रूत गड़ मिं जानै
(रूत २:१-१३)
2
1-3 तब एक दिन रूतल आपणि सॉस धैं कौ, "मिकैं मैंसोंक गॉड़ों मिं जाण दियो, कि जो मैंस मी मिं दया करिबेर यौ काम करण द्याल, मी उनार पछिल बे छुटी-छाटी बालड़ों कैं जॉम करुंल।" यौ सुणिबेर सॉसुल कौ, "ठिक छु, तु जा, इजा।" तब रूत जैबेर खेति कॉटणियोंक पछिल-पछिल जौंक बालड़ों कैं जॉम करणक लिजी उ गड़ मिं पुजी, जो नामीक घरवालक रिश्तदार बोअजक छी। उ अमीर मैंस छी। और यैक अंताज रूत कैं नि छी। 4-5 यैक बाद जब बोअजल वां ऐबेर यौ चेलि कैं काम करन देखौ, तब वील आपण मुन्शी धैं पुछौ, "पार उ को छु?" 6 उ मुन्शिल जबाब दे, "यौ चेलि मोआब देशकि छु, और यौ वांबे नामीक दगाड़ ऐ रै। 7 तैल रात्तै ऐबेर मिधैं पुछौ कि मी तुमर जौं कॉटणियोंक पछिल बे छुटी-छाटी बालड़ों कैं जॉम करि ल्यूं? और वीक बाद बे तौ लगातार आपण काम मिं लागि रै, तैल बस जरा देर छॉन भितेर ऐराम करछी, वीक बाद बे तो लागियैं छु।" 8 तब बोअजल रूतक पास जैबेर कौ, "सुण, चेली, तु और कैकै गड़ों मिं झन जाये। तु हमार कामदारोंकै दगाड़ पछिल पछिलै आपण काम करिये। 9 और उं जो-जो गड़ों मिं जॉल तु लै वैं जाये। और मील आपण सब बैग कामदारों कैं हुकुम दी रॉखौ कि उं त्यर दगाड़ क्वे लै छेड़-खानी नि करो। और जब तुकैं पाणितीस लागेलि, तब तु यौ भाड़ूं मिं बे पिये जकैं हमार मैंस भर रॉखनी।" 10 तब रूतल बोअज कैं पैलाग करिबेर कौ, "सैपज्यू, तुम म्यर इतुक ध्यान किलै धरणाछा, जबकि मी एक परदेशि छूं?" 11 बोअजल उधैं कौ, "जस त्वील आपण आदिमक मरणक बाद लै आपण सॉसक लिजी भल करि रॉखौ, मील यौ सब सुण रॉखौ और मिकैं यौ लै पत्त लागौ कि तु आपण इज-बौज्यू और आपण जनम भूमी कैं छोड़िबेर यॉस मैंसोंक बीच मिं रुणक लिजी ऐ रैछै, जनुकैं तु नि पछ्याणनी। 12 यैक लिजी प्रभु परमेश्वर तुकैं त्यर कामोंक बदाव दियो। और इस्रायलियोंक परमेश्वर जैक शरण मिं तु ऐ रैछै, उं तुकैं भौत आशीश दियो।" 13 वीक बाद रूतल उधैं कौ, "म्यर मालिक, तुमेरि दया मि पर हैरै। किलैकि मी तो तुमेरि नौकरोंक बारबर लै न्हैंतियूं, फिर लै तुमुल मिकैं भली कैं समझैबेर तसल्ली दे।"बोअज रूतक ख्याल करूं
(रूत २:१४-२३)
14 खॉण बखत बोअजल रूत धैं कौ, "आ, तु लै हमर दगाड़ भैबेर खॉण खा।" और वील रूत कैं र्वटक दगाड़ अंगूरकि रसकि चटणि लै दे। और वील उकैं थ्वाड़ उमिं लै देई। रूतक पेट भरीणक बाद थ्वाड़ खॉण बचि लै गोय, जो च्वख छी। वील उ आपण सॉसक लिजी धरि दे। 15-16 जब उ फिर उठिबेर जौं बालाड़ जॉम करण लागी, तब बोअजल आपण नौकरों धैं कौ, "तुम यकैं बालाड़ जॉम करण दिया, और पुलोंक बीच-बीच मिं लै तुम थ्वाड़-थ्वाड़ बालाड़ छोड़नै रया, जनुकैं यौ जॉम करि सको। और यकैं परेशान झन करिया।" 17 रूतल बयाव तलक गड़ों बे बालाड़ जॉम करीं, और जब उ चुटणक बाद भरीं, तब उ पांच पैंसेरि हईं। वीक बाद वील आपण घर वापिस ऐबेर जौं आपण सॉस कैं दिखाई, 18 और वीक अलावा वील उ खॉण लै दे जो उ समाइबेर ल्यै रैछी। 19 रूतक सॉसल खुशि हबेर पुछौ, "इजा, त्वील आज कैक वां काम करौ? उ मैंसक भौत भल है जो।" तब रूतल आपण सॉस कैं बता कि जैक वां मील आज काम करौ, वीक नाम बोअज छु। 20 तब नामील रूत धैं कौ, "ज्यून और मरियों द्विनों मिं आपण दया करणी परमेश्वर बोअज कैं भौतै आशीश दियो! उ हमर करीबी रिश्तदार छु, जैक हमुकैं समावणक फर्ज लै छु।" 21 तब रूतल कौ, "उनुल मिधैं यस लै कै रॉखौ कि जब तलक म्यार काम करणी मेरि फसल कैं नि काटि लिन, तब तलक तु उनरै दगाड़ काम करिये।" 22 नामील रूत धैं कौ, "इजा, यौ त्यर लिजी भल छु कि तु बोअजकि नौकराणियोंक दगाड़ वीक गॉड़ों मिं काम करणैछै। 23 अगर तु दुसरोंक गॉड़ों मिं काम करनी, तब उं तुकैं परेशान करछी।" इसिक रूतल बोअजकि नौकराणियोंक दगाड़ जौं और ग्यों कॉटण तलक बालाड़ जॉम करीं। और उ आपण सॉसुक दगाड़ रुंछी।