Yunus na'ahan
4
Makromod Nin panaeku na'awoir kota Ninewe ka namwali, de Yunus akin apinha, ai na'ahan wake'e. 2 Ende an hi'i lir napanak Makromod na'ahenia, “Makromod! Lere ya'u aile ainu'u lekloi makun, ya auroinedi Om hi'i heheni me'e. Enpenia ya'u ken lari laa Spanyol. Ya auroiroin ki O peni Makromod ma namre'e namharu, la ma nala ampun, kam pelek ma'ahan, la akin wa'an mamani. Ya auroin nahenia Om pelek herre Num panaeku hukum ri haenihi. 3 Ende lo'o Kam paeku mesne hi, wa'an rehi ya'u maki me'e.”Makromod wakuku Yunus
4 Makromod walha na'ahenia, “Kan wa'an o ma'ahan panaeku eni!”
5 Enime'ede Yunus namhara kota onne laa wali kimur. An lae ne, an hi'i heuheu ida naikoredi raram, la lapan ke'ede, po'on inhawa namwali kota onne.
6 Makromod Lalap na'ori au or'ori ida lodo nin heuheu wawan de Yunus akin nahuwa'an wake'e ono kan manha me'e.
7 Enimaa oreki nohoropo Makromod Lalap nala orrida laa na'an a'arne, de makiyedi. 8 Onne horu, lere ha'edi, Makromod Lalap nala anna kimur manmanha huu laa Yunus. Lere manha nakadkadi wake'e, de uluwakun apinha de oin makan manlo'o metek, kan paeku mori me'e. Ai napanak na'ahenia, “Wa'an rehi ya'u maki here.”
9 Maa Makromod Lalap na'aheni, “Kan wa'an o ma'ahan au or'oriyana man maki onne!”
Yunus walha, “Ya a'ahan hehenanumene ya'u maki.” 10 Enla Makromod na'aheni, “Au or'oriyaneni mori alam ida mehe namlauwedi. Onne, o ka ma'ori la ka madiyake, maa om po'on namlau lo'o om hehel haenihi. 11 Emene lo'o Ka aramyaka manin Niniwe onnenihe? Kote onne nina ri riwan rahu werro'o rehi ma naise tatana ma ka nauroin ha man wa'an noro man yake, wali'ur rira ha mormori kar akinale.”