Kelabori Yesus yeplameka
8
1 Neneko uro yabiogpa ko'o olog ik sulu wamna koma Yesus ina yabalamogne, as eneag as eneag kanero yabalamog. As ologne nubunge yabalamogti, Allah Yubu Walinge Allahri yubu sia lero nimi saelbahinepne sembe ambarelamsiog. Yesusti nimi ao bare wepto pogsiognang eneko babe Yesusap nhon yabalamekpa, 2 kelabo etbare babe sinap nhon yabalamek. Kelabo sinap nhon yabalamek kelabo enekona, Yesusti phia yonge kulomag wamsiog kelabo wali nembahiog kelaboap, naikna nhon saogne nhon saogne naiklamekpa, wali nembahaiog kelaboap nhon yabalamek. Kelabo taneko nhonna, Maria as Magdala agha urop kel phia yonge saekbare kulomag wamogpa, Yesusti yag lambahiog keleneko nhon yabalamek. 3 Kelabo yognena, Susana kelenekoap, Yohana kelenekoap, apna kelabo yogne maiknoap nhon yabalamek. Yohana kelenekona, ela'ange si Khuza wamog. Khuza ponekori nimi nubunge Herodes yepto el saeag agha wamlange paia ulamogne poneko wamog. Kelabo tanekoap Yesus elag neleptopnangap nhon yabalamekti, kelabo tanekori sindi saeagha sinag wamogne agha tenaba kamna toro Yesusap eldi wepto pogsiognang aobare nang tanekoap yeplamsiek.Yesusti sunumna wana yamoropne sembe ambatsiogha
(Matius 13:1-9; Markus 4:1-9)
4 Yesusag nimi maikno as nubungeag ologneag wamekne Elag yalamek. Nimi maikno yalamekti, winiltalameka kembahiogti, Yesusti sinag sunumna sunuro yubu ambarelamsiogti, 5 “Awe weropne nhondi so'oag wana togtoba maikno yamoro toghol palamog. Yamoro toglamogba, wana nenne inaag timbaog. Inaag timbaogne neneko nimi pang yang ulamekneri ingisaplobekpa, nenne winang yingkina wana togna toghogha taneko ni toro teek. 6 Nenne kirikag timbaek. Kirikag timbaekne taneko pongoro yabiek aghana so'o si mag orogti halo aro ul taek. 7 Nenne babe pongoroba alog aba nusamag timbaogti, alog aba tanekoap nhon sirikom pongkarek aghana, alog aba tanekori oro niknibaogpa tebaog. 8 Aghana nenne babe so'o mesaag sukuptobag timbaog. So'o mesaag ingkiogne wali uro pongkaogti, wana mauamog. Pongkaogti yo'o nhonag nhonag wana teng tombare saog maubaog,” aro Yesusti sunumna sunuro ambatsiog.
Wene aro Yesusti ambatsiogti nen lelamogti, “Aori ka'ebalomne nimi niri seneragto saelbamlulom.,” seog.
Yesusti “Tam nene sembe likiptop yubuag agha sunumna ambatsin,” aro tibin nembatsiogha
(Matius 13:10-23; Markus 4:10-20)
9 Yesusti sunumna tol pina ambatsiogne sembe Eldi yubu ka'ero neleptopnang tanekori, “Sunumna lomagna welaro wamlange sembe ambatsilam?” aro haibaek.
10 Wene aro haibaekpa Yesusti, “Allahri mog so'oag nimi Saelbahilulne neneko samenagna tognoro wamog aghana wene, a'unag tibin nenero ambatsinuan andarina, el wamlulom. Ot nimi orange sembe tognoro wamlaba likiptop yubuag ambarelamsin. Undo ambarelamsin pagha,
‘Kembahane,’ aro haingdi kemelamukang aghana, wanaag agha ibukang kom.
‘Ka'ebahane,’ aro aori ka'elamukang aghana, wanaag agha seneraghukang kom,” aro ambatsiog.
11 Yesusti likipto ambatsiog yubu eneko tibin nenero ambarelamsiogti, “Likiptop yubu lomag wamlange nenekona ane. Wana aweag togtopne neneko Allah yubu wamla. 12 Wana toglamogpa, inaag timbaogne neneko sunumnana, Allah yubu ka'erop nimi. Aghana phia yonge sikini nubunge neneko yingkina, ‘Sindi Allah yubu sik sembaik kombana, Allahri sin taluro wali nembahilul kom,’ aro wanaag agha pelepto tol toplingkirop. 13 Wana aweag toglamogpa, kirikag timbaog nena, nimiri Allah yubu ka'ebom agha yeng uro senero torop aghana, yubu walinge neneko yareng pelengero sindi wanaag pongkanep kom nimi sembe lemna. Nimi undop nena, yubu walinge ambarelamsiropne abeneko hae sesog sik sembanep aghana, sinag eraruk tangom agha mipsirop tanena, yubu walinge neneko laploa libukang. 14 Wana toglamnaba, pongoroba alog aba nusamag yingkirop sennena, nimi nenne Allah yubu ka'erop nimi sembe lemna. Undop nimi anekona Allah yubu ka'erop aghana, sindi wanaag sop-sop, ‘Wela wamnun,’ aro wana ikin uro seneraglamang. Undo seneraglamangdi, ‘Tup tahaneri, nia ni walinge nari saeag taho,’ senenne sindi wanaag to'op tangtopneri, Allah yubu niknil orop. Oro niknilamlaba, sindi wanaag kolo orogti, Allah yubu pongoro wana maubanep kom saog wamla. 15 Wana toglamnaba, so'o mesa sukuptobag yingkirop sennena, sin wana sikne walingeag agha Allah yubu ka'ero wali uro seneragto salerop nimi sembe lemna. Sindi wana paliro wali uro Allah yubu salelamangne pere agha sindi wanaag Allah yubu pongoro wana maiknoro mauamla,” seog.
Yesusti sunumna whea sembe ambatsiogha
16 Seogti, Yesusti likiptop yubuag sunumna nhon babe ambarelamsiogti, “Nimi nhondi babe whea timbom agha kau agha niknibalul kom. Whea timbom agha ae usa mamneba mombolag babe tognobalul kom. Whea aneko timbom agha elba whea tinina yan iktoba anekoag meamle andarina, nimi ni ae lomag wa'ilamik nimiri tibin aneko imnep. 17 Allahri samenag salag lebogne whea saog uro wamla. Allahri yubu lebogne ‘Ya'ag tognoro wamlul,’ aro lebog komdi, lag nembalul. Nia tognoro wamlange, ‘Lag taleba, el taukang,’ aro lebog. 18 Ane sembe a'undi ka'elamlomne pere agha wali uro seneragto ka'ebamlulom. Nimi etneri Allah yubu ka'ero saelba ulamle tanena, Allahri nimi enekoag seneragna walinge nen ma'aro tatlul. Aghana nimi etneri Allah yubu ka'ero saelba ulamle kom tanena, seneragna ologha elag wamlange babe kom talul,” seog.
Yesus ilinap ilipsaboap sembe lebogha
(Matius 12:46-50; Markus 3:31-35)
19 Yesus ilinap ilipsabo taptopneap Elag yaek aghana, nimi maiknori sendebel alamekne sembe elag yubu lero haiptanep kom. 20 Ane sembe nimi nhondi Yesusag ambarelamogti, “Aninap anipsaboap, ‘Yesusap haiptaukap,’ aro yaang aghana, asag wamang,” aro ambarog.
21 Wene aro ambarogpa, Yesusti samoro, “Nimi etneri Allah yubu ka'elamangdi saelba ulamang tanena, nimi ene agha Nari kaenap naipsaboap wamang,” seog.
Yesusti khao aingnibaogha
(Matius 8:23-27; Markus 4:35-41)
22 Ik nhon sum Yesusti eldi yubu ka'ero neleptop nimiag, “Mag kauro tara sip pukapti yahut,” seogpa kabongag waelbaekti mag alip toman palamek. 23 Sin kabongag waelbaekti, “Phoanari ko'oro pabalamlul,” aro kerektop ag towalengkaekti, mag alip toman agha palamekpa, Yesus kabongag malamog. Malamogpa khao nubunge lo'om aro yalamogti, mag kula'epto kabongag wa'alamogpa, sin ni opsinep ulamog. 24 Sin opsinep ulamogpa, sin Yesusag pina kamolamekti, “Nai! Nai! Nu magti opsinep!” aro kaombaek.
Wene aro kaombaekpa, Yesus pukogti, khaoap mag kula'eptoba nenekoap abenekoag wembahiogti aingnilopsiog. Khaoap mag kula'eptoba nenekoap aingnilopsiogpa khao ulamlori mag walelalamlo koma saog uro tebelag alabog. 25 Tebelag alabogpa Yesusti eldi yubu ka'ero neleptopnangag yubu lelamogti, “Sa'a sembe Nanag, ‘Nu paiamsilul' aro seneraglamnelom kom?” aro sinag wene seog.
Wene seogpa, sin logti lo'om aro sin mamun yubu lelamekti, “Yaghe! Nimi ene etne saog uro wamlari yubu leplaba, khaoap magapti Eldi yubu ka'ebarangdi aingnibarang?” aro sin mamun haildalamek.
Yesusti phia maikno nimi nhon kulomag agha yag lambahiogha
(Matius 8:28-34; Markus 5:1-20)
26 Yesus el neleptopnangap kabong lomag mag alip toman kauro palameka mog so'o tara sip Gerasa so'oag piek. 27-29 Piekti, Yesus kabong lomag agha kuluka yangkalamogpa, as aneko kabuni nhon phia kulomag wa'iog nimi nhondi Yesus yalamogha tiboghaog. Nimi enekona, Yesus anam yan komag phia el kulomag wa'iogpa, kerebenang ua ulamogti, aeag mamna koma nimi teptop nimi kirik arameag siksirobag ua ulamog. Yog nimiri, “El yae wamukap,” aro ik sulu salero sae mamunap, yan mamunap haing kauplamek aghana, sop-sop pulpulukto eplamsiog. Yan sae haing kauplameknena, nimiri haing pulukanep kom haing besiag agha sunurop haing babe kogto puluklolamsiogti, phia anekori ik sulu nimi eneko salero nimi oroghag poa piog. Phia yonge kulomag wamog nimi enekori Yesus yalamogha weag agha tiboghaogti, nimi teptopne kirik arameag siksiroba aneko laplobi agha Yesus wamoghag yingkiog. Yingkiogpa, Yesusti phia yonge nimi eneko kulomag wamogne, “Lambae!” aro arukaog. “Lambae!” aro arukaog abeneko pere nimi enekori Yesus ibom agha yubu nubu uro haum aro Yesus yanag malingkiogti, “Yesuso, Allah Paliag Sirikne Elme wamlamne! Andi nanag ‘Huanun,’ aro yalam? Na ‘Seklebale' aro na omneheng kom aro mololangken!” aro haum seog.
30 Wene aro haum seogpa, Yesusti phia yonge anekoag hailamogti, “An si etne?” seog.
Wene seogpa, samoro lelamogti, “Na si Legion,” aro ambarog.
“Na si legion,” seognena, Roma nimiri yubuag yin saleropnang teng-tengne (6.000) winiro polorop nimi sembe, “legion” alamek. Nimi eneko kulomag phia yonge teng-tenga teknero wa'iek ane sembe, “Na si Legion,” seog.
31 Phia tanekori Yesusag sarikto mololamekti, “Andi nu ta'ap urobag selenga we sirikne anukoag pelengkahiseng kom,” aro molbaek. 32 Sin wamekag aneko pham maikno main alunag longolaekti, so'o ero toro telamek. Phia yonge tanekori Yesusag mololamekti, “Andi nunag, ‘Pham taneag wa'isut,’ aro nu arukahilulam te,” aro molbaek. Seekpa, Yesusti, “Hae, pululom,” seog. 33 “Pululom,” seogpa, phia yonge taneko ponekoag agha lambaekti, pham taneko kulomag wa'ahiek. Wa'ahiekpa, pham taneko merelamekti, kwerenag eba timbom agha mag sinag tagpurukom seekti, tebaek.
34 Mag sinag tagpurukom seekti tebaekpa, pham yae paia ulamsieknang taneko logti laplobi agha merebaek. As peramag wamek nimiag merebaekti, uro yabiogne sembe ambarel phiek. 35 Ambarel phiekpa, nimi taneko sindi asag lambaekti, “Sa'a uro yabil,” aro kemelaek. Yesusag yaekti, kemelamekpa, el samen phia yonge maikno kulomag ua ulamogpa, Yesusti yag lambahiogpa, wali taogne poneko Yesus yan tamag pukamogpa ibek. Wali taogti, ag nongag wangkamogti, wana peket uro pukamog. Pukamogpa, ibekti, “Welaro uro yabil?” aro log tahiog. 36 Log tahiogpa, ni uro yabiogne ibek nimi tanekori sin kemelaek nimiag el nenelamsiek. El nenero ambarelamsiekti, “El phia kulomag wamo nimi agha Yesusti phia yag lambahilba, wali tal,” aro ambatsiek. 37 Ambatsiekpa ka'ebom agha sin log lelem tahiogpa, nimi ni Gerasa so'oag wamek nimiri, “Nuri mog so'o eneag wamsom kom. Pululam te,” aro wene molbaek. Wene aro molbaekpa, Yesus kabongag waelbaogti, “Punun,” aro ulamog.
38 “Pululam,” seek aghana, phia kulomag wa'iogha wali taogne ponekori Yesusag sarikto mololamogti, “Nari anag nelepto wali nhon pukap te?” seog. Wene seog aghana Yesusti, “Kom,” seog. Seogti, poglamogti, 39 “Andi aeag pululam. Allah Ponekori o'ona maikno senero yepkelne sembe angkaboag ambarel phululam,” seog. Wene seogpa nimi eneko piogti nimi ni as soro kalurop as taneko wamek nimiag, “Yesusti na maiknoro yepneori, wali nembaneo,” aro ambarelamsiog.
Yesusti eneng palamog kelap Yairus elmangkel teptopneap wali nembahiogha
(Matius 9:18-26; Markus 5:21-43)
40 Yesus samoro kabongag agha yalamogpa, nimi maiknori El yananne sembe tibogto wamek nimi tanekori awi sembaekti, kibek. 41-42 Tibogto wamekag yaogpa, as enekoag nimi nhon Allah yubu lero nimi poloro winirop ae saleropne sina Yairus Yesusag yaog. Yairus elmangkel ot nhonogne hengkun aobare wamog pog nikna niklamogti, loba tanep saog wamog. Ane sembe Yairus poneko yaogti, Yesus yan tamag yabu sanukto uamupto malangkina Yesusag, “Nari aeag yalulam,” aro molbaog.
Wene aro molbaogpa Yesus, “Yairus ponekori aeag punun,” aro palamogpa, nimi maikno Yesusag nelepto seklem tarabal talamek. 43 Undo palameka nusamag kelabo nhon eneng palamogha hengkun aobare seklero wamog kel nhon babe nelepto palamog. Kelenekori, “Nimi whesinnangdi whebanehengba, wali tahane,” senelamogti elenge saeagha wamsiogne ni kamna tolamsiog aghana, eneng palamogne whelameka babe olog karepto palamog kom. 44 Undop agha keleneko Yesus wa'ilag sip yingkina Yesusti nongag wangaro pelengkamog ag sirikag sael piog. Sael piog abeneko pere keleneko eneng palamogne neneko pabog. 45 Pabogpa Yesusti hailamsiogti, “Etneri Nanag po'obanel?” aro haibahiog aghana nimiri, “Nuri kom,” aro wene seek.
Wene seekpa, Petrusti Yesusag, “Nai, An tara-tara tane nimi maiknori Anag seklem taraplangkeang,” aro wene seog.
46 Wene seogpa Yesusti, “Aghana nimiri Nanag saelbitnel. Na el wamna. Nari nong mikipne Nanag agha lambal,” seog.
47 Yesusti wene seogpa kelenekori, “Nari Elag saelbanne lag tal,” aro log lelem pet-pet aro yingkina Yesus yan tamag yingkina uamupto malingkiog. U amupto malingkiogti, nimi ni wamek nimi tanekoag ambarelamsiogti, “ ‘Na wali tahane,’ sembandi nari wene Eldi aghag saelbanne abeneko pere, eneng palamnange neneko papto yabilba, wali tan,” aro ambatsiog.
48 Wene aro ambatsiogpa Yesusti kelenekoag yubu lelamogti, “Namangkel, Nanag wana palilamlamne neneri an wali nembaghel. Wana aingniro wapmendi pululam,” seog.
49 Eldi wene aro ambarelamog abeneko, Allah Yubu lerop ae saelba uropne ponekori aeag agha nimi nhon poghekne yaog. Poghekpa yaogti Yairus ponekoag ambarelamogti, “Nai, anmangkel loba tal. Ya'ag loba talbana, yubu ambatsiropne poneri hualul kombana, el ina karepto enero poa peheng kom,” aro Yairus ponekoag ambarog.
50 Wene aro Yairus poneko ambarog yubu Yesusti ka'ebaogti, Yesusti Yairus ponekoag ambarelamogti, “Andi, ‘Yaghe namangkel maneagha loba tal,’ aro log sembaheng kom. Ot nanag mikipne aro seneraglamnemenba, an mangkel wali talul,” aro Yesusti Yairus poneko ambarog.
51 Wene aro ambarogpa, Yesusap Yairus ponekoap nhon eldi aeag piekti, nimi wamek nimi tanekoag, “Nimi nhon babe Nanap wa'aukang kom,” aro irikahiog. Irikahiog aghana, ot elkabo Petrusap, Yohanesap, Yakobusap kelmeneko ili ilinap aghabog “Nhon wa'aukap,” aro ambatsiogti nhon wa'iek. 52 Wa'iekpa nimi ni wamekne kel meneko loba taogne neneko sembe engelamekti, wana ikindi sindam saramag oldalamek. Aghana Yesusti lelamogti, “Engkaheng kom. Kelmene tebal kom. Elna mana agha malamla,” seog.
53 Wene seog aghana, nimi tanekori, “Kel meneko sik ya'ag tebaogpa, sa'a sembe ‘Mana agha malamla,’ sel?” aro og solamek. 54 Og solamekpa Yesusti kelmenekori saeag saelbamogti, “Namangkel puke!” seog. 55 “Namangkel puke!” seog abeneko pere kelmenekori nen hain eplobogpa, puka pulingkiog. Pukogpa Yesusti, “Kwaneng tatmunba telul,” aro ambatsiog. 56 Kelmeneko kamag taogne sembe ili ilindi “Yaghe! Mane agha ual,” aro lo'om serek aghana, Yesusti ambarelamsiogti, “Yog nimi nhonag babe, ‘Nen kamag nembal,’ aro ambatsiseng kom,” aro irikahiog.