1 Korintus 14

Allah Yameri yubu tatsinepne sembe ambatsiogha

O'ona senehiropne ul palapmundi, Allah Yameri tatsiropne sembe, “Nanag taho,” aro wana yengneag agha seneraglamlulom. Ot wali sirik nena, “Nanag taho,” senelamlulom nena, “Allah Yameri nari wanaag yubu tatnohoba, eldi yubu silimu tipto nimi ambatsisene,” senelapmunne nenena wali sirik. 2 “Allah yubu silimu tipto ambatsisene,” senelamlulom sen nena tam nene sembe. Allah Yameri ora nimi ekon yubu ka'eptanep kom yubu nimi nhonag tatlaba, lelamla tanena, ora nimiag lelamla komdi, ot Allahag mo lelamla. Yubu lelamla yubu eneko Allah Yameri tognorop yubu nimi enekoag mo tattop yubu agha ora nimiri ka'ero seneragnep kom yubu lelamla. 3 Aghana nimi etneri Allah yubu silimu tiplamlari, ambarelamsil tanena, wana aingnibahinep yubuap, wana khabahinep yubuap, mikip nembahinep yubuap nimiag ambarelamsil. 4 Allah Yameri ora nimi ekon yubu ka'eptanep kom yubu nimi nhonag tatlaba, lelamla tanena, nimi eneko eldamne mo mikip nenel dalamla. Aghana nimi nhondi Allah yubu silimu tiplamlari, nimiag ambarelamsil tanena, Kristusag wana paliro winip tangtop nimi mikip nenelamsil. 5 Na yeng uanep nena, “Allah Yameri a'un nimi niag ora nimi ekon yubu ka'eptanep kom yubu tatsisoba, Allahag yubu lelamseng,” senelamna. Aghana na yeng maikno sirik uanep nena, “Allah Yameri a'undi wanaag yubu tatsisoba, eldi yubu silimu tipto nimi ambatsiseng,” senelamnange uro yabinep tanena, na yeng maikno uanoho. Allah Yameri ora nimi ekon yubu ka'eptanep kom yubu nimi nhonag tatlaba, ora nimiag tipna koma ora nimiri seneragnep kom yubu lilim lelamlange nenena olog wali. Aghana Allah Yameri nimiri wanaag tatlaba, ora nimiag Allah yubu silimu tipto seneragnep yubu lilim lelamla tanena, Kristusag wana paliro winip tangtop nimi mikip nembahinep yubu ambarelamsilba, ka'elamangne nene wali sirik.

6 Nangkabo, nari wene a'unag lelamnangena undo. Allah Yameri a'un ekon yubu ka'ebanep kom yubu nanag tatnohoba, a'unag ambarel ahiseneri, a'undi yubuag tipna koma lelamsene tanena, a'un yepsinep kom yubu mo wamnep. Ot Allah Yameri nanag ambarelamneleri, tognoroba lag nenerop yubu to, el nenehirop yubu to, Allah yubu silimu nimiag tipnep yubu to, nimi amoro ambatsinep yubu to tatneleba, nari a'undi yubuag tipto ambarelamsine taneogna, a'un yepsinep yubu talul. 7 Tam nene sembe lebe arop komneag sunumna tol pina sumbatnuahin. Nimiri lebe arop koma agha ma'i lom toman pho alamnari, yubu lilim lambanep. Lebe arop komne pingpong yubu neneroba kecapi babe kerekandi olamnari, yubu lilim lag nembanep. Nimiri wali uro o'obandi, ma'i lom pho alamna to, pingpong yubu neneroba kecapi kerekandi olamna to, taneogna ora nimiri wali uro ka'ero seneragnepti sepnep. 8 Ma'i trompet lom pho alamnari, yubu lilim lero la'imbanepne babe, mal tangtop nimiri, “Mal tabukapti, wero wamlulom,” aro trompet pho aro sikinkabo el nembahinep. Pho aro el nembahinep aghana, salik-malik pho alamnari, yubu lilim lero la'imbanepne tibin kom tanena elkabori, “Sa'a sembe pho alamla,” aro wanaag ekon uro wamnepti, mal tabanepne sembe weamna koma saog wamnep. 9 A'undi pamag agha lanarop yubu babe, Allah Yameri ora nimi ekon yubu ka'ebanep kom yubu a'unag tatsileba, nimi yubuag tipna koma lelapmun tanena, ora nimiri ka'elobi agha seneragnep komdi, mo ekon uro wamnep. Undop pagha tanena, a'undi yubu lilim lelapmun yubu eneko phoanari pabiloa saog uro kom tanepneog wamnep. 10 Mog so'oag nimi tala-tala wamang nimiri sik uro yubu maikno a'ero-a'ero lelamang. Yubu lerop nimi tala-tala wamang nimi niri, “Nari seneropne agha el taukang,” aro yubu lelamangne nhonne babe seneragnep kom yubu mo mipto salik-malik yubu lelamang kom. 11 Ane sembe, nimiri nanag yubu ambarelamnel yubu ka'ebanep komdi, seneragna kom tanena, nimi eneko na sembe nimi ekonne ka'ebanep komne mo wamnep. Apna nimi eneko sembe na babe nimi ekonne ka'ebanep komne mo wamnep. 12 Ane saog uro, a'un mamun ekon yubu ka'eptanep kom yubu lelapmunagti, seneragto lero ulamlulom. A'un wali ulamlom nena, Allah Yameri a'unag tatsinepne sembe, “Topsebe,” aro yeng senelamlom. Ane sembe, a'un Kristusag wana paliro winip tangtop nimi mamun mikip nenep tanepne o'omne nenero, “Tatsiso,” aro sarekereplamlulom.

13 Ane sembe, Allah Yameri a'un ekon yubu ka'eptanep kom yubu nimi nhonag tatleba, yubu lemnep nimi enekori Allahag mololamleri, “Wana mikip nembahinep yubu eneko ora nimiri ka'ebanep yubuag tipto ambatsinep yubu tatnululam,” aro molbanepneog wamla. 14 Allah Yameri na ekon yubu ka'eptanep kom yubu nanag tarelamnelba, Allahag yubu lero mololamna. Nari wanaag agha Allahag moloro lelamna aghana, nari seneragnep kom yubu agha mololamna. 15 Wene aro lemna pagha tanena, “Nari welaro uanun,” sembanep? Nari wanaag babe, nari seneragnangeag agha babe Allahag mololamnun. Apna nari Allah omektopne seplamnunne, nari wanaag babe, nari seneragnangeag agha babe omekto seplamnun. 16 A'un winil dalapmundi, Allah Yameri tatsirop yubuag agha Allah omeklapmunba, ekon urop nimi a'un nusamag wamnep. A'un ekon yubuag agha Allah kipto omeklapmunba, ekon nimi a'un nusamag wamnep nimi enekori a'undi yubu lelapmunne ka'ero seneragnep komdi, “Sikne agha lelamang,” aro seneragnep komdi, saekag lemnep kom. 17 A'undi sik uro wali uro Allah omeklamnep aghana, a'un nusamag wamnep nimi eneko seneragnep kom tanena, mikip tan koma ekon uro mo wamnep.

18 Allah Yameri ora nimi ekon yubu ka'ebanep kom yubu tarelamsilne neneko, a'unag olog tarelamsilba, yubu lelamlom. Ot na mo maikno sirik uro tarelamnelba, yubu lelamna. Tarelamnelne nene sembe, “Wali tatnelam,” aro Allah kiplamna. 19 “Wali tatnelam,” aro kiplamna aghana, “Kristusag wana palirop nimiap winil dalamapti lelamna tanena, ot nimiri ka'ebanep yubu mo lemnun,” senelamnari lero ambarelamsin. Allah Yameri ora nimi ekon yubu ka'ebanep kom yubu tarelamnelne agha yubu tam teng-tengne ambatsinep. Aghana nimi winip tangtobag wamna tanena, ka'ebanep kom yubu lilim teng-tengne ora nimi yepsinep kom yubu laplopneri, sin ka'ebanep yubu ologha wamnep yubu agha amoro ambatsisene taneogna, wali senelamna.

20 Nangkabo, a'undi seneraglamlulom nena, me ologneri seneraglamangne saog uro seneraglamseng kom aghana, nong nimiri seneraglamang saog uro wali uro seneraglamlulom. Ot olog mabori malinge uan koma ulamang saog uro olog mabo saog wamlulom. 21 Mog so'oag nimi tala-tala wamang nimiri yubu leropne sembe imap so'oap Saelba Uhiropne ponekori Yahudi nimiag yubu lelamogti,

“Nimi tanekoag yubu ambarelamsineri,

sin ekon nimiri yubuag agha babe,

ora nimiri pamag agha babe ambarelamsinun aghana,

nari amik yubu lemnunne babe ka'ero ulamukang kom,”

aro lebogpa, Yahudi nimi aruksirop yubuag mome toro pibog.

22 Yubu ene agha el talamap nena, Allah Yameri ora nimi ekon yubu ka'eptanep kom yubu tatsiropba lelamnep nena, Kristusag wana palirop nimiag yubu ambatsinepne sembe tatsirop kom. Ot elag wana palirop kom nimiri ka'elamnepti, “Yaghe, Allahri tarelamsilne agha lelamang,” senenne kekneba imnepti, sik sembanepne sembe Allah Yameri sin ekon yubu tarelamsilba lelamang. Aghana Allah Yameri nimi wanaag yubu tarelamsilba, nimiag Allah yubu silimu tipto ambatsinep yubu eneko, “Kristusag wana palirop nimi mikip taukang,” aro tarelamsil. Wanaag yubu tarelamsilba, nimiag Allah yubu silimu tipto ambatsinep yubu eneko Kristusag wana palirop kom nimi sembe tarelamsil kom. 23 Ane sembe a'un Kristusag wana palirop nimi ni nikag winil dalapmunba, nimi nhon-nhon Kristus sembe ekondi, elag wana palirop kom nimi a'un nusamag wa'inep. A'un nimi niri lelapmundi, sin ekon yubu ka'ebanep kom yubu lelapmunba, a'un nusamag wa'ilamik tanena, sindi a'un sembe nenek salehirop nimi sembahinepne wamla. 24-25 Aghana a'un Kristusag wana palirop nimi winil dalapmundi, a'un nimi niri Allah Yameri yubu tarelamsilenge sunsunum uro Allah yubu silimu tipto ambarel dalapmun tanena, nimi nhon Kristus sembe ekondi elag wana palirop kom nimi wa'inep. Allah Yameri a'un nhinag yubu tarelamsil yubu ambarel dalapmun yubu ka'ebaleba, eldi wanaag tognoro seneropne lag taleba, nimi enekori, “Yaghe, malinge seneragto ulamnoa sembe Allahri tam kemero karebaleri, na omneleag,” aro sikne agha seneragnep. Undo seneraglamleri, yabu sanukto u amupto Allah omeklamleri, “Allah a'un nusamag tapto ua ulamla,” aro lag phoro lemnep.

Kristusag wana palirop nimiri winip tangtobag agha lero ulamnepne sembe ambatsiogha

26 Nangkabo, wene aro lemna tanena, “Nu winil dalameberi hulamukap?” aro haibanep. A'un mamun winil dalapmundi, nimi nhondi, “Sepna nhon sebukap,” sembanep. Nhondi, “Yubu amohinne ambatsinun,” sembanep. Nhondi, “Tognorop yubu Allah Yameri lag nembatnelba ambatsinun,” sembanep. Nhondi, “Allah Yameri ora nimi ekon yubu ka'eptanep kom yubu tatnelba lemnun,” sembanepba, nen nhondi, “Ora nimi ekon yubu leplange eneko Allah Yameri el nembatnelba, tipto ambatsinun,” sembanep. A'un nimiri, “Uaukap,” senelapmunne ni aneko, “Ot Kristusag wana palirop nimi mikip nembahinepne agha ulamukap,” aro ulamlulom. 27 A'un winip tangkapmunag agha Allah Yameri ora nimi ekon yubu ka'eptanep kom yubu a'un nimi nenneag tatsileba, “Lemnun,” aro ulamik tanena, nik sum salik-malik uro lemnep komdi, a'ero-a'ero lelamukang. Nhondinge komopto lepleba, nen nhondinge salnuro lemnep aghana, ot nimi phenderi to, wilindiri to mo lemnep. Tomne lemnep kom. Apna Allah Yameri tatsin yubu ora nimi ekon yubu sin ka'ebanep kom yubuag, “Lemnun,” aro ulamik tanena, winip tangkamna nimiag Allah Yameri ora nimiag mikip nembalengeag agha yubu tipto ambatsinep taneogna, Allah Yameri tatsin yubu ora nimi ka'ebanep kom yubu enekoag lemnep. 28 Winip tangto wamik nimi tanekoag yubu tipto ambatsinep nimi wamna kom tanena, Allah Yameri ora nimi ekon yubu ka'eptanep kom yubu tatle yubu eneko leplul kom. Allah Yameri nimi ka'eptanep kom yubu tatle yubu eneko ot nimi enekori wanaag Allahag mo leplul. 29 Apna Allah Yameri nimiri wanaag yubu tatsileba, “Allah yubu silimu tipto ambatsinun,” aro lelamik tanena, ot nimi phenderi to, wilindiri to, nimi tanekoag yubu tipto ambatsinep. Allah Yameri tatsirop yubu tipto ambarelamsiikpa, a'un winil dalapmun nimiri ka'elapmundi, wanaag seneragto tam kareplamlulom. 30 Allah Yameri tatle yubu eneko nimi nhondi yubu tipto ambarelamsileba, ora nimi nhon ka'ero pulamleba, Allah Yameri el pulamle nimi enekoag tognoropne nhon lag nembatnep. Allah Yameri pulamle nimiag lag nembatle tanena, el yubu lelamle nimi enekori yubu lero komobi agha yubu kom talul. Yubu kom taleba, el pulamle nimi enekori nen alniro yubu ambatsinep. 31 A'un nimi nhindi Allah Yameri tatsirop yubuag agha yubu silimu tipto ambatsinep ane sembe, “Nhondi lepleba, nhondi leplul,” aro o'obi agha lelamlulom. Undo lelapmun andarina, nimi ni mamun ka'el dalapmundi, el nenel dalapmundi, wana mikip nenel dalamlulom. 32-33 Allahri salik-malik ulamlange kom aghana, eldi wepsirop kelmabo me winip tangtop nimi tala-tala wamang nimi ni sembe wana aingniro ma'alamsil. Ane sembe Allah Yameri nimiri wanaag yubu tatsileba, “Allah yubu silimu tipto ambatsinun,” senelamik tanena, Allah yubu silimu tipto ambatsinep nimi tanekori sindam nimi wana aingniro umag nenep tangkamnepti lemnep.

34-35 A'un winil dalapmunag kelabo yubu koma wamnep. Musari aruksirop yubu sunsunum uro kelabo taneko sindam nimi umag nenep tanepneog wamnep ane sembe, Kristusag wana palirop nimi winip tangtobag yubu lag nenero lelamseng kom. Winip tangtop nimi whingag kelabori yubu lag nenero lemnepne sunsunum urop komdi, ali nenep tanep. Ane sembe kelabo nhondi wanaag, “El tahane,” senelamle tanena, ela'angeap ae lomag wamdikti, hailamleri el talul.

36 Allahri wepsirop kelmabo me winip tangtop nimi tala-tala wamang nimi sembe yubu lemnange nene sikne agha lemna to, ot a'un mori Allah yubu sam seneraglamomdi, sikne agha ulamom to? Ot a'undam nimi sembe senel dalamlom nena, “Allah yubu nunag mo lag tangto yabio,” senelamlom te? 37 A'un nimi nhon eldamne sembe seneraghal dalamnari, “Allah Yameri el nenehirop yubu tarelamnel,” seneptanep to, “Allah yubu silimu tipto ambarelamsin,” seneptanep to, tanena nimi enekori tam nhon el tanepneog wamla. El tanepneog wamlangena, na Paulusti wene aro mome toro ambatsin yubu ene, “Ot sik uro nu Saelba Uhiropne ponekori, ‘Ulamlulom,’ aro aruksirop yubu wamla,” aro nimi enekori el tanepneog wamla. 38 Nari sik yubu ambatsin yubu eneko ka'elobi agha nimi enekori el tanep kom tanena, ora nimiri nimi eneko ka'ebaheng kom.

39 Ane sembe, nangkabo a'undi, “Nanag taho,” aro wanaag seneraglamlulom nena, “Allah Yameri nari wanaag yubu tatnohoba, yubu silimu tipto ambatsisene,” aro wana yengneag agha seneraglamlulom. Apna Allah Yameri nimi ekon yubu ka'eptanep kom yubu tarelamsileba, nimiri lemnepne sembe irikaheng kom. 40 Ot nia mangkina ulapmunne neneko wali uro wilniro o'olapmundi, sunsunum uro ulamlulom.