झुट लगूणकि सजा
(प्रेरितों ५:१-११)
5
1 फिर एक मैंस जैक नाम हनन्याह छी, उ और वीक स्यैणि सफीराल आपस मिं बात-चीत करिबेर आपण थ्वाड़ जमीन बेची। 2 उनुल जमीनक दाम बे थ्वाड़ डबल आपण लिजी बचै लेई, और बकाइ रुपैं लिबेर पतरस कैं यौ कैबेर देई कि यौ लियो, यौ हमर गड़ॉक डबल छन। 3 लेकिन पतरस कैं पवित्र आत्माक जरियल पत्त लागौ, कि उ झुटि लगूणौ। यैक लिजी वील हनन्याह धैं कौ, "तु शैतानकि बात सुणिबेर परमेश्वर कैं ध्वक किलै दिणौछै! 4 के जब तलक उ जमीन बेची नि रैछी उ तेरि नि छी, बेचीणक बाद लै के उं डबल त्यरै नि छिया? तब त्वील आपण मन मिं यस करणक विचार किलै सोचौ, कि हम झुटि लगैबेर जमीनक डबलों मिंबे थ्वाड़ डबल चुपचाप आपण लिजी बचै लिंनू?" 5 यौ सब सुणिबेर हनन्याह भिं मिं छुटौ, और वील दम तोड़ दे।6 तब थ्वाड़ जवानोंल ऐबेर उकैं कप्ड़ मिं लपेटौ और भ्यार लिजैबेर दफनै दे। और सब जनुल यौ बात सुणी, उं भौतै डरि ग्याय।
7 यैक तीन घन्टक बाद हनन्याहकि स्यैणि सफीरा लै वां ऐ। उकैं आपण बैगक मौतक बारि मिं के पत्त नि छी। 8 पतरसल उधैं पुछौ, "के तुमुल जमीन इदुकै डबलों मिं बेचछा?" वील जबाब दे, "होई, इदुकै मिं बेची।" 9 तब पतरसल कौ, "यौ के बात छु, कि तुम द्विनोंल परमेश्वरक आत्माक इम्तिहान लिणक सोची? देख, त्यर बैग कैं दफनूनियोंक खुटक अवाज द्वार तलक ऐ गे, ऑब उं तुकैं लिबेर जॉल।" 10 तब उ च्याट वीक खुटॉन मिं छुटी और वील लै दम तोड़ दे। तब दफनूनियोंल भितेर ऐबेर उकैं लै मरी पा, और भ्यार जैबेर उकैं लै वीक आदिमक दगाड़ दफनै दे। 11 यौ घटनाल सब मैंसों मिं डर छै गोय।
खाश शिष्योंक चमतकार
(प्रेरितों ५:१३-१५)
12 खाश शिष्योंल मैंसोंक बीच मिं ठुल-ठुल चमतकारॉक काम दिखाईं, और यौं सब विश्वासी मैंस परमेश्वरक भवन मिं एक दगाड़ जॉम हुंछी। 13-14 दुसॉर यहूदी मैंसोंक नजर मिं उनेरि भौत इज्जत छी, लेकिन उं उनर पास उण मिं डरछी। तब लै यीशु मिं भरौस करणी मैंसोंक गिनती रोज-रोज बढ़नै जाणैछी। 15 खाश शिष्योंक ठुल-ठुल चमतकारॉक कामोंल वांक मैंस आपण घरॉक बिमारों कैं लै बॉट मिं यैक लिजी धरछी, कि अगर पतरसक स्योव लै इनुमिं पड़ि जॉल, यौं भॉल है जॉल। 16 और ऑश-पासक सब गौंनों बे बिमार और भूत लागीं मैंसों कैं लै खाश शिष्योंक दगाड़ भेट करूणक लिजी मैंस उनुकैं लिबेर उंछी, और उं सब आपण रोगों बे भॉल है जाछी।
शिष्यों मिं सताव
(प्रेरितों ५:१७-४२)
17-18 लेकिन यौ सब कारणल महायाजक और धर्म गुरुओंल जलनक कारणल खाश शिष्यों कैं पकड़िबेर जेल मिं बन्द करि दे। 19-20 पर रात मिं परमेश्वरक दूतल उनुकैं भ्यार निकालिबेर कौ, "तुम यांबे परमेश्वरक भवन मिं जैबेर मैंसों कैं यौ नई जीवनक बारि मिं बताओ!" 21 यैक लिजी उं रात्ति पर परमेश्वरक भवन मिं जैबेर मैंसों कैं फिर उपदेश दिण लागीं।
और दुसर तरफ महायाजकल न्यायालयकि सभा बुलवै, और उनुकैं जेल बे खाश शिष्यों कैं वां बुलूणक हुकुम दे। 22-23 पर जनुकैं उनुल बुलूणक लिजी भेजि रॉखछी, उनुकैं जेल मिं क्वे नि मिल। जेलॉक द्वार तो भली कै बन्द छी, चौकदार लै वैं छी, लेकिन शिष्योंक के पत्त-पाणि नि छी!
24 तब महायाजक और परमेश्वरक भवनक चौकदारोंक सैप यौ सुणिबेर फिकर करण लागीं कि ऑब के ह्वल! 25 पर कैलै ऐबेर उनुकैं बता, "जो मैंसों कैं तुमुल पकड़िबेर जेल मिं खिति रॉखछी, उं परमेश्वरक भवन मिं मैंसों कैं उपदेश दिणईं!" 26 तब चौकदारोंक सैप आपण मैंसोंक दगाड़ गो, और खाश शिष्यों कैं सभा मिं ला। उं उनुकैं बौथ्यैबेर ल्युणौछी, किलैकि उं मैंसों कैं देखिबेर डरणाछी कि कैं उं हमुकैं ढुङल नि मारो।
27-28 तब महायाजकल शिष्यों धैं पुछौ, "के हमुल तुमुधैं यौ नि कै रॉख छिया कि तुम यौ यीशुक बारि मिं मैंसों कैं उपदेश नि दिया? फिर लै तुमुल सॉर यरुशलेम मिं यौ उपदेश फैलै दे, और तुम हमुकैं यीशुक खूनक जिम्मेदार बणूणाछा!"
29 यौ सुणिबेर पतरस और दुसॉर खाश शिष्योंल कौ, "हमर लिजी तुमर है जरूरी, परमेश्वरक हुकुम मानण छु। 30 किलैकि हमर पुरखोंक परमेश्वरल, यीशु मसीह कैं दुबार ज्यून करौ, जनुकैं तुमुल सूली मिं लटकैबेर मारि देछी। 31 और उनुकैं परमेश्वरल प्रभु और मुक्तिदाता ठैरैबेर आपण दैण हातक तरफ उंच्च जॉग मिं बैठा, कि उं इस्रायलियों कैं आपण पापों बे मुड़णक मौक और माफि लै दियो। 32 हम सब यैक गवाह छूं। उस्सै पवित्र आत्माक लै, जो परमेश्वरल आपण मानणिवॉलों कैं दी रॉखी।"
33 लेकिन जब महायाजक और धर्म गुरुओंल यौ बात सुणी, तब उं रीशल लाल-पिङव हबेर उनुकैं मारणक लिजी तैय्यार है ग्याय। 34 लेकिन गमीऐल नामक एक धर्म गुरुल जैक सब मैंस इज्जत करछी, वील सभा मिं ठॉड़ हबेर कौ, "उनुकैं थ्वाड़ देरक लिजी भ्यार करि दियो।" तब उनुल उस्सै करौ।
35 यैक बाद गमीऐलल कौ, "इस्रायली मैंसों, तुम इनर दगाड़ जे लै करला, सोच-समझिबेर करिया। 36 किलैकि थ्वाड़ बखत पैली थियूदास नामक मैंस यौ दाव करिबेर ठॉड़ हौ कि मी लै के छूं, और लग-भग चार सौ मैंस वीक पछिल गेईं। लेकिन उ मारी गोय, वीक बाद वीक शिष्य लै तितर-बितर है ग्याय, और फिर उनर के नाम निशाण नि रौय। 37 थियूदासक बाद यहूदा नामक एक दुसर मैंस ठॉड़ हौ, और भौत मैंस वीक पछिल है ग्याय, पर वीक मरणक बाद उं सबनक लै जड़-टुक के नि रौय। 38 यैक लिजी मी यौ मामुल मिं तुमुधैं कूंनू कि तुम इनर दगाड़ के मतलब नि धरो, किलैकि अगर यौ काम मैंसोंक तरफ बे ह्वल, तब एक दिन यौ आफी खतम है जॉल। 39 लेकिन अगर यौ परमेश्वरक तरफ बे ह्वल, तब यकैं कभै नि मिटै पाला। इनर दगाड़ आपण व्यवहारल कैं यस नि हो कि तुम परमेश्वरक दगाड़ लै लड़निवॉल नि बणि जाओ।"
40 तब उनुल वीक बात मानिबेर खाश शिष्यों कैं भितेर बुलैबेर चाबुक लगूणक बाद उनुकैं यौ हुकुम दे, कि ऑब तुम मैंसों कैं यीशुक नामल क्वे उपदेश नि दिया।