Yohanes
Ponekori Mome Toro Pibogha Wilindipne
1
Na Allah elmabo wenehiropne wamnangeri yubu ene an Gayus sembe mome toro palilamna.
Nangkae,
an nari wanaagne wamlamne,
anap nanapti sikne aro seneraglamnamne sunsunum uro an o'ona senelangken.
2 Nangkae wanaagne,
andi wana seneragna wali wamla saog uro nari an sembe Allahag molbarelangken nena,
“Nia mangkina uro yabalamle abeneko pere ot walinge agha anag tagheleba,
an nong naikna koma mikip wamlulam,”
aro molbarelangken.
3-4 Wene aro lemnange tam nene sembe.
Orange babe uro yabohoba,
yeng uanoho aghana,
nimirina nari mabo sembe,
“Sikne salelamangdi,
sunsunum uro ul palamang,”
aro yubu ambattoba nari ka'eban tanena,
yeng maikno uanepne neneko mo paliagne wamla.
Ane sembe nungkabo Yesusag wana palirop nimi etpare tanekori an sembe wali aro lelamongdi,
“Sikne salelamlari,
porogne sop-sop ul palamla,”
aro ambarelaneong.
Ambarelaneong yubu ka'ebanori,
yeng maikno uaneo.
5 Naba nangkae wanaagne,
nungkabo Yesusag wana palirop nimi yeplamsilamne andi Yesusag wana paliropneag agha ul palamlam.
Nungkabo anag yaong sum andi sin ekon nimi yaong aghana,
wali yepsiom.
6 Andi o'ona senelamsiomdi,
sinag wali uaomne sembe sin nimi tanekori wali aro lelamongdi,
Yesusag wana paliro winip tangtop nimi whingag ambatsiong.
Nungkabo nen anag yahengpa,
andi Allahag tatnepne sunsunum uro sin yepsisomdi,
“Wali tipto pululom,”
aro kipsisom tanena,
“Nangkae an wali yepsilam,”
sembahane.
7 “Yepsisom,”
aro ambatken nena,
sin nimi taneko,
“Kristus si nubu talul,”
aro lambaongdi,
ambatto tongolamsiong.
Ambatto tongolamsiongag,
Allah ekon nimi tala-tala wamang nimiri sin yepsiong kom aghana,
ambatto tongolamsiong.
8 Ane sembe sin sik yubu ambatto tongolamsiong nimi sembe nuri ulamnep nena,
“Awe nikne tobukap,”
aro sin kipsinepneog wamla andarina,
sinap sae tiptangto sik yubu ambatsiropne ul palamukap.
9 Samenag nari a'un Yesusag wana paliro winip tangtop nimi sembe mome toro pimno.
A'un sembe mome toro pimno aghana,
Diotrefes ponekori eldamne sembe,
“Whingagne tahane,”
senelamlari nari yubu saelban koma ka'ebao kom.
10 Ane sembe,
na amik yanep tanena,
eldi nu sembe san tilipto lolon yubu kamolange lelamlange sembe ekon tanep komdi wembanun.
Eldi nu sembe mo yubu toraplamsil kom aghana,
nungkabo Yesusag wana palirop nimi elag yingkirop nimi sembe Diotrefes ponekori sin babe kiplamsil kom.
Ora nimiri babe nungkabo yingkirop nimi taneko,
“Kipsisebe,”
aro uanep.
Aghana sin,
“Kipsisebe,”
senerop nimi babe Diotrefes ponekori iriklamsildi,
“Kipsimun tanena,
nu winip tangtobag ane wamlulom kom,”
aro yag lanalamsil.
11 Naba nangkae wanaagne!
Nimi etneri malia urop tanena,
nimi eneko Allah ekon nimi uropti,
malia urop.
Malia uropne neneko saog uro nelepto uaheng kom.
Aghana nimi etneri walia urop tanena,
Allahringe wamla ane sembe,
walia uropne saog uro nelepto ulamlulam.
12 Anena Demetrius poneko sembe nimi niri,
“Walia ulamlaba ililamap,”
aro maiplamang.
Demetrius ponekori sikne salero ul piropne babe lag nenel dalamla.
Nuri babe el sembe,
“Walia ulamla,”
aro maiplamap.
An el uro wamlam nena,
nuri el sembe wali aro lelamapne ot sikne agha lelamap.
13 Mome neneag yubu maikno anag ambatkehene semban aghana,
saeag agha mome toro palinne sunsunum kom senelamna.
14 “Elem uro haiptahaneme,”
senelamna ane sembe,
haiptanemeri yubu lemnunam.
15 Nangkae,
an wana aingniro wali wamlulam.
Nungkabo tane wamang nimiri an kiplangkeang.
Andi babe nungkabo an yaghag wamang nimi babe a'ero-a'ero si lepmendi kipsululam.
Abenda.