<<    <     Yunus     3     >    >> 
Yunus lernohi Makromod Nin konomdere
3
1-2 Makromod mai hopon Yunus wali'ur na'ahenia, “Mala'a kota Niniwe loikaru I Lir'u man Ya'u konohiyedi o me'eni.”
3 Enime'ede Yunus derne nakani, de nala'a Niniwe me'e. Kote onne lapa la naphari, de ri nala'a nano honon wali, lere wokelu mene rakan honon wali. 4 An rakan Niniwe, ai nala'a lere ida rakanedi kote raram mene loikaru Makromod Nin nou eni. Ai na'aheni, “Lere weli'akka ikar Makromod lo'o na'awoir kote eniyeni!”
5 Niniwe ne'en raram derne rakani, de rala kenekrohu ra'aluli kemen ka ra'ak romun. Nano rai rakan hophopon wahwahan, na'akeme ka ra'ak romun, la hir nair nainair kaduk namwali tanada nahenia mahar hehel kemen ono rira dohohaleni.
6 Rai Ninewe derne Yunus nina wanakunu eni ne, an kopuredi nano nina kadere mahe, ruriyedi nina rain lapa sorsoru eni, nair kaduk, la naikoredi apu wawan namwali tanada mahan hehel kemen.
Yunus loikaru MAKROMOD Lirna ri Niniwe (Yun. 3:4-10)
7 Rai noro nina man hemen na'akeme rala kenekrohu man werek, la konohi manin Niniwe na'akeme na'ahenia, “Yono ri mahaku na'ak nomun, hunuri wana'an na'akeme yono ra'an romun, haenihi,8 la na'akeme nair kaduk. Ri na'akeme kemenedi morimori ailanna, hini'i yak wenewhe yaka, la werre akinhe hi'i lir napanak Makromod.9 Yon hi'i Makromod Nin ahan keper de naramyaka ik haromo, leke yon ik maki.”
10 Makromod po'on hir kemenedi rira hini'i wenewhe man yaka onne me'e, de Ai naramyaka hi penia kan hukum hi lernohi Nin panaeku dedesne me'e.