प्रेरितों के काम 15

यरूशलेमा री सभा

1 तेबा कुछ लोगा यहूदिया क इच्छी करे भाईओं बे सिखाऊंदे लागे : “ज़ेबा मूसा री रीति संघे थारा खतना ा नांई होला तेबा तमा उद्हार नांई पांऊंणा ।" 2 जेबा पौलुस होर बरनबासा रा त्याह हे संघे बहू झगड़ा होऊ होर बाद-बिवाद होऊ , तेबा यह ठहराऊ कि पौलुस होर बरनबास होर त्याह में कुछ आदमी ऐसा गला रे बारे में प्रेरितों होर प्राचीनों सेटा यरूशलेमा बे नाहे । 3 अत: कलीसिया कुछ दूर तंणी पजेरी दिने ; होर त्याह फीनीके होर सामरिया बा अन्यजाति बे मना फिराऊँणे रे सुसमाचारा शूणाऊंदे लागे , होर सभे भाई बहू आनन्दित होई । 4 जेबा त्याह यरूशलेमा में पूजे , तेबा कलीसिया होर प्रेरित होर प्राचीन त्याह हे संघे खुशी-खुशी मिली , होर त्याह हे खोजू कि दईबे त्याह हे संघे मिली करे केहडे-केहडे कामा करी , । 5 परन्तु फरीसी रे पंथा मेंज़ा का जासु विश्वास करू , त्याह ह में कुछ उठी होर बोलू , “त्याह ह खतना ा करणे होर मूसा री व्यवस्था मानने री आज्ञा दीनी लोढ़ी । 6 तेबा प्रेरित होर प्राचीन ऐसा गला रे बारे में सोचणे री तंणी कठे होई । 7 तेबा पतरसे बहू बाद-बिवाद हूंणे बाद खड़े होई करे बोलू , “हे भाईओ , तमे जाणदा कि बहू दिहाड़े होई कि दईबे तमा मेंजा क हांऊ चुनु ताकि मेरे मुंहा क अन्यजाति सुसमाचारा रा शूणी विश्वास करे । 8 मना जाँचणेआले दईबे त्याह ह भी म्हारे समान पवित्र आत्मा देईकरे त्याह ह री गबाही दीनी ; 9 होर विश्वासा दुआरा त्याह हे रे मन शुद्ध करी करे हामा में होर त्याह ह में कोई फर्क नांई डाहू । 10 तेबा एबा तमे किबे दईबा री परीक्षा करदा कि चेले रे गलआ पेंदे एडह जूं डाहू , ज़ोह ना म्हारे बाप-दादे चुआकि सके होर ना हामे चुआकि सकदे ? 11 हाँ , म्हारा यह फैसला सा कि जासू रीति त्याह दईबा यीशु रअ अनुग्रह में उद्धार पाऊले ; तेसा रीति हामा भी पांऊंणा ।" 12 तेबा सारीी सभा चुपचाप बरनबास होर पौलुसा शूणदी लागी , कि दईबे त्याह ह रे दुआरा अन्यजाति बे केहडे बड़ेे-बड़ेे चिन्ह , होर अद्बभुत काम रीहाई । 13 जेबा त्याह चुप-चाप होई तेबा याकूब बोलदअ लागअ , “हे भाईओ , मेरी शूणा । 14 शमौने खोजू कि दईबे पहिले-पहिले अन्यजाति पेंदे केहडी कृपादृष्टि करी कि त्याह ह मेंज़ा का आपणे ना बे एक आदमी बणाऐ । 15 एता में ज्योत्षी री गला भी मिलदा , जेहडा कि लिखूदा सा , 16 'एता बाद म्हा भी इच्छी करे दाऊदा रा डूहलू दा डेरा ऊठाऊँणा , होर तेऊरे खंडहर भी बनाऊणे होर सअ म्हा खडअ करणअ' 17 इसलिए बाकी आदमी , अर्थात अन्यजाति ज़ोह मेरे ना क कहलांऊंदा , दईबा लोडे , 18 यह सहे दईबा बोलदा ज़ोह एऊ संसारीा री ऊत्पति क याह गला रा समाचार दीनदअ आअदअ ।' 19 इसलिए मेरा बिचार यह सा कि अन्यजाति मेंज़ा का ज़ोह लोग दईबा फेरा बे फीरदा , हामा त्याह ह बे दुःख नांई दींणा ; 20 परन्तु त्याह ह बे लिखी करे भेजा कि त्याह मूर्ति री अशुद्धता होर व्यभिचार होर गलअ घोंटी दे मांसा क लोहू दूर रहे । 21 किबेकी पूराणे टाइमा क नगरा - नगरा में मूसा री व्यवस्था रा प्रचार चेले करदे आएदे , होर तेसा हर सब्ता री दिहाडी पढ़दा ।

अन्यजाति य विश्वासी बे पत्र

22 तेबा सारीी कलीसिया सहित प्रेरितों होर प्राचीनों शोभला लागा कि त्याह ह में कुछ आदमी चुनी , अर्थात यहूदा ज़ोह बरसब्बा कहलांऊंदा , होर सीलास ज़ोह तखे भाईओ में मुखिया , ; होर त्याह पौलुस होर बरनबासे संघे अन्ताकिया भेजी । 23 त्याह हे त्याह ह रे हाथे यह लिखी करे भेजू : “अन्ताकिया होर सीरिया होर किलिकिया रहणे आले भाईओं बे ज़ोह अन्यजाति मेंज़ा का सा , प्रेरितों होर प्राचीन भाईओ री नमस्ते े । 24 हामे शूणू कि हामा में कुछ लोगे तखे नांही करे , तमे आपांणी गला संघे डरेई ; होर थारा मन बदलू परन्तु हामे आज्ञा नांई दीनी , । 25 इसलिए हामे एक मन लाई ठीक समझू कि चुनी दे आदमी आपणे प्रिय बरनबास होर पौलुसा संघे तमा सेटा भेजी । 26 या एडहे आदमी सा जासू आपणे प्राण म्हारे दईबा यीशु मसीह रे ना री तंणी खतारे में डाली । 27 इसलिए हामे यहूदा होर सीलास भेजी दअ , त्याह ह या गला आपणे मुंहा खोजले । 28 पवित्र आत्मा बे होर हामे यह ठीक जाणू कि याह जरुरी गला छाडी , तमा पेंदे होर बोझ नांई डांहणा । 29 कि तमे मूर्ति सेटा बलि रे मांसा क होर लोहू क होर गलआ घोंटी दे मांसा क , होर बुरे व्यवहारा क दूर रहे । एटा क दूर रहले त थारा भला हूंणा । आगे शुभ ।" 30 तेबा त्याह तखा क नाहशी करअ न्ताकिया पूजे , होर सभा कठी करी क्रुसा ह पत्री त्याह ह बे दीनी । 31 त्याह पत्री पढ़ी तेसा उपदेशा री गला क बड़ेे खुशी होई । 32 यहूदा होर सीलास ज़ोह आपु भी ज्योत्षी , बहू गला संघे उपदेश देई करे भाई स्थिर करी । 33 त्याह कुछ दिहाड़ी रहिकारे , भाईओ संघे शांति संघे बीदा होई , कि आपणे भेजणे आले सेटा नांहे । 34 (परन्तु सीलासा तखे रंहणा रांबडा लागा) 35 परन्तु बरनबास होर पौलुस अन्ताकिया में रही : होर अन्य लोगा संघे कठे दईबा रे बचना रा उपदेश दिंदा , होर सुसमाचार शूणाऊंदा , ।

पौलुसा री दूजी प्रचार यात्रा

पौलुस होर बरनबासा में मतभेद 36 कुछ दिहाड़े बाद पौलुस बरनबासा बे बोलू , “जासू -जासू नगरा में हामे दईबा रा बचन शूणाऊ , ईच्छ भी त्याह ह में नांही करे आपणे भाई हेरने त्याह केहडे सा ।" 37 तेबा बरनबासे यहुन्ना बे ज़ोह मरकुस कहलांऊंदा , संघे नींणे रा बिचार करू । 38 परन्तु पौलुसे सअ ज़ोह पंफुलिया में त्याह ह क अलग होऊ , होर कामा पेंदे त्याह ह संघे नांई नाठअ , संघे नींणअ ठीक नांई समझू । 39 अत: एडहा बिबाद ऊठू कि त्याह एकी दूजे क अलग होई ; होर बरनबास , मरकुसे संघे जहाजा में साइप्रसा बे नाठअ । 40 परन्तु पौलुसे सीलास चुनु , होर भाई दईबा रअ अनुग्रह में सौंपी होर तखा क नाठअ ; 41 होर कलीसिया स्थिर करदे - करदे सीरिया होर किलिकिया बाह निखदअ ।