Markus 14

Nimiri, “Yesus obukap,” aro saekag lebeka

(Matius 26:1-5; Lukas 22:1-2; Yohanes 11:45-53)

1-2 Yahudi nimi sembe nubu sum peramag wamogpa, nimi maiknori, “Nubu sum Paskah amni taleba, as Yerusalem sani yoro telameberi, kwaneng roti walerop komne ik saekpare telamukap,” aro Yerusalem yalamek. Yalamekti wamekpa, memnang Allah sembe palirop nang sikini yaboap, Musari yubu amohirop nangap tanekori, “Welaro Yesus pan khero saelbaberi obukap,” aro ina elamek. “Obukap,” senelamek aghana seneraglamekti, “Nu sani yoro telamebe ko'oag agha saelbaukap kom. Sum eneko agha el salero obebe tanena, nimi asag poloro winilamik nimiri yanghang alamsiikag,” aro wene seek.

Kel nhondi song wali mag Yesusag ikto pelaghaogha

(Matius 26:6-13; Yohanes 12:1-8)

3 Wene, “Salero obukap,” senelamekpa Yesus Yerusalem peramag as Betania Simondi aeag wamog. Simon poneko samenag kon tena pololamogpa, wali taogne ponekori aeag Yesus wamogti, kwaneng telamog. Kwaneng telamogpa, kelabo nhondi aeag wa'iogti, nongag pelagtop mag song walinge payaog. Nongag pelagtop mag song walinge nene kirik hogtoba lom nhonag ikto tobongkia ya'ag serekaekpa, kamna alikinag kapto tobogti payaog. Payaogti ologha babe pimna koma, “Ni ikto kipnun,” aro mag liroba nene kobongkia Yesusti usoghag ikog. 4 Kamna alikinag kapto torop mag song walinge ikogpa, nimi etpare wamekne tanekori ibekti, wana yo senelamek. Yo senelamekti, sin mamun yubu lelamekti, “Sa'a sembe mag song walinge nene loba nenero iklopla? 5 Song wali mag anena, nimiri hengkun nhon awe welamnaba, kamna tatsiropne saog uro kamna kapto torop mag ane. Kel eneri nimiag kamna kapto topsoba, nimi saeagha orog nimiag tatsinep aghana iklopla,” aro kel eneko wabaek.

6 Wene aro walamekpa Yesustina, “Eldi ualne lipsut! Sa'a sembe kel eneag waro neplamlom? Eldi nanag ualne nene wali sirikne agha ual. 7 Sin nimi saeagha orog nimi a'unap sop-sop ua ulamikpa a'undi, ‘Wene yepsisebe,’ sembamun tanena, sop-sop yepsinep. Ot nana agha sop-sop a'unap wamnun kom. 8 Kel eneri eldi saeag wamlangeag agha na sembe, ‘Nimi o'omne,’ aro kipnel. Na amik tebaneba, nari nongag nimiri song wali mag ikto pelaghanehengdi, so'oag sikitneheng saog uro ual. Na anam teban komag kel eneri nanag song wali mag ikneldi, na tebaneba, so'oag siknukang sum sembe wero ual. 9 Yubu sikne agha ambarelamsin nena, nimiri mog so'o tala-tala Allahri yubu walinge aneko ambarel palamsiikti, kel eneri nanag walia ualne sembe ekon tan koma ambarelamsukang,” seog.

Yudasti, “Yesus pan khebanun,” aro Yahudi nimi nubunangap saekag lebeka

(Matius 26:14-16; Lukas 22:3-6)

10 Wene seogpa, Yesusti yubu ka'ero neleptop nimi aobare nang nhonna, Yudas Iskariotne neneko memnang Allah sembe palirop nang sikini yaboag piogti, “Yesus pan khebanun,” aro ambatsiog. 11 Wene aro ambatsiogpa, ka'ebaekti wana awi sembaek. Awi senelamekti, “Yesus nunag pan khebamenba, kamna kaptoba tatkukap,” aro salag lero pibek. Saekag lebekneag agha Yudasti, “Pa'asea etsum wamleba, pan khebanun,” aro weamogti, keme nelero seneraglamog.

Yesus eldi yubu ka'ero neleptop nangapti kwaneng rotiap anggur lolterop maghap teeka

(Matius 26:17-30; Lukas 22:7-23; Yohanes 13:21-30; 1 Korintus 11:23-25)

12 Yahudi nimiri ik saekpare kwaneng roti walerop komne telamek ko'o alnirop sum, nubu sum Paskah sum eneko taog. Paskah sum eneko Yahudi nimiri sop-sop ul palamekne sunsunum uro, “Pham domba me oro yobaukap,” aro ulamek. Yobaukap aro ulamekti, Yesusti yubu ka'ero neleptop nangdi Yesusag hailamekti, “Tala siba pham domba me oro yobeberi tukap? Piberi meneklolamukap,” seek.

13 Wene aro haibaekpa, Yesusti eldi yubu ka'ero neleptop nang phende arukto poglamsiogti, “As soro kalurop as Yerusalem palamtumunba, nimi kabuni nhon mag tero poa yalamlenge pone haiptamundi, elag nelebarurom. 14 Elag nelepto palapmundi, el wa'alogle ae eneag wa'irurom. Wa'irumundi ae ngainge ponekoag, ‘Nuni nu yubu amohiropne ponekori nun anag pogsilba yanam. Anag hailangkeldi, “Nanap nari yubu ka'ero neleptop nangap Paskah sum eneko mo wameberi, andi ae lom nhonag telaukap. Ae lom nelag agha nanap nari yubu ka'ero neleptop nangap mo wameberi, pham domba me nhon tukap?” aro hailangkeldi, nu pogsilba yanam,’ sururom. 15 Wene surumunba, ae ngainge ponekori a'unag ae tika paliagneag ae lom nubunge ambatsilul. Ae lom nubunge anekoag ae usa puna babe, kwaneng palinag babe ni sunuro nu sembe wero wamla. Ae lom aneag agha nu ni sembe wero palilamturom,” aro Yesusti sin phende pogsiog.

16 Wene aro pogsiogpa, eldi yubu ka'ero neleptop nang phende abeneko as Yerusalem anekoag pirekpa, Yesusti sinag, “Ipturom,” seogne sunsunum uro iptek. Iptekti ae lom anekoag wa'irekti, “Paskah sum sembe kwaneng nhon tukap,” aro togto meneklamdek.

17 Ae imbaogpa, Yesusap aobare nang tanekoap wa'iek. 18 Wa'iekti kwaneng tero pukamekpa, Yesusti lelamogti, “Yubu sikne agha ambatnuahin. Wene nu ane kwaneng nikag tero pukamap nang nhon, a'un wamlom nimi nhondi na pan khebanelul,” seog.

19 Wene aro ambatsiogpa, ka'ebaekti wana ikin sirik tahiogpa, eldi yubu ka'ero neleptop nang ni tanekori a'ero-a'ero Yesusag yubu lelamekti, “Andi leplamne nari uanep komne agha leplam,” alamek.

20 Wene alamekpa, Yesusti nen yubu lelamogti, “A'un aobare nang nhondi pan khebanelul. Nimi endana nanap nikag telamnamdi, kal wana lolterop mag ingiroba nikneag el babe nikag kwaneng roti werebongkia telamnam aghana, pan khebanelul. 21 Na mog so'oag nimi tahingeag uro yabilul nena, samenag Allah Yubuag na sembe mome toro pibekne sunsunum uro tebanun. Ot el pan khebanele nimi sembe yaghe senero seklebalul. Na nimi mog so'oag nimi tahinge pan khebanele nimi enekoag Allahri tam ikin sirikne piplul. Ilindi el mangkaho komba, elag ikinne wamso komba, seklebaho kom. Aghana na pan khebanelul nimi sembe ikin sirikne elag pipleba seklebalul,” seog.

22 Wene seogti, kwaneng telamekag anekoa Yesusti kwaneng roti tobogti, “Nani, wali tatsilam,” aro Allah kibog. “Wali tatsilam,” aro yubu lebogti, kwaneng roti aneko saeri khepto-khepto eldi yubu ka'ero neleptop nangag tarelamsiogti, “Nari nong ane topsut,” seog.

23 Wene seogti, mag anggur lolterop mag ma'i tobogti, “Nani, wali tatsilam,” aro Allah kibogti, mag tebatsiog. Mag tebatsiogpa, sin ni wamek nimi tanekori anggur lolterop mag ane teek. 24 Anggur lolterop mag ane telamekpa, Yesusti ambarelamsiogti, “Nari eneng nimi maikno taulbahinepne sembe lambanualne enena, Allahap yubu nikne kaupnep eneng wamla. 25 Yubu sikne agha ambarelamsin nena, Allahri nimi mog so'oag nimi saelba uhin ko'o anam uro yabin komag, anggur lolterop mag nen tenun kom. Ot Allahri nimi mog so'oag nimi saelba uhin ko'o lag tale sum eneko weneogna, anggur lolterop mag wendogne tenun,” seog.

26 Wene seogpa, Allah omektop sepna nhon sebekti, Zaitun yimag piek.

Yesusti Petrusag, “Andi na sembe, ‘Ekonne,’ sululam,” aro ambarogha

(Matius 26:31-35; Lukas 22:31-34; Yohanes 13:36-38)

27 Aneko wamekti, Yesusti eldi yubu ka'ero neleptop nang ambarelamsiogti, “Samenag Allah Yubu mome toro pairop nena,

‘Nari pham domba yae ua uropne poneko omneba,

pham domba taneko talup tangka tala-tala pukang,’

aro mome toro pairopne wamla. Mome nene a'un sembe mome toro pibogpa, a'un ni tanekori nanag agha telektangka lia pululom. 28 Aghana omneikpa, nen samoro kamag taneri, na sam mog so'o Galilea pineba, a'un amik yalulom,” seog.

29 Wene aro Yesusti ambatsiogpa Petrusti, “Nangkabo niri liloa pikinep aghana, nari anag agha telektangka lia pikinun kom,” seog.

30 Petrusti wene seogpa Yesusti, “Anag yubu sikne agha ambarelangken. Ae anam kwelekan komag winang ayamdi anam ik phende kau sen komag, andi ik wilindi na sembe, ‘Ekonne,’ sunululam,” seog.

31 Wene seogpa, Petrusti nen mikip uro ambarelamogti, “Kom. Nana tapto anap ma'aro tebahenemea babe hae. Aghana nari an sembe, ‘Ekonne,’ senun kom,” seog. Seogpa wamek nimi taneko niri babe nika uro lebek.

Yesus Getsemani so'oag piogti, Allahag molona molbaogha

(Matius 26:36-46; Lukas 22:39-46)

32 Anekoa mog so'o sina Getsemani so'oag piek. Piekti Yesusti eldi yubu ka'ero neleptop nangag ambarelamsiogti, “Na Allahag molona mololamneba, a'un ane pukamlulom,” seog.

33 Wene seog aghana, Yesusti Petrusap Yakobusap Yohanesap enero pabahiog. Pabalamsioghag aneko eldi wana alniro samsamolamogti, wana ikin taog. 34 Wana ikin uro sinag ambarelamsiogti, “Na wana ikin sirik ulamnelba, tebanep saog uro wamna. Ane wapmundi, haing whi uro yae wamlulom,” seog. 35 Wene seogti, Yesus nen olog ko'oro piogti, so'oag malingkina ko'o nenekoag elag uro yabinepne sembe Allahag, “Angkitnep te?” aro molbaog. 36 Molona mololamogti, “Naba naniong! An mori nia mangkina uanep. Andi nanag, ‘Seklero tebalulam,’ aro mag tebatneloa saog uro tatneomne neneko ikindi, kom nembalulam. Ot nari, ‘Undo yaboho,’ seneropne agha ualulam kom. Andi wanaag seneropne agha uro yabilul,” seog.

37 Wene seogti eldi yubu ka'ero neleptop nang wilindi wamekag samoro yaogti, malameka kembahiog. Kembahiogti Petrusag yubu lelamogti, “Simon, meo! An malamlam, te? Ko'o nhonog wero yae wamnep kom, te? 38 Nimiri wanaag agha, ‘Walia uahane,’ sembanep aghana, nong mikip komdi, walia uanep kom. Ane sembe haing whi uro yae wamsuri, Allahag mololamsu. Orabari a'un mipsileba, malia ulapmunagti, a'undi Allahag, ‘Nu yepsi,’ aro molona mololamlulom,” aro ambatsiog.

39 Wene aro ambatsiogti, nen samoro piogti, Allahag molona samen lel piogne saog uro molorop yubu nikne nen lel piog. 40 Lel piogti, nen samoro yaogti kemelamsiogpa, sin nen malamek. Sin kwahingdi malamekne sembe aliri, “Sa'a sukap,” aro yubu koma wamek.

41 Yubu kom taekpa, Yesus nen samoro ik wilindip sum Allahag molona molol piog. Piogti Allahag molona molbaogti, nen samoro yaog. Yaogti malameka kemelamsiogti, “A'un wene babe kwahing sau nonolamlom te? Abeneag maplom! Na pan khebanenep ko'o wene yal. Kembalulom! Na mog so'oag nimi tahinge pan khebanuanelba, mali-malia urop nangdi saeag nembanukang. 42 Wene puksuri palamukap! Na pan khebanelne yalamla,” seog.

Yesus saelbaekti, haing sae kaupto pabieka

(Matius 26:47-56; Lukas 22:47-53; Yohanes 18:3-12)

43 Yesusti anam yubu ambarelamsiog abeneko kemelamekpa, eldi yubu ka'ero neleptop nang aobare nang nhon Yudas neneko yalamogha ibek. Yudasap nhon yalamek nimina, nimi maikno, “Yesus saelbaukap,” aro yaek. Sin Yudasap nhon yaek nimi tanekona, memnang Allah sembe palirop nang sikini yaboap, Musari yubu amohirop nangap, Yahudi nimi wenehirop nangap tanekori pogsiekpa, karoghap kameap saelba, “Yesus haing sae kaupto saelbaukap,” aro Yudasap nhon yaek. 44 Sin anam yan komag, Yesus pan khebaogne Yudasti sinag, “Kekneba nhon uanun,” aro ambatsiog nena, “A'undi elamlom nimina, nari somoro togtogha kibil togne nimi ene. El agha saelbamundi, lambaleag aro wali yae uro pabululom,” aro ambatsiog.

45 Wene aro ambatsiogti payahiogti, Yudas yingkina Yesusag yubu lelamogti, “Nai, an yubu amohinne nubunge wamlam!” aro togtogha kibog. 46 Togtogha kiplamog abeneko nimi yaek nimi tanekori Yesus salero haing sae kaubek. 47 Haing sae kauplamek nimi anabiag agha memnang Allah sembe palirop nang sikini nubunge arukna nhon babe wamog. Haing sae kauplamekpa, Yesus peramag sekamogne nhondi karog kilbom agha memnang sikini arukna wamogne poneko ao pubom agha pelengkaog. 48-49 Ao pubom agha pelengkaogpa, salelamek abeneko pere Yesusti nimi tanekoag yubu lelamogti, “Sop-sop Allahri Mem Ae aramag wa'alamnori, a'un whingag Allah yubu ambarelamsino aghana, a'undina haing sae kaupto salelamneom kom. Na, ‘Mo sekukap,’ aro mal tarop nimi sikini wamsene tanena, a'undi nanag yalamlomne, ‘Nimi yonge ane oro saelbaukap,’ aro karoghap kameap payalamlomne sunsunum sembanep. Na, ‘Mo sekukap,’ aro mal taropne wamna te? A'undi nimi whingag yo kom uro na saelbanep aghana, samenag nimiri Allah yubu mome toro pibekne sunup tangto uro yabilul ane sembe, wene yalomdi undo salelamnelom,” seog.

50 Wene alamog abeneko, elkabo taneko ni el laploa tognop tang-tang merebaek. 51-52 Sin Yesusag neleptop nang tognop tang-tang merebaek nimi agha kabuni nhon ag wet purum winne agha wirop ag nongag wangkamogti, Yesusag neleplamog. Sin Yesus haing sae kauplamek nimi tanekori, “Yesusag neleptopne eneko saelbaukap,” aro ulamekti saelbaekpa, ag aneko kologlobi agha kabeog merebaog.

Yahudi nimi sembe tam kareptop nang whingag Yesus pabieka

(Matius 26:57-68; Lukas 22:54-55, 63-71; Yohanes 18:13-14, 19-24)

53 Yesus saelbaekti, memnang Allah sembe palirop nang sikini ponekoag poa palamek. Poa palamekag aneko memnang Allah sembe palirop nang sikini yabo niap, Yahudi nimi wenehirop nangap, Musari yubu amohirop nangap ni poloro winip taek. 54 Winil dalamekag aneko Yesus salero pabalamekpa, Petrusna amik nelepto weag uro tiro palamogha memnang Allah sembe palirop nang sikiniri ae aramag piog. Petrus Kayafas ponekori aramag wa'iogti, memnang Allah sembe palirop nang sikini yae ua urop nang anabiag auk lekto pukamog. 55-56 Auk lekto pukamogpa, memnang Allah sembe palirop nang sikini yaboap, yog nimi nubungeri Yahudi nimi sembe tam lelekto kemerop nang Mahkamah Agama wamek nang niap tanekori, “Yesus ya'ag obukap,” aro elag tam palinne sembe elamek. Elag tam palinne elamekti, nimi maiknori Yesus sembe minirop yubu ambatsiek. Undo ambatsiek aghana sindi, “Undo-undo lero ulamoa ka'ebanori imno,” aro lelamek yubu nene olog tiptangtop komdi, nimiri sik sembanep kom ane sembe, ka'elamekneag agha Yesusag tam palinne olog ibek kom.

57-58 Yesusag tam palinne ibek komba, nen nimi etpare sekelaekti, yubu minirop yubu mangkaek. Yubu minirop yubu mangalamekti, “Nimi eneri yubu lelamoba ka'ebabongena, ‘Allahri Mem Ae, nimi saeri sorop ae enena kwerekaneri, ik wilindi sum agha mem ae wendogne nimi saeri sorop komne sobanun,’ alamoa ka'ebabo,” seek.

59 Wene seek aghana sindi, “Undo-undo lero ulamoba ka'ebabori ibobo,” aro mangarop yubu lebekne nene babe olog tiptangtop komdi, nimiri sik sembanep kom.

60 Wene aro sik sembanep komne lebekpa, memnang Allah sembe palirop nang sikini nubunge poneko sin ni wameka anabiag sekogti, Yesusag hailamogti, “Sindi anag tam pairopne lebangne sembe samoro yubu leplulam kom te?” aro haibaog.

61 Wene aro haibaog aghana, Yesus yubu lemna koma wamog. Yubu lemna koma wamogpa, memnang Allah sembe palirop nang sikini nubungeri nen hailamogti, “Anna Allah omeklamapne poneko Elme walinge wamlam to, kom to? Anna mog so'oag nimi taluro saelba uhinepne Kristus wamlam to, kom to?” aro haibaog.

62 Wene aro haibaogpa Yesusti, “Wene leplamne pone wamna. Na mog so'oag nimi tahinge Imagne mikipne poneko sae sirik sip pukamneri, toa imag wamlenge nusam toman nen samoro mog so'oag yalamnea tiboghanululom,” seog.

63-64 Yesusti wene seogpa, memnang Allah sembe palirop nang sikini nubunge ponekori ka'ebaogti, yo lelem elenge ag wangkamogne taepto ebog. Taepto ebogti, tam kareptop nangag yubu lelamogti, “Eldamneri Allahap nhon sansano nenep talne Allah san tilipto leplange wene ka'ebalom. Yog nimiri, ‘Undo-undo lero ulamoa ka'ebanori imno,’ aro lenne nen ka'ebaukap kom. Wenena yubu ka'ebalomneag agha, ‘Huaukap,’ aro seneraglamlom?” aro haibahiog.

Wene aro haibahiogpa, sin ni wamek nimi tanekori, “Ya'ag tebalulne sunsunum,” senelamekti tam karepto pelengkibek.

65 “Tebalul,” aro tam karebaekti, nimi nhon-nhondi silumag suplamekti, haing ubi agha saeri olamekti, “Allahri an wana heklangkelne agha ambatsi,” aro yubu nepto olamek. Olamekpa memnang Allah sembe palirop nang sikini nubunge yae ua urop nang tanekori babe Yesus salero olamek.

Petrusti Yesus sembe, “Na ekonne,” seogha

(Matius 26:69-75; Lukas 22:56-62; Yohanes 18:15-18, 25-27)

66 Yesus olamekpa, ae aramag Petrus tau sip wamogpa, memnang Allah sembe palirop nang sikini nubunge arukna kelabo nhon Petrus wamoghag yaog. 67 Yaogti Petrus auk leklamogha ibogti, wali uro whingag kembirogti, “An babe Yesus Nazaretne nenekoap nhon ua ulamdom,” seog.

68 Wene seog aghana, Petrusti kom alamogti, “Andi sa'a yubu agha lelamlamne na ekon. Na seneragna kom,” seog.

Wene seogti, sekom agha ae aram wa'inebag piogpa, [winang ayamdi kau seog].

69 Petrus ae aram wa'inebag sekamogpa, kel enekori nen Petrus ibog. Ibogti nen sarikto nimi wamek nimi tanekoag alniro ambarelamsiogti, “Nimi ene babe Yesusag neleplamla,” aro ambatsiog.

70 Wene aro ambatsiogpa, ka'ebaogti Petrusti nen kom seog.

Kom seogpa, ko'o olog wameka nimi taneko nen yingkina Petrusag lelamekti, “An sembena, ‘Galileange,’ aro el wamap. Galileange wamlam tanena, nuri an sembe, ‘Sik tapto Yesus nenekoag neleptopne wamla,’ aro seneraglamap,” seek.

71 Wene seekpa, Petrusti alniro mikip uro yubu lelamogti, “A'undi lelamlom nimi ene si na otsik tapto ekonne agha lelamlom. Orolenange lelamna tanena, imagne ponekori hae omnelul,” aro yubu so'opto ambatsiog.

72 Wene alamog abeneko winang ayamdi ik phendepne kau seog. Winang ayamdi phendepne kau seog abeneko Yesusti samenag yubu lebogne sembe Petrus el taog. Yesusti samenag Petrusag yubu ambarelamogti, “Winang ayamdi ik phende kau sen komag andi ik wilindi na sembe, ‘Ekonne,’ sunululam,” seogne sembe Petrusti seneraghogti engelamog.