A é Yowas gan suwal Yuda pal
23
1 Del ge ɓyalar go, bage tuwaleya Yoyada sal na laar, dol temel mbo tol ga̰l ge asagar ma ne ma ya: Azariya ge Yeroham vya, ne Ismayel ge Yohanan vya, ne Azariya ge Obed vya, ne Maaseya ge Adaya vya, ne Elichafat ge Zikri vya. 2 Naa mbe ma an suwal ge Yuda ne go pet, a kote Levi vya ma poseya ne ga̰l ge vuwal pe ge Israyela vya ma ne ma ya Ursalima diŋ. 3 Ge zok ge Dok ne zi, ɓase ma pet, a ke wak tuli ne gan. Bage tuwaleya Yoyada jan nama go: «Ndi me gan vya no! A tem na ká gan dimma ne Bage ɗiŋnedin ne ke wak tuli ne Dawda vya ma go. 4 No a kaŋ ge aŋ ba mbo kerra ne: Levi vya ma ne naa ge ke tuwaleya ma ge a ne mbo wan temel ya dam ɗigliya go ma, a mbo caɗe nama se pe ataa. Mbut ma mbo ga koy zok wak ga̰l, 5 ge mbut ma ga dol bama ndwara gan zok wak pal, ge mbut ma ga koy zok wak Yesod me. Ɓase ge may ma mbo ga mḛya ge yapul ge zok ge Bage ɗiŋnedin ne go. 6 Ndu a̰me ge baŋ go ɗar na wá zok ge Bage ɗiŋnedin zi ya to, ɗeŋgo na ka naa ge ke tuwaleya ma ne Levi vya ge ne temel wak go ma, ne da pe, a mbege nama mbege. Ago ɓase ge may ma nama gwa̰ ne nama pala eya ge Bage ɗiŋnedin pe se. 7 Levi vya ma mbo ver gan se ne bama kaŋ pore ma bama tok go, a mbo ka ɗame na, na swaga luwaɗeya yapul go. Ago ndu ge daage pet ge ne mbo wat ja yapul diŋ, a hṵ na uzi.»8 Levi vya ma poseya ne Yuda ma pet a ke tem dimma ne bage tuwaleya Yoyada ne ho̰ bama na wak go. A abe bama naa bama pe go, nama ge ne wan temel dam ɗigliya go ma, poseya ne nama ge ne á bama temel dam ɗigliya go ma. Ago bage tuwaleya Yoyada be ya̰ ndu a̰me ɗu uzi to. 9 Bage tuwaleya Yoyada var asagar ma ga̰l ma gan Dawda ɓiyaar ge ga̰l ma ne ge zaaso ma ge ne ka zok ge Dok ne zi nama tok go. 10 E naa ne bama kaŋ pore ma bama tok go, a mḛ ne zok le ge matoson go ɗiŋ mbo le magul ya, twal tuwaleya ma ne zok ge Dok ne ndwara ŋga, ndwara ver gan zi. 11 Go̰r go, wan gan vya ya zum, par na kadmul gan na pal, hon na maktub wak tuli na tok go me. Yehoyada ma ne na vya ma kan num na pal ndwara é na gan. Ɓase ma suwa̰le digi tetege go: «O i gan! O i gan!» 12 Swaga ge Atali ne za̰ ɓase ma ka̰l suwa̰leya uware gan, mbo ɓase ma buwal zi ya zok ge Bage ɗiŋnedin ne zi. 13 Ndil swaga, kwa gan ne mḛya na tandal digi zok ge mbegeya wak go, ga̰l ge asagar ma ne ma ne naa ge sun burci ma a ver na ya se, a ka ke laar saal ne burci sunna ma. Ɓase ma pet a ka ke laar saal ge be ɗo to, a ka sun burci ma, naa ge mbal kaŋ ma ne bama kaŋ haleya ma a ka uware na ne kaŋ mballa ma. Swaga ge Atali ne kwa no, taabe na ba̰r ma ne na ta uzi, á na pe janna go: «A ndwara mbuɗiya ne! A ndwara mbuɗiya ne!»
14 Bage tuwaleya Yoyada jan asagar ma ga̰l ma go, nama wa̰ na, nama gene na zum ya, ndu ge ne kare na pe ya ya, nama wa̰ na, nama hṵ na uzi. Ago Bage tuwaleya jya̰ fare mbe no ne da pe, na kaage nama hṵ na zok ge Bage ɗiŋnedin ne zi to. 15 A wan na, a wat ne na ya zum viya̰ wak ge tisi ma ne ge ne mbo gan yadiŋ ya go, a hun na swaga mbe go.
16 Yoyada é ɓase ma, ne gan me, a ke wak tuli ta buwal zi go, ne ga ne zḛ no, bama gá Bage ɗiŋnedin naa ma. 17 Ɓase ma pet a mbo zok ge sḭḭm Baal ne ya, a gul na, a gul na twal tuwaleya ma, a ɓá Baal kḭḭm ma uzi, a hun Mattan, bage tuwaleya ge Baal ne ge twal tuwaleya wak go. 18 Yoyada hon Levi vya ma, naa ge tuwaleya ma temel koy zok ge Bage ɗiŋnedin ne wak dimma ne Dawda ne e nama kerra zok ge Bage ɗiŋnedin ne zi go. Ne da pe, nama ka tyare tuwaleya ge tilla uzi ma hon Bage ɗiŋnedin dimma ne a ne njaŋge na ne maktub eya ge Musa ne zi go, nama ka ke laar saal ne mbal kaŋ ge Dawda ne ma me. 19 Yoyada e naa koy zok ge Bage ɗiŋnedin ne wak, ne da pe, na kaage ndu ge harcal to a̰me na wá zok ge Bage ɗiŋnedin ne zi to. 20 Kote asagar ma ga̰l ma, ne naa ga̰l ma, ne naa ge ne suwal pal ma, ne ɓase ma pet, a ɗame gan ne zok ge Bage ɗiŋnedin ne zi diŋ mbo gan yadiŋ ya ne viya̰ ge zok wak ga̰l ne. A e gan katɗa na hool gan pal. 21 Swaga ge a ne hṵ Atali, ɓase ma pet a ke laar saal, suwal iyal se halas me.