Yubu ka'eropne pere agha, “Phia yongeri yubu to, Allah Yameri yubu to,” aro seneragto miptopne sembe ambatsiogha
4
Nangkabo,
a'un nari wanaag nimi wamlom!
Ni memari ambatsirop yubu ka'elapmunne sik sembaheng kom.
Mog so'o eneag nimi maiknori orolena yubu ambatto tongolamsiangdi,
“Allah Yameri ambatneoba yubu silimu tipto ambarelamsin,”
aro orolenange ambarelamsiang aghana,
mipna koma ni sik sembaheng kom.
Yubu ka'elapmundi,
“Yubu ene Allah Yameri ambarelamsil yubu lelamla to,
phia yongeri ambatsirop yubu lelamla to,”
aro seneragto miplamlulom.
2 Allah Yameri ambarelamsil yubu sik tapto lelamang tanena,
lag phoro yubu lemnepne wamlangena,
“Yesus mog so'oag nimi nongag taogne poneko Allahri wepto poghogne Kristus wamla,”
aro lag phoro lemnepneog wamla.
Lag phoro ambarelamsiang yubu ene ka'elapmunneag agha,
“Allah Yameri yubu ambarelamsiang,”
aro el talulom.
3 Ot mema yubu leropne pere agha Yesus sembe,
“El Allahri wepto poghogne Kristus kom,”
alamik tanena,
a'un el uro wapmundi,
“Ane Allah Yameri yubu kom.
Kristusap aisa nenep tangtop yubu lelamang,”
aro seneragto el talulom.
Kristusap aisa nenep tangtopne mog so'oag yalulne sembe ka'elamom.
Wene babe mog so'oag yaori wamla.a
4 Namabo,
Allah Yame a'unag wamlange mikip phelektopne wamlaba,
Kristusap aisa nenep tangtopne mog so'o eneag wamlange el mikipneap sunsunum kom.
A'un Allahringe wamlom ane sembe,
Kristusap aisa nenep tangtop yubu ambatsirop nimi luknubahilomdi,
sinag nelebahin koma khapto wamlom.
5 Sin Kristusap aisa nenerop nimi mog so'o eneringe wamang ane sembe,
mog so'oag nimiri seneragtopneag agha yubu lelamangba,
mog so'oag nimi tanekori sindi yubu ka'ero neleplamang.
6 Nu Allahringe wamap ane sembe,
nimi etne Allahap nimi pali optangkamang tanena,
nuri yubu ka'elamang.
Aghana nimi etne Allahringe kom tanena,
nuri yubu ka'elamang kom.
“Nuri yubu ka'ero neleplamang to,
kom to,”
aro miptopneag agha nu el uro wamnep nena,
“Allah Yameri yubu sikne lelamang to,
phiari yubu orolenange lelamang to,”
aro el uro wamnep.
“Allah eldamne o'ona senehinne wamla,” seogha
7 Nangkabo,
nari wanaag nimi wamlom.
Nimiri o'ona sembahinepne neneko ot Nuni Allahri senehinneag agha lag tanep ane sembe,
nu mamun o'ona senel dalamukap.
Nimi etneri o'ona senelamsil tanena,
nimi eneko Ili Allahag agha mangap tangtop nimi,
Allahap nimi pali nenep tangtop nimi wamla.
8 Allah eldamne o'ona senehinne wamla ane sembe,
nimi etneri nimi o'ona senehirop kom tanena,
nimi eneko Allah ekonne wamla.
9 Allahri nu o'ona senelamsilne lag nembatsiog nena,
Elme ot nhonogne agha mog so'o anekoag poghatsiog andarina,
el pere agha nu kamag uro wamukap.
10 O'ona senehinne taptop nena,
nuri Allah o'ona senelamubunge sembe kom aghana,
Allahri nu o'ona senehiropneag agha Elme poghatsiog.
Elme nu sembe poghatsiogti Allahri,
“Na Name tebalenge pere agha nimiri malia uroba tam kom nembalul,”
aro uaogne nenena,
o'ona senehinne taptopne wamla.
11 Nangkabo,
nari wanaag nimi wamlom.
Allahri undo nu sembe maiknoro o'ona sembamsiog tanena,
nu mamun o'ona seneptanepneog wamla.
12 Nimi nhondi babe Allah irop kom aghana,
Allah nunap ma'ap tangto ua ulamlaba,
nu mamun o'ona senel dalamap tanena,
eldi o'ona senehiropne nunag mauptangto lag talamla.
13 Elap nunap ma'ap tangto uropne sembe el uro wamap nena,
tam nene sembe.
Eldi Yame nunag tatsiog ane sembe,
nu el uro wamap nena,
nunap elap ma'ap tangto wamapti,
el nunag ua ulamla.
14 Nuri haingdi ililamuburi,
sik yubu tipto ambarelamsiap nena,
Nuni Allahri Elme poghatsiog andarina,
Elme ponekori nu mog so'oag nimi taulbahilul.
15 Nimi etneri lag phoro,
“Yesus poneko Allah Elme wamla,”
aro saekag yubu lerop tanena,
Allahap nimi enekoap ma'ap tangto ua uropne wamlaba,
Allah nimi enekoag ua ulamla.
16 Nu el uro wamapti,
sik senelamap nena,
“Allahri nu o'ona senelamsil,”
aro elag wana palilamap.
Allah eldamne o'ona senehinne wamla.
Nimi etneri o'ona senehinne nenekoag meptangto ua ulamla tanena,
Allahap ma'ap tangto ua ulamlaba,
Allah babe nimi enekoag ua ulamla.
17 Undo unulamapne pere agha,
o'ona senehinne neneko nunag mauptangto lag talamla andarina,
wene mog so'oag wamapne Kristus wamla saog uro nu babe wamap.
Kristus poneko saog wamap ane sembe,
eldi tam ni kemero kareptop sum lag taleba,
nu log kom uro wamukap.
18 Nimiri wanaag,
“Omnelul,”
aro log seneropne loloro teknep tangtop tanena,
o'ona senehinne wanaag whi uro mauptangto lag tanep kom.
Nimiri wanaag o'ona senehinne mauro whi tangto teknep tal tanena,
log senenne wamnep komdi,
kom tanepneog wamla.
19 Nuri o'ona senelamsiap nena,
ot Allahri sam nu o'ona senelamsilneag agha nuri o'ona senelamsiap.
20 Allah poneko nimiri haingdi imnep kom aghana,
nimiri haingdi ipsinep nena,
Allah elmabo haingdi ipsinep.
Haingdi ipsinep ane sembe,
nimi nhondi elkae nhon Yesusag wana palirop nimi sembe o'ona semban koma hausag senerop aghana,
pamag agha,
“Allah o'ona senelamna,”
aro yubu lerop tanena,
nimi enekori orolena yubu agha lelamla.
Nimi nhondi elkae nhon Yesusag wana palirop nimi haingdi ilirop aghana,
el sembe o'ona semban koma hausag senerop tanena,
Allah haingdi ilirop komne poneko babe nimi enekori o'ona sembanep kom.
21 Nunag,
“Ulamlulom,”
aro arukahiog yubuna undo wamla.
“Nimi etneri Allah o'ona senerop tanena,
elkabo Allah elmabo yogne babe o'ona sembahinepneog wamla,”
aro nunag yubu ambatsiog.