प्रेरितों के काम 20

मकिदुनिया , यूनान होर त्रोसाहा में पौलुस

1 जेबा हुल्लड शांत होऊ तेबा पौलुसे आपणे चेले शदाई क्रुसा मझाई , होर त्याह ह बिदा होई करे मकिदुनिया बे नाठअ । 2 तेऊ सारीे परदेशा में होइकरे होर चेले बहू उत्साहित करी सअ युनाना बे आऊअ । 3 जेबा चीई महीने रही क्रुसा अ तखा क जहाजा पेंदे सीरिया बे नांहदअ लागअ , तेबा यहूदी तेऊरी घाता में , इसलिए त्याह हे यह निश्चय करू कि मकिदुनिया होई करे लौटणा । 4 बिरिया रे पुरुर्स र शोहरू सोपत्रुसहोर थिस्सलुनिकिया मेंज़ा का अरिस्तखुर्स होर सिकुन्दुस होर दिरबे रा गयुस , होर तीमुथियुस होर आसिया र तुखिकुस होर त्रुफिमुस आसिया तणी तेऊ संघा नाठे । 5 परन्तु या लोग क आगे , नाठेदे होर त्रोसाहा में हामा निहालदे , लागे दे । 6 होर हामे अखमीरी रोटी रे दिहाड़े बाद फिलिप्पि क जहाजा पेंदे चढ़ी करे पांजा दिहाड़ी में तेऊ सेटा पूजे , होर साता दिहाड़ी तखी रही । पौलुस त्रोयासा में यूतुखुस जींऊदअ करणअ 7 हप्ते रे पहिले दिहाड़े जेबा हामे रोटी चोडने री तंणी कठे होई , तेबा पौलुसे ज़ोह दूजे दिहाड़े नांहणे आलअ , त्याह हे संघे गला करी , होर आधा राची तंणी गला करदअ रहू । 8 जासू आटारी में हामे कठे , तखे सजिए जलदे , लागे दे । 9 होर युतुखुस ना रअ एक जबान ताकी सेटा बेशी करे गहरी नीन्जा में , होर पौलुस बहू देरी तंणी गला करदअ रहू तेबा सअ नीन्जा में पहिली आटारी क चिंहुणी आटारी पेंदे पडू होर मुंअ दअ चूआकु । 10 परन्तु पौलुस उतरी करे तेऊ में लिपटू होर गलए लाई करे बोलू , “नांई घबराए , किबेकी एऊ रे प्राण एऊ में सा ।" 11 तेबा तेऊ उझे नांही करे रोटी चोडी होर खाई करे त्याह हे संघे बहू देरी तंणी गला करदअ रहू होर दोत होई , तेउखी सअ नाठअ । 12 होर त्याह हे सअ जबान जींऊदअ आणू होर बहू शांति पाई ।

त्रोसाहा क मितेलुसा री यात्रा

13 हामे पहिले ही जहाजा पेंदे चहडी करअ स्सुसा क आगे आऊए कि तखा क पौलुस चहडे किबेकी तेऊ यह ठहराऊ , कि आपु पैदल नांहणे आलअ , । 14 जेबा सअ अस्सुसा में हामा भेटअ तेबा हामे सअ चढाई करे मितुलेने में आणू । 15 तखा क चली करे हामे दूजे दिहाड़े खियुसा सामने पूजे दूजे दिहाड़े हामे समुद्रा पार समोसा में पूजे होर तेबा दूजे दिहाड़े मितेलुसा में आऊए । 16 किबेकी पौलुसे इफिसुसा बा होई करे नांहणे रा निश्चय करू , कंही एडहा नांई हो कि एऊ साहा िया में देर लागे , किबेकी सअ जल्दी में , कि होई सके त सअ पिन्तेकुस्ता री दिहाड़ी यरूशलेमा में रहे । इफिसुसा रे प्राचीनों बे उपदेश 17 तेऊ मिलेतुसा बे सन्देश भेजी करे कलीसिया रे प्राचीनों आपु सेटा शदाई । 18 होर जेबा त्याह तेऊ सेटा आऊए तेऊ बोलू , “ तमे आपे जाणदा कि पहिले दिहाड़े क ही जेबा मांई एशिया में पैर डाही केहडी तरह तमे संघे हर बक्त रहू - 19 अर्थात बड़ेी दीनता संघे , होर आर्शु बहाई-बहाई करे , होर त्याह ह परीक्षा में भी , ज़ोह यहूदी रे षड्यंत्रा रे कारण म्हा पेंदे पड़ी , दईबा री सेबा करदअ रहू । 20 होर ज़ोह -ज़ोह गला थारे लाभा री , त्याह ह खोजणे होर लोग सामने होर घरे-घरे सिखाऊंणे भी नांई झिझकू । 21 हाँऊ यहूदी होर यूनानी रे सामने गाबाही दीनदअ रहू कि दईबा फेरा बे मना फेरेआ होर म्हारे दईबा यीशु मसीह पेंदे विश्वास करे । 22 एबा हेरा हांऊ आत्मा में बान्हू दअ यरूशलेमा बे चालू होर नांई जाणदअ कि तखे म्हा पेंदे कह-कह बीतणी । 23 केबल यह कि पवित्र आत्मा हर नागरे गबाही देई करे म्हा क बोलदा कि बंधन होर क्लेश ताह बे तैयार सा । 24 हांऊ आपणे प्राण केहडी भी तरह आपणे आपा बे प्रिय नांई समझदअ ज़ेबा समझदा तेबा केबल इसलिए कि म्हा आपांणी दौड़ होर तेऊरी सेबा पूरी करणी ज़ोह दईबा रअ अनुग्रह क सुसमाचार पेंदे गबाही दींणे री तंणी दईबा यीशु क पाई । 25 एबा हेरा , हांऊ जाणदा कि तमे सभे जासू में हांऊ दईबा रे राज्य रा प्रचार करदअ फिरा मेरअ मुंह भी नांई भालणअ । 26 इसलिए हाँऊ आज कि दिहाड़ी गबाही देई करे बोलदा , कि हाँऊ सभी रे लोहू क निर्दोष सा । 27 किबेकी हाँऊ दईबा री पूरी इच्छा तमा खोजणे बे नांई झिझकू । 28 इसलिए आपांणी होर आपणे झुंडा री रखबाली करा जासू बीचे पवित्र आत्मा तमे अध्यक्ष ठहराई । कि तमे दईबा री कलीसिया री रखाबाली करे । जूंण तेऊ आपणे लोहू संघे लई दी सा । 29 हांऊ जांणदा कि म्हा नांहणे बाद चिरणे आले भेडिये तमा में इंहणे जासू झुण्ड नांई छाडने । 30 तमा बीचे एह्डे-एह्डे आदमी हूंणे , ज़ोह चेले आपु पीछे खिंचणे री तंणी उलटी सीधी गला करणी । 31 इसलिए जागदे रहा , होर याद करा कि मांई चीअ साला तंणी राच दिहाड आर्शु बहाई-बहाई करे एक-एक समझाऊणे नांई छाडी । 32 होर एबा हांऊ तमा बे दईब होर तेऊरअ अनुग्रह रे बचना सौंपदा , ज़ोह थारी उन्नति कर सकदा होर सब पवित्र करी दे लोगा संघे मीरास देई सकदा । 33 मांई कासीके सोने चांदी या झिखडे रा लोभ नांई करू । 34 तमे आपे ही जांणदा कि याही हाथे मेरी होर मेरे सा री जरूरता पूरी करिदी । 35 मांई तमा बे सभे कुछ रिहाऊदा कि एढ़ी रीति कठिन परिश्रम करीकरे निर्बला संभाले होर दईबा यीशु रे बचना याद डाहे ज़ोह तेऊ आपे बोलिदे , “लेणे क दींणा ठीक सा ।" 36 यह बोली करे तेऊ घुटने टेकी होर त्याह ह सभी संघे प्रार्थना करदअ लागअ । 37 तेबा त्याह सभे लेरदे लागे होर पौलुसा रे गलए लिपटी करे तेऊ बे मुंघी दिंदे लागे । 38 त्याह ज्यादा ऐसा गला क दुखी , कि तमा मेरा मुंह भी नांई भालणअ , होर त्याह हे सअ जहाजा तंणी पजेरी दींनअ ।