1 Korintus 7

Nengabo kelabo top tangtopne sembe

Wene aro lemnaba, a'undi samen nanag mome toro pibomne sembe olog lemnuan. A'undina, “Nengabori kelabo tomna koma wamnange wali,” aro mome toro pibom. 2-3 Wene aro mome toro pibom aghana, a'un nimiri wanaag, “Bobonge agto yaboho,” senenne agha salik-malik walep tangto ulapmunagti, nengabori a'ero-a'ero elkel mo toroamnari, elkelag ela'angeri uanepneog wamlange ulamlulom. Apna kelabori a'ero-a'ero ela'ange mo toroamnari, elkeldi ela'angeag uanepneog wamlange ulamlulom. 4 Nengabo kelabo top tangtop tanena, kel enekori nong eldinge mo kom aghana, ela'angeag mo tatnepneog wamla. Ane saog uro ela'angeri nong babe eldinge mo kom aghana, elkelag mo tatnepneog wamla. 5 Ela'ange elkel sin mamun tattanepneog wamlange nenekona, a'un nengabo kelabo top tangtop nimi tattan koma wamseng kom. Wene aro lemna aghana, a'un mamun saekag lelamnepti, “Sesog sembe nikag mamna koma wamnemeri, Allahag mo seneragto mololamnunam,” aro saekag leptumun taneogna, sesog sembe elkel ela'angeri nong nikag wamnepne mamna koma wamnep. Aghana a'undi wanaag, “Uahane,” senenne agha wana mamnep kom wamlomne sembe, nen elkel ela'angeri uanepne ulamdik andarina, phia sikini nubunge nenekori a'un wana alukto nepsinep kom.

6 Wene aro lemnange nenena, “Ulamlulom,” aro arukahin kom aghana, a'un wamlomne el talapmundi, “A'undi undo hae uanep,” aro ambatsin. 7 Nari nimi ni sembe wanaag, “Ulamseng,” senelamnange, “Na kelabo tomna koma wamna saog uro wamseng,” senelamna. “Na wamna saog uro wamseng,” senelamna aghana, Allahri nimiag mo tatsinepne a'ero-a'ero tarelamsil. Allahri nimi nhonag, “Undo wamlulam,” aro tarelamlari orangeag, “Undo wamlulam,” aro tarelamla.

8-9 Wene nengabo kelabo toptan koma wamlom nimiap, yauog kelap, yauogneap sembe ambatnuahin. Wene nengabo kelabo toptan koma wamlom tanena, “A'un babe na kelabo tomna koma wamna saog uro tipto wapmunne wali,” alamna. Nengabo kelabo toptan koma wamseng aghana, sindam nimiri wanaag, “Bobonge agto yaboho,” senenne mombolag nembanep kom tanena, nengabo kelabo toptanep. Wali nengabo kelabo toptan koma wamseng aghana, “Sindi senenne neneri sindam nimi mali nenep taikag,” aro hae nengabo kelabo toptanep.

10 Wene nengabo kelabo top tangtop nimi sembe ambatnuahinne, nari seneropne mo ambatnuahin kom, aghana nu Saelba Uhiropne ponekori yubu tipto ambatnuahin. Nengabori torop kelabo nhondi ela'ange laplobi agha a'ep taheng kom. 11 Ela'ange laplobi agha a'ep tarik tanena, kel eneko nengabo orangeri tomna koma mo wamnepba, nen ela'ange ponekoap babe nen ma'ap tanep. Aghana nengabo orangeri kel talul kom. Ane saog uro nengabori babe elkel laplobi agha a'ep taheng kom.

12 Wene aro lemna aghana, nen tam nhonna, a'un Kristusag wana palirop nimi agha elag wana palirop kom nimiap top tangtop nimi sembe ambatnuahin. Tam nene sembe nu Saelba Uhiropne ponekori yubu tipto ambatnuahin kom aghana, nari senenne agha ambatnuahin. Nengabori kelabo tomnari, amikna Kristusag wana paliro sikne aro seneraglamna aghana, elkeldi Kristusag sikne aro seneraglamnep kom. Elkeldi Kristusag sikne aro seneragnep kom aghana elkeldi, “Hae nikag wamnunam,” alamso tanena, ponekori elkel laplobi agha a'ep taheng kom. 13 Apna nengabori kel nhon tomnaba, amik elkeldi Kristusag wana paliro sikne aro seneragnep aghana, ela'angeri Kristusag sik semban koma wamnep. Ela'angeri Kristusag sik semban koma wamnep, aghana ela'angeri, “Hae nikag wamnunam,” alamso tanena, kel enekori ela'ange laplobi agha a'ep taheng kom. 14 Nari lemnange nenena, nengabo nhondi sik senerop kom aghana, elkel Kristusag wana palirop kel enekoap ma'ap tangtopne pere agha el poneko Allah whingag o'om nimi tangtop. Apna kel nhondi sik senerop kom aghana, ela'ange Kristusag wana paliropne ponekoap ma'ap tangtopne pere agha kel eneko Allah whingag o'om nimi tangtop. Undopne wamso kom tanena, a'un Kristusag wana palirop nimiap, elag wana palirop kom nimiap top tangkamlom nimiri mangkahinep kelmabo me taneko mo salik-malik urop kelmabo me sembahinep. Aghana ela'angeap elkelap Allah whingag o'om nimi nenep tangtopne pere agha a'undi kelmabo me babe Allah whingag o'om nimi wamang. 15-16 Aghana sik senerop kom nimi enekori, “A'ep tanunam,” aro laplobi agha pin tanena, sin phenderi, “Nikag wamnunam,” aro kauptek yubu enekoag agha nen Kristusag wana palirop nimi enekoag tam pimnep kom. Sik senerop kom nimi enekori, “A'ep tanunam,” aro laplobi agha palamle tanena, lilopmunba pilul. Amik uro yabinepne sembe olog ekon uro wamap. A'un Kristusag wana palirop kelabo wamlomne pere agha a'undi nengabo wali nembahinep to, kom to? A'un Kristusag wana palirop nengabo wamlomne pere agha a'undi kelabo wali nembahinep to, kom to? Tam nene sembe olog ekon uro wamap, ane sembe Allahri, “A'un mamun wana aingniro ma'al dalamlulom,” aro yopsiogne sunsunum uro ulamlulom.

“Allahri a'unag pipsiogneag agha sunsunum uro ul palamlulom,” aro ambatsiogha

17 Ot nu Saelba Uhiropne ponekori pogto a'unag a'ero-a'ero pibogne sunsunum uro wamlumag agha Allahri, “Nanag yalulom,” aro yopsiog. A'un yopsiog sum eneko a'unag pibogne sunsunum uro wamlumneag agha nen tipto ul palamlulom. Wene aro lemnange saog uro Kristusag wana paliro winil dalamang nimi niag, “Undo ulamlulom,” aro ambatto tongolamsin. 18 Allahri nimi nhon yobog nena, kere kon kareptop nimi wamogpa, Allahri yobog nimi eneko, kon kareptop kom nimi saog talul kom. Allahri nimi nhon yobog nena, kere kon kareptop kom nimi wamogpa, Allahri yobog nimi eneko, kere kon karebaheng kom. 19 Nengabo kon karepto ul piropne neneri nimi yepsinep kom. Apna nengabo kon kareptop komne neneri babe nimi yepsinep kom. Wene nhonog paliag urop nena, Allahri aruksirop yubu ul piropne o'omne wamla. 20 A'un wamlumba, Allahri yopsiog sum eneko a'unag pibogne sunsunum uro wamlumneag agha nen tipto ul palapmundi wamlulom. 21 Allahri yoplangkeog sum eneko nimiri aruksirop yubu awe tolamlumdi, nimi arukna wamlumba, yopkeogne sembe wana ikin sembaheng kom. Nimi arukna wamlam nena hae aghana, anag aruklangkel nimi enekori, “An sae loplopkenun,” sele tanena, an pa'asea, “Mo sektop nimi tanun,” aro ebalulamne wali. 22 “Nimi arukna wamlamne sembe ikin sembaheng kom,” sen nena, tam nene agha lelamna. Nimi etne nimi arukna wamnaba Allahri, “Ma'ap tanemeri saelbaghenun,” aro yopna tanena, nimi eneko sembe nu Saelba Uhiropne ponekori haing sae lopnaba, mo sektop nimi saog tanep. Ane saog uro nimi etne babe mo sektop nimi wamnaba, Allahri yopna tanena, nimi eneko Kristus ponekori arukna tangtop. 23 Kristus ponekori a'undam nimi sembe kamna tobog ane sembe, mog so'oag nimiri aruksirop yubu mo nelepto ul palamseng kom. 24 Nangkabo, Allahri a'un sembe, “Naringe taukang,” aro yopsiog sum eneko a'unag pibogne sunsunum uro wamlumneag agha nen tipto, “Allahringe wamna,” aro ul palapmundi wamlulom.

Nengabo kelabo top tangtop kom nimiap yauog nimiap sembe ambatsiogha

25 Wene saren kelabo topsinepne sembe olog yubu ambatnuahin. Tam nene sembe nu Saelba Uhiropne ponekori arukahiog yubuag orog, ane sembe nari tipto ambatsinep kom. Arukto ambatsiog yubuag wamla kom aghana, nu Saelba Uhiropne ponekori nanag yareag sembaneogneag agha nari tam lelekto kemero seneraglamnange nene sik sembanep ane sembe, a'unag yubu ambatnuahin.

26 Nari tam lelekto seneraglamnange, ko'o we uro wamna komag ikinne nunag uro yabinep ane sembe, wene wamlom saog uro nen tipto ulamlulom. 27 Andi kelabo nhonag, “Top tanunam,” aro salag pibom tanena, kaupsirop yubu ene lopseng kom. Aghana kelaboap salag paip tangkamna kom tanena, “Top tanunam,” aro kelabo topseng kom aro wenelamsin. 28 Undo wenelamsin aghana, nengabo kelabo top tamun tanena a'undi, “Malinge uan,” sembaheng kom. Apna saren kelabo babe, “Nengabori tomnelul,” seleba top tarik tanena, “Malinge ual,” sembanep kom. Ot nengabo kelabo top tangtop nimi sembe wene mog so'oag wamabag ikinne nunag uro yabinep. Ane sembe a'un nengabo kelabo anam toptan kom tanena, “A'unag ikinne wamleagti top taheng kom,” aro wenelamsin.

29-31 Nangkabo, nari yubu ambatsinne nene, “Nen ko'o weag uro wamla kom,” aro ambatsin. Mog so'oag nimiri ulamang nena, orog tanepne sembe seneragto ulamang. Ane sembe, wene wamap ko'o eneag mog so'oag nimiap sae tiptangto pali optangtop nimi wamlom tanena, mog so'oag urop nimiri ul palamangne wanaag to'opto tobongkimna koma ya'ag uropne agha seneragto ul palamlulom. Kamna kapto tol torop nimi wamlom tanena, “Naringe kom,” senelapmundi kamna kaplamlulom. Wana sesogti engerop nimi wamlom tanena, engena engerop kom nimi saog uro ul palamlulom. Wana yeng uahirop nimi wamlom tanena, andamne mo wana yeng uahinepne sembe seneptan koma ul palamlulom. Kelabo tohirop nengabo wamlom tanena, “Nari kel wamla kom,” seneptalonga saog uro ulamlulom.

32 Nari a'un sembe, “Wana wag nenep tangka ophag seikag,” aro ambarelamsin. Nengabori kelabo torop kom tanena, el ponekori nu Saelba Uhiropne sembe awe salero, “Wana yeng nembanun,” aro mo seneragto ul pinep. 33-34 Aghana nengabori kelabo torop tanena, eldi seneragto ul piropne wana wag nenep tangka mog so'oag uropne sembe awe toro, “Nari kel wana yeng nembanun,” aro seneragto ul pirop. Nengabo sembe lemnange saog uro saren kelabo babe, nengabori torop kom kelabo babe, nu Saelba Uhiropne sembe awe tol pinep andarina, eldangkel nong babe, wana seneragnange babe ot nu Saelba Uhiropne ponekoringe mo walinge wamnep. Aghana nengabori torop kelabona, mog so'oag uropne sembe awe toro, “Nana'ange wana yeng nembanun,” aro seneragto ul pirop.

35 Wene aro lemnange nenena, “A'un yepsinun,” aro ambatsin. “A'un irikahinun,” aro lemna kom aghana, “A'undi ot sunsunum uropneag agha nu Saelba Uhiropne poneko abolag nemban koma el mo sembe sol wali, wali uro tolamlulom,” aro ambarelamsin.

36 Aghana nengabo nhondi kel nhonap, “Top tanunam,” aro salag paip tangkamnep. Paip tangkamnep aghana, ponekori wanaag, “Saelbahane,” seneropne mombolag nembanep kom saog wamnep. Undop pagha tanena, kel eneko saren taog kel wamlaba, nengabori wanaag, “Top tahaneme,” sembanepneog wamla tanena, hae eldi, “Top tanunam,” seneropne sunsunum uro top tarukang. Nengabo kelabo top tarikne nene sembe, “Malinge uarang,” sembanep kom. 37 Aghana nengabo nhondi eldamne wanaag agha tam karebaleri, “Kelabo saelbahin koma wamneri, kelabo tomnun kom,” aro wana khapto seneragnep. El ponekori, “Saren kelabo saelbahane,” seneropne luknubanepne el sembe ikin kom tanena, wali kelabo saelbahin koma kelabo torop kom nimi wamlul. 38 Abene sembe nimi nhondi saren kel torop tanena, hae top tangkamnep. Apna nimi nhondi kelabo torop kom tanena, kelabo toro koma wali sirikne wamnep.

39 Nengabori kelabo nhon torop tanena, “Nikag wamnunam,” aro kaupsirop yubu kauptangto urop. Ela'ange teban koma kamag wamna tanena, kaupsirop yubu eneko elkelag kauptangto urop. Aghana ela'ange teban taneogna, “Nikag wamnunam,” aro kauptop yubu elkelag pimnep kom. Ela'ange tebahoba, nengabo orangeri, “Kel eneko maupto tomnun,” sembanepba kel enekori, “Wali tomnelul,” sembanep. “Wali tomnelul,” sembaleba kel eneko tomnepne poneko nu Saelba Uhiropneap ma'ap tangtop nimi wamna taneogna, hae kel enekoag pinepti, maupto tomnep. 40 Kel eneko nengabori nen maupto tonne hae aghana, nari senelamnange, nengabori nen tomna koma el mo wamleba, kel enekoag yeng maikno ualul senelamna. Nari seneragto lemnange babe Allah Eldamne Yame Walinge nanag wamnelba, seneragto lemna semban.