Nimiri mema sembe palilamek kwaneng telamnepne sembe
8
Wene nimiri mema sembe palirop kwaneng sembe olog yubu ambatsinun.
“Nunagna seneragnange nun nimi niag wamsil,”
alamlomne el wamap.
Ot nimiri el uro seneragnange neneag agha sindam nimi maibil dalamang aghana,
o'ona senehiropne neneag agha nimi mamun mikip nenel dalamang.
2 Nimi etneri eldamne sembe,
“Ni el uro seneragna,”
seneptangkamla tanena,
nimi eneko el tanepne sunsunum uro el tangtop nimi wamla kom.
3 Ot nimi etneri Allah o'ona senelamla tanena,
nimi eneko sembe Allahri,
“Naringe,”
aro el uro wamla.
4 Undop pagha tanena,
nimiri mema sembe palirop kwaneng sembe olog yubu ambatnuahin.
Nu el uro wamap nena,
Allah ot nhonogne wamlaba,
nimiri saeri mema sunuropne sembe mog so'oagne nene mikipne wamla kom.
5 Nimi saeri mema sunuropne nene sembe,
nimiri yubu lelamangne agha,
“Memneap mikipneap maikno wamla,”
alamang.
Memne orange imag babe so'oag babe wamnep aghana,
6 nu sembe ot memne nhonogne Nuni Allah wamla.
Elag agha nia mangkina lag taogpa,
el sembe wamap.
Nia mangkina Saelba Uhiropne ot nhonog wamlange Yesus Kristus poneko wamlaba,
el pere agha nia mangkina lag taogpa,
el pere agha wamap.
7 Aghana nu el uro wamapne seneragna nunag wamlange neneko nimi niag wamla kom.
Nimi nhon-nhondi samenag agha mema sembe kwaneng paliro ul palamek.
Samenag agha ko'o we uro undo ul palamek ane sembe,
wene babe mema sembe palirop kwaneng telamsengdi,
wana wag tangom agha,
“Mema sembe palirop kwaneng telamnari,
malinge ulamna to,”
aro wanaag seneragnep.
8 Aghana nuri kwaneng telamapne nenekori nu Allah whingag enero poa wali nembahinep kom.
Nimiri seneraglamnep nena,
“Mema sembe palirop kwaneng ene nuri terop komne toman agha luknup tangkamnep aghana,
telamseberi paliag nenep tangkamnep,”
aro undo seneraglamnep kom.
9-11 Ot a'undam nimi yae paip tangkamlulom.
Andi wanaag wana khapto,
“Allah nhonogne wamlaba,
mikipne orange orogti,
mema sembe palirop kwaneng hae wali tenep,”
senelamlamdi el uro seneragnange anag ulangkelba,
hae wali tenep.
Ora nimiri mema sembe kwaneng palilamang kwaneng pail pinep ae anekoag andi kwaneng nene hae tenep.
Kwaneng hae tenep aghana,
ando anipsae tangtop nimiri,
“Tenep to,
kom to,”
aro wana khaptop kom nimi babe wamang.
Wamangba mema sembe palirop kwaneng telamsomba ipkehengdi,
welaro seneragseng?
“Tenep to,
kom to,”
aro wanaag seneraglamangne sunsunum uro wali ten koma wamnep aghana,
andi telamsomba ipkeheng tanena,
sindi wali ul pinep ina anekoag perarekto phukul pinebag saogne pipsomne neneko mali sembanep.
Anag el uro seneragnange ulangkelba,
kwaneng telapmunne ipkeikti,
wana khaptop komdi wana wag tangom agha sindi babe loba nenep tangto teikag.
Undop pagha tanena,
ando anipsae tangtop nimi sembe Kristus tebaog aghana,
“Sin nimi taneko perarekto phukul piikag,”
aro yae paiamsululom.
Anag el uro seneragnange wamlange pere agha,
“Sin loba nembahineag,”
aro yae paip tangkamlulam.
12 Kristusag wana paliro ando anipsae tangtop nimi tanekori wanaag khaptop komdi,
“Uanep to,
kom to,”
aro seneragnange olog wana phende saog wamnep.
Aghana sindi wanaag seneraglamangne torapto,
“Ualulom,”
aro a'undi menangkitsimun tanena,
sindi wanaag seneragna opsimunne neneri Kristus ponekoag malinge uamunag.
13 Tam nene sembe nari kwaneng teropne pere agha naro naipsae tangtop nimi perarekto phukul piikagti,
nari seneraglamnari,
“Perarekto phukul pileag,”
aro nari lebe aroba sop teropne ya'ag lipsene senelamna.