Allah yubu lero tek-tek papto urop sum nimiri uanepne sembe Yesusti o'oro tibin nembaogha
(Matius 12:1-8; Markus 2:23-28)
6
1 Olog wameka, Yahudi nimiri tektek papto Allah yubu lerop sum Sabat sum taog. Sabat sumeneko Yesusap eldi yubu ka'ero neleptopnangap palamekti, kwaneng roti sumbaneba gandum awe wero meroba nubungeag ina palamek. Palamek abeneko pere, Yesus eldi yubu ka'ero neleptopnangdi gandum wana tagto lolobaekti saeri pebaghongkia teek. 2 Saeri pebaghongkia teekne Farisi nimi nhon-nhondi ipsiekti, yubu lelamekti, “Musari samenag mome tobognena, Allah yubu lerop sumeneko awe tomnep kom aro mome tobog. Sa'a sembe a'undi Musari yubu nene ka'eban koma gandum wana nene tagto tobom?” aro haibahiek.3 Wene aro haibahiekpa, Yesusti samoro ambarelamsiogti, “Nunisag nubunge Daud poneko samen elkaboap kwaneng yo wamekti, Daudti uaogne sembe mome toropneag agha olog kemelamlom kom, te? 4 Nunisag Daud elkaboap kwaneng yo wamekne sembe Daud poneko Allahri Mem Ae enekoag wa'iogpa, kwaneng roti Allah sembe pibekne taneko nimiri Daud ponekoag tarogpa tobog. Kwaneng roti neneko toro teogti, Daudti elkaboag tipto tatsiogpa teek. Kwaneng roti teekne tanekona, Musari samenag mome tobogne sunsunum uro, ‘Ot memnang Allah sembe pairopnangdi aghabog telamukang,’ seog,” aro samoro ambatsiog.
5 Wene seogti, Yesusti nen tipto yubu lelamogti, “Nimiri Sabat sum uanepne neneko na imag agha mog so'oag nimi tahingeri salelamnari o'obanep,” aro ambatsiog.
Yesusti sae tara malinge wali nembaogha
(Matius 12:9-14; Markus 3:1-6)
6 Olog wamekpa, Allah yubu lerop sum taogpa, Yesus nen Yahudi nimi poloro winirop ae Allah yubu lerop aeag wa'iog. Wa'ina Allah yubu ambarelamsiogpa, nimi nhon sae sirik sae malinge ae lomag wamog. 7 Wamogpa, Farisi nimiap Musari yubu amohirop nangap ae lom neneag wamek. Sin tanekori, “Yesusag tam pipsebe,” aro Yesusti ulamogne keme nenelamek. Sin Farisi nimi seneraglamekti, “Tektek papto urop sum Sabat sum wamap aghana, Yesusti sumene nimi nene wali nembalul to, kom to?” aro Yesus kemelamek. 8 Ot Yesusti sindi seneraglamekne sembe el taog. Ane sembe Eldi nimi sae tara mali nimi enekoag yubu lelamogti, “Sekmendi nimi ni whingag ane sekelamlulam,” seog. Wene seogpa nimi eneko sekogti, whingag aneko sekel piog. 9 Sekel piogpa, Yesusti ambarelamsiogti, “A'unag olog haibahinun. Sabat sum wamapnena, Musari samenag aruktop yubu mome tobogha sunsunum uro nimiri huanep? Nimiri walia uanep to, malia uanep to? Sabat sumeneko tek-tek papto ulamapnena, nimi wali nembahinep to, nimi ya'ag opsinep to?” aro hairo ambatsiog.
10 Wene aro ambatsiogti, Yesus ni kanero kembahiogti, Yesusti nimi sae tara mali nimi enekoag yubu lelamogti, “Sae nginikae,” seog. Seogpa, poneko sae nginikaogpa, sae wali taog. 11 Aghana Musari yubu amohiropnangap Farisi nimi tanekoap, sin yo lelem uahiog. Yo uahiogpa, sindi “Yesusag huaukap?” aro yubu lel palamek.
Yesusti nimi aobarenang wepto pogsiogha
(Matius 10:1-4; Markus 3:13-19)
12 Wameka ik nhon sum Yesus “Allahag molona molbanun,” aro yim kongtenag aneko yingkiog. Aneko yingkiogti Allahag molona mololamogha ae inipna nhon ningki taog. 13 Ae inipna nhon ningki mololamogha kwelekaogpa, Eldi yubu ka'ero neleptop nimi yopsiogti, sin wamekne anabiag agha ao bare nang wepsiog. Eldi ao bare wepsiog nang eneko sembe, “Nari wepto pogsiropnang wamukang,” aro sekitsiog. 14 Sin wepto pogsirop nangna sina,
Simon, Yesusti si Petrus aro engeropne ponekoap,
Simon ilipsae Andreasap,
Yakobusap,
Yohanesap,
Filipusap,
Bartolomeusap,
15 Matiusap,
Tomasap,
Alfius elme Yakobusap,
Simon, el si nhon mo sekukap aro yin saleropne ponekoap,
16 Yakobus elme Yudasapna
Yudas, eldi amik sum Yesus pan khebaogne nenekoap
Yesusti wepsiog.
Yesusti yubu ambatto naiktop nimi maikno wali nenelamsiogha
(Matius 4:23-25)
17 Yesus yim kongtenag anekoa sin wepsiog nangap kuluka yingkiekti, puluag aneko wamek. Aneko wamekpa, nimi maikno Yesusti yubu ka'ero neleplamek nimi wamekpa, nimi maikno as tala-tala Yudea mog so'oag wamek nimiap, as Yerusalema yingkirop nimiap babe wamek. Wamekpa, as soro kalurop as mag longorop mag nubunge abolag wamek as Tirusap as Sidonap nimi babe yalamekti wamek. 18 Sin yalamek nena, “Yesusti yubu lelamlenge ka'ebabeba, nu nikna niklamapne wali nembahailul,” aro yalamek. Sinag phia yonge kulomag ulamsiog nimi babe yalamekpa, Yesusti wali nenelamsiog. 19 Yesusag mikipne ulamogne nenekori nimi wali nenelamsiog, ane sembe nimi ni tanekori, “Yesusag po'obaberi, wali wamukap,” aro ulamek.
“Nimi nenne awi sembaikpa, nenne seklebaukang,” aro Yesusti ambatsiogha
(Matius 5:1-12)
20 Yesusti eldi yubu ka'ero neleptop nimi kembahiogti, yubu lelamogti,
“A'un teko uahirop nimi Allahri a'un sembe yubu sia lero saelbamsilul,
ane sembe awi uro wali wamlulom.
21 A'un wene kwaneng yo uro wamlom nimi amik mon og uro tero wamlulom,
ane sembe awi uro wali wamlulom.
A'un wene engero wamlom nimi amik og soro wamlulom,
ane sembe awi uro wali wamlulom.
22 Na Imag agha mog so'oag nimi tahinge yubu ka'ero neleplamnelomne sembe,
nimiri a'unag karong aro ulamsiik tanena
awi uro wali wamlulom.
A'undi nanag neleplamnelomne sembe nimiri sin anabiag agha yag lambahiikti, san tiliplamsiikti, ‘An si mali,’ aro wa'eplamsiik tanena
awi uro wali wamlulom.
23 Samenag babe sikiniyabori Allah silimu yubu tiptop nimi tanekoag malia unulamsiek.
Ane sembe a'undi nari yubu ka'ero neleplamnelomne sembe nimiri a'unag babe malia ulamsiik sumeneko,
awi seneptamundi, ‘Nuringe kamna imag wamlange nubu uro tatsilul,’ aro yeng uro lolo'oplamlulom.
24 Aghana a'un wene tup uro wamlom nimi teko semban koma a'undi saeag wana yeng neneroba wamla,
ane sembe amik nen tomna koma seklero wamlulom.
25 A'un wene kwaneng mon og uro tero wamlom nimi
amik kwaneng yo uro seklero wamlulom.
A'un wene og soro si kerero wamlom nimi
amik a'un mantuk-tuka engero seklero wamlulom.
26 Nimi niri a'un sembe ot omektop yubu agha a'unag kiplamsiik tanena yae uptangkamlulom.
Sindi a'un kiplamsiik nimina, samenag babe sikinisagyabori orolena lerop nimi omekto kiplamsiek.
Orolena lerop nimi kiplamsiek nimina, ‘Allah silimu yubu tiptop nimi wamapti ambarelamsiap,’ aro ambarelamsiekpa,
sikinisagyabo tanekori sin orolena lerop nimi babe omeklamsiek.
Nimiri orolena lerop nimi omekto kiplamsiek aghana, Allahri undop nimi sembe ‘Nari yubu sikne ambarelamsiang kom,’ aro seklenne pelengerop.
Ane sembe nimi niri a'un sembe ot omektop yubu agha kiplamsiik tanena,
Allahri a'unag babe seklenne pelengahileba, seklelamlulom,”
aro Yesusti ambatsiog.
“A'undi aisa nimi sembe o'ona senelamsululom,” aro Yesusti ambatsiogha
(Matius 5:38-48)
27 Wene aro ambatsiogti, Yesusti nen tipto yubu lelamogti, “Aghana wene ane Nari yubu lelamnange ka'ebamnelom nimi ene, Nari yubu ene a'unag palilamna. A'undi aisa nimi sembe o'ona senero yeplamsimundi, a'unag karong senehirop nimiag walia ulamsululom. 28 Nimiri a'unag ‘Seklebale,’ aro yo'olamsiikpa, sinag tangoro, ‘Wali wamlulom,’ aro ulamsululom. Nimiri a'unag yoaba ulamsiik nimi sembe Allahag, ‘Sin yepsululam,’ aro molona molbarelamsululom. 29 Nimiri abom tara sip opkele tanena, a'undi whing ebom agha, ‘Tara sip babe omneleba, lunuro omnun kom,’ aro ulamlulam. Nimiri anenge ag siliro pelengen ag pelepto tople tanena, ‘Ag nongagne babe toro aleag,’ aro irikaheng kom. 30 Nimi niri anag mololangkeikpa tatsululam. Nimiri anengeaba tolamik tanena, andi nen moloro toro aheng kom. 31 A'undi, ‘Nimiri nanag wali uaneheng,’ senelamlomne sunsunum uro a'undina, nimi orangeag walia ulamsululom.
32 A'undina, ‘Ot na sembe o'ona senehirop nimi aghabog samoro o'ona senelamsinun,’ aro ulapmun tanena, wali-walia kamna tatsineba a'unag loloro tahilul kom. Malia urop nimiri babe sindam nimi sembe o'ona senehirop nimi samoro o'ona senelamsiang. 33 A'undina, ‘Ot nanag walia ulamneang nimi sembe walia ulamsinun,’ aro ulapmun tanena, wali-walia kamna tatsiroba a'unag loloro tahilul kom. Malia urop nimiri babe sindam nimi sembe walia uhirop nimiag samoro walia ulamsiang. 34 A'undina, ‘Kal ma'al nimi eneri nari sae paliltoroba hae sap samoro tatneluldiog,’ aro tarelamsumun tanena, wali-walia kamna tatsiroba a'unag loloro tahilul kom. Nimi malia urop nimiri babe ora nimi malia urop nimiag, ‘Tarelangkenne nene ni lunuro nen tatnululam,’ aro sesog sembe tarelamsiang. 35 Aghana a'undi undo seneragna koma, a'un aisa nenehirop nimi o'ona senelamsimundi, sinag walia ulamsululom. Sin kwema wamsileba sindi a'unag, ‘Na kwema wamnelag yepnemenba, amik nen lumbahinun,’ aro mololamsiikpa a'undi, ‘Nen lunuro tatnelul to, kom to?’ aro seneragna koma tarelamsululom. Undo unulapmun tanena, a'undinge kamna tatsiroba nubunge a'unag loloro talul. Allah Paliag Sirik wamlange ponekona, yoaba urop nimiap, nimiri wanaag, ‘Wali tatnelam,’ semban koma urop nimiap babe, sin nimi palu ni phende abeneko Allahri walia ulamsil. Ane sembe Allahri walia ulamsil saog uro ulamsimun tanena, Allah El mabo taptopne wapmundi, sunsunum uro ulamlulom. 36 A'uni Allah wana waliri yareag senero ulamsil saog uro a'undi babe nimi sembe yareag senehiro ulamsululom,” aro ambatsiog.
“Nimiag tam pimna koma yareag senelamsilulom,” aro Yesusti ambatsiogha
(Matius 7:1-5)
37 A'undi ora nimi sembe tam karebi agha, ‘El mali nimiri malia ual,’ aro nimiag tam pipmun kom tanena, a'un sembe babe Allahri tam karebi agha, ‘Mali ual,’ aro tam pimna koma wamnep. Nimiri malia uaikpa, tam orog nembi agha wailag piplulom andarina, a'undi malia uamunne babe tam kom tanep. 38 A'undi nimiag tatsimun tanena, Allahri babe a'unag tatsilul. Nubu uro sumbi agha a'un tatsileba toplulomnena, to'op-to'op agha liro siriro a'un ilag la'iniropne a'un sembe wea uropne tatsilul. A'undi nimiag sae sumbi agha tatsimunne sunsunum uro Allahri babe sae sumbi agha a'un babe tatsilul,” aro ambatsiog.
39 Wene aro ambatsiogti, Yesusti sunumna nhon tolpina ambatsiognena ane. “Haing uropne nhondi elkae haing uropne nhon salero poa pinep te? El poa palamna tanena sin ni phende abeneko selenga eba tinil pinep. 40 Nimi nhonna, ‘El tahane,’ aro ka'eamna tanena, anam el tan komag yubu amoropne phelekto paliag tanep kom. Ot ‘El tahane,’ senerop nimi eneko ni el tan taneogna, elag yubu amorop nimi saog talul.
41 Sa'a sembe a'un kabori haing kal a'esengkea ua ulamsilne, ‘Imnun,’ aro elamsilom aghana, a'undi haingag kal la'asi optenaba ulamsilne ilildalamlom kom? 42 A'undi a'un kaboag lelamlomdi, ‘Kal a'asengkea andi haingag wangkekelne toro la'imbitkenundi,’ alamlom aghana, a'undam nimiri haingag kal la'asi optenaba ulamsilne babe imnep kom. Undop agha welaro, ‘Andi haingag wangkekelne toro la'imbitkenun,’ aro lelamlom? A'undi nimi haing kunuhiro ulamlom! A'undam nimiri haingag samen kal la'asi optenaba ulamsilne toro la'iniptamundiogna, a'undi a'un kabori haingag kal a'asengkea ua ulamsilne tibin wali uro ipsimundi, toro la'inilamsululom,” aro ambatsiog.
Kal yo'oap kal wanaap sembe yubu likipto sunumna ambatsiogha
(Matius 7:16-20; 12:33-35)
43 Yesusti nen tipto ambarelamsiogti, “Kal wali uro pongorop kaldi kal wana malinge maurop kom. Ane saog uro kal iklerero pongorop kaldi wana walinge maurop kom. 44 Nimiri kal sembe eltanepnena, kal wana mauropne kembi agha, ‘Kal ene kal nene saogne wamla,’ aro eltanep. Nimiri ‘Kal ara wana to, anggur wana to, takto tenun,’ aro ulamlonga werengkel alog kalag agha takto tenep kom. 45 Nimi wana wali nimiri walinge aghabog siriro la'inilamlangeag agha walinge lero ulamlul. Nimi yo nimi yonge aghabog wanaag to'opto wamlangeag agha yoaba malinge lero ulamlul. Nimiri pamag agha lelamlangena, nimiri wanaag to'opto seneragnangeag agha yubu la'anero lelamla,” aro ambatsiog.
Ae soropnang phende nhonna wana hektopneap, nhonna limituk uropneap sembe Yesusti ambatsiogha
(Matius 7:24-27)
46 Yesusti tipto ambarelamsiogti, “Sa'a sembe a'undi nanag ‘Nuniong! Nu saelbamsilamne!’ aro ambarelamnelom pog, nari yubu sunsunum uro ulamlom kom? 47 Nimi Nanag yalamleri, Nari yubu lelamnange ka'ero saelba ul palamle tanena, el welaro saog nimi wamlange sembe sunumna nhon ambatsinun. 48 Nimi nhon eldi, ‘Ae nhon sobanun,’ aro so'o walilamnari, so'o punag walil wa'ina kirik anekoag aeog pubu pairo sorop. Walil wa'ina soropba mag telamnari mag wenero ae eneko tupnep aghana, aeog so'oag walil wa'ina kirikag pairo sobanepne nenekori, ae eneko lebe aro tupnep kom. 49 Aghana nimi nhondi Nari yubu lelamnange ka'eban aghana, eldi salero ul palamle kom tanena, nimi eneko ot kirik yangkan koma salik-malik ae soropne saog wamla. Mag wenelamnari ae enekoag siplamna tanena, ae eneko tuplamnari, loba tanep,” aro ambatsiog.