Yudasti “Yesus pan khebanun,” aro Yahudi nimi nubunangap saekag lebeka
(Matius 26:1-5; Markus 14:1-2, 10-11; Yohanes 11:45-53)
22
1 Yahudi nimi sembe nubu sum peramag wamogpa, nimi maiknori, “Nubu sum ‘Paskah' taleba, as Yerusalem sani yoro telameberi, kwaneng roti walerop komne ik saekpare telamukap,” aro Yerusalem longolamek. 2 Longolamekti wamekpa, memnang Yahudi nimi sae agha Allah sembe pairopnang sikindoyaboap, Allahri aruksirop yubu Musa pere agha mome toro pairopne ambatsiropnangap tanekori, “Welaro Yesus obukap,” senelamek. “Obukap,” senelamek aghana, nimi maiknori Yesusti yubu awi uro ka'elamekpa, sin Yahudi nimi nubunang logti, “Yesus obukap,” aro ina elamek. 3 “Yesus salero obukap,” aro ina elamekpa, Yesusti wepto pogsiognang aobarenang agha nimi nhonna, Yudas Iskariotne wamog. Phia yonge sikini nubunge Yudas kulomag wa'ina wana aluklamogpa, 4 Yudas neneko memnang Allah sembe pairopnang sikiniyaboap, Allahri Mem Ae yae ua unnang yin saleropnang sikiniyaboap wamekag piogti, “Welaro Yesus a'unag pan khebanun,” aro yubu nikne lelamek. 5 Yudasti “Yesus pan khebanun,” aro ambatsiogpa, sin wana awi uahiogpa, “Yesus nunag pankhebamenba, kal ma'al kamna tatkukap,” aro salag lero pibek. 6 Saekag lebekneag agha Yudasti wali seogti, “Yesus nimi oroghag pileba, pa'asea wamleba, pan khebanun,” aro weamogti, keme nelero seneraglamog.Yesus eldi yubu ka'ero neleptopnangapti kwaneng rotiap anggur lolterop maghap teeka
(Matius 26:17-30; Markus 14:12-26; Yohanes 13:21-30; 1 Korintus 11:22-25)
7 Yahudi nimiri ik saekpare kwaneng roti walerop komne telamek ko'o alnirop sum, nubu sum Paskah sumeneko taog. Paskah sum talamogpa, Yahudi nimiri sop-sop seneraglamekti, “Sumene pham domba me oro yobaukap,” aro ulamek. 8 “Yobaukap,” aro ulamekti, eldi yubu ka'ero neleptopnang phende Petrusap Yohanesap abeneko Yesusti poglamsiogti, “Nu usa pham domba me oro yoro tukap. A'un samenag purumundi meneklamturom,” aro pogsiog.
9 Wene aro pogsiogpa, sindi Yesusag hailamdekti, “Nai tala siba yoro meneklolamnunam,” aro haibarek.
10 Wene aro haibarekpa, Yesusti sinag samoro ambarelamsiogti, “As soro kalurop as Yerusalem pururom. As wa'ilamtumun abeneko pere, nimi kabuni nhon mag tero poa yalamlenge pone haiptamundi, elag nelebarurom. Elag nelepto palaptumundi, el wa'alogle ae eneag wa'arurom. 11 Wa'arumundi ae ngainge ponekoag, ‘Yubu amohiropne ponekori nun anag pogsilba, yanam. Anag hailangkeldi, “Nanap nari yubu ka'ero neleptopnangap Paskah sumeneko mo wameberi, andi ae lom nhonag telaukap. Ae lom nelag agha nanap nari yubu ka'ero neleptopnangap mo wameberi, pham domba me nhon tukap?” aro hailangkeldi, nu pogsilba, yanam,’ sururom. 12 Wene surumunba, ae ngainge ponekori a'unag ae tika paliagneag ae lom nubunge ambatsilul. Ae lom nubunge anekoag ae usa puna babe, kwaneng palinag babe ni sunuro nu sembe wero wamla. Ae lom eneag agha nu ni sembe wero palilamturom,” aro Yesusti sin phende pogsiog.
13 Wene aro pogsiogpa, eldi yubu ka'ero neleptopnang phende abeneko as Yerusalem anekoag pirekpa, Yesusti sinag, “As anekoag ipturom,” seogne sunsunum uro iptek. Iptekti, ae lom anekoag wa'irekti, Paskah sum sembe tenaba yoro wero palilamdek.
14 Heng purukaogpa, “Wene tukap,” sembaekti aeag wa'ina Yesus eldi a'obarenang wepto pogsiognangap, “Kwaneng nikag tukap,” aro pulaek.
15-16 Pukekti Yesusti sin ambarelamsiogti, “Nu Yahudi nimiri Paskah sum pham domba me oro sani yoro telamapne nenena, Allahri nunisagyabo sae kiliro Mesir so'oag agha taluro yag lambahiogti saelbamsilne sembe seneraglamapti, Paskah sumeneko pham domba me olamapti, yoro telamap. Nu wene Paskah sum sani yoro telamapne saog uro nen tenun kom. A'unag ambarelamsinne ka'ebahut! Allahri, ‘Nimi taluro saelbamsinun,’ senenne lag tale sum uro yabile taneogna, nu Paskah sumene sani yoro telamapne saog uro nen tenun. Ane sembe, na anam seklenne sekleban komag na wana maikno uro a'unap nhon, ‘Paskah sum sani yoro nikag kwaneng tehabe,’ senelamnori senelamna,” aro ambatsiog.
17 Wene seogti, mag ma'iag mag anggur lolterop mag tero lirop mag ma'i tobogti saelbamogti, Allahag “Wali tatsilam,” aro kibog. “Wali tatsilam,” aro kibogti sinag tarelamsiogti, 18 “Allahri nimi mog so'oag nimi saelba uhin ko'o anam uro yabin komag, anggur lolterop mag nen tenun kom. A'unag ambarelamsinne ka'ebahut! Ot Allahri nimi mog so'oag nimi saelba uhin ko'o lag tale sumeneko og, anggur lolterop mag nen tenun. Ane sembe, wene mag ma'i a'unag tarelamsinne nene topmundi, a'un kaboag pogtangto telamlulom,” aro tatsiog.
19 Wene seogti Yesusti kwaneng roti tobogti saelbamogti, “Nani, wali tatsilam,” aro Allah kibog. “Wali tatsilam,” aro yubu lebogti, kwaneng roti aneko saeri khepto-khepto tatsiog. Tarelamsiogti, “Nari nong ane a'un sembe tarelamsin. Wene kwaneng roti telamap saog uro a'undi amik telapmun sum babe Na sembe ekon tan koma seneraglamnululom,” aro tatsiogpa telamek.
20 Kwaneng roti khepto-khepto tatsiogpa teekpa, Eldi kwaneng roti tatsiogne saog uro mag anggur lolterop mag ma'i babe tobogti ambarelamsiogti, “Nari eneng ikto lambanualne eneag agha Allahap wendog yubu nikne kaupnepne sembe mag anggur lolterop mag ma'i ane ikto a'unag tarelamsin. 21 A'unag tarelamsin aghana, a'un wene saeri tolamlomne agha nimi nhon aneri na pan khebanelul! 22 Na imag agha mog so'oag nimi tahinge nanag uro yabilulnena, samenag Allahri, ‘Undo uro yabilul,’ aro yubu lebogne sunsunum uro tebanun. Ot el pankhebanele nimi sembe yaghe senero seklebalul,” aro Yesusti sin aobarenang ambatsiog.
23 Wene aro ambatsiogne sembe sin mamun “Etneri pan khebalulne sembe lepla,” aro haildalamek.
Sin Yesusti wepto pogsiognang aobare mamun, “Etne agha nubunge wamlul?” aro yubu leldalameka
24 Sin aobarenang tanekori sin mamun yubu lelamekti, “Nun anabiag etne agha nubunge wamla?” aro yubu leldalamek.
25 Wene alamekpa Yesusti sinag yubu ambarelamsiogti, “Nimi sisa Yahudi kom nimi tala-tala wamang nimi sembe yubu sia lennangdi nimi luknuhiro salelamsiang. Sin Yahudi kom nimi anabiag agha sikiniyabori aruktop yubu ambarelamsiangdi, sindam nimi sembe, ‘Na a'uni walinge wamna,’ aro maibil talamang. 26 Sindi unulamang aghana sindi ulamang saog uro a'undi unuaheng kom. Sindi ulamangne saog uro uan koma a'undi ulamlulomnena, a'un agha nimi nubu sirikne wamlam tanena, andamne mombolag neneptangto olog sirikne saog neneptalulam. Nimi whingag menangalamsilamba neleplangkeang tanena, nimi arukna saog neneptalulam. 27 Nari a'unag, ‘Andamne mombolag neneptalulam,’ aro aruklamsin saog uro nari babe nandamne mombolag neneltalamna. Sunumnana, nimi nhon ‘Kwaneng tenun,’ aro pukamsoba, eldi aruknari el yepto kwaneng el whingag ingkarelaho tanena, nimi phende nene agha mog so'oag nimiri nelagha nubunge senelamang? Nimi nubungena, ot el kwaneng telamnange poneko nimi nubunge sembanep. Na a'un anabiag wamnange, ‘Yepne,’ aro arukahinep aghana nimi yeplamsinne tahiri wamna.
28-29 Nari Nai Ponekori na wepto, ‘Mog so'oag nimi saelbamsululam,’ aro pogneog. A'un tane wamlomnangna, na eraruk uro ulamnoag a'undi na laploa pineom kom. Ane sembe Nari Nairi nanag ‘Saelbamsululam,’ aro ambatneog saog uro a'unag babe, ‘Nimi saelbamsululom,’ aro a'un saeag nenelamsin. 30 ‘Nimi saelbamsululom,’ aro a'un saeag nenelamsin andarina, nari mog so'oag nimi saelba ulamsine abeneko pere a'undi babe nimi nubunge puka urobag pukapmundi, na umag nimi salero yubu sia lelapmunba, Israel ponekori nimi sisa aobare liksiog nimi sembe tam lelekto kemero karebalulom. Nari umag nimi salero yubu sia lelapmundi, nari kwanengap magap telamneag a'undi babe nanap nhon nikag telamukap,” aro Yesusti eldi wepto pogsiognang aobarenang tanekoag ambatsiog.
Yesusti Petrusag, “Andi na sembe ‘Ekonne' sululam,” aro ambarogha
(Matius 26:31-35; Markus 14:27-31; Yohanes 13:36-38)
31 Yesusti Simon Petrusag yubu lelamogti, “Simon, Simon wali uro ka'eamlulam! Phia yonge sikini nubungeri a'un nari yubu ka'ero neleplamnelom nang taneko sembe Allahag molbaongena, ‘Nari sin ni mipsinun. Miplamsineri, nimiri kwaneng roti wana poloro yo'oag agha, “Kolopto yangkalul,” aro keloplamang saog uro sin wepsinun,’ aro phia nubunge nenekori Allahag molbao. 32 Molbao aghana Nari an sembe mo kopto Allahag molona molbatkenongena, Simon andi Nanag seneragnange, ‘Lupto yabilul kom,’ aro molbatkeno. Phia yonge sikini nubungeri mipkeleba, andi Nanag samoro yamen tanena, andi ankabori Nanag wana seneragnange mikip nembahilulam,” aro Yesusti Simonag ambarog.
33 Wene aro ambarogpa, Simondi samoro Yesusag, “Nai, na sik uro Anag ya'ag neleplangkenun. Nimiri na haing sae kaupto kop aeag tobongkimneika babe, anap nhon tebanemea babe an liloa pikenun kom,” aro wene seog.
34 Wene seogpa Yesusti Petrusag, “Petrus, sik uro ambatkenun. Sumene winang ayam anam yubu lemna komag andi ik wilindi Na sembe ‘Ekonne,’ sunululam,” aro Yesusti Petrusag wene seog.
“Nimiri a'un aisa nembahukangne sembe wero wamlulom,” aro Yesusti ambatsiogha
35 Wene aro Petrusag ambarogti, sin nia ambarelamsiogti, “Nari samenag a'un poglamsinori, ‘Palapmundi, kamna kaptoba kal ma'al babe, ag nongag wangana nen nhon wangkanepne babe aghag libaheng kom. Yan wangana nen nhon poroan koma sae lam pululom,’ aro pogsino aghana, a'unag kwema unna olog uahio to kom to?” aro haibahiog.
Wene aro haibahiogpa, sindi samoro “Kwema nunag uahio kom,” seek.
36 Wene aro “Kom,” seekpa, Yesusti yubu lelamogti, “Samen Nari a'un, ‘Sa'a poroan koma pululom,’ aro pogsino aghana, wenena a'undinge kal ma'al lina ag wamleba, ag nonag enektop ag babe kwaneng babe lina wamsile tanena, toro poro agha pinep. A'un peleptangtopne sembe karog wamsile kom tanena, a'ununge ag siliro pelengka wangka ulamlom ag nimiag kamna kapto toroamundi, kamna nenekoag agha karog tol pululom. 37 Nari a'unag, ‘Unualulom,’ aro ambatsinne nenena tibin nenero ambatsinuan. Allah yubuag samenag na sembe mome toro pibog yubu nhon sik uro nanag uro sunuptalul. Samenag Allahri silimu yubu tiptopne ponekori na sembe mome toro palilamogti,
‘Nimiri el sembe “Yubu sia ingisaptopne,” aro seneragtop,’ aro mome toro pibog.
Anamag nimiri amik na senelamneikne sembe mome toro pibogne nene sik uro sunuptalul. Wene babe uro yabinual,” aro Yesusti ambatsiog.
38 Wene aro ambatsiogpa, Yesusti yubu ka'ero neleptopnang tanekori Yesusag, “Nai, karog phende abene wamdang,” seekpa, Yesusti, “Hae, lelamapne lipsebe,” seog.
Yesus Getsemani so'oag piogti, Allahag molona molbaogha
(Matius 26:36-46; Markus 14:32-42)
39 Wene “Abenda,” seogti Yesus sop-sop Zaitun kongtenag palamog saog uro sumeneko babe Zaitun kongtenag piogpa, eldi yubu ka'ero neleptop nimi taneko babe nelepto piek. 40 Sindi “Pukap,” sembaekag aneko piekti, Yesusti sin neleplamek nimi tanekoag, “Phia yonge sikini nubungeri a'un ‘Mipsinun,’ aro ulamsileba, malia ulapmunagti, a'undi Allahag, ‘Nu yepsi,’ aro molona mololamlulom,” aro ambatsiog.
41 Wene aro ambatsiogti, olog we uro piogti, yabu sanukto pulingkina u amupto Allahag molona mololamogti, 42 “Naniong, nanag ‘Seklero tebalulam,’ aro pogneomne ikindi, Andi wali sembahom tanena, kom nembahom. Ot nari ‘Undo yaboho,’ seneropne agha ualulam kom. Andi wanaag seneropne agha uro yabile,” aro Allahag molona molbaog.
43 Wene aro Allahag molona molbaogpa, Allah arukna malaikat imag agha yingkina el whingag lag taogti, mikip nenelaog. 44 Yesus El seklenne seklebanepne ikin logti, Yesusti wana ikinneag agha Allahag molona mololamogne abeneko pere Elag whin ulamogne eneng tiniroba saog mag teroba karaklamloa tinilamog.
45 Yesusti molona komopto molbaogti, sekom agha yingkina kemelamsiogpa, eldi yubu ka'ero neleptopnang malameka ipsiog. Sin taneko wana ikindi, nong pesa taekti, malamekpa ipsiog. 46 Malameka ipsiogti, yubu lelamogti, “Sa'a sembe a'un malamlom? Pukmundi Allahag molona mololapmun andarina, phia sikini nubungeri a'un ‘Mipsinun,’ aro miplamsileba, a'undi malinge ualulom kom,” aro wenero ambatsiog.
Yesus haing sae kaupto saelbaekti pabieka
(Matius 26:47-56; Markus 14:43-52; Yohanes 18:3-12)
47 Yesusti anam yubu ambarelamsiog abeneko eldi yubu ka'ero neleptopnang ao bare nang abeneko agha Yudas nenekori nimi maikno whingag menangal payalamsiog. Poa yahiogti, Yudas nenekori, “Yesus tog-tog aro somoro kipnun,” sembaogti Yesus whingag sekel piog. 48 Yudasti Yesusag unuaog aghana, Yesusti yubu lelamogti, “Yudas, Na imag agha mog so'oag nimi tahingena, andi togtog aro na pankhelamnelam, te?” seog.
49 Yesusag neleptopnang Elap aneko wamek nang enekori Yudasti uloghogne ibekti, wene uro yabinepne sembe el taekti, sindi lelamekti, “Nai, nimi tane karog agha omnuahisebe,” seek.
50 Wene seekpa, sin “Yesus saelbaukap,” aro yaek nimi anabiag agha memne Allah sembe pairop nang sikini nubunge arukna nhon babe wamog. Wamogpa Yesusag neleptopnang taneko nhondi karog kilbom agha arukna wamogne poneko ao sae sirik uropne pubom agha pelengelobog. 51 Undo unuaog aghana, Yesusti irikto yubu lelamogti, “Unualamne nene libe,” seogti nimi enekori ao eneko Yesusti salero tibirogti, nimi ene wali nembaog.
52-53 Wene aro wali nembaogpa, memnang Allah sembe palirop nang sikini yaboap, Allahri Mem Ae yae ua urop nang sikini yaboap, Yahudi nimi sikiniyabo nimi wenehiropnang yaek nang tanekoag Yesusti yubu lelamogti, “Na sopsop Allahri Mem Ae aramag wa'alamnori, a'un whingag ua ulamnobog, a'undina salelamneom kom. Na ‘Mo sekukap,’ aro mal tarop nimi sikini wamsene tanena, a'undi nanag yalamlomne, ‘Nimi yonge ane oro saelbaukap,’ aro karogap kameap payalamlomne sunsunum sembanep. Aghana na, ‘Mo sekukap,’ aro mal taropne kom. Ane sembe a'undi nimi whingag yo kom uro na saelbanep aghana, Allahri ko'o ologha ane a'un liamsilbana, el inipnag saelba uhiropne phia sikini nenekori senenne sunsunum uro a'undi ul palamlom,” aro Yesusti ambatsiog.
Petrusti Yesus sembe, “Na ekonne,” seogha
(Matius 26:57-58, 69-75; Markus 14:53-54, 66-72; Yohanes 18:12-18, 25-27)
54 Sindi Yesus saelbaekti poa lebekti, memne Allah sembe palirop nang sikini nubungeri aeag poa piek. Yesus saelbaekti poa palamekpa, Petrusna nelepto palamogne pororo tiro saog uro neleplamsiog. 55 Weag agha neleplamsiog aghana, memne Allah sembe palirop nang sikini nubungeri aramag aneko auk nhon lolbaekti, nimi orange babe auk lekto puro warekamekpa, Petrus babe auk lekto pul piog. 56 Auk lekto pukamogpa, olog wareamogpa, kel nhon memne Allah sembe palirop nang sikini nubunge arukna wamog kel nhondi Petrus pukamogha ibog. Ibogti yubu lelamogti, “Nimi ene babe Yesusap nhon ua ulamonge,” seog.
57 Kelenekori wene seogpa Petrusti, “Na kom! Nari babe nimi ene ekon nimi,” seog.
58 Nen olog wamogpa, nimi kabuni nhon yaogti, Petrus kembi agha, “An babe Yesusag neleplamlamne,” seog.
Wene seog aghana Petrusti kabuni enekoag, “Na kom! Na Elag neleptop komne,” seog.
59 Wene seogti wamogpa, ko'o olog uro piogpa, nimi kabuni yogne nhon yaogti, yubu mikip uro, “Nimi ene Galileange ane sembe, otsik uro el babe Yesusag neleptopne wamla,” aro wene seog.
60 Wene seog aghana, Petrusti samoro kabuni enekoag, “Na andi lelamlamne nene olog seneragna kom,” alamog abeneko pere winang ayam yubu lebog.
61 Winang ayam yubu lebogpa, Yesus tangabom agha Petrusag kembaog. Kembaogpa Petrusti Yesusti lebogne seneraghogpa, “Sumene winang ayam yubu lemna komag, andi ik wilindi Na sembe, ‘Na ekonne,’ sunululam,” seogne seneraghog. 62 Seneraghogti aneko sekom agha lambaogti, wana ngik-ngokha engelamog.
Yesus yubu nepto olameka
(Matius 26:67-68; Markus 14:65)
63 Yesus yae wamek nimi tanekori yubu nepto ali nenelamekti ol wa'alamek. 64 Sindi Yesusti whing lilbi agha lelamekti, “Allahri an wana heklangkelne agha lebe. Etneri an olangkelne si lepmen,” aro yubu nepto olamek. 65 Yubu neplamekti, san tiliptop yubu maikno lelamekti, ali nenelamek.
Yesus poa nubunang Yahudi nimi sembe tam kareptopnang Mahkamah Agama whingag poa pieka
(Matius 26:59-66; Markus 14:55-64; Yohanes 18:19-24)
66 Wamekpa, kwelekaogpa lukun sum eneko Yahudi nimi sembe tam kareptop nimi Mahkamah Agama nimi taneko, sin anena memnang Allah sembe palirop nang sikini yaboap, Musari yubu amohirop nangap poloro winiptaekti, wameka whingag Yesus poa piek. 67 Poa sin whingag piekpa, sin tam kareptopnangdi Yesus hailamekti, “Nu ambatsululam! Anna Allahri weptopne, ‘Mog so'oag nimi taluro saelbamsululam,’ aro pogtopne Kristus wamlam tanena ambatsi” aro ambarek.
Wene aro ambarekpa, Yesusti samoro, “Nari samoro lag phoro a'unag ambatsisenea babe a'undi nanag ‘Sikne’ aro seneragnululom kom. 68 Nari a'unag haibahisenea babe samoro a'undi ambatnululom kom. 69 Aghana wenena el Allahri weptopne, ‘Nimi Taluro Saelba Uhilul,’ aro imag agha poghogne poneko Allah Mikipne poneko sae sirik sip puknualdi ya'ag saelbamsilul,” aro ambatsiog.
70 Wene aro ambatsiogpa, sin niri elag hailamekti, “Wene selam tanena, Anna, ‘Allah Elme wamna,’ selam te?” aro haibaek.
Wene aro haibaekpa Yesusti, “A'undi wene leplamne pone wamna,” seog.
71 Wene seogpa sindi lelamekti, “Nundam nimiri Eldamneri pamag agha yubu leplange aori ka'ebap. Ane sembe, yog nimiri ‘Undo-undo lelamoa ka'ebano,’ aro lenne nen ka'ebaukap kom,” seek.