बैग-स्यैणि इम्तिहान मिं फेल हुंनी
(उत्पत्ति ३:१-७)
3
1 परमेश्वरक बणाई सब जानवरों मिं स्याप सबों है जादे चलॉक छी। वील स्यैणि कैं ध्वक दिणक मंशाल पुछौ, "के परमेश्वरल तुधैं कौछा कि तुम बगीचक क्वे लै बोटक फल झन खाया?" 2 स्यैणिल स्याप धैं कौ, "ना, हम बगीचक बोटोंक फल खै सकनू, 3 लेकिन एक बोटक फल यस छु जकैं हम नि खै सकन। परमेश्वरल हमुधैं कौ, बगीचक बीचवॉल बोटक फल तुम नि खाया, और उकैं छुङिया लै झन। किलैकि अगर तुम उकैं खाला, तब जरूड़ मरि जाला।"4 लेकिन स्यापल स्यैणि धैं कौ, "तुम कतई नि मरला। 5 लेकिन परमेश्वर जाणुं कि जब तुम उ बोटक फल खाला, तब नक और भलक बारि मिं जाणिबेर तुम परमेश्वरक समान है जाला।" 6 तब स्यैणि देखौ कि उ बोट भलौ छु, और वीक फल खॉण लैकक छु, और उकैं समझदार बणण भल लागछी। येक लिजी वील बोट बे फल टोड़िबेर खा। उ बखत वीक बैग लै वीक दगाड़ छी, और स्यैणिल आदुक फल उकैं दे और वील लै खा।
7 तब स्यैणि और बैग द्विनों कैं यौ समझ ऐ गेईं कि हमुल यौ के करौ! और उनुल देखौ कि हम नॉङड़ै छूं। यौ देखिबेर उनुकैं शरम लागि गेई, और उनुल तिमुलॉक पातोंक लुकुड़ बड़ैबेर पैरीं।
परमेश्वरक फैसॉल
(उत्पत्ति ३:८-२४)
8 फिर उ दिन ब्याव बखत जब स्यैणि-बैगल बगीच मिं परमेश्वरक उणक अवाज सुणी, तब उं द्विवै बुजों मिं लुक गेईं। 9 तब परमेश्वरल मैंस कैं धात लगैबेर पुछौ, "ओ! आदम, तु कां छै?" 10 तब मैंसल बुज भितेर बे कौ, "मी तेरि उणकि अवाज सुणिबेर डरि गोयूं, किलैकि मी नॉङड़ै छूं। यैक लिजी मी लुक गोयूं।" 11 प्रभु परमेश्वरल मैंस धैं पुछौ, "तुकैं कसिक पत्त चलौ कि तु नॉङड़ै छै? मिकैं लागणौ कि तुमुल उ खाश बोटक फल खै है, जकैं खॉणक लिजी मील मना करि रॉखछी!" 12 तब मैंसल कौ, "होई, मील खा, लेकिन जो स्यैणि तुमुल मिकैं दी रॉखी, वील फल टोड़िबेर मिकैं खवा।" 13 तब प्रभु परमेश्वरल उ स्यैणि धैं कौ, "त्वील यस किलै करौ?" स्यैणिल कौ, "स्यापल मिकैं उल्टि मति दे, तब मील उ फल खा।"
14 तब प्रभु परमेश्वरल स्याप धैं कौ, "त्वील यौ भौत गलत काम करौ। यैक लिजी जानवरों मिं तेरि हालत सबन है खराब होलि। तु आज बे आपण पेटल हिटलै और जीवन भर मॉट चाटलै। 15 मी तुकैं और यौ स्यैणि कैं एक दुसरक दुश्मण बणूंल, और तुम द्विनोंक बच्च लै आपस मिं दुश्मण ह्वाल। उ त्यर ख्वर कैं फोड़ि द्यल, और तु वीक खुटक कुर्कुच कैं डांसलै।" 16 तब प्रभु परमेश्वरल स्यैणि धैं कौ, "किलैकि त्वील म्यर कौय नि मॉन, यैक लिजी जब तु अङ-भारि ह्वेलि तब तुकैं भौत जादे परेशानी ह्वेलि। तेरि मंशा आपण बैगक लिजी ह्वेलि, पर उ तुमिं आपण हुकुम चलाल।" a
17 तब प्रभु परमेश्वरल मैंस धैं कौ, "मील हुकुम दी रॉखछी कि तुम उ बोटक फल नि खाया। लेकिन त्वील आपण स्यैणिकि बात सुणिबेर उ बोटक फल खै ले। 18 यैक लिजी मी तुमर गल्तिक कारणल धरति कैं फिटकार दिंनू। धरति त्यर लिजी कॉन और झाड़-पात पैद करलि। तु धरतिक नाज-पाणि कैं जिन्दगीभर भौत मेहनत करिबेर खालै। 19 तु आपण खॉणक लिजी उ बखत तलक मेहनत करलै, जब तलक त्यर कपाव मिं पसिण नि ऐ जाओ। और अंत मिं तु दुबार मॉट मिं मिलि जालै, किलैकि तु मॉटलै बणाई गो छियै।
20-24 तब प्रभु परमेश्वरल मैंस और वीक स्यैणिक लिजी जानवरों कैं मारिबेर उनर खालक लुकुड़ बणैबेर उनुकैं देईं। फिर प्रभु परमेश्वरल कौ, "देखो, मैंस हमर जस्सै है गो। उ भल और नकक बारि मिं जाणणौ और ऑब जीवनक बोट बे लै फल खै सकुं। अगर मैंस उ फल कैं खॉल, तब हमेशा ज्यून रौल।" यैक लिजी प्रभु परमेश्वरल मैंस कैं उ बगीच बे भ्यार भेजि दे, कि उ उ मॉट मिं खेति करो, जैल उकैं बड़ाई गोछी।
परमेश्वरल मैंस और वीक स्यैणि कैं बगीच बे भ्यार निकालिबेर खाश स्वर्गदूतों कैं बगीचक द्वार मिं देखभाल करणक लिजी धरौ, जो हरेक बखत ऑगकि तलवार घुमूनै रुंछी।
यौ पैल मैंसक नाम आदम छी, और वील आपण स्यैणिक नाम हव्वा (मतलब ज्यून) धरौ, किलैकि उ सब मैंसोंक आदिमाता है।