1 Korintus 9

Yesusti wepto pogsiog nimiri ulamnepne sembe

Na mo Yesusti wepto pogneogne wamnari, nimi arukna tangtop kom nimi wamna. Nari babe nu Saelba Uhiropne Yesus poneko haingdi ipsi. Nu Saelba Uhiropne poneko sembe awe tolamnangeag agha a'undi elag sikne aro seneraglamlom. Nari lemnange ane sik te? 2 A'undi elag wana paliro ma'al dalamlomne neneri lag nenelamlaba, nu Saelba Uhiropne ponekori sik uro na a'unag wepto pogneogpa, ambarel ahisinge lag nenep tangto yabio. Ane sembe, ora nimiri na sembe sembanep nena, “Yesusti Paulus sik uro wepto poghog kom,” sembanep. Aghana a'undi na sembe sembanep nena, Yesusti sik uro na pogneogpa, ambarel ahisinge sembe sik sembanepneog wamlom.

3 Nimiri na Paulus sembe, “Yesusti sik uro wepto poghogpa ambarelamsil to, kom to,” aro tam kemero miplamneangba, sin nimi tanekoag nandamne pelep tangtop yubu samoro ambatnuahin. 4 Nu Allah yubu ambatto tongohirop nimiri kwanengap maghap teroba nimiri saeagha molbanepne, hae molbanep kom te? 5 Yesusti wepto poghogne Kefasap, nu Saelba Uhiropne ilipsabo taptop nangap, pogsiog nimi yogneap tanekori Kristusag wana palirop kelabo topsiekti, ela'ange elkelapti ambatto tongolamsiang. Ot nanap ambatto tongohirop nang mori Kristusag wana palirop kelabo topsinep kom senelamlom te? 6 Yesusti wepto pogsiog nang orangeri awe yogne tomna koma amohinne aghabog amolamsiang aghana, ot nanap Barnabasap mo saeri awe yogne babe tomnepneog wamnam te?

7 Teko uahinepne sembe sunumna olog sumbatsinun. Yin salerop nangdi ora nimi sembe, “Mal taro yepsukap,” aro ulamang nena, sinag teko wamsinne tatsinepne sembe yin salerop nangdi nimi enekoag sip tangom agha mal tabanep. Nen sunumna nhon, nimi nhondi awe wero haing anggur aweag wero memna tanena, wana mauropne neneag agha takto tenep. Nen sunumna nhon, nimiri pham domba paia mo'oban tanena, pham domba maum mag loltero tero tenep.

8 Nari wene aro lemnange ot mog so'oag nimiri seneropne agha ambatsin kom. Allahri aruksirop yubu pere agha babe nik yubu ambatsiog. 9 Allahri aruksirop yubu Musaag ambarogpa, mome toro pibog nena,

“Gandum yongol torop nimiri pham sapi kerekamnari, ‘Kwaneng roti sununa gandum wana kolopto yingkileba, poloro anun,’ aro pham sapi yagto pabalamna.

Pham sapi yagto pabalamnange abeneko pere, ‘Yo'oag ingirop pham sapiri roti wana teleag,’ aro pham ua'al aroro kauptop saog uro kaupseng kom,”

aro mome toro pibog. Allahri pham sapi mo sembe yareag sembaogti, ambatsiog te? 10 Pham sapi mo sembe kom. Nu sembe babe yareag senero ambatsiog. Nu sembe babe ambatsiogpa, mome toro pibog andarina, awe so'o toro werop nimi babe, wana kolopto yingiroba poloro toropne babe, ni phende abenekori, “Nari babe toro tenun,” aro tiro wamnepneag agha awe tomnepneog wamla. 11-12 Nuri samenag ambarelamsibunge, “Nubu talamleri, wana maubalul,” aro Allah yubu a'unag awe webalori, meploa saog uro a'unag alniro mebililamsibu. Allah yubu mebililamsibu aghana, wene a'undi saeag wamsilne agha ora nimiag pogto tarelamsilomba, sindi wali sunsunum uro tomnep. A'undi sinag pogto tatsinep tanena, nu meploa saog uro alniro mebililamsibu nimiri sembanep nena, “Nunag nen ma'aro tatsiseng,” aro nuri yubu lemnepneog wamnep. Undo wamnep aghana, ni uro yabioba, nuri wanaag, “Kristusti yubu walinge nene sabo tangto pinepne irikabeag,” aro wana pailingkina, “Nunag tatsululom,” aro a'unag ambatsibo kom.

13 Sin mem aeag awe torop nimiri kwaneng tenepne sembe olog ekon talom te? Mem aeag awe torop nimiri tenep nena, mem ae lomag kwaneng wamlange agha pogto tarelamsiangba telamang. Apna sin nimiri saeagha Allah sembe palirop nimiri kwaneng tenep nena, nimiri saeagha Allah sembe pail pinepne agha pogto Allah sembe palilamangdi, pogtopne sindam nimiri telamang. 14 Ane saog uro, nu Saelba Uhiropne ponekori aruklamsiogti, “Nari yubu walinge ambatto tongolamsiang nimi kamag uro wamnep nena, nari yubu walinge ambarelamsiikne sembe sin teko uahinepne nimiri tatsiikpa, kwaneng tero wamukang,” aro arukto ambatsiog.

15-16 Undop pagha tanena, nari yubu ambarelamsinne sembe, “Nimiri nanag tatneheng,” sembanep aghana, “Tatneheng,” sen koma ambatto ulamsiri ulamna. Wene babe nari mome ene toro palilamnange, “A'undi undo tatneheng,” aro mome toro palilamna kom. Nimiri nanag tatnen koma wamangba, Kristusti yubu walinge ambarelamsinne sembe nari wanaag, “Walinge ulamna,” aro yeng ulamnel. Ane sembe, “Nari Kristusti yubu walinge, ‘Kamna tatneheng,’ sen koma nimiag ambarelamsin,” alamnange nene kamola yubu saog taleagti, na tebahanea babe wana yengag agha, “Nari nen tipto, ‘Kamna tatneheng,’ sen koma yubu walinge ambarelamsinun,” sembamna. “Walinge ulamna,” aro yeng ulamnel aghana, nadamne maiptanep kom. Nari sa'oag tatneogpa, nari Kristusti yubu ambatsinepneog wamna. Nari nimiag ambatsisene kom tanena, seklebanepneog nanag tanep. 17 Nari wanaag agha, “Mo ambatsisene,” seneropne agha yubu walinge ambarelamsin tanena, kamna nanag tanep. Nari wanaag agha, “Mo ambatsisene,” seneropne agha ambarelamsin kom tanena, nari sa'oag awe tatneogne mo salelamnari, sunsunum uro ambarelamsin. 18 Undop pagha tanena, kamna nanag wamnepne nene huro sembanep? Kamna nanag wamnep nena, nari nimiag molbahinepneog wamlange neneko molbahin koma ulamnaba, nanag tatnen koma wamang nimiag Kristusti yubu walinge nene nari mo kamna tomna koma yubu ambatsinep.

19 Ane sembe, na nimi arukna tangtop komne wamna aghana, “Nimi maiknori ka'elamikti, sik sembaukang,” aro nadamne nimi ni sembe arukna nenep taloa saog uro ulamna. 20 “Yahudi nimiri sik sembaukang,” aro nadamne Yahudi nimiri ul palamekne sunsunum uro ul palamsi. Nandamne Musari aruksirop yubu umag wamna kom aghana, “Musari aruksirop yubu saelba ul pirop nimiri sik sembaukang,” aro nandamne Musari aruksirop yubu sunsunum uro ul palamsiri ambarelamsisi. 21 Ane saog uro Musari Yahudi nimiag aruksirop yubu ekon nimi wamekag wamsiri, “Musari yubu ekon nimi tanekori sik sembaukang,” aro na mo Musari aruksirop yubu saelban koma ul palamsiri, Kristusti yubu ambarelamsisi. Allahri aruksirop yubu lipsi kom aghana, Kristusti aruksiropne sunsunum uro ul palamsiri ul palamna. 22 Mikip kom urop nimi wamekag wamsiri, “Mikip kom urop nimiri sik sembaukang,” aro mikip kom urop nimi nenep tahiri ambarelamsisi. Ni ul palamsinge abeneko pere nimi ni ubu paiamang nimi saog nenep tangkamsiri, “Taulbahisene,” aro ul palamsiri ambarelamsisi. 23 Nia mangkina ulamnange, “Kristusti yubu walinge sabo tangto yabilul,” aro ulamna andarina, yubu ene sunsunum uro amik walinge uro yabinepne nanag babe talul.

24 Sunumna nhon sumbatnuahin. Nimiri lemnepti, “Mipsukapti a'un merero pimunne etne samenag taleba, kamna tarukap,” aro wene senep. A'un el uro wamnep nena, nimi maikno merero peheng aghana, ot el samenag yanep nimi mo paliagne tahoba, elag mo kamna tatnep. El paliag tanep nimi sol wali uro merero pindi, kamna tomnep saog uro a'undi babe sol wali uro ul palamlulom. 25 Nimiri, “Paliagne tanun,” aro mererop nimi niri seklero kilim weang aro mikip nenep tangtopti, merero palamang. Sin undo unurop nimiri, “Paliag tangtop nimi kiptopne elag tanep kwiria usoghag elektoba tomnun,” aro seklero mikip nenep tangto ulamang aghana, sindi tomnep kamna aneko amik mo polbanepne agha tomnep. Nuri seklero kilim weang aro ulamap nena, “Paliag tangtop nimiag tanep kamna kwiria usoghag elektoba polbanep komne neneko nanag talul,” aro ul palamap. 26 Ane sembe na mori ul palamnange salik-malik uro merebaloa saog uro ul palamna kom. Nen sunumna nhonna, nimi phenderi, “Sae ol dalamnemeri, mikipne taneri, kamna tomnun,” aro ol dalamdang tanena, optangtop nena salik-malik lehekto sae optanep kom. Ot, “El luknubanun,” aro nimi whingag nongag ol dalamdang. Nari babe sae nginikom agha ulamnange, salik-malik urop kom aghana, “Uanun,” seneropne sunsunum uro ulamna. 27 Ora nimiag yubu amoro ambarelamsisiri, ambarelamsino aghana, na mo sembe, “Kamna nanag tanepne angap taleag,” aro nari nong yeng neneropne umag nenel dalamna. Nari wanaag arukul dalamnange, “Ot walinge uahane,” aro seneraglamnange sunsunum uro nari nong yeng neneropne umag nenel dalamna.