Yunus napanak terimkasi Makromod
2
Yunus minle i'in konoin raram hi'i lir napanak laa nin Makromod Lalap na'aheni,2 “Makromode! Lolo ainu'u sus ya apoluwedi O,
Om walhedi ya'u me'e.
Minle mai noho maki ya apoluwedi O,
Om dernedi i lir'u me'e.
3 Om wakaledi ya'u laa kahi raram,
la ya'u keper laa kahi wi'in,
hari paipokoredi ya'u,
la wo'o lapa pupinedi ya'u me'e.
4 Lolo ya'u honorok akin ya a'aheni, ‘Makromod nohiyedi ya'u nano herne kalarne me'e,
de lo'o ka'u do'on Nin Romleu Lapa man moumou dewdewe me'e.’
5 Oir kahi lolo weweredi ya'u,
heleken lape olokedi ya'u,
lumak ra'ihi weweredi yu uluwak'u.
6 Ya'u keper laedi wo'or lehern man aile kahi wi'in me'e,
laedi onno ma nin nike na'inelekedi lolo waliwali,
de kalla kaale leke ya amhara me'e.
Maa Makromod huri we'eredi ya'u nano makimaki onno.
7 Lere onne ka aruri me'e, ya'u horok wali'ur Makromod,
de hi'i lir napanak ki O rakanedi Num Romleu Lapa man moumou dewdeweni.
8 Ri man hoikani aukerhe ma kan min haida waliyedi kili'urne nano Makromod Nina rere'e haharu ma na'akekene hi eni.
9 Maa ya ahinara, a'uli asa'a O,
la hanara onne namwali ainu'u honoi kanani,
la inhawa nou ya'u kikanedi me'e,
lo'o ya'u hi'i wewhe.
Makromod penia man huri we'er ri nano makmaki.”
10 Enime'ede Makromod hopon i'in lapa onne laa ro namokedi Yunus.