शुरुवाद 2

पैल बैग

(उत्‍पत्ति २:७-९, १५-१७)

2 परमेश्‍वरल दुनी बणूणक हरेक काम छटूं दिन पुर करणक बाद सतूं दिन ऐराम करौ। यैक लिजी परमेश्‍वरल सतूं दिन कैं अलग करिबेर उकैं एक खाश दिन ठैरा। 7-9 परमेश्‍वरल पैल मैंस कैं इसिक बणा, कि पैली वील धरति बे मॉट लिबेर एक मैंस बणा, वील वीक नाक भितेर आपणि सांस फूकी और तब उ मैंस एक ज्‍यून प्राणि बणौ।

और वीक बाद प्रभु परमेश्‍वरल पूरब दिशाक अदन नामक जॉग मिं मैंसक रुणक लिजी एक बगीच बणा, जां हरेक बढ़िया-बढ़ि बोट छी जनार फल खॉण मिं मिठ छी। और उ बगीचक बीच मिं जीवनक फलक बोट लगै रॉखछी। परमेश्‍वरल वां एक यस बोट लै बणै रॉखछी जैक फल भल और नक द्विनोंक ज्ञान दिंछी। 15-17 और तब प्रभु परमेश्‍वरल उ मैंस कैं जकैं वील बणै रॉखछी बगीच मिं धरौ। और उकैं उ बगीचक देखभाल करणक काम सौंपौ।

प्रभु परमेश्‍वरल मैंस धैं यस कौ, "तु बगीचक क्‍वे लै बोटक फल खै सकछै, लेकिन उ बोटक फल नै जो भल और नक द्विनोंक ज्ञान द्‍यूं। अगर तु वीक फल खालै तब तु जरूड़ मरि जालै।"

पैल स्‍यैणि

(उत्‍पत्ति २:१८-२५)

18-25 तब प्रभु परमेश्‍वरल कौ, "मैंसक यकलै रुण भल न्‍हैं। ऑब मी वीक लिजी एक दगड़ी बणूंनू जो वीकि जोड़िदार ह्‌वेलि।" यैक लिजी प्रभु परमेश्‍वर हरेक जानवर और प्‍वथील जो वील धरतिक मॉटल बणाछी उनुकैं मैंसक सामण ल्‍यीं। और मैंसल उनर अलग-अलग नाम धरी। मैंसल घरेलू जानवरोंक, अगाशक सब प्‍वथीलोंक और जंग्‍ली सब जानवरोंक नाम धरीं। मैंसल अलग-अलग जानवर और प्‍वथील देखीं, लेकिन उकैं क्‍वे यस दगड़ु नि मिल जो वीक ज्‍वड़क हो।"

और यौ कारणल प्रभु परमेश्‍वरल मैंस कैं भौत गैल नीन मिं सितै दे। और जब उ से रौछी तब वीक छाति मिं बे एक भांट निकालिबेर उ जॉग बन्‍द करि दे। तब प्रभु परमेश्‍वरल मैंसक उ भांटल स्‍यैणि बणै, और उकैं मैंसक पास ल्‍या। जब मैंसक नीन खुली तब वील स्‍यैणि कैं देखिबेर कौ, "अरे, वाह वाह! मेरि जोड़िदार मिल गे जकैं मी चाणौछी। यौ बिल्‍कुल मेरि जसि छु।" (यैक लिजी इनेरि उणिवॉल पुश्‍तक मैंस आपण इज-बाबू कैं छोड़िबेर आपण स्‍यैणिक दगाड़ रौल, और उं द्विवै लै इनर चारि एक आङ है जॉल।)

मैंस और वीक स्‍यैणि बगीच मिं नॉङड़ै रुंछी, लेकिन उनुकैं एक दुसर कैं देखिबेर शरम नि लागछी, किलैकि उं बिल्‍कुल निष्‍पाप छी।