शुरुवाद 42

यूसुफॉक भै वीक पास उंनी

(उत्‍पत्ति ४२:१-२८)

1 ऐल जब कनान देश मिं लै यौ अकाल पड़ि रौछी, तब याकूब कैं पत्त लागौ कि मिस्र देश मिं अनाज छु। तब वील आपण च्‍यालों धैं कौ, "तुम एक दुसरक मूख किलै चाणाछा? 2 मील सुणौ कि मिस्र देश मिं अनाज छु। तुम वां जाओ और खॉणक लिजी अनाज खरीदिबेर ल्‍याओ, जैल हम ज्‍यून रूंल।"

4-5 यैक लिजी याकूबॉक च्‍याल लै दुसॉर देशोंक मैंसोंक चारि मिस्र देश मिं अनाज खरीदणक लिजी ऐ राछी। लेकिन याकूबल यूसुफक नॉन भै बिन्‍यामीन कैं उनर दगाड़ नि भेजि रॉखछी, किलैकि उ डरछी कि कैं बिन्‍यामीन मिं क्‍वे मुशीबत नि ऐ पड़ो।

6 यूसुफ मिस्र देशक उप-रॉज छी, और उ सब देशोंक मैंसों कैं अनाज बेचछी। यूसुफॉक भै लै वीक सामण आईं और उनुल चौड़ हबेर यूसुफ कैं पैलाग करौ। 7-8 जब वील आपण भैनों कैं देखौ, तब उनुकैं पछ्‌याण ले पर उनुल नि पछ्‌याण। तब यूसुफल उनर दगाड़ अपछ्‌याणक चारि बात करी। वील उनुधैं जोर-जोरल पुछौ, "तुम को छा, और कांबे ऐ राछा?" उनुल जबाब दे, "हम अनाज खरीदणक लिजी कनान देश बे ऐ रयूं।"

9 और तब यूसुफ कैं आपण स्‍वीण याद आ, जो वील आपण भैनोंक बारि मिं देखि रॉखछी।

वील उनुधैं कौ, "तुम लोग जासूस छा, और मिस्र देशक भेद लिणक लिजी ऐ राछा।" 10 उनुल यूसुफ धैं कौ, "नै, नै, मालिक, हम तुमर दास छूं और यां सिरफ अनाज खरीदणक लिजी ऐ रयूं। 11 हम सब भै छूं। हम सांचि कूणयूं कि हम जासूस न्‍हैंतियूं!" 12 लेकिन यूसुफल कौ, "ना, तुम मिस्र देशक भेद लिणक लिजी ऐराछा।" 13 उनुल फिर कौ, "ना, हम बार भै छूं। और हमर घर कनान देश मिं छु, हमर सबों है नॉन भै बौज्‍यूक दगाड़ घर मिं छु। और एक भै ऑब नि रौय।"

14 यूसुफल उनुधैं कौ, "जो बात मील तुमुधैं कै उ सांचि छु, तुम जासूस छा। 15 तुमर पूछताछ करी जालि। मी रॉजकि कसम खांनू कि जब तलक तुमर नॉनवॉल भै नि आल तब तलक तुम यां बे नि जै सकना। 16 तुम आपुं मिं बे एक भै कैं घर भेजो कि उ तुमर भै कैं लिबेर आओ। तब तलक तुम बन्‍दी रौला। यैल तुमेरि बातकि पूछताछ करी जालि कि तुम सांचि छा या झुट। रॉजक जीवनक कसम तुम जासूसै छा!"

17 तब यूसुफल उनुकैं तीन दिन तलक जेल मिं धरौ।

18 तीन दिनक बाद यूसुफल उनुधैं कौ, "मी परमेश्‍वर कैं माननू, यैक लिजी मी तुमुकैं यौ साबित करणक एक मौक दिंनू कि तुम सांचि कूणाछा। तुम यौ साबित करो और मी तुमुकैं ज्‍यून रुण द्‍यूंल। 19 अगर तुम सांचि मैंस छा, तब तुमुमिंबे एक भै जेल मिं रओ और बकाइ सब भै आपण परिवारक लिजी अनाज लिबेर जाओ। 20 लेकिन तुम आपण सबों है नॉन भै कैं म्‍यर सामण लिबेर आया। इसिक तुमेरि बात लै सांचि होलि और तुम मरण है बचि जाला।"

21 तब भैनोंल आपस मिं बात करिबेर कौ, "सांचि मिं हम आपण भै यूसुफक प्रति कसूरदार छूं। जब वील हमुधैं दयाकि भीख मांगी, तब हमुल वीक दु:ख देखौ लेकिन हमुल के नि कर। ऑब हमुधैं वीक दु:खक बदाव ली जॉल।" 22 रूबेनल उनुधैं कौ, "के मील तुमुधैं नि कौछिया कि यूसुफक खिलाफ पाप नि करो? पर तुमुल मेरि बात नि सुणि। ऑब हमुकैं यैक सजा मिलेलि।"

23 यूसुफ और उनरि बीच बात-चीत एक तिसर आदिमक जरियल हुंछी, जो उं द्विनोंकि बात समझछी। इसिक उनुकैं यौ बातक पत्त नि चल कि यूसुफ उनरि भाषा कैं समझुं। 24 यूसुफ उनर सामण बे पलिकै जैबेर डाड़ मारण लागौ। जब उ फिर उनर सामण आ तब वील शिमोन कैं उनर सामण बदवैबेर बन्‍दी बणै ले।

25 तब यूसुफल आपण दासों कैं हुकुम दे कि भैनोंक बोरियों मिं अनाज भर दियो और हर एकक रुपैं लै उनार बोरियों भितेर धरि दिया। और उनुकैं बॉटक लिजी खॉण लै दिया। उनुल उसै करौ।

26 यूसुफॉक भै अनाजक बोरि आपण आपण गधों मिं लादिबेर वां बे जानै रईं। बॉट मिं, जब उं रात बितूणक लिजी रुकीं, तब उनुमिं बे एकल आपण गधा कैं चार दिणक लिजी बोरि खोलौ। तब वील वैं आपण रुपैं देखीं! 28 वील आपण भैनों कैं बुलैबेर कौ, "अरे, देखौ म्‍यार रुपैं यैं छन! यौं म्‍यर बोरि मिं छी!" यौ सुणिबेर उं सब डरि पड़ीं और एक-दुसरक मूख चाण लागीं, कि परमेश्‍वरल हमर दगाड़ यौ के करौ?

भै आपण घर पुजीं

(उत्‍पत्ति ४२:२९-३८)

29 जब उं कनान देश मिं आपण बौज्‍यूक पास पुजीं तब उनुल कौ, 30 "मिस्र देशक उप-रॉजल हमर दगाड़ भली कै बात नि करी। वील हमुकैं उ देश मिं जासूस समझौ। 31 लेकिन हमुल कौ, "हम सांचि मैंस छूं, हम क्‍वे जासूस न्‍हैंतियूं। 32 हम बार भै यक्‍कै मैंसक च्‍याल छूं। हमर एक भै ऑब ज्‍यून न्‍हैं। और एक भै हमर बौज्‍यूक दगाड़ कनान देश मिं छु।" 33 तब उ देशक उप-रॉजल हमुधैं कौ, "अगर तुम यौ काम करला, तब मी मॉन ल्‍यूंल कि तुम सांचि मैंस छा। तुम आपण भैनों मिंबे एक कैं म्‍यर पास छोड़ि जाओ और बाकि आपण पुर परिवारक लिजी अन्‍न लिबेर जाओ। 34 और आपण नॉन भै कैं म्‍यर पास लिबेर आओ। जब मिकैं भरौस ह्‌वल कि तुम जासूस न्‍हैंता, तब मी तुमर यौ भै कैं लै छोड़ि द्‍यूंल, और तुम हमर यौ देश मिं धंध लै करि सकला।""

35 जब उनुल आपण अन्‍नक बोरि खोलीं तब उनुल आपण-आपण रूपैंक थैल लै बोरियों मिं देखीं। उं सब डरि पड़ीं। 36 याकूबल कौ, "तुमुल मिकैं बे-औलाद करि है! यूसुफ तो नि रौय, ऑब शिमोन लै न्‍हैं, और तुम बिन्‍यामीन कैं लै ली जाणकि बात करणाछा! यौ सब परेशानी मिं पर ऐ रै।" 37 रूबेनल आपण बौज्‍यू धैं कौ, "अगर मी बिन्‍यामीन कैं वापिस नि ल्‍यूंल, तब तुम म्‍यार द्विवै च्‍यालोंक गव काटि दिया। पर ऐल तुम तकैं मिकैं सौंप दियो। मी तकैं तुमर पास जरूड़ वापिस लूंल।" 38 लेकिन याकूबल कौ, "बिन्‍यामीन तुमर दगाड़ कतई नि जाओ। वीक भै यूसुफ तो मरि गो, ऑब यौ यकलै बचि रौ। मी बुड़ छूं, और अगर बॉट मिं बिन्‍यामीन मिं क्‍वे परेशानी आलि तब मी यौ दु:खलै मरि जूंल।"