Yunus
Yunus kan lernohi Makromod Nina konomdere
1
Makromod wakunu noro Amitai anan Yunus na'ahenia, 2 “Mala'a laa kota lap Niniwe onne, lam konohi ne'en raram memen ma'aheni Ya'u do'onedi hirira honoli yaka na'akeme me'e.” 3 Maa Yunus nahala kemen de nala'a onno namehin leke nako'uwala Makromod. Ende ai nala'a kotida naran Yope. An rakan ne, holikuku kapal ida na'ikeki hopol laa Spanyol me'e. An pair kapal, hopol wewerre noro man howok kapal enihe me'e, leke nako'uwedi Makromod. 4-5 An ha'a kapal eni, kopur laedi daran noyawa wake'e, la namkuruwala tarana, maa namkuru me'ede, mahaledi. Hir hopol rakanedi heleken ne, Makromod nala kahi anna lapa nalwali kapal me'e, de manlo'o mayo'edi. Enpenia man howok kapal enihe ramka'uk rehi de meririi rapolu rir noho makromon man hir hohoi kakani enihe, leke pakuhe. Enla hi rala ukun ne'en wakal laa kahi raram leke ra'arana kapal eni.6 Enime'ede ma nasala kapal eni kopur laa kapal daran noyawa wake'e, do'on Yunus namkukuru worworno de na'ahenia, “Alhi'ihepe mamkuru worne? Mamakedi here! Hi'i lir napanak o makromon man om hohoi kakani leke yon hi'i naramyaka ika harome, yono ik maki.”
7 Kame'ede woro'ohe ha'a laa wawan. Rakan wawan ne, man howok kapal enihe ida ma ne'el ida ra'aheni, “Mai ik hi'i undi leke kauroin inhoi nina sale penia lernala kahi anne lapa eniyeni! Hir hi'i undi ne, Yunus lernale.”
8 Enime'ede hi ra'ukani ai, “Om hi'i inhawa sala penia ik lernala kahi anna lap enie? Onum honowok inhawa? O mamhara nano inhawa leke? Inhawa hair? Inhawa noho?”
9 Yunus walhe na'ahenia, “Ibrani ya'u. Ya'u hoikani Makromod Lalap, man aile a'am raram, la ma nakuku nawau lour noro ro.” 10 Enime'ede an konohi nahenia nahala kemen nano Makromod herne kalarna.
Hir derne nina wanakunu onneni, ramka'uk rehi de ra'ukani, “Alhi'ihepe om paeku hehenie?” 11 Kahi anna eren nammomori me'e de ra'ukani ai na'ahenia, “Am hi'i hehewi o, leke kahi anna namlina wali'ur?”
12 An walhe, “Wakaledi ya'u laa kahi raram leke kahi anna namlina, ono ya'u penia ma nakoko kahi anna lapa eniyeni.”
13 Maa kar sopol Yunus makun, laa rahehe rodi ruri wain kapal laa ro. Enimaa kahi anna eren nammomori, de ka raruri wain laa ro. 14 Enpenia hi rapolu Makromod ra'aheni, “Makromode! Ri eni penia nakoko kahi anna lap eni de, ne'e namhene am wakal ai laa kahi raram. Maa ainim panaeku ka, Makromod mehe hi'i ha wo'ira na'akeme eni namwali. Ende ai mapanak, yom hukumesnai.”
15 Kame'ede kikan Yunus wakal laa kahi raram, ideweni ne kahi anna namlinedi.
Rala Yunus wakal laa kahi raram (Yun. 1:12-15)