कलीसिया पेंदे अत्याचार चार
8
1 तेसा दिहाड़ी यरुशलेमा री कलीसिया पेंदे बड़ेा उपद्र्ब आरंभ होऊ होर प्रेरितों छाडी सभे यहूदिया होर सामरिया देशा में तितर बितर होई । 2 कुछ भक्ते स्तिफनुस कब्रा में डाहू होर तेऊ री तंणी बडआ दुःख होऊ । 3 शाऊल कलीसिया खत्म करदअ , लागअदअ होर घरे-घरे नांही करे मर्द होर बेटडी घशीटी करे जेला में लाई डांहणे ।सामरिया में फिलिप्पुस रा प्रचार
4 ज़ोह तितर बितर होई त्याह सुसमाचार शुणाऊंदे लागे । 5 होर फिलिप्पुस सामरिया नगरा में नाही करे लोगा बे मसीहा रा प्रचार करदअ लागअ । 6 जूंणा गला फिलिप्पुसे बोली त्याह ए लोगे शुंणी करे होर ज़ोह चिन्ह सअ रीहांऊदा , त्याह हेरी-हेरी करे एक चित होई करे मन लाऊ । 7 किबेकी बहू लोगा क अशुद्ध आत्मा चिलाऊंदे-चिलाऊंदे निखली , होर बहू लकबे रे रोगी होर लंगड़े भी रांबडे होई । 8 होर तेऊ नगरा में बडआ आनंद होऊ ।
जादूगर शामोन
9 एता पहिले तेऊ नगरा में शमौन ना रअ एक आदमी , ज़ोह जादू टोना करी सामरिया लोगा चकित करदअ रंहदा , होर आपणे आपा बे बडअ आदमी माना , । 10 होछे बड़ेे सभे तेऊ रा सम्मान करदा , “यह आदमी दईबा री शक्ति सा , ज़ोह महान कहलाऊँदा ।" 11 तेऊ बहू दिहाड़े तंणी आपणे जादू रे कामा संघे चकित डाही एढ़ी तरह त्याह तेऊ बहू माना , । 12 परन्तु जेबा त्याह ह फिलिप्पुसा पेंदे बिश्बास करू ज़ोह यीशु मसीहा रे राज्य होर यीशु रे ना रा सुसमाचार शूणाऊंदा , तेबा कह बेटडी केह मर्द , बपतिस्मा लंऊदे लागे । 13 तेबा शमौन भी आपे बिश्बास करू होर बपतिस्मा लऊ होर फिलिप्पुसे संघे रंहदअ लागअ । सअ चिन्ह होर बड़ेे-बड़ेे काम हेरी चकित हुंदा , ।
सामरिया में पतरस होर यहुन्हा
14 जेबा प्रेरितों ज़ोह यरुशलेमा में , शूणू कि सामरिये दईबा रा बचन मांनू तेबा पतरस होर यहुन्ना त्याह सेटा भेजी । 15 त्याह ए नांही करे त्याह री तंणी प्रार्थना करी कि पवित्र आत्मा पाए । 16 किबेकी स मची तंणी त्याह ह मेंज़ा का कोही पेंदे आज तंणी नांई ऊतरी , । त्याह ए त सीधी दईबा यीशु रे ना रा बपतिस्मा लऊ , । 17 तेबा त्याह ए त्याह पेंदे हाथ डाही होर त्याह ए पवित्र आत्मा पाऊ । 18 जेबा शमौने हेरू कि प्रेरितों रे हाथा डांहणे क पवित्र आत्मा ईंहदा तो तेऊ सेटा ढबे आंणी करे बोलू , 19 “ यह अधिकार म्हा भी दे , कि जासू -कासु पेंदे हाथ डाहे सअ पवित्र आत्मा पाए ।" 20 पतरसे तेऊ बे बोलू , “तेरे ढबे तांई संघे नष्ट हो , किबेकी ताई दईबा रा दान ढबे संघे लऊंणे रा बिचार करू । 21 ऐसा गला में न तेरा हिस्सा , न भाग , किबेकी तेरा मन दईबा सामने सीधा नांई आंहदा । 22 इसलिए आपांणी एसा बुराई क मन फिराई करे दईबा क प्रार्थना कर , संभव सा कि तेरे मना रा बिचार क्षमा होला । 23 किबेकी हाँऊ हेरा कि तू पिता री कडबाहटे संघे होर अधर्मी रे बंधना में पडू द सा । 24 शमौने उतर दीना , “तू मेरी तंणी प्रार्थना कर कि ज़ोह गला तांई बोली , त्याह में कोहे भी म्हा पेंदे नांई पड़े । 25 अत: सअ गबाही देई करे होर दईबा रा बचन शुंणी करे यरुशलेमा बे नाठअ होर सामरिया रे बहू ग्रां में सुसमाचार शूणाऊ ।
फिलिप्पुस होर कूश देश रा अधिकारी
26 तेबा दईबा रे एकी स्वर्ग दूते फिलिप्पुसा क बोलू , “उठ होर दक्षिणा फेरा बे तेसा बाता नांह , ज़ोह यरूशलेमा क गाजा बे नांहदा । यह रेगिस्थानी बात सा । 27 सअ उठी करे नाठअ होर हेरा , कुश देशा रअ एक आदमी इंहदअ , लागअदअ ज़ोह खोज़ोह होर कुशियो कि राणी कन्दाके रअ मंत्री होर खजांची , । सअ आराधना करदअ यरूशलेमा में आऊअ , । 28 सअ आपणे रथा पेंदे , बेठदअ , होर याशायाह भबिश्यबक्ता री कताबा पढ़दे-पढ़दे , नांहदअ लागअदअ । 29 तेबा आत्मा फिलिप्पुसा क बोलू , “सेटा नाशी करे एऊ रथा संघे नांह ।" 30 फिलिप्पुस तेऊ फेरा बे ठुहरु होर याशायाह भबिश्यबक्ता री कताबा पढ़दअ शूणू होर पुछु , “ तू ज़ोह पढ़दअ लागअदअ कह तेता समझदा भी ?” 31 तेऊ बोलू , “ जेबरे तंणी म्हा कोहे नांई समझाए म्हा केढे समझणा ?” होर तेऊ फिलिप्पुसा आर्जा करी कि चढी करे तेऊ सेटा बेशे । 32 पवित्र शास्त्रा रअ ज़ोह अध्याय ज़ोह सअ पढ़दअ , लागअदअ स यह , “सअ भेड़ा रे समान मरणे री तंणी पजेरू होर जेढ़अ छेलू आपणे काटणे आले सामने चुपचाप रंहदा तेढी तरह तेऊ भी आपण मुंह नांई खोलू । 33 तेऊ री दीनता में तेऊ रा न्याय नांई होई पाऊ । तेऊ टाइमा रे लोगा रा बर्णन कासु करणा ? किबेकी पृथ्बी ी क तेऊ रा प्राण चुआकणा ।" 34 एता पेंदे खोजे फिलिप्पुसा क पुछु , “हांऊ त बिनती करदा , यह खोज की भबिश्यबक्ता यह कासके बारे में बोलदा , आपणे या होरा रे बारे में ।" 35 तेबा फिलिप्पुसे आपण मुंह खोलू , होर तेऊ शास्त्रा क पहिले क शुरू करी करे यीशु रा सुसमाचार शूणाऊ । 36 बाता नांहदे-नांहदे त्याह एक पाणी री जागह पूजे तेबा खोजे बोलू , “हेर अखे पाणी सा एबा म्हा बपतिस्मा लऊणे में कह रोक सा ।" 37 फिलिप्पुसे बोलू , “ज़ेबा तू सारीे मना संघे करदा तेबा ही तू लई सकदा ।" तेऊ उतर दीना , “हांऊ बिश्वास करदा कि यीशु मसीह दईबा रअ शोहरू सा ।" 38 तेबा तेऊ रथ खड़े करणे री आज्ञा दीनी होर फिलिप्पुस होर खोजा दुहे पाणी में उतरी होर तेऊ खोजे बे बपतिस्मा दीना । 39 जेबा सअ पाणी मेंज़ा का निखली करे उझे आऊअ , तेबा दईबा रा आत्मा तखे आऊआ होर फिलिप्पुस चकी करे नींऊ होर सअ आनंद करदे-करदे आपांणी बाता नाठअ । 40 फिलिप्पुस अशदोद में आऊअ होर जेबरे तंणी कैसरिया में नांई पूजअ तेभरे तंणी नगर-नगरे सुसमाचार सुणाऊंदअ रहू ।