Yeésu Krísto-dɛ́ɛ Laabáárʊ Kífeńgi
Lúka
waaŋmáa kɩ nɛ́
Naanɩ́ na ɖɩbáázɩ nɛ́
Njííla-dɛ́ɛ tákaraɖáwá naazáánɩ́-daá,
tákaraɖá kɩna gɛ toozo ńgɩ.
Lúka waaŋmaa ná kɩ.
Krísto ńba bɛdɛkɛ́ɛ Yahúúɖuwá bɩka bánŋmatɩ́ Gɩrɛ́ɛkɩ kʊnʊm nɛ́ gɛ waaŋmáa kɩ.
Lúka tɛkɛ́ɛ Yeésu-dɛ́ɛ tɩndʊ́ʊ,
cáńfáná bɔtɔ́ sɩsɩ waana yɩ na waazá nyazɩ Maatéwu yáá Yʊháánɩ.
Lákʊ́ta kʊ́bɔnɩ́ gɛ ɩgɛ́ɛ.
Amá,
naanɩ́ ɩŋmáa tákaraɖá kɩna nɛ́,
waabá ɩbɔ́ɔ́zɩ gɛ bɩbɩ́ɩ wenbá baana Yeésu,
na wenbá beewélesi yɩ,
na wenbá bána yɩ baalá tɩmɛ́rɛ nɛ́.
Ngɛ weeɖéézi sɩsɩ wentí tɩrɩ́ŋa waanɩ́ɩ bɔjɔ́ nɛ́ kɛ́ɛ toovonúm.
Tákaraɖá kɩna kɩdɛ́ɛ kabaazɩya-daá nɛ́,
Lúka wɛɛgɛ́ɛ́zɩ wenbá wánŋmaá wɛ nɛ́ nŋɩ́nɩ́ bɩɩlá hálɩ bɔkɔ́nɩ balʊ́rʊ Yeésu nɛ́.
Ngɛ ńŋɩnáa ɩgɛ́ɛ na bú abaalʊ́ kaɖaa ńnɩ́ nɛ́,
Lúka waawɩ́lɩ nŋɩ́nɩ́ ɩgɔɔ na ɩjaa boovu wentí Múúsá-dɛ́ɛ Mará-daá,
baaɖʊ sɩsɩ bála bú abaalʊ́ kaɖaa ńnɩ́ báa weení nɛ́.
Lúka waaŋmátɩ ɖʊɖɔ Yeésu-dɛ́ɛ lɩ́m-daá liríi-dɛ́ɛ tɔ́m hálɩ ɩwɩ́lɩ nŋɩ́nɩ́ bɩɩlá hálɩ ɩbáázɩ ɩdɛ́ɛ tɩmɛ́rɛ zamɔ́ɔ-daá nɛ́.
Waaŋmátɩ sɩ́m wenbí Yeésu waazɩ ná bɩ nɛ́,
na ɩdɛ́ɛ ɩsɩɖáa-daá fém-dɛ́ɛ tɔ́m.
Lúka waawɩ́lɩ sɩsɩ Wúro Lɛɛrʊ́ weení Ɩsɔ́ɔ waavʊ́ńbaná caanawʊ́ anɖébiwá ɩŋmátɩ ɩdɔ́m sɩsɩ wéngediríi yɩ ɩkɔ́nɩ ɩlɛ́ɛ ɩráa,
ngɛ Yahúúɖuwá ɩvʊnbá baɖamáa yɩ nɛ́,
ɩnáábɩ́lɛ́ Yeésu.
Tɩmɛ́ Yeésu waalá yɛ nɛ́ adaá,
Lúka waaŋmátɩ Ɩsɔ́ɔ-dɛ́ɛ Kowúrɔ́ɔ-dɛ́ɛ tɔ́m Yeésu waaŋmátɩ nɛ́,
na waázuwá ndɩ‑ndɩ wentí waalaaná lám nɛ́-dɛ́ɛ tɔ́m;
kʊdɔmɩ́nɩ waawáázɩ tɩ nɛ́,
zííniwá ndɩ‑ndɩ wɔɔɖɔ́ɔ tɩ tɩlɩ́ɩ ɩráa-rɔ nɛ́,
maamááciwá kʊ́bɔńdɩ na mááɖéwá Yeésu waalá nɛ́ bɩdɛ́ɛ tɔ́m.