“Nu Allahag wana palirop nimiri mog so'oag nimiri seneragto ul piropne luknulamap,” seogha
5
Nimi etneri Yesus sembe seneraglamlari,
“Allahri wepto poghogne Kristus wamla,”
aro elag wana palilamla tanena,
Allahag agha mangap tangtop nimi wamla.
Sunumnana,
ili elme wamnaba,
nimi etneri ili poneko o'ona sembamna tanena,
elme babe o'ona semba urop.
2 Ane saog uro Nuni Allah o'ona senelamapti nunag,
“Ulamlulom,”
aro arukahiog yubu sunsunum uro ulamapne pere,
eldi kelmabo me babe o'ona senelamsiap.
3 Nuri Allah o'ona senelamapne lag tangtop nena,
eldi nunag,
“Ulamlulom,”
aro arukahiog yubu sunsunum uro ulamap.a
Eldi nunag “Ulamlulom,”
aro arukahiog yubu enena ikin kom.
4 Ikin kom nena,
nimi etne Allahag agha mangap tangtop tanena,
mog so'oag nimiri seneragto ul piropne mombolag nenero luknulamangdi,
Allahri seneropne salero paliag nenelamang.
Nuri Allahag wana palilamapne pere agha mog so'oag nimiri seneragto ul piropne mombolag nenero luknulamapti,
Allahri senenne salero paliag nenelamap.
5 Mog so'oag nimiri seneragto ul piropne mombolag nenero luknulamangdi,
Allahri seneropne salero paliag nenelamang nimi tane et nimi sembe lemna?
Ot nimi etneri Yesusag,
“Sik uro Allah Elme wamla,”
aro wana palirop nimi sembe lemna.
Allah Elme sembe sikne aro lag phoro ambatsiroba
6 Yesus Kristus poneko yaog nena,
el maghag pelengkaogpa,
amik sum eneng lanaro tebaog.
El maghag pelengkaogne mo kom aghana,
Kristus poneko maghag pelengkaogpa,
amik eneng lanaro tebaog.
Tam nene sembe Allah Yameri sikne lag nenero ambarelamsil.
Allah Yame eneko ot sikne agha wamla.
7 Sikne lag nenero ambatsiroba nhonog kom aghana,
wilindi tanekona,b
8 Allah Yameri ambatsiropneap,
maghag pelengkaogneap,
eneng lanaro tebaogneap tam wilindi taneag agha phelekan koma tiptangtopti,
sikne aro el talamap.
9 Phelekan koma tibil dalamlange neneko sik sembanepneog wamla.
Sik sembanepneog wamlangena,
nu mog so'oag nimiri,
“Undo-undo uro yabioba imno,”
aro ambatsiropne sik senelamap.
Mog so'oag nimiri yubu leropne sik senelamap aghana,
Allah Eldamneri sikne lag nenero ambarelamsilne nubu phelektopne wamla ane sembe,
sik sembanepneog wamla.
Allah eldamneri Elme sembe sikne lag nenero ambarelamsil yubu eneko nubu phelektopne wamla ane sembe,
“Sikne” aro ka'elamap.
10 Nimi etneri Allah Elmeag sikne aro wana palilamla tanena,
Allah Yameri sikne lag nenero ambarelamsil yubu eneko saelbamlari,
wanaag paia ulamla.
Aghana Allahri Elme sembe sikne lag nenero ambarelamsil yubu eneko nimi etneri sik senelamla kom tanena,
nimi enekori,
“Allah sik komne,”
aro lelamla.
11 Allah Yameri sikne lag nenero ambarelamsil yubu nenekona,
ya'ag kamag uro unne nu mog so'oag nimiag Allahri tare agha ulamsil.
Kamag uro unne tare agha ulamsilne enekona,
Allah Elmeap ma'ap tangto ua ulamap.c
12 Nimi etne Allah Elmeap ma'ap tangkamla tanena,
kamag uro unne nimi enekoag wamla.
Nimi etne Allah Elmeap ma'ap tangtop kom tanena,
kamag uro unne nimi enekoag wamla kom.
Ya'ag kamag uro unne sembe el nembahiogha
13 A'un Allah Elmeag wana palilamlom nimi sembe,
nari mome nene a'un sembe toro palilamna andarina,
a'un el wapmundi,
“Kristus si nubunge ponekoag wana palilamapne sembe ya'ag kamag wamukap,”
aro el uro wamlulom.
14 Nuri Allahag mololamapne eldi seneropne sunsunum uro molorop tanena,
“Sik uro ka'ebalul,”
aro log kom uro sik senelamap.
15 Apna nuri mololamapne ka'elamlange sembe el wamap tanena,
nu el wamapne babe,
“Nuri elag mololamapne sunsunum uro ualeba,
nunag talul,”
aro el wamap.
16 A'unkabo Yesusag wana palirop nimi nhondi malia ulamle tanena,
nimi eneko sembe Allahag molbarelamlulom.
El malia urop nimi enekori loba nenep tangto urop komne ulamle tanena,
nimi eneko sembe Allahag molbarelapmuna andarina,
kamag uro unne tatlul.
Aghana nimiri malia uropti loba nenep tangto uropne babe wamla.d
Nimiri loba nenep tangtopne neneko malia ulamle tanena,
tam neneko sembe,
“Allahag molbarelamlulom,”
aro nari a'unag ambarelamsin kom.
17 Nimiri wana sengkwanekto uropne ni aneko malia uropne wamla.
Aghana nimiri malia uroba loba nenep tangto urop komne babe wamla.
18 Nu el uro wamap nena,
nimi etne Nuni Allahag agha mangap tangtop tanena,
nimi enekori malia ulamla kom.
Nimi eneko sembe Allah Elmeri tiro yae ulamla andarina,
phia yonge enekori nimi eneko salero omnep kom.
19 Mog so'oag nimiri seneragto ul piropne neleptop nimi taneko yonge nenekori saelbamsil aghana,
nunna Nuni Allahag agha mangap tabunge sembe el uro wamap.
20 Nen nu el uro wamap nena,
Allahri nu sembe,
“Sikne ponekoap ma'ap taukang,”
aro Elme poghol aogne yaogti,
nu el nenelamsiog.
Allah Elme Yesus Kristus ponekoap ma'ap tangtopne pere agha sikne ponekoap ma'al dalamap.
Yesus Kristus poneko Allah sikne wamlange ponekori nimi ya'ag kamag nembahinepne wamla.
21 Namabo,
a'undam nimi yae up tangkapmuna andarina,
mema yogne whingag nemban koma Nuni Allah wail ibarelamlulom kom.
Abenda.