Kristusag wana palirop nimi as Yerusalem urop nimi yepsinepne sembe ambatsiogha
16
Wene aro lemnaba,
Allahri wepsiog kelmabo me yepsinepne sembe olog ambatnuahin.
As Galatia nimi Kristusag wana paliro winip tangtop nimi sembe nari sinag,
“Undo-undo ulamlulom,”
aro ambatsino saog uro a'undi babe ulamlulom alamna.
2 Anena,
na anam yan komag a'un Minggu sum sop-sop winil dalapmundi,
a'un nimiri a'ero-a'ero saeagha wamlenge tatsinepne sunsunum uro kareplapmundi,
poloro winilamlulom.
Undo Minggu sum sop-sop unulamlulom andarina,
na yane sum eneko nen poloro wimban koma yepto tatsinepne aneko weroba wamlul.
3 Weroba wamleba,
a'undi as Yerusalem nimiag tatsinepne poa pinep nimi wepsululom.
A'undi sik senelapmun nimi wepsimunba,
na amik yane sum eneko a'undi yepsinepne pabinep nimi tanekoag mome toro tatsineri pogsinun.
4 Na babe sinap nhon pinepne sunsunum aro tam karebahabe tanena,
sin nanap nhon pinep.
Paulusti, “Undo pang-yang uanun,” seogne sembe ambatsiogha
5 Na amik Makedonia so'oag pinun.
Ane sembe Makedonia so'oag agha laploa lemneri,
a'unag yanun.
6 A'unap nhon wameberi,
ko'o we uro wamukap to,
son li nhon babe ma'aro a'unap nhon wamukap to senelamna.
A'unap nhon wameberi,
a'undi olog yepnohomba,
amik naba nari wanaag agha tam karebaneag sip nen tipto pinun senelamna.
7 Wene a'unag yanepne ot phihibom agha a'un kemel ahisenenge na karong.
Na a'unag yahane senelamnange,
“Ko'o we uro a'unap nhon wamukap,”
aro nang-nangalamna ane sembe,
nu Saelba Uhiropne ponekori wali seleba yanun.
8-9 Wene na as Efesus wamnange,
Allahri na sembe ina nubunge yarebatneoba,
nimi maikno yubu amoro ambarelamsin aghana,
nimi maiknori toraplamneang.
Ane sembe tane wamneri,
nubu sum Pentakosta sum taleba pinun.a
10 Timotius a'unag yalulne ponekona,
nari awe tolamna saog uro eldi babe nu Saelba Uhiropne sembe awe tolamla.
Ane sembe a'unag yaleba,
a'un sembe log sembahileag aro wali yae paip tangkamlulom.
11 Nimi nhondi babe el sembe teba'en seneropne agha ulamseng kom.
A'unag yaleba,
wali uro kiplapmundi,
wali nikag wamlulom.
Nhon wapmundi,
amik wanaag agha ma'al dalapmunne agha,
“Wali pululam,”
aro pogmunba,
nanag samoro yalul.
Elap nungkabo Kristusag wana palirop nimi yogneap nanag samoro yalamika nang-nangalamsin.
12 Apna nungkae Apolos poneko sembe,
nari elag wenelamnori,
“Nungkabo Korintus nimiag mome ene pabahinep nimiap nhon pululom,”
aro maiknoro wenelamno.
Maiknoro,
“Pululam,”
aro wenelamno aghana,
“Erarukti wene pinun kom,”
seo.
Amik pa'asea sum elag taleba,
a'unag yalul.
13 Haing whi uro wapmundi,
Yesusag sikne aro wana palilamlomne wana khapto wamlulom.
Mikip uro wapmundi,
log senerop kom nengabo wamlulom.
14 Nia mangkina ulapmundi,
a'un mamun o'ona senel dalapmundi ulamlulom.
Yubu komoptobag nimi kipsiogha
15-16 Nangkabo a'unag wenelamsin nena,
nimi etneri,
“Allahri wepsiog kelmabo me yepsinun,”
aro ma'ap tangto whin seklero tol tongorop tanena,
undo unurop nimi nhinag kiplamsimundi,
sindi yubu ka'elamlulom.
Sin Stefanusti ae lom nimiri undo whin seklero tol tongoropne sembe el uro wamlom.
Akhaya so'oag wamek nimi yogne Kristusag anam seneragna komag,
Stefanusti ae lom nimi tanekori Kristusag wana palilamekti,
sik senerop nimi sam nimi taek.
17-18 Stefanus ponekoap,
elkabo Fortunatusap,
Akhaikusap nanag yaongne sembe wana awi uaneo.
A'un nanap nhon wamnep kom aghana,
a'undi pogsiom nimi nanag yaongdi,
nari wana keyagman nenero awi nenelamneong.
A'undi wana babe keyagman nenero awi nenelamsiong.
Sindi undo ulamangne wali kemero kiplamsululom.
19 Sin Kristusag wana paliro winil dalamang nimi Asia so'oag wamang nimiri a'un kiplamsiang.
Akwila elkel Priskilaap,
sindi ae lomag winil dalamang nimiapti a'un sembe,
“Nu Saelba Uhiropne ponekoap ma'ap tangtop nimi wamap,”
aro wanaag agha a'un kiplamsiang.
20 Nungkabo Kristusag wana palirop nimi ni tane wamang nimiri a'un kiplamsiang.
A'un mamun haibil dalapmundi,
“Allahri wepsirop kelmabo me ma'ap tangto wamap,”
aro somoro togtog aro kibil dalamlulom.
21 Na Paulusti a'un kiplamsin.
Yubu abene palilognange na Paulusti kipsirop yubu abene mo saeri toro palilamna.
22 Nimi etneri nu Saelba Uhiropne poneko o'ona sembale kom tanena,
Allahri nimi eneko yo'obale.
Naio,
nu Saelbamsilamne yalulam!
23 “Nu Saelba Uhiropne Yesus ponekori wana a'unag yorolamsilneag agha yepto paiamsilul,”
aro a'un sembe molbarelamsin.
24 A'un Kristus Yesusap ma'ap tangtop nimi ni wamlomne nari o'ona senelamsin.
Abenda.