1 Korintus 10

Mema pharopne sembe wenero ambatsiogha

Nangkabo, wene aro lemnaba, a'un Yesusag wana palirop nimi wamlomba, nu Israel nimi nunisang yabori ulamekpa, sinag uro yabiogne sembe ekon uro wamnep kom sembamna. Nunisang yabo ni toa sekto menangalamogpa, nelepto palamek. Palameka mag laut longoropne abolag piekti, mag laut longorop mag aneko tara-tara karepto murukaogpa, nusam toman ni kauro piek. 2 Nunisang yabori Musari yubu ka'ero elag nelepto palamekne sembe ni maghag pelengelamsiloa saog uro yabiog nena, toa anekoap, mag laut longorop maghap abenekoag uaog. 3-4 Allah Yameri tatsiog kwanengap maghap sin nimi ni tanekori telamek. Mag telamek nena Allahri, “Mag tebatsinun,” aro uaogpa, kirikag agha mag la'imbaogpa telamek. Kirikag agha mag la'imbaog kirik enekona, sinap nhon yabalamogne eneko Kristus wamogti, mag tebatsiogpa telamek. 5 Mag tebatsiogpa, sin ni tanekori telamek aghana, nimi ni taneko sembe Allahri wali sembahiog kom. Ot nimi ologha sembe wali sembahiog. Wali sembahiog kom ane sembe, sin nimi maikno pai aldesag teplalaghek.

6 Sin nimi tanekori, “Allahri nunag, ‘Uaheng kom,’ seogne uahabe,” aro wanaag seneraglamekti tebaek. Sinag uro yabiogne nu sembe sunumna taogpa, nu el tanep nena, “Sindi malia ulamekne saog uro ulamukap kom,” aro el talamukap. 7 Sin nimi nhon-nhondi Allah wail ibare agha mema phalamek. Tam nene sembe mome toro palilamogti, “Sin nimi tanekori, ‘Kwanengap maghap tukap,’ aro pul kanelamekti, ‘Mema phabaukap,’ aro septo sekel pina phalamek,” aro mome toro pibog. Sindi Allah wail ibare agha mema phalamek saog uro ulamseng kom. 8 Sin nimi nhon-nhondi nengaboap kelaboap salik-malik walep tangto ulamekpa, nimi teng-tengne (23.000) ik nhon sum agha tebaek. Sindi salik-malik walep tangto ulamekne saog uro ulamseng kom. 9-10 Sin nimi nhon-nhondi, nu Saelba Uhiropne poneko miplamekpa, paghaeri si saplamsiekne agha tebaek. Orangeri elap yubu toraplamekpa, imagnang malaikat nhon poghogpa opsiog. Sindi nu Saelba Uhiropne poneko yubu torapto miplamek saog uro nuri yubu torapto mipseng kom. 11 Sinag uro yabalamogne pere agha, “Undo unuaheng kom,” aro nu el nenero sunumna sumbarelamsiogti, mome toro pibog. Samenag sindi, “Amik uro yabilul,” aro nang-nangaro ulamekne nu wene wamap li ko'o enekoag lag tangto yabiog.

12 Nu sembe sunumna sumbarelamsiogti, mome toro pibog ane sembe, a'undam nimi sembe, “Mikip uro sekamna,” aro seneptangkamlom tanena, “Eba timbaneag,” aro yae up tangkamlulom. 13 Sa'a-sa'ari a'unag uro yabalamlangeri miplamsil tanena, tam nene ot mog so'oag nimiag uro yabinepne mo wamla. Allah elmo sikne wamlaba, nimiri elag wana palilamnepne poneko wamla ane sembe, tam ikinne a'un mori sa'obanep komne a'unag timbaleba, sae lipsilul kom. Sa'a-sa'ari a'unag uro yabalamlangeri miplamsil tanena, Allahri yeplamsil andarina, a'un la'imbanep ina yarebarelamsilba, a'undi wana khapto ulapmundi, miplamsilne nenekoag agha la'imbalulom.

14 Ane sembe, nangkabo wanaag nimi wamlomne, mema pharopne neneag agha kolop tangto elem uro laplobi agha weag nembalulom. 15 A'un wanaag wali uro seneragnep nimi wamlom ane sembe, nari a'unag ambarelamsinne seneragto wali uro tam karebalulom. 16 Nu poloro winip tangtop aeag mag tero, “Wali tatsilam,” aro kipto telamap mag enekona, Kristus eneng lanaro tebaogne nunag ma'ap talne sembe mag telamap. Apna nu poloro winip tangtop aeag kwaneng roti khepto telamap kwaneng anekona, Kristus nong obekne nunag ma'ap talne sembe kwaneng telamap. 17 Kwaneng roti anena ot nong nhonog wamla ane sembe, kwaneng nong eneko khepto nun nimi niri pogtangto telamapne toman agha nu nimi maikno nong nhonog nenelamsil.

18 Israel ponekori mangaroba mangarobari mangalamsiang nimi sembe seneraglamsut. Sin Israel nimiri saeagha memnang Allah sembe palirop nangdi pogtopne aukag taro palilamangdi, pogtopne sinap nhon, “Allahap ma'ap taukap,” aro pogto nikag telamang. 19 Undop pagha tanena, ora nimiri phia pharo saeri sunuroba mema yogne sembe palirop kwaneng teroba sembe welaro seneragnep? Narina, “Mema yogneag mikiba nubunge wamla,” aro lelamna kom. Apna mema yogne sembe kwaneng paliropne sembe babe, “Kwaneng nongag mikipne wamla,” alamna kom. 20 Mema yogneap, kwaneng anekoap tam o'omne senelamna kom aghana, nimiri mema yogne sembe palirop tanena, Allah sembe palilamang komdi ot, “Phia phabaukap,” aro palilamang. “Phia phabaukap,” aro kwaneng paliropti, pogto teropne sembe, “A'un phiaap ma'ap taheng kom,” aro seneraglamnari wenelamsin. 21 Nu Saelba Uhiropne poneko eneng lanaro tebaogne sembe a'undi seneragto mag terop tanena nimiri, “Phia phabaukap,” aro mag ikto paia urop mag babe a'undi tenep kom. Nu Saelba Uhiropne tebaogne sembe a'undi seneragto kwaneng nhon terop tanena nimiri, “Phia phabaukap,” aro kwaneng palirop kwaneng babe a'undi tenep kom. 22 Nuri wanaag log kom uro, “Nu Saelba Uhiropne poneko pesange wamlaba, nu mo mikip nimi wamap,” aro ulamebenge toman eldi nu wana yongeag agha wabahinepne apto aukap te?

Yesusag wana palirop nimiri Allah paliag uropne kipto ulamnepne sembe

23 A'undi yubu lelamlomdi, “Nunag iriksin yubu orogti, nia mangkina ulamnep,” alamlom. Sikne lelamlom aghana, nimiri nia ulamnepne neneko agha, ot nimiri uropne nhon-nhondi nimi yepsinep. “Nimiri nia mangkina ulamnep,” aghana ot nimiri uropne nhon-nhondi nimi mamun mikip nenep tanep. 24 Nimi nhondi babe el mo tup nenep tangtopne ero neleplamseng kom aghana, ora nimi yepsinepne elapmundi, ul palamlulom.

25-26 “Mog so'o ene babe, nia mangkina mog so'oag wamlange babe nu Saelba Uhiropne ponekoringe wamla.” Ane sembe nimiri teroba, “Kamna kapto tobukang,” aro pail pirobag pail alamikpa, tolapmun tanena, “Mema sembe pibom to, kom to,” aro tam kemero haibahin koma wana aingniro senenneag agha toro tenep.

27 Yesusag sik senerop kom nimi nhondi an yoplangkeleri, “Nikag kwaneng tununam,” seleba an yeng tanena, wali tel pululam. Ni an whingag palilamleri, “Kwaneng nhon tununam,” aro tatkelenge sembe, “Mema sembe pibom to, kom to,” aro tam kemero haiban koma wana aingniro senenneag agha tenep. 28-29 Aghana tatkelenge sembe nimi nhondi anag lag phoro, “Mema sembe pibori, wene pogto tarelangkel,” aro ambatkele tanena, teheng kom. “Teheng kom,” alamnangena, andamneri wanaag seneragtopne sembe, “Teheng kom,” aro lelamna kom. An mo wanaag agha, “Hae tenep,” aro seneraglapmen tanena, hae tenep. Aghana nimi nhondi anag lag phoro, “Mema sembe pibo,” aro ambatkele nimi sembe babe, ambatkele nimiri wanaag seneragnange sembe babe, “Teheng kom,” aro wenelangken. Nimi enekori an sembe tam karebi agha, “Malia ulamla,” aro wanaag seneraglangkeleagti, “Teheng kom,” aro wenelangken. 30 Nari tam nene sembe yubu lelamnangena, nari tenepne sembe Allahag, “Wali tatnelam,” aro kipnari wali tenep. Allah kipnari, wali tenep aghana nimiri, “Malia ulamla,” aro san tilibaneikagti, na hae ten koma wamnep.

31 Ane sembe a'undi kwaneng telapmunne babe, mag telapmunne babe, nia mangkina ulapmunne babe, “Allah si paliag nenero kipnun,” aro ulamlulom. 32-33 Yahudi nimi sembe babe, Yunani nimi sembe babe, Allahri kelmabo maboap Yesusag wana paliro winip tangtop nimi sembe babe, “Sin taulbahinep ina punpun tiptoba pimnun kom,” aro ulamlulom. Nari babe nia ulamnangeag agha na mo tup nenep tanepne ero neleplamna kom aghana, nimi maikno yepsinepne elamnari, ul palamna. Nia mangkina ulamnangeag agha, nari yeng uro senelamnange, “Nimi niri wali sembaikti, nari yubu ka'ebaikpa, Allahri taulbahilul,” aro ulamna.