nusamag wamlange sembe a'undi sembanep nena, “Malinge uropne nene nunag agha toro koloro lambaukap,” aro a'un wana ikin uahinep senelamna. 3-4 Wene nu nong a'eptangto wamap, aghana nari wanaag nikag wamap sembamna. A'unap nhon wamloa saog uro nari tam kemero karebi agha a'unag yubu ambarelamsin. Amik nu Saelba Uhiropne Yesus si kekhaektop nimi winildalamlom sumeneko, na babe a'unap nhon wamloa saog uro nikag wamukap. Nikag wameberi nu Saelba Uhiropne Yesustinge mikipne a'unag talengeag agha, 5 iliri kelag walerop nimi eneko phia sikini nubungeri saeag nenelamlulom. Phia sikini nubungeri saeag nenelapmun nena, “Nong yeng nembahane,” seneropne nimi enekoag wamlange kom talul aro phia sikini nubungeri saeag nenelamlulom. Phia sikini nubungeri elag malia ulamleba, “Nong yeng nembahane,” seneropne nimi enekoag wamlange kom tale tanena, el yame amik sum nu Saelba Uhiropneri tam karebale sumeneko wali wamnep.a6-8 A'undam nimi maibildalamlomne nene mali. Malinge olog wamna pagha tanena, ni mali nembanep. Sunumnana nimiri, “Kwaneng roti nhon wimbanun,” aro ulamnari, roti waelbalul aro yamoroba ologha ma'abanep. Ologha ma'abanep aghana, sabo tangto palamnari, roti winiroba niag tanba, roti aneko nubu tanep. Roti waelbalul aro yamoroba aneko likiptopnena, malingeap yongeap, “Nubu talul,” aro yamoroba samenne saog wamla. “Waelbalul,” aro yamoroba samenne ni neneko toro la'inilapmun andarina, “Waelbalul,” aro yamoroba ma'aban koma kwaneng roti wendog saogne agha wamlulom. Kristus poneko nu sembe tebaognena, Yahudi nimiri senelamekti, “Allahri nu opsin koma taulbahiog,” aro Paskah sum pham domba oro telamek saog uro Kristus poneko nu sembe pham domba saog uro tebaog.b Ane sembe, a'un wene wamlomne, “Waelbalul,” aro yamoroba ma'arop kom nimi wamlom. Undop pagha tanena, yamoroba samenne neneko ma'aptan koma malinge ni toro lanalameberi, Allahri Kristus pere agha uaogne sembe yeng uro seneraglameberi, wanaag agha ot sikne agha ulamukap.
9 Samen mome toro pimno yubu enekoag, “Salik-malik waleptangtop nimiap sae tiptangto wamlulom kom,” aro mome toro pimno. 10-11 Nari undo mome toro pimnonge nenena, sin nimiri, “Kristusag seneraglamna,” aro yubu lerop nimi aghana, kelabo nengabo salik-malik waleptangtop tanena, “Sinap sae tiptangto wamlulom kom,” aro mome toro pimno. Aghana sin Kristusag wana palirop kom nimi sembe, “A'eptangto liamsululom,” aro ambatsino kom. Sin Kristusag wana pimna koma salik-malik waleptangtop nimiap, aboap sembe ul pirop nimiap, yo uro urop nimiap, phia pharop nimiap mog so'oag wamang nimi sembe, “A'eptangto liamsululom,” aro mome toro pimno kom. A'undi, “Kristusag wana palirop kom nimi liro a'eptahabe,” sembamsom tanena, mog so'o eneag nen wamnep kom saog. Sin Kristusag wana pimna koma malia undo urop nimi sembe samenag undo mome toro pimno kom. Aghana wene tibin nenero mome toro palilamnange, nimi nhondi, “Na Kristusag wana palilamna,” aro leropne agha, “Nangkae,” seneptangtop nimi sembe lelamna. Nimi nhondi, “Kristusag wana palilamna,” aro lerop aghana, salik-malik waleptangtopne to, aboap sembe ul piropne to, phia pharopne to, nimi san tilipsiropne to, mag yonge terogha nenek saelba uropne to, apna yonge maikno uropne to, “Nimi enekoap sae tiptangto wamlulom kom,” aro mome toro pimna. Undop saog nimiap nikag tenepne babe kwaneng nhon teheng kom.
12-13 “Kristusag wana palilamna,” aro lerop nimi sembe yubu lemnange nenena, sin Kristusag wana pimna koma urop nimi nunap nhon winiptangtop komdi, nuri ae lom nimi senep kom. Ane sembe nari sin sembe tam karebatsinne sunsunum komdi, Allahri sin sembe tam karebatsilul. A'undi ae lom nimi sembe tam karebatsululom. Musari mome toro pibog yubu sunsunum uro, “Malia urop nimi eneko yag lambalulom.”