Gan Yowas e a nṵsi zok ge Bage ɗiŋnedin ne
24
1 Swaga ge Yowas ne ame gan ka da ne ɗel ɓyalar. Zá gan Ursalima diŋ del wara anda. Na ná a vya gwale ge suwal Bercheba ne ne, a tol na Sibiya. 2 Swaga ge bage tuwaleya Yoyada ne ka gale ne na ndwara ɗe, Yowas ka ke kaŋ ge dosol Bage ɗiŋnedin ndwara se. 3 Yoyada san na gwale ma azi, a tol na vya sonmo ma ne ge zaab ma me.4 Go̰r go, Yowas ɓol dwatɗa ge nṵsi zok ge Bage ɗiŋnedin ne. 5 Kote naa ge ke tuwaleya ma ne Levi vya ma ya se, jan nama go: «Mbo me suwal ge Yuda ne ma go mwaɗak, sya me bware ne Israyela vya ge daage tok go, ne nṵsi zok ge aŋ Dok ne pe del ge daage zi. Ke me temel mbe avun.» Amma Levi vya ma dol bama pala uzi ne temel mbe ta. 6 Gan tol kep tuwaleya Yoyada ya, jan na go: «Kyaɗa mo ba e Levi vya ma ame kaŋ syal ma ne naa ge ne Ursalima diŋ ma ne ge ne Yuda go ma pet tok go to ɗaa? Na ge Musa mo̰r ge Bage ɗiŋnedin ne poseya ne ɓase ge Israyela ne ma ne za̰ ta honna ne gur ge Dok ne pe, na ge maktub wak tuli ne na zi.» 7 Ago Atali gwale ge laar sone kakaɗak poseya ne naa ge ne na pe go ma a vḛne zok ge Dok ne, uwale a abe kaŋ ge mbegeya ge ne zok ge Bage ɗiŋnedin ne zi ma ke temel hon sḭḭm Baal.
8 Gan hon wak go, a nṵsi gum a̰me ɗu, a e na zok ge Bage ɗiŋnedin ne wak zum. 9 A oy ge Ursalima diŋ ne suwal Yuda go pet, ndu ge daage na sya kaŋ ge Musa ne e Israyela vya ma pal babur pul ya go. 10 Naa ga̰l ma ne ɓase ma pet laar saal zi, a ka gene bware ma ya kanna gum zi, a ka wi na. 11 Swaga ge swaga ne mbya ge go Levi vya ma mbo ya abe bware mbo ne na bage ndil kaŋ ma ge gan ne ndwara se ya, ndwara go swaga ge gum ne wi ɗe, bage njaŋgeya ge gan ne poseya ne bage koy kaŋ ma ge kep tuwaleya ne, a mbo ya kan bware se, a gwan ne gum eya na byalam go. A ka ke mbe go dam ne dam, a kote bware digi gḛ ge be to. 12 Gan ma ne Yoyada a abe bware mbe hon naa ge ke temel ge zok ge Bage ɗiŋnedin ne ma, ne da pe, nama ba ka pot naa ge cer njal ma, ne naa ge ke zok pala ma, ne naa ge ɗeere walam ma ne fool ŋgirma ma me. 13 Naa ge ke temel ma wan temel kerra, temel ga ke fogor nama tok go, a nṵsi zok ge Dok ne digi pool na byalam go.
14 Swaga ge a ne á temel kerra, a gene bware pe ge ne ga ya hon gan ma ne Yoyada. A abe bware mbe, a nṵsi kaŋ temel ge ne zok ge Bage ɗiŋnedin ne zi ma, kaŋ ge ke tuwaleya ma, ne seɗe ma ne kaŋ ke kaŋzam ma ge a ne ɗeere nama ne fool kaal ma ne dinar ma.
Swaga ge Yoyada ne ka ne na ndwara ɗe, ɓase ma ka mbo ke tuwaleya ɗaɗak zok ge Bage ɗiŋnedin ne zi.
15 Yoyada sabe gwagwa, su ne del kis para tapolɗu. 16 A mbul na ge sḭḭm pala ge gan ma ne go, Dawda suwal diŋ, ne da pe, ke kaŋ ge kwaɗa ma gḛ ne Israyela suwal pe, ne Dok pe, ne zok ge Dok ne pe me.
Yowas saŋge Bage ɗiŋnedin na go̰r
17 Go̰r siya ge Yoyada ne go, ga̰l ge Yuda ne ma a mbo ya gan ndwara se wan na koo, gan me za̰ nama fare. 18 A saŋge zok ge Bage ɗiŋnedin, Dok ge bama bá ma ne bama go̰r, a ga ke temel mo̰r hon sḭḭm Achera ma ne sḭḭm ge may ma. Ne nama kaŋ kerra mbe ma no pe, a zwal pore ge Bage ɗiŋnedin ne ya suwal Ursalima ma ne Yuda pal pet. 19 Bage ɗiŋnedin teme anabi ma ya nama ta, ndwara saŋge nama haŋgal ma ya se na ta. Anabi ma jan nama fare, amma ndu ge zá̰ nama kat to bat.
20 O̰yom ge Dok ne wat Zakariya ge Bage tuwaleya Yoyada vya zi, mḛ ɓase ma buwal zi, jan nama go: «Dok jan go: ‹Kyaɗa aŋ ba ka yele wak honna ge Bage ɗiŋnedin ne ma pala ɗaa? Aŋ mbo zam zḛ go ŋgeɗo to bat. Ne jo̰ aŋ saŋge Bage ɗiŋnedin aŋ go̰r, na sḛ me mbo saŋge aŋ na go̰r me›.» 21 Ne wak honna ge gan ne ta, a vwal wak na pal, a mbal na ne njal uzi yapul ge zok ge Bage ɗiŋnedin ne go. 22 Go no gan Yowas vyale ne kwaɗa ge Yoyada ge Zakariya bá ne ke ne na, hun Zakariya uzi. Swaga ge Zakariya wak ne ɗage dibiya go, jan go: «Ya̰ Bage ɗiŋnedin na kwa, na ke giliya ne.»
Siya ge Yowas ne
23 Del ɗu go̰r go, asagar ge Siriya ma ne ma mbo det Yowas pore mballa. A ame suwal Yuda mwaɗak ne suwal Ursalima me, a hun ga̰l ma uzi mwaɗak, a pál kaŋ ma, a teme nama mbo hon bama gan suwal Damas ya. 24 Ago asagar ge Siriya ne ma mbo ya woɗege gwa, amma Bage ɗiŋnedin e nama hal asagar ge Yuda ne ma ge ɓase gḛ ma pal no. Ne da pe, a saŋge Bage ɗiŋnedin Dok ge bama bá ma ne bama go̰r. A go no, ge Dok ne e Siriya ma mḛre Yowas. 25 Asagar ge Siriya ma ne gwan, a ya̰ na ne ke moy daŋ pul, na naa vwal bama pe ya na pal, a hun na, na saŋgal pul go, ne na ne hṵ bage tuwaleya Yoyada vya pe. Swaga ge ne sú, a mbul na ge Dawda suwal diŋ, amma a be swaga mbul ta ge gan ma ne go to.
26 Nama ge a ne vwa wak na pal ma dḭl ma no: Zabad ge Chimeyat vya, na ge vya gwale ge Ammon ma ne, ne Yozabad ge Chimrit vya, na ge vya gwale ge Mowab ma ne. 27 Yowas vya ma dḭl ma, ne fare ma gḛ ge anabi ma ne jya̰ na pal ma, ne na temel ge ne nṵsi zok ge Dok ne ma, a njaŋge nama ya maktub hare fare pe ge gan ma ne zi.
Na vya Amasiya zam gan na byalam go.