Yohanes
Ponekori Mome Toro Pibogha Phendepne
1
Na Allah elmabo wenehiropne wamnangeri yubu nene an Allahri wepkerop kel sembe babe,
andi kelmaboap maboap sembe babe mome toro palilamna.
Anap andi kelmabo meapti sikne aro seneraglamapne sunsunum uro nari a'un o'ona senelamsin.
Na mori kom aghana,
nimi etneri babe sikne neneko salero el wamang tanena,
sin niri anap andi kelmabo meap sembe babe o'ona senelamsiang.
2 O'ona senehiropne nenekona,
sikne neneko nunag sop-sop ua ulamlari,
ya'ag uro nunag ua ulamlulne sembe o'ona senelamsiap.
3 Sikne salelamapti,
nu mamun o'ona senel dalamapneag agha,
“Nuni Allahap Elme Yesus Kristusapti wana nunag yororo walia ulamsirikti,
yareag yeplamsirikpa,
wana aingniro wamukap,”
senelamnari a'unap nunap sembe molbarelamsin.
4 Samenag andi kelmabo meap ililamsinoba,
Nuni Allahri,
“Ulamlulom,”
aro nunag arukahiogne sunsunum uro sikne salelamongdi,
ul palamongne ipsinori,
yeng maikno ulamneo.
5 Wene nanin,
anag aruksirop yubu wendogne agha,
“Ulamlulom,”
aro mome toro palilamna kom.
Ot samenag agha salelamap yubu ambarelangkendi,
“Nu mamun o'ona senel dalamukap,”
aro ambarelamsin.
6 Nu mamun o'ona seneptangtop nena,
eldi nunag,
“Ulamlulom,”
aro aruksirop yubu sunsunum uro ul palamap.
Samenag agha nunag ambarelamsiogti,
“A'un mamun o'ona senel dalapmundi,
ul palamlulom,”
aro arukahiogpa,
ka'elamlomne sunsunum uro ul palamlulom.
7 Wene aro ambatken nena,
tam nene sembe.
Mog so'o eneag haing kunuro ekel ina ambatsirop nimi maiknori ambatto tongolamsiangdi,
“Yesus Kristus poneko mog so'oag nimi nongag taog kom,”
aro ambarelamsiang.
Nimi nhondi undo ambatsirop tanena,
nimi enekori haing kunuro ambatsiropti,
Kristusap aisa nenep tangtopne wamla.
8 A'undam nimi yae up tangkapmun andarina,
a'un sembe awe tol tongolamobonge neneko loba nembalulom kom.
Loba nemban koma yae up tangkapmun andarina,
kamna ni a'unag tanepne neneko toplulom.
9 Nimi etneri Kristusti ambatsirop yubu laplobi agha ina orangeag pirop tanena,
nimi eneko Allahap ma'ap tangtop kom.
Aghana nimi etneri Kristusti ambatsirop yubu saelbamla tanena,
nimi eneko Ili Allahap Allah Elmeap ma'ap tangtopne wamla.
10 Nimi nhondi a'unag yubu ambarel alamsile aghana,
Kristusti ambatsiog yubu sunsunum uro ambatto payalamsile kom tanena,
nimi eneko a'undi aeag poa yaheng kom.
Kristusti ambatsirop yubu toraptop nimi eneko a'unag yale tanena,
nimi enekoag,
“Nangkae,
wali yalam,”
aro sae yangkatseng kom.
11 Kristusti yubu toraptop nimi enekori malia ulamla ane sembe,
nimi etneri elag sae yangalamla tanena,
malia urop nimi enekoap sae tiptangto malia ulamdang.
12 Mome neneag yubu maikno a'unag ambatsisene semban aghana,
saeag agha mome toro palinne sunsunum kom senelamna.
Ot amik a'unag yaneba haiptaberi,
a'un whingag agha yubu lebukap.
Haiptahaberi yubu ambat tangto lepsebe andarina,
yeng maikno nuri wanaag loloptaho senelamna.
13 Nanin,
anipsa'ela babe Allahri weptop kel wamla.
Eldi kelmabo mabori babe an kiplangkeang.
Abenda.