पैल परिवार
(उत्पत्ति ४:१-१६)
4
1 वीक बाद आदमकि स्यैणि अङ-भारि भै और वील एक नॉनतिन कैं जनम दे और वीक नाम वील "कैन" धरौ किलैकि वील कौ, "प्रभु परमेश्वरकि मधतल मील एक मैंस पैद करि है।" 2 यैक बाद हव्वाल दुसर नॉनतिन कैं जनम दे, और उनुल वीक नाम हाबिल धरौ। उ ठुल हबेर भेड़ बकॉरॉक ग्वाव बणौ, और वीक भै कैन खेति करणी जिमदार बणौ।3 एक दिन खेति काटिबेर परमेश्वर कैं धन्यवाद दिणक लिजी कैनल थ्वाड़ नाज परमेश्वर कैं भेट चढ़ा। 4 और हाबिलेल लै आपण भेड़क उ साल मिं पैद हईं सबों है पैलिवॉल भेड़क बोक्की कॉटौ और वीक सबों है भल हिस्स परमेश्वर कैं चढ़ा। और प्रभु परमेश्वर हाबिल और वीक भेट कैं देखिबेर खुशि हौ, 5 लेकिन कैन और वीक ल्याई भेट देखिबेर परमेश्वर खुशि नि हौय। तब कैन रीशल लाल-पिङव हौ।
6 यौ देखिबेर परमेश्वरल कैन धैं पुछौ, "तु लाल-पिङव किलै है रेछै? 7 अगर तु भल करलै, तब मी तुकैं देखिबेर लै खुशि रूंल। लेकिन अगर तु भल काम नि करलै, तब देख, पाप तुकैं आपण बश मिं करण चां, पर त्वील उकैं आपण बश मिं करण छु।"
8 लेकिन कैनल आपण भैक पास जैबेर कौ, "आ हम गॉड़ोंक ऑश-पासक जॉग मिं जांनू।" तब उं वां गेईं, वां कैनल ध्वक दिबेर हाबिल कैं मारि दे।
9 कैनक वांबे उणक बाद परमेश्वरल उधैं पुछौ, "त्यर भै हाबिल कां छु?" तब कैनल जबाब दे, "पत्त न्हैं। मी आपण भैक ग्वाव जै के छी? 10 परमेश्वरल उधैं कौ, "त्वील यौ कै करौ? त्यर भैक खून जो धरति मिं बगणौ, उ मिधैं न्याय मांगनौ। 11 किलैकि त्वील आपण भैक खून करिबेर धरति कैं अशुद्ध करौ, यैक लिजी मी तुकैं यौ जॉग बे निकालनू। 12 अगर तु धरति मिं बीं बोलै, तब वीमिं क्वे लै फल नि लागो। पुर धरति मिं कैं त्यर ठौर-ठिकाण नि हो। और तु हमेशा इथां-उथां फेरीनै रौलै।"
13 यौ सुणिबेर कैनल प्रभु परमेश्वर धैं कौ, "तुमेरि यौ सजा म्यर सहण है भ्यार छु। 14 म्यर तरफ चा। तुमुल मिकैं यांबे निकालि है और ऑब मी तुमर नजिक नि ऐ सकन। जकैं लै मी मिलुंल उ मिकैं मारि द्यल, और यौ डरिल मी हमेशा इथां-उथां भॉजनै रूंल।"