Kristus kamag taogti, lag nenep taogne sembe ambatsiogha
15
Nangkabo,
nari Yesus yubu walinge a'unag ambarelamsisiba,
ka'ero saelbalumneag agha wana khapto sekamlom.
Yubu eneko ekon tanep komdi,
yubu ene nen so'opto el nenelamsin.
2 Nari a'unag ambarelamsisi yubu enekoag seneragto mikip uro salelamlom tanena,
yubu enekori a'un talulamsil.
Ot a'un nimi nhon-nhondi senelamnep nena,
“Paulusti nunag ambatsiog yubuag wali uro seneragna koma sik senelamubu,”
aro sae lipsimun tanena,
yubu walinge enekori a'un taulbahinep kom.
3 Nari ambarelamsisi yubu nanag babe ambarelamneekpa,
a'unag tipto ambarelamsisi.
Ambarelamsisi yubu o'omne enena,
nuri malia uropne sembe Kristus tebaog.
Kristus tebaogne Allah yubuag uro yabilul aro mome toro pibekne sunsunum uro tebaog.a
4 Tebaogpa kirik hogtobaag sikekpa,
ik wilindip sum kamag taog.
Kamag taog nena,
Allah yubuag uro yabilul aro mome toro pibekne sunsunum uro kamag taog.b
5 Kamag taogti,
Kefas si nhon Petrus whingag lag nenep taogti,
amik aobare nang whingag babe lag nenep taog.c
6 Amik sum nungkabo teng sa'o tarabareap eptopneap (500) nimi nikag wamekpa,
sin whingag babe lag nenep taog.
Sin whingag lag nenep taogpa,
ibek nimi taneko nhon-nhon mali taong aghana,
ibek nimi maikno wene babe wamang.
7 Amik sum Yakobus whingag babe lag nenep taogti,
eldi wepto pogsiog nang ni whingag babe lag nenep taog.
8 Na whingag babe lag nenep taog aghana,
na elabonge lo'om aro mangap taloa saog wamsiba,
komoptobag agha na whingag amik lag nenep taog.
9 “Na elabonge lo'om aro mangap taloa saog wamsi,”
aro lemnangena,
nari anamag elag seneragna koma wamsiri,
Allahri wepsiog kelmabo me Kristusag wana paliro winil dalamek nimi taneko,
“Seklebaik,”
aro olamsisiba,
Yesus na whingag lag nenep taog.d
Yesusti wepto pogsiog nimi yogne nubunang saog uro wamangba,
na mo wepto pogneogne sembe ologne saog uro wamna.
Na wene aro lemnange,
Yesusti na wepto pogneogne aro lemnange sembe na olog sunsunum kom senel dalamna aghana,
10 Allahri wana nanag yorolamnelneag agha na sekitneogne wamnange wamna.
Eldi wana nanag yorolamnelne wana mauban koma wamla kom.
Ora nimiri awe tolamek aghana,
nari whin seklero maiknoro awe wero toro poa tongolamsiri tongolamno.
Awe wero toro poa tongolamsiri tongolamno aghana,
na mori kom ot Allahri wana nanag yorolamnelne neneri na pere agha awe tolamog.
11 Ane sembe nari to,
sindi to,
nu Yesusti wepto pogsiog nimiri yubu ene ambarelamsiap.
Ambarelamsiap yubu ene ka'ebalumdi,
wene sikne aro seneraglamlom.
Teptop nimi kamag tanepne sembe
12 Nuri Kristus kamag taogne sembe yubu ambarelamsiap ane sembe,
a'un nimi nhon-nhondi yubu lelamlomne,
“Teptop nimi kamag tanep kom,”
aro a'undi welaro yubu lelamlom?
13 A'undi,
“Teptop nimi kamag tanep kom,”
aro yubu lelamlomne sikne wamso tanena,
“Kristus babe kamag tanep kom,”
aro seneragnep.
14 Kristus kamag taho kom tanena,
nuri yubu walinge ambarelamsiapne babe,
“Mo yubu kamolange agha ambarelamsiang,”
aro seneragnep.
Apna a'undi elag sikne aro wana palilamlomne babe,
“Seneragna kamolange mo sik senelamlom,”
aro seneragnep.
15 Nen nhonna,
nuri yubu ambarelamsiap yubuna,
“Allahri Kristus kamag nembaog,”
aro ambarelamsiap.
Aghana a'undi yubu lelamlomne,
“Teptop nimi kamag tanep kom,”
aro lelamlomne sikne wamnep tanena,
Kristus babe kamag tanep kom.
Kristus kamag tanep kom tanena,
nuri ambarelamsiap yubuna,
“Allahri Kristus kamag nembaog,”
aro ambarelamsiap yubu eneko sik kom yubu sembanepneog wamnep.
Undop pagha tanena,
“Nuri Allah sembe sik komne ambarelamsiap,”
sembanepneog wamnep.
16 Tam nenena,
teptop nimi kamag tanep kom tanena,
“Kristus babe kamag taog kom,”
aro seneragnep.
17 Kristus kamag taho kom tanena,
a'undi elag sikne aro wana palilamlomne sembe,
“Mo limitukne seneraglamlom,”
aro seneragnep.
Kristus kamag taho kom tanena,
a'undi malia uropne sembe wene babe Allahri a'unag tam pimnep.
18 Kristus kamag taho kom tanena,
“Elap ma'ap tangtop nimi tebaek nimi taneko mo ya'ag tebaek,”
aro seneragnep.
19 Nuri Kristusag wana palilamapne,
“Ot wene mog so'oag wamabag nu yeplamsil,”
aro elag wana paliro tilamseng aghana,
amik kamag tanepne sembe nu yepsinep kom tanena,
nu wene seklelamapne mo seklebanepneog seklebanep.
Nu Kristusag wana palirop nimi Kristus ponekori amik yepsinep kom tanena,
wene ora nimi wamangne olog hae wali wamnep,
aghana nu elag wana palirop nimi seklelamapne saog uro seklebanepneog wamnep.
20 Aghana Kristus sik uro kamag taog.
Teptop nimi agha kamag tanep nimi sembe el sam kamag taogne poneko wamla.
21 Mog so'oag nimi teplamap nena,
nimi nhon pere agha tepna nunag lag taog.
Teptop nimi agha kamag tanepne babe nimi nhon pere agha nunag tanep.
22 Anena Adamag agha liktangtop nimi ni teplamang saog uro,
Kristusap ma'ap tangtop nimi ni kamag nembahilul.
23 Kamag nembahilul aghana,
ko'o wilniro pairopne sunsunum uro mo uro yabinep.
Sam nena Kristus.
Amik nena,
Kristusap ma'ap tangtop nimi el nen samoro yale sum eneko kamag taukang.
24 Tanena komobanep sum talul.
Komobanep sum eneko mog so'oag nimiri nimi saelba uhiropneap,
yubu lenneap,
mikipneap Kristusti kom nembahilul.
Sum eneko Kristusti nia mangkina saelba uhiroba aneko nen samoro Ili Allah saeag nembalul.
25 Anamagna Kristus ponekori saelbamsinepneog wamlul.
Kristusap aisa neneropne ni Kristusti luknubahileri,
yan ingisaple taneogna,
eldi saelba uhiroba aneko nen samoro Ili Allah saeag nembalul.
26 Kristusap aisa neneropne komopto luknubalul nena,
nimi tepnange kom nenero luknubalul.
27 Allah yubu silimu tiptop nimiri,
“Nia mangkina el yan mombolag pibog,”
aro mome toro pibog.e
Wene,
“Nia mangkina,”
seog aghana,
Allah eldamne Kristus mombolag wamnepne sembe mome toro pibog kom.
Tibin uro wamlangena,
Allahri nia mangkina Kristus umag pibog tanena,
Allahri eldamne Kristus umag nenep tanep kom.f
28 Allahri nia mangkina Kristus mombolag nembaleba,
nia mangkina Kristus mombolag taleba,
Allah Elme Kristus poneko eldamneri Ili Allah umag nenep talul.
Allah Elme ponekori,
“Nia mangkina wamlange pere agha Allahri seneropne ni sunup taho,”
aro Ili Allah umag nenep talul.
29 Teptop nimi kamag tanepne sembe seneraglamsut!
Nimi nhon-nhondi ulamang nena,
“Tebaek nimi sembe maghag pelengkanukang,”
seneropne agha maghag pelengelamsiang.
Teptop nimi amik kamag tanep kom tanena,
tebaek nimi sembe maghag pelengelamsiangne enena sa'a sembe ulamang?g
30 Apna nu Yesus yubu ambatto tongorop nimi sembe seneraglamsut.
Nimi amik kamag tanep kom tanena,
nuri yubu ambatto tongoropne sembe nu sop-sop ya'ag opsinepne seneragna koma tipto ambarelamsiap.
31 Nangkabo,
na omnepba tebanepne sop-sop wamla.
Sikne agha lelamna.
Nu Saelba Uhiropne Yesus Kristusap ma'ap taomne sembe nari a'un sik uro wana awi agha maiplamsin saog uro,
sikne agha lelamna.
32 Na as Efesus wamnoba,
si yoabari weamnari omneloa saog uro nimiri na,
“Obukap,”
aro ulamneongba wamno.
Na tebanepne eneko sembe mog so'o eneag kamna tomnepne orog.
Kamag tanep sum agha kamna tomnep.
Aghana teptop nimi amik kamag tanep kom tanena,
nuri mo sembanep nena,
“Ambuhum nu tebanep ane sembe,
wene mon og uro maghap kwanengap tukap,”
sembanepneog wamnep.h
33 A'undam nimi haing kunup taheng kom.
“Wana wali nimi mali nimiap sae tiptangto pirop tanena,
malinge ul pirop inaag sae kiliro pinep.”
34 A'un ali nembahinepne lelamna.
A'un nusamag Allah sembe ekon urop nimiri yubu lelamang ane sembe,
sindi yubu nen ka'ebaheng kom.
A'un wana porogneag agha seneraglapmundi,
nen malia ulamseng kom.
Teptop nimi agha amik kamag tanep nimi nong sembe ambatsiogha
35 Aghana nimi nhondi haibanep nena,
“Welaro teptop nimi kamag tanep?
Teban tanena nimi nong wela saonge agha kamag tanep?”
aro haibanep.
36 Yubu ene hairop nimiri seneragna koma haibanep.
Nimiri aweag wana togtoba so'oag tognepba,
tebaloa saog uro ul tan taneogna,
nen pongoro nong tanep.
37 Aweag wana togtoba,
gandum wana to,
orange to nimiri togna tanena,
amik yina tanep.
Wana nong ningki so'oag tognep kom.
Ot yina pongkanep wana so'oag tognep.
38 Ot yina pongkanep wana so'oag tognep aghana Allahri,
“Pongolamleri nong talul,”
seneropne sunsunum uro wana tognange eneko a'ero-a'ero pongop tangto Allahri nong tarelamsil.
39 Lebe aroba sop wamlange ni nikne kom.
Nimi sop nhon sao,
nimiri mo'osiropne sop nhon sao,
winang sop nhon sao,
maghag uropne sop nhon sao.
40 Imag uropneap,
mog so'oag uropneap babe nikne kom.
Imag uropneri imang warebanepne nhon sao,
nimi nong mog so'oag uropneri imang warebanepne nhon sao.
41 Hengdi imang wareropne nhon sao wamlaba,
waldi imang wareropne nhon sao wamlaba,
imbereari imang wareropne nhon sao wamla.
Imberea babe,
nhondi tibin uro imang warelamlaba,
nhondi imang warelamla aghana,
olog inibin saog wamnep.
42 Teptop nimi agha kamag nembahile nimi nong wamnepne undo saog wamla.
Nimi nong so'oag siknepne mo polbanep aghana,
kamag tanep nimi nongna polbanep komne wamlul.
43 Nimi nong so'oag siknep nena,
mo loba tangtopne aghana,
kamag tanep nimiri nongna imang wareropne saog wamlul.
Nimi nong so'oag siknepne mo pesa tangtopne aghana,
kamag tanep nimiri nongna mikip sirik wamlul.
44 Nimi nong so'oag siknepne mog so'o eneag wamnep nong wamla aghana,
kamag tanep nimiri nongna Allah Yameri tatsinep nong wamlul.i
Mog so'o eneag wamnep nimi nong wamla ane sembe,
Allah Yameri tatsinep nong babe wamla.
45 Tam nene sembe mome toro pibog nena,
“Nimi samne Adam poneko kamag uro lebe aropne taog,”
aro mome toro pibog.j
Kristus ponekona,
Adam komoptopne saog taog nena,
Allah Yameri kamag tatsinep saog uro Kristus kamag nembahinepne taog.
46 Ot Allah Yameri nong tatsinepne sam tanep kom.
Mog so'oag wamnep nimi nong sam nembahiogti,
amik Allah Yameri kamag nenehiro nong tatsinepne nunag talul.
47 El sam sumbaog nimina,
Allahri mog so'oag sumbaog so'o olog tobogti,
nimi sumbaog.
El phendepne ponekona,
imag agha kulukul aog.
48 Mog so'oag urop nimi wamnep nena,
Allahri so'o agha sumbaog nimi saog wamnep.
Imag urop nimi wamnep nena,
el imag agha kulukul aog nimi saog wamnep.
49 Wene wamap nena,
el so'o agha sumbaog nimi saog wamap.
Ane saog uro amik wamukap nena,
el imag ua uropne poneko saog wamukap.
50 Nangkabo,
wene a'unag yubu ambarelamsin nena,
Allahri saelba uhiroba,
“Namaboag tatsinun,”
aro tatsinepne neneko nu wene nong sopap enengap wamap nimiri salero tomnep kom.
Allahri polbanep komne tatsinep nena,
nu polbanep nimi nongag wamap nimiri saeri tomnep kom.
51 Ka'ebahut!
Samenag tognoro wamogne wene lag nenero ambatnuahin.
Nu Kristusag wana palirop nimi ni tebaukap kom aghana,
nu nhin nong a'ero taukap.
52 Nu nong a'ero taukap sum eneko wa'en yubu lilim nubu uro ma'i saog uropne trompet komoptopne pho alogleba,
yubu lilim nubu uro leplul.
Lepna libango alognaba,
hengom aloa saog uro teptop nimi kamag tangom agha polbanep kom nongag taikpa,
nu nong a'ero taukap.
53 Polbanepne kwirip taleba,
ot polbanep komneag agha enektangto wamnepneog wamlul.
Tebanep nong ene kwirip taleba,
ot tebanep kom nong agha enektangto wamnepneog wamlul ane sembe,
nong a'ero taukap.
54 Poloropne polbanep komneag enektangkamleba,
tebanepne tebanep komneag enektangkamle sum eneko,
samenag nimiri lebogne,
“Nimi tepna nikniro luknubaog,”
aro mome toro pibogne sunsunup talul.k
Sum eneko sum ora nimiri mome toro pibogne,
55 “Nimi tepnari nen nimi luknubahinep mikipne kom tal te?
Nimi tepnari nen nimi si sapsinepne kom tal te?”
aro mome toro pibogne sunup talul.l
56 Nimi tepnari nimi si sapsinepne enena,
nuri malia urobari nu opsinepne sembe lebog.
Nuri malia urobari nu opsinepne enena,
Allahri aruksirop yubu ingisaplamubunge sembe nuri malia urobari nu opsinep.
57 Nuni Allahag wana yororo,
“Naba nani,”
aro kiplamsut!
Nu Saelba Uhiropne Yesus Kristus poneko pere agha nunap aisa nenep tangtopne luknulamsildi,
nu yepto paliag nenelamsil!
58 Ane sembe,
nangkabo nari wanaag wamlom nimi,
a'un yubu sikneag koloptan koma wana khapto wamlulom.
A'un el uro wamlom nena,
whin seklero awe tolamlomne nu Saelba Uhiropne sembe tolamlom tanena,
kom tanep komne tolamlom.
Ane sembe,
nen ma'aro nu Saelba Uhiropne sembe sop-sop awe tolamlulom.