Romange yin saleropnang sikindori arukna Yesusti wali nembaogha
(Matius 8:5-13; Yohanes 4:43-54)
7
1 Yesus nimi maikno taneko whingag wene aro ambatsiogti, Yesus as Kapernaum wa'iog. 2 As Kapernaum pioghag aneko yin saleropnang sikindo Romange eldi arukna o'ona sirikne naikna naiklamog. Naikna naiklamogti, loba tanep saog wamog. 3 Romange yin saleropnang sikindo ponekori Yesus sembe yubu ka'ebaogti, nubunang Yahudi nimi sembe wenehiropnang etpare poglamsiogti, “Yesusag pimundi elag mololapmunba, yaleri nari arukna wali nembalul,” aro pogsiog. 4-5 Sin pogsiog nimi taneko Yesusag piekti, wanaag agha sarikto-sarikto ambarelamekti, “Nai, yin salerop nang sikindo ponekori nu Yahudi nimi sembe o'ona sembamsildi, nuri asag Allah omekto yubu lerop ae sobatsio. Ane sembe eldi, ‘Yepnoho,’ aro molona mololangkelba, yepmenne sunsunum sembamap,” aro ambarek.6 Wene aro ambarekpa, Yesusap nhon piek. Palamekti Yesus ae enekoag wa'al pinep peramag palamekpa, yin salerop nang sikindo ponekori elkabo Yesus yalamogha whingag pogsiog. Pogsiogpa piekti ambarelamekti, “Eldi ambarelamsildi yubu piplangena, ‘Na sisa Yahudi komne pone wamna. Na aeag An mandu aro opkeleagti, an nimi nubunge wa'alanenne olog sunsunum komdi na nimi ologneri aeag yaheng kom. 7-8 Wene aro seneragnari, na babe An nimi nubunge whingag yanenge sunsunum kom. Ane sembe Andi yubuag agha “Arukna wali talul,” semenba wali talul. Nimi mikipneri yubu leplenge sik uro yabinepne sembe na el wamna. Nu yin saleropnang nuniri yubu leroba nari babe ka'eamnari, saelba ulamna. Nari yubu lemnea babe na umag nimiri ka'elamangdi, saelba ulamukang. Nari nimi nhonag, “Pululam” sen tanena, el palamla. Nari orangeag babe lelamnari, “Yalulam” sen tanena yalamla. Nari aruknaag “Undo Unualulam,” sen tanena, nari “Ualulam,” senne neneko ulamla. Ane sembe an nimi nubunge wamlamdi, mo yubu lepmenba, wali talul,’ seldi yubu pipla,” aro Yesusag ambarek.
9 “Mo yubu lepmenba, wali talul,” aro ambarekne Yesusti ka'ebaogti, lo'om seog. Lo'om seogti tangabom agha nimi maikno Elag neleplamek nimiag yubu lelamogti, “Yubu lemnunne ene ka'eamsut. Nimi eneri Nanag sik tapto ‘Mikipne,’ aro wana paliro seneraglamnel. Eldi nanag sikne aro seneraglamnelne saog uro Israel nimiri Nanag undo seneragtop nimi nhon babe imna kom,” aro wene seog.
10 Yin saleropne ponekori pogsiog nimi taneko samoro aeag piekpa, eldi arukna aneko wali taogpa ibek.
Yesusti as Nain yauog keldi me kamag nembaogha
11 Ik ko'o maikno wamna komag anekoa Yesus as Nain piog. Yesus eldi yubu ka'ero neleptop nimiap Elag nimi maikno mo kemero neleplamek nimiap nhon piek. 12 Yesus palamogha as leka kanero solingkirop ina siramag anam sekel wa'in komag, nimiri nimi teptoba keyapto asag agha poa lambaek. Tebaog meneko ilinna yauog kel wamog pog, ot me nhonogne neneko tebahiog. Tebahiogpa as eneko nimi maiknori wana o'ona paibato ilinap nhon poa palamek. 13 Nu Saelba Uhiropne Yesusti keleneko ibogti, wanaag agha yareag sembaogti kelenekoag, “Nanin, engkaheng kom,” seog.
14 Wene seogti Yesus nimi teptoba kal morea keyapto poa yalameka anekoag sae sael pibogpa, nimi keyapto poa yalamek nang pabom seekpa, Yesusti teptop kabuni enekoag yubu lelamogti, “Meo, Nari anag lelamnange ‘Puke' sen,” seog.
15 Wene seogpa, kabuni tebaogne aneko puka pukogti, yubu lelamog. Puka pukogti yubu lelamogpa, kabuni eneko Yesusti sae kiliro ilin saeag samoro tarog. 16 Nimi ni wamek nimi tanekori ibekti, logti Allah omeklamek. Log uahiogpa sindi Allah omeklamekti lelameknena, “Allah silimu yubu tiptopne nubunge nu anabiag wene lag tal! Nuni Allah wene yingkina ‘Nari mabo yepsinun,’ aro kemelamsil,” aro Allah omeklamek. 17 Sindi Yesus sembe yubu lelamekne nene mog so'o Yudea wamek nimiag niag sabo tangto ni kanero wamek so'oag babe piogpa nubu taog.
Yohanes mag sinag pelengelamsiogne ponekori, “Yesusag hail pululom,” aro nimi pogsiogha
(Matius 11:2-19)
18 Yohanes mag sinag pelengelamsiogne ponekoag neleptop nangdi Yesusti nia uaogne sembe Yohanesag ambarek. Ambarekpa Yohanesti ilipsabo phende yopsiogti, 19 nu Saelba Uhiropne Yesusag poglamsiogti, “A'un Yesusag pirumundi haibaruromnena, ‘Anna Allahri samenag, “Yalul,” aro salag pibogne neneko agha yaom to, amik nimi nhon yogne yalulne tibogto wamukap to?’ aro hail pururom,” aro pogsiog. 20 Sin pogsiogne abeneko Yesusag pirekti hailamdekti, “Yohanes nimi maghag pelengelamsiogne ponekori Annag, ‘Hail pururom,’ aro pogsilba Annag yanam. ‘Hail pururom,’ selnena, Anna Allahri samenag ‘Amik pognenge nhon yalul,’ aro salag lero pibogne neneko an sembe lebog to, nimi nhon amik yalulne tibogto wamukap to?” aro haibarek.
21 Yohanesti pogsiognang abeneko Yesusag yarekti haibarek sum enena, Yesusti nimi naikna nhon saog nhon saog nimi wali nenelamsiogti, phia yonge nimi kulomag ua ulamsiogne yag lanalamsiogti, nimi haing uropne kweleklamsiog sum eneko yarekti haibarek.
22 Wene aro haibarekne sembe Yesusti sinag samoro, “A'un samoro Yohanesag purumundi, a'undi haingdi iptomneap, aori ka'ebaromneap ambatururom. Ambarel pururomnena, ‘Nimi haing uropne kwelekto ililamang. Yan mali nimi yan ingiro palamang. Nimi kon tena tero pololamsilne kut talamang. Nimi ao lepsirop nimi ao kuplamsil. Nimi teptop nimi kamag talamang. Neapna Allah Yubu Walinge nimi sae agha orog nimiag ambatto palamla. 23 Nimirina, “Allahri wepto poghogne ponekori undo unualuldiog,” sembanep aghana, nimi etneri na Yesusti ulamnange sembe wa'epnele kom tanena, nimi eneko wana yeng uro wali wamlul,’ sel aro ambarel pururom,” aro ambatsiog.
24 Yohanesti pogsiog nimi sin phende abeneko samoro pirekpa, Yesusti alniro nimi maikno winiro polorop nimi tanekoag Yohanes sembe ambarelamsiogti, “A'undi ‘Sa'a ibukap,’ aro aldesag eneko pilum? Phoanari pongoroba ko nhon phoalamlaba, tara sip pang, tara sip yang ulamlange ‘Ibukap,’ aro pilum te? 25 A'un pilumne, ‘Sa'a ibukap,’ aro pilum? ‘Ag walinge agha enekto amog nimi ibukap,’ aro pilum te? Ag walinge wangaltorop nimi sindi kwema orogti, wanaag topsene senenne torop nimi tupnang agha wamang. Sin ot yubu sia leropne ae nubungeag ua urop. 26 Ane sembe a'un pilumne ‘Sa'a ibukap,’ aro pilum? ‘Allah silimu yubu tiptopne ibukap,’ aro pilum te? ‘Allah silimu yubu tiptopne ibukap' aro pilum pagha tanena, otsik Nari babe a'unag lelamnange Allah silimu yubu tiptopne wamla. Ot Yohanes ponekona, el Allah silimu yubu tiptopnang ni anabiag agha el mo paliag uropne wamla.
27 Yohanes sembe Allahri silimu yubu tiptop nimi nhondi mome toro pibogne ane,
‘Nari yubu ambatsirop nimi nhon an whingag pogneba,
“Eldi ina an amik pinepne sembe yarelamlul,” aro pognun,’
aro mome toro pairopne wamla.
28 Sik uro ambarelamsin. Mog so'o eneag mangaptaek nimi ni agha Yohanes ponekori yubu ambatto tongolamlange nubu sirikti, el saogne nhon wamla kom. Aghana Allahri amik sum nimi saelba ulamsile tanena, saelba ulamsile nimi anabiag agha nimiri ‘Nimi ene olog sirikne,’ sembahinep aghana, Yohanes olog el umag wamleba, Allahri Saelba Ulamsile nimi eneko paliag wamukang,” aro Yesusti ambatsiog.
29 Wene aro Yesusti Yohanes sembe ambatsiog yubu ene nimi ni wamek nimi tanekori ka'ebaek. Ni ka'ebaek nimi tanekona, Yohanesti samenag ambatsiogne, “A'undi wanaag malia seneragto ulamlomne lipsimundi, Allahri senenne sunsunum uro seneragto ulapmunba, maghag pelengkipsinun,” aro ambatsiogne sunsunum uro uaek. Sin Roma nimi sembe kal ma'al poloro toropnangdi babe Yohanesti ambatsiogne sunsunum uro ulamek ane sembe, Allah yubu ka'elamek nimi ni tanekori, “Sikne,” aro seneraglamek. 30 Aghana sin Farisi nimiap Musa yubu amohirop nimiapti, “Nuri malia seneragto ulamapne libukap kom,” senenne agha Yohanesti yubu sa'elban koma Allahri “Ulamukang” senenne wa'eplamekpa, Yohanesti sin samenag maghag pelengkipsiog kom.
31 Nen Yesusti yubu lelamogti, “Nimi wene ko'o wamang nimi tane welaro saog nimi wamang? Nari sunumna huropneag agha sumbahinun? 32 Sin olog mabo nimiri tol toro poloro longorobag puka urop mabo saog wamang. Wharo puklamangdi yoboldalamangdi,
‘Nu ma'i lom toman phoro sunukna sunuklamap aghana,
a'un sepna seplom kom.
Nu peasina lelamap aghana,
engena engkalom kom,’
aro waldalamlonga saog wamang.
33 Mabori ulamlonga saog wamlom alamnange tam nene sembe. Yohanes maghag pelengelamsionge poneko yaogti, kwanengap, anggur wana lolterop mag yongeap maikno uro ten koma wamogpa, a'un wene ko'o wamlom nimi tanekori, ‘Phia yonge el kulomag wamlaba ulamla,’ aro wharo walamom. 34 Na Yesus imag agha mog so'oag tahinge kwaneng mag tena yahi aghana, a'undi yubu lelamlomdi, ‘Kembahut! Elna kolaglinne wamlari, mag yongeri wana toropne wamla. Elna Roma nimi sembe kal ma'al poloro toropnangap, mali-malia urop nimiap sikinkae wamla,’ aro wharo walamlom. 35 Wene nu sembe wharo walamlom aghana, Allahri senenne saelba urop nimi niri ul palamangne nimiri kembiag agha el tanepnena, ‘Allah wana hektopneri senenne sikne aghabog wamla,’ aro nimiri el tanep,” aro Yesusti ambatsiog.
Malia urop keldi Yesus kibogha
36 Farisinge nhon sina Simon ponekori Yesusag, “Kwaneng nari aeag tununam,” aro yobog. Wene aro yobogpa, Yesus Simondi aeag wa'ina, “Kwaneng tununam,” aro pulingkil piog. 37 As enekoag kelabo nhon, nimiri el sembe, “Mali-malia aghabog urop kel,” senerop kel nhon wamog. Kelenekori ka'elamogpa, “Yesus poneko Farisinge Simondi aeag kwaneng telamla,” aro wene alameka kaebaog. Ka'ebaogti, kel enekori nongag pelagtop mag song walinge payaog. Nongag pelagtop mag song walinge nene kirik agha sunurop ma'i kamna alikinag uropne nhonag ikto tobongkibekpa, eldi saeag taogpa payaog. 38 Payingkina Yesus wailag sip yanag sekelingkina engelamogti, hail mag agha Yesusti yanag alniro pelaglamogti engelamog. Yesusti yanag hail mag agha pelaghongkia kel enekori usog hongdi Yesus yan lupto meklamog. Yan lupto meklamogti, kel enekori Yesus yan togtoa kiplamogti, mag song walinge neneko agha liklamog. 39 Simon Farisinge Yesusag, “Kwaneng nari aeag tununam,” aro yobogne ponekori kemelamog. Kemelamogpa kelenekori Yesusag unuaogne sembe Simondi wanaag seneraglamogti, “Nimi pone Allah silimu yubu tiptopne wamso tanena, el yan salelamla kel ene sembe elwamsongena, ‘Malinge maikno urop kel,’ aro eltanep,” aro wanaag yubu lelamog.
40 Wene aro wanaag yubu lelamogpa, Yesusti Farisinge ponekoag, “Simon, Nari yubu nhon ambatkunun,” seogpa Simon ponekori, “Nai, yubu amolamsilamne! Andi ambatnemenne ka'ebanun,” seog.
41 Wene seogpa Yesusti sunumna nhonag tol pina ambarelamogti, “Nimi phenderi tup nimi nhonag a'ero-a'ero pirekti mololamdekti, ‘Kamna kaptoba kirik wana solomne tatnemenba, amik ni lumbaneri tatkenun,’ aro molbarek. Nhonna, ‘Teng supna tarabare tatnemenba ni lumbanun,’ aro molbaogpa nhonna, ‘Teng phende agha tatnemenba ni lumbanun,’ aro molbaog. Tup nimi enekori sindi molona sunsunum uro tatsiog. 42 Tatsiog aghana, sin ni phende abenekori sindi salag lero pibek sunsunum uro kamna kaptoba kirik wana solomne nene lumbanep kom. Lumbanep kom ane sembe sin phende abenekori lemnepti, ‘Nu saeag orogti andinge kareploroba lumbaghanep kom,’ serekne agha tupne ponekori ambarelamsiogti, ‘Naringe a'undi sae kareploroba nen samoro lumbanululom kom. Nari mo tatsisi,’ seog. Wene seogpa, sin phende abeneko agha tupne poneko sembe ‘Naba Naniong,’ aro o'ona sembanep aghana, nimi nelari wanaag agha o'ona maikno sembalul?” aro Yesusti hairo ambarog.
43 Wene aro haibaogpa Farisinge Simon ponekori, “Nari seneropnena, kamna nubunge saeag agha lumbanep komne ponekori tupne poneko sembe, ‘Nari kamna kom nembal,’ aro o'ona maikno sembalul,” seog.
Wene seogpa Yesusti, “Andi leplamne otsik leplam,” seog.
44 Wene seogti Yesusti kelenekoag kembi agha Simonag yubu lelamogti, “Andi kelene iplam te? Na andi aeag yan aghana, andi nari yan mag a'elenne wero paiamlam kom. Ot keleneri nari yan eldi hail magti nari yan pelagto a'elbaldi, eldi usog hongdi lupto mekla. 45 Na usa yanba andi somoro togtoa kipnelam kom aghana, keleneri papna koma nari yan togtoa kiplamla paghabog tal. 46 Andi Nari usoghag kal zaitun wana lolterop mag iknenne ‘Kipnun' aro weamlam kom aghana, keleneri kamna alikinag urop mag song walinge Nari yanag ikto pelagnel. 47 Ane sembe sik uro ambarelangken. Keleneri malinge ulamonge maikno sirik aghana, kelenekori nanag o'ona senero ulamlange kembiag agha, ‘Eldi malia maikno uroba tam kom tal,’ aro el wamna. Aghana nimi nhondi malia olog uro uropne Allahri orog nenerop tanena, nimi enekori olog uro o'ona senehirop,” seog.
48 Wene seogti Yesusti kelenekoag yubu lelamogti, “Andi mali-malia ulamlamne tam kom tal,” seog.
49 Wene seogpa, Yesusap kwaneng nhon nikag telamek nimi tanekori sin mamun alniro leldalamekti, “Allah Elmori nimiri malia uroba kom nembanep. Nimi ene ‘Etne wamna,’ sembaldi kelenekoag, ‘Andi malia uropne ni kom nemban,’ sel,” aro wene alamek.
50 Aghana Yesusti kelenekoag yubu lelamogti, “Andi Nanag seneraglamnelamneri andi malia uropneag agha wali nembangkel. Ane sembe an wana aingniro pululam,” seog.