Kaldam kel nhondi ni el saeag wamogne Allah sembe pibogha
21
1 Yesus Allahri Mem Ae aramag pukamogti, usog ebom agha tilamogpa, Allah sembe kal ma'al pail piroba anekoag saeagha tup nimi tanekori kal ma'al lilameka tibogahiog. 2 Eldi kemelamogpa, kaldam kel sik saeagha orog keldi babe kamna kaptoba wana phende wamsiogne abeneko si toro tona babe ologha tatsinepne liro pibog. 3-4 Kaldam kel enekori liro pibogpa, ibogti Yesusti yubu lelamogti, “Tup nimi maikno tanekori sikin saeag maikno wamlange agha pogto waliaba maikno palilamang. Maikno palilamang aghana, kaldam keleneri olog piplange, el saeag oroghag agha ni kwaneng toro tenne elag wamlange Allah sembe ni pipla. Tup nimi taneri pogto pibangne kembi agha, ‘Wali pogto pibang,’ sembanep. Aghana kaldam keleneri el saeag orog agha ni tatla ane sembe, Nari a'unag sik uro lelamnange, nimi ni tane wamangne kembiag agha, ‘Kaldam keleneri maikno phelektopne pipla,’ alamna,” seog.Allahri Mem Ae kwerekanepne sembe Yesusti ambatsiogha
(Matius 24:1-14; Markus 13:1-13)
5 Sin Allahri Mem Ae aramag wamekpa, Yesusti yubu ka'ero neleplamek nimi agha nimi etpare tanekori Allahri Ae sobaekne keme warekaekti yubu lelamekti, “Allahri Mem Ae ane kembamen! Nubu kirik sopso waelbaek kirik walinge aneap, nimiri wali-walia Allah sembe paliropneap abenekoag agha wali uro sobaek,” aro ngalaglamek. Ngalaglamekpa Yesusti, 6 “A'un wene ngalagto ililamlomnena, amik sum ni soroba ane nimiri ni kwerekto yamolobikpa, kirik pai sobi ubu walerop kirik enekoag agha nhon babe nen sorobag sekamlul kom,” aro Yesusti nimi tanekoag ambatsiog.
7 Wene aro ambatsiogpa sindi Yesusag hailamekti, “Nai, Andi yubu nu amohiro ambarelamsilamne wamlam. Andi wene uro yabilul selamne nenena, etsum agha uro yabilul? Kekneba huropne agha lag taleba, ‘Wene uro yabinep,’ sembaukap?” aro eldi yubu ka'ero neleptopnang abenekori Yesusag haibaek.
8 Wene aro haibaekpa Yesusti samoro, “Nimiri a'unag, ‘Orolenange ambatsikag,’ aro haing whi uro yae wamlulom! Allahri samenag salag lero palilamogti, ‘Nimi nhon “Nimi taluro saelbamsilulam,” aro wepto pognun,’ seogne sunsunum uro, na Yesus wepto pogneo. Na Yesus wepto pogneonge sembe lebog aghana, amik sum nimi maiknori orolenange leroa yalamikti, a'ero-a'ero lelamikti, ‘Allahri nanagha “Saelbamsululam,” aro wepto pogneoba yandi, wene na yubu sia lero nimi saelbamsinun,’ sukang. Sindi orolenange lelamikne sembe a'undi sik senero nelebahiseng kom. 9 A'undi ka'elapmunba nimiri, ‘Nu luknuhiro saelba uhiropnang umag wamukap komdi, mal tabeberi, mo sekukap,’ aro yubu lelamika ka'elapmun tanena, wanaag samsamoro log sembaheng kom. Mal talamikne ane sik uro sam yabilul aghana, Allahri tam karepto ikinne komopto pimnep sum anam elem uro yabinep kom,” aro Yesusti ambatsiog.
10 Wene seogti Yesusti nen tipto yubu lelamogti, “Yubu sia leropne as nhonap nhonap aisa neneptangto mal talamikpa, nubu mog so'o nhonap mog so'o nhonap nimi teng-tengne mal talamukang. 11 Mal talamikpa, mog so'o tala-tala sa'uma nubu sirik sa'uma pot-porolamleba, kwaneng yo maikno walelamleba, nimi nikna nimiag singina singihinne babe nhon sao nhon sao tala-tala posaplamlul. Nimi log lelem nenehinne imag uro yabalamleba, tiwalengebom agha ‘Undo uro yabilul,’ senen kekneba nubunge lag talamlul.
12 Ni lemnange uro yabin komagna, yo nimiri a'un na Yesusag ‘Sikne,’ aro seneragtop nimi a'un saelbahiikti, ‘Seklebaukang,’ aro yubu nepto olamsukang. Nimiri a'un salero, ‘Yesusag neleptopnang luknubahukap,’ aro Yahudi nimi poloro winiro yubu lerop aeag pabhiikti, sae kaupto kop aeag tobongkipsukang. A'un salelamsiikti, ‘A'un Yesusag sik sembaheng kom,’ aro nimi mog so'o saelba uhiropnang gubernurap, yubu sia leropnangap, sikin whingag pabalamsukang. 13 A'un sin nubunang whingag wapmunne sirikagnena, na Yesus sembe ‘Undo-undo wamori, ulamoba, ibobo,’ aro lag phoro ambarelamsululom. 14 Aghana anamag a'undi, ‘Uaukap,’ aro wanaag karebalulomnena, ‘Nimiri na tam kemero kareptop nimi whingag pabineik tanena, “Yubu pelebeltananne welaro lemnun,” aro wana ophag aro wamnun kom,’ aro wanaag karebamundi, wana ikin uro seneragseng kom. 15 Nandamneri a'undi pelebeltanan yubu lemnepne wana seneragna hekahineba, a'undi yubu leplulom. Nari yubu a'unag tatsine yubuag agha lelapmun tanena, a'un aisa neneptangtop nimiri ka'ebaikti, ‘A'undi yubu orolena,’ aro lemnep komdi, sindi a'unag yubu samoro tarabanep kom. 16 A'undi nanag sikne aro seneraglamlomne sembe a'uni yabo, a'unin yabo, a'undo yabo, a'unipsabo, a'un kabo, a'undi nimi pali tanekori, ‘A'un opsukang,’ aro pan khebahikpa, a'un tane wamlom nimi agha nhon-nhon ya'ag opsukang. 17 A'un nanap ma'aptangto neleplamnelomne sembe nimi niri a'un sembe karong sembahiikti, haing sek nembahukang. 18-19 Nimi niri a'un ‘Karongdi, a'un opsukap,’ aro ulamsiik aghana, nimi etneri wana khapto wamleri nanag, ‘Sikne’ aro seneraglamle tanena, Nuni Allahri nimi eneko taluro wali nembaleba, a'undi usog hong kiki nhon timbaloa saog ualul kom,” aro Yesusti eldi yubu ka'ero neleptopnang abenekoag ambatsiog.
Yahudi nimi amik seklebaukangne sembe Yesusti ambatsiogha
(Matius 24:15-28; Markus 13:14-23)
20-22 Yesusti yubu tipto ambarelamsiogti, “Samenag agha Allahri silimu yubu tiplamek nangdi mome toro palilameknena, ‘Yerusalem nimi eneri yoaba ulamangne sembe Allahri “Opsinun,” aro tam pelengkalul,’ aro mome toro palilamek. Samenag ‘Allahri tam pelengkalul,’ aro mome toro palilamekne ni sunsunum uro sik uro yabilul. A'undi kemelapmunba, yin salerop nangdi as Yerusalem wea kanelamika ipsumun tanena, a'un el tahilulnena, ‘As soro kalurop as Yerusalem aneko oro talbalimna tanual,’ sembamlulom. Ane sembe unulogleba ipmun tanena, a'un mog so'o Yudea wamlom nimi merero lepmundi, wali yimag pululom. As soro kalurop asag wamikne lanaro peheng. Sin as Yerusalem paiag sip as olog-ologneag wamik nimi nen as Yerusalem wa'alaheng kom. 23 Allahri ‘Opsinun,’ aro tam pelengelamle sum eneko memon wamsile kelaboap, me maum tiniltolamik kelaboap sin merero panne ikin sirikti, seklenne seklebaukang. Sin mog so'o taneag wamang nimi ni anekori yoaba ulamangne sembe Allahri lunuro nimi wahinne lag talul sum eneko mog so'o aneag wamik nimi niag eraruk uro unne lag talul. 24 Sin tane wamik nimi tanekona, nimi sisa Yahudi kom nimiri mog so'o tane nimi karog agha mal taro luknubahukang. Nimi nenne ya'ag opsiikti, nenne salero haing sae kaupto poa lepsiikti, tala-tala paphukang. Sin nimi sisa Yahudi kom nimiri luknuhiro opsiikti, as Yerusalem nene saelbamikti, mog so'o ane yan ingisaplamukang. Sindi mog so'o ane salero yan ingisaplamukangnena, ot Allahri, ‘Sin nimi sisa Yahudi kom nimiri mog so'o ane hengkun taibuka taubuka ulamogha ko'o nene saog uro uro yabalamle abeneko saelbamsukang,’ senenne sunsunum uro komopto yabile taneogna lambaukang,” aro Yesusti ambatsiog.
Yesus eldamne nen so'oag yalulne sembe ambatsiogha
(Matius 24:29-35; Markus 13:24-31)
25 Yesusti tipto ambarelamsiogti, “Amik imag tiwalengebom agha el nenehirop kekneba imag ualulnena hengag, walag, imbreag kekneba ualul. Mog so'oag uro yabilulnena, mag nubu uro longorop mag laut nubu uro irik-irikna palilamlul. Mag kurut alamlenge neneko limang talagtoba saog ulamleba, nimi tala-tala wamang nimiri, ‘Welaro omnulamsil,’ aro wana enhaun aro log sembaukang. 26 Imag khaepto wamloa abeneko babe lebe seleri lologhale ane sembe, nimi mog so'oag wamik nimiri, ‘Ni mog so'oag uro yabilenge sembe welaro omnulamsil,’ aro log seklebaikti, nimi teploa saog nimi taukang. 27 Undo unulamle abeneko na imag agha nimi mog so'oag nimi tahinge toa nusam toman nen samoro yanun. Yalamne sumeneko Allah Imagne ponekori mikipne pere agha imang warero libango aropne nanag wamleba, mog so'oag wamik nimiri na tiboghanukang. 28 Ni lemnange ane uro yabalamleba, mog so'oag nimiri log sembaukang aghana, a'unna log sembaheng kom. Ni kekneba lemnange ane ipsumundi, a'undi wana awi uro wapmundi, ‘Eldi nu wali nenero toro pipsinepne poneko yananne peram talamle tagha ualul,’ aro puka sekmendi usog eplulom,” aro Yesusti ambatsiog.
29 Yesusti likiptop yubu sunumna tolpiogti, nen tipto ambatsiogne ane. “Kekneba uro yabilul aro lemnange ane sunumnana ane. A'undi kal arag kembapmundi, ora kal niag babe kembamlulom. 30 Kal tanekoag kembamsimunba, kal aneko mog towaleng-towaleng paloghik tanena, ‘Wene ebare lag tanual,’ aro mog so'o tane nimiri eltangtop. 31 Ane saog uro usa lemnange uro yabile tanena a'un el talulomnena, ‘Wene Allahri weptopne, “Nimi mog so'oag nimi Taluro Saelbamsululam,” aro poghogne poneko yanuala peramdi, wene uro yabinep,’ aro a'un eltahilul.
32 Sik uro ambarelamsin. Nimi wene wamang nimia anam teban komag ni ambatsinne nene uro yabilul. 33 Imap so'oap orog talul aghana, nari yubu leropne orog talul kom. Ya'ag wamlul,” aro ambatsiog.
“Yae wero wapmundi, ‘Sa'a-sa'ari wana topsileag,’ aro togtangto wamlulom,” aro Yesusti ambatsiogha
34-35 Yesusti nen tipto wenero ambarelamsiogti, “Na amik yanunne a'un yae tibogto wamlulom. Na amik yanenge sembe a'un wali uro yae piptangkamsom kom tanena, selbel wa'iloa saog uro wa'isom. A'undamneri yae togtangto wapmunnena, ‘Mag yonge tero nenek salehirop nimiri ulamang saog uro ulamebeag to, wana ophag uro, “Wela wamnun,” aro wana phende tabebeag to,’ aro a'un togtangto wapmundi, yae piptangkamlulom. Na lo'om aro yalamne sumeneko sebeldi lo'om aro noropsirop saog uro nimi mog so'oag urop nimiri kekneba kemban koma ekon wamik sumeneko yanun. Ane sembe yae piptangkapmundi, 36 tibogto wamlulom. Allahag moloro mololapmundi, ‘Ni seklenne uro yabinepne neneko nanag omneleagti, yepnemen andarina, An Allahri weptopne Imag agha Saelba Uhiropne poneko nen yaleba, na el whingag wali wamnun,’ aro Allahag mololamlulom,” aro Yesusti eldi yubu ka'ero neleptopnangag ambatsiog.