Yeésu Krísto-dɛ́ɛ Laabáárʊ Kífeńgi
Lúka
waaŋmáa kɩ nɛ́
Wenbí bʊrɔ Lúka waaŋmáa tákaraɖá kɩna nɛ́
1
1 Kʊ́bɔnɩ́ Tewofíili,
wenbí bɩrɩ́ŋa bɩɩlá ɖɛ́dɛ́ɛ cé nɛ́,
ɩráa ɖabata waaŋmáa bɩdɛ́ɛ tɔ́m.
2 Wenbá baana ná tɩ na baazá ɖoo bɩgabaazɩya ngɛ bɛɛgɛ́ɛ́zɩ ɖáa nɛ́,
bɛlɛ́ baabɩ́sɩ Ɩsɔ́ɔ-dɛ́ɛ tɔ́m feeriɖáa.
Wenbí bɛɛgɛ́ɛ́zɩ nɛ́,
bɩlɛ́ nɔ́ɔ́ gɛ ɩráa bɛḿ baaŋmáa.
3 Bɩnáábɩ́lɛ́ mɔ́ɔ́ ɖʊɖɔ mɔ́ɔ́bɔ́ɔ́zɩ bɩbɩ́ɩ madɩlɩ́ wenbí bɩrɩ́ŋa bɩɩlá ɖoo bɩgabaazɩya nɛ́,
ngɛ mááná sɩsɩ bɩmɔɔ́na maŋmáa nya nŋɩ́nɩ́ biibó nɛ́,
4 na ndɩlɩ́ sɩsɩ wentí baawɩ́lɩ nya nɛ́ kɛ́ɛ toovonúm.
Malááyɩ́ka weevééri Sákarɩ sɩsɩ wánlʊrʊ́ʊ Yaayá
5 Sáátɩ wenkí Eróodi wénɖíi kowúrátɩ Yudée laadɔ́ɔ-rɔ nɛ́,
Ɩsɔ́ɔ-dɛ́ɛ sarásɩ lanɖʊ́ naárʊ fʊnwɛ,
bánÿaá yɩ sɩsɩ Sákarɩ.
Sarásɩ lanɖáa-dɛ́ɛ bɔwá-daá,
bɔwʊ́ɖɛ wenɖé-daá Abíya kɛ́ɛ kʊjʊ-dʊ́ʊ nɛ́ ɖɩdaá gɛ ɩwɛ,
bɩka ɩɖɛɛlʊ́ kɛ́ɛ sarásɩ lanɖʊ́ kʊ́bɔnɩ́ Árʊ́ʊ́na bíya‑bíya-daá alíya,
bánÿaá ɩlɛ́ sɩsɩ Elizabɛ́ɛtɩ.
6 Sákarɩ ɩmʊ́ na ɩɖɛɛlʊ́,
bɛlɛ́ɛ́nɩ́ bɔjɔwʊrɛ sɩɩzɛ́ɛ gɛ Ɩsɔ́ɔ ɩzá-daá,
bɩka bovóo Ɖádʊ́ʊ Ɩsɔ́ɔ-dɛ́ɛ Mará na wenbí bɩrɩ́ŋa waazɩ́ɩ́zɩ bɩ nɛ́ na toovonúm.
7 Amá,
bɛvɛ́yɩ́na bú,
káma,
Elizabɛ́ɛtɩ kɛ́ɛ kaalʊrʊya,
bɩka bɛlɛ́ɛ́nɩ́ báńbá babɩ́ɩ ábɔ́náa.
8 Wɩ́rɛ neɖére gɛ Sákarɩ wɛ wánlám sarɔ́ɔ Ɩsɔ́ɔ-dɛ́ɛ Ɖaána kʊ́bɔńga-daá,
káma,
bɔwʊ́ɖɛ wenɖé ɩwɛ ɖɩdaá nɛ́ gɛ bɩɩdála sɩsɩ ɖɩlá Ɩsɔ́ɔ sarásɩ.
9 Sarásɩ lanɖáa tɔ́rɔ́wɛná ɖɔ́ɔ́ná bɔ́ndɔ́ɔ tɛ́tɛ́ na bana weení sɩ ɩfʊ́ʊ́dɩ tulaarɩ́ nɛ́.
Bɩdɛ́ɛ wɩ́rɛ bɔɔdɔ nɛ́,
Sákarɩ gɛ bɩɩgba sɩsɩ ɩ́sʊʊ Ɖádʊ́ʊ Ɩsɔ́ɔ-dɛ́ɛ Ɖaána kʊ́bɔńga-daá ɩfʊ́ʊ́dɩ tulaarɩ́ ɖɩdáarɛ ɖacɩrɩ‑cɩrɩ ńɖɛ-daá.
10 Sáátɩ wenkí ɩwɛ wánvʊʊdɩ́ tulaarɩ́ nɛ́,
zamɔ́ɔ tuutúúma wɛ ná asʊ kɩ́nzʊlʊ́ʊ.
11 Ńna gɛ Ɖádʊ́ʊ-dɛ́ɛ malááyɩ́ka naárʊ waaɖʊ ɩlɩ́ɩ Sákarɩ-rɔ ɩgazɩ́ŋɛ́ɛ ná sarásɩ ɖaalanɖɛ́ wenɖé ɖɩrɔ bánvʊʊdɩ́ tulaarɩ́ nɛ́ ɖɩdɛ́ɛ fúu kíɖiiwú-rɔ.
12 Sákarɩ waagʊ́sɩ gɛ waana yɩ nɛ́,
ɩdaá lɩ́m wɛɛjɛ́,
ngɛ nɩdáárɛ kʊ́bɔnbɔńɖɛ waagba yɩ.
13 Amá,
malááyɩ́ka wɔɔdɔ́ yɩ sɩsɩ:
«Sákarɩ,
nkanɩ́ɩ nɩdáárɛ,
Ɩsɔ́ɔ waamʊ nyɛ́dɛ́ɛ sʊlʊ́ńdɩ.
Nɖɛɛlʊ́ Elizabɛ́ɛtɩ wánlʊrʊ́ʊ nya bú abaalʊ́,
na nva yɩ yɩ́ɖɛ sɩsɩ Yaayá.
14 Wɛ́nvɛɛzɩ́ nyéwenbiré bɩlá nya niíni,
bɩka ɩráa ɖabata ɩfaarɩná ɩdɛ́ɛ lʊrʊ́ʊ.
15 Wɔ́ngɔnɩ́ ɩlá ɩrʊ́ kʊ́bɔnɩ́ Ɩsɔ́ɔ ɩzá-daá;
ɩ́dɔ́nnyɔɔ víinyi bíya sʊlʊ́m,
cáńfáná sʊlʊ́m ɖóni ńbɩ nabɩ́rɩ,
ngɛ Kezeŋa Ɖacɩrɩ‑cɩrɩ ńga wóngozunáa yɩ ɖoo ɩgɔɔ lóódi-daá.
16 Wɔ́ngɔnɩ́ ɩkábɩsɩná Israyɛ́ɛlɩ bíya ɖabata-dɛ́ɛ laakáarɩ Badʊ́ʊ Ɩsɔ́ɔ-rɔ.
17 Wɛ́ndɛ́ɛ yɩ nɩ́bááwʊ;
Kezeŋa na yíko Anɖébi Elíya wooyuú kɩ nɛ́ gɛ sɩ iyuú na ɩnyɔ́ɔ́zɩ caanáa na bebíya bɔlɔwʊtáá.
Bɩka wenbá bédénzée Ɩsɔ́ɔ nɛ́,
babɩ́sɩ áséńsí-dɩnáa ńŋɩnáa ɩráa bɔjɔwʊrɛ sɩɩzɛ́ɛ nɛ́.
Bɩlɛ́ gɛ sɩ ɩlá na ɩkpɩ́ɩ́rɩ Ɖádʊ́ʊ Ɩsɔ́ɔ zamɔ́ɔ wenkí kɩɖamáa yɩ nɛ́.»
18 Ngɛ Sákarɩ wɔɔbɔ́ɔ́zɩ malááyɩ́ka sɩsɩ:
«Wé gɛ sɩ madɩlɩ́na sɩsɩ bɩgɛ́ɛ toovonúm.
Káma,
mána mɛɖɛɛlʊ́ ɖáńbɩ́ɩ́ ábɔ́náa.»
19 Ngɛ malááyɩ́ka woobúsi yɩ sɩsɩ:
«Mɔ́ɔ́ gɛ Jibiríílu,
mɔ́wɛ Ɩsɔ́ɔ ɩzá-daá gɛ mánlám yɩ bɔwʊtá.
Weegédíri ma gɛ sɩsɩ mɔ́gɔnɩ mevééri nya Laabáárʊ Kífeńgi kɩna.
20 Amá,
ńŋɩnáa ńdáfá wentí méévééri nya tɩ nɛ́ toovonúm ngʊ́ tɩwɛ sɩ tɩlá a tɩdɛ́ɛ alɩwáátɩ waadála nɛ́,
bʊrɔɔzɩ́,
nyánbɩsɩ́ komóomúŋa hálɩ wɩ́rɛ wenɖé bɩdɛ́ɛ yáásɩ́wá sɩ tɩlá nɛ́.»
21 Bɩdɛ́ɛ sáátɩ kɩḿ nɛ́,
zamɔ́ɔ wɛ kɩɖamáa Sákarɩ bɩka kɩ́nlám bítí sɩsɩ weegéleeri ɖɩdáarɛ ɖacɩrɩ‑cɩrɩ ńɖɛ-daá.
22 Sáátɩ wenkí waagálɩɩ nɛ́,
ɩdabɩ́ɩ́zɩ ɩŋmatɩná wɛ;
ńna gɛ bɛlɛ́ baadɩlɩ́ sɩsɩ bɩɩlɩzɩ́ nabʊ́rʊ bɩkáwɩlɩ yɩ ɖɩdáarɛ ɖacɩrɩ‑cɩrɩ ńɖɛ-daá.
Níízi gɛ waaŋmatɩná wɛ bɩka ɩwalɩ́ bɩlɛ́ ɩbɩ́sɩ komóomúŋa.
23 Sáátɩ wenkí Sákarɩ-dɛ́ɛ sarásɩ lám-dɛ́ɛ wɛ́-bíya wɛɛdɛ́ nɛ́,
ngɛ wɔɔlɔ́ɔ ɩbɩ́sɩ ikpé ɩdɛ́ɛ.
24 Bɩɩgɔ́nɩ bɩlá wɛ́ náálɛ nɛ́,
ɩɖɛɛlʊ́ Elizabɛ́ɛtɩ wɛɛyɛ́ɛ fuwá,
ngɛ ɩlɛ́ wɔɔjɔ́ɔ ɖaána hálɩ irodunáa nɔɔ́nʊ́wá ɩdalɩ́ɩ asʊ.
Bɩdɛ́ɛ sáátɩ kɩḿ nɛ́ ɩwɛ wɔ́ndɔ́m ɩdɩ sɩsɩ:
25 «Wenbí Ɖádʊ́ʊ Ɩsɔ́ɔ waalá ma nɛ́ nbɩlɛ́;
alɩwáátɩ wenkí bɩɩmɔ́ɔ yɩ nɛ́,
weewíi mɔ́rɔ́ ɩlɩzɩ́ ma fɛɛrɛ́ ɩráa-daá.»
Malááyɩ́ka weevééri Marɩyáma sɩsɩ wánlʊrʊ́ʊ Yeésu
26 Elizabɛ́ɛtɩ-dɛ́ɛ fuwá-dɛ́ɛ irodúu loɖo ńnɩ́-daá gɛ Ɖádʊ́ʊ Ɩsɔ́ɔ weegédíri malááyɩ́ka Jibiríílu Nazarɛ́ɛtɩ tɛ́ɛ́dɩ tɩwɛ Galilée laadɔ́ɔ-rɔ nɛ́ tɩdaá.
27 Weegédíri yɩ bú aléeré naárʊ ɩdatɩlɩ́ ta abaalʊ́ nɛ́ ɩjɔ́.
Bú aléeré ɩmʊ́,
wúro Ɖáwʊɖa-dɛ́ɛ ɖugoré-daá ɩrʊ́ bánÿaá yɩ sɩsɩ Ísifu nɛ́ gɛ baava yɩ,
ɩdɛ́ɛ yɩ́ɖɛ gɛ Marɩyáma.
28 Malááyɩ́ka waazʊ́ʊ ɩjɔ́ ɩtɔ́ yɩ sɩsɩ:
«Mɛ́ɛ́zɛ́ɛ nya.
Nyóóyúú kʊjʊʊ́ niíni Ɖádʊ́ʊ Ɩsɔ́ɔ-jɔ́,
Ɖádʊ́ʊ Ɩsɔ́ɔ sɩ́ŋɛ́ɛ nyɔ́wɔ́rɔ́.»
29 Marɩyáma waanɩ́ɩ tɔ́m bíya bɛḿ nɛ́,
ngɛ waazʊ́ʊ bítí,
ngɛ wɔ́nbɔɔzɩ́ ɩdɩ sɩsɩ:
«Sɛ́ɛ́dɩ tɩna tugutoluú gɛ sɩsɩ wé.»
30 Ńna gɛ malááyɩ́ka wɔɔdɔ́ yɩ sɩsɩ:
«Nkanɩ́ɩ nɩdáárɛ,
Marɩyáma,
nyóóyúú kʊjʊʊ́ niíni Ɩsɔ́ɔ-jɔ́.
31 Bɛɛ́ɛ,
nyɛ́nÿɛɛ́ fuwá nlʊ́rʊ bú abaalʊ́,
na nva yɩ yɩ́ɖɛ sɩsɩ Yeésu.
32 Wɔ́ngɔnɩ́ ɩbɩ́sɩ ɩrʊ́ kʊ́bɔnɩ́,
bɩka bayáa yɩ sɩsɩ Ɩsɔ́ɔ bílí-bílí-dʊ́ʊ Biyaalʊ́.
Ɖádʊ́ʊ Ɩsɔ́ɔ wánzɩɩ́ yɩ ɩjaájaa wúro Ɖáwʊɖa-dɛ́ɛ kowuro-gbelé-rɔ.
33 Wénɖíi kowúrɔ́ɔ kɛvɛ́yɩ́na tɛ́m nɛ́ Yaakúbu-dɛ́ɛ ɖaána-rɔ ngɛ ɩdɛ́ɛ kowúrɔ́ɔ fɛ́yɩ́na kánzɩɩ́ tɩ́ŋa kɛtɛngɛrɛ.»
34 Ngɛ Marɩyáma wɔɔdɔ́ malááyɩ́ka sɩsɩ:
«Tɔ́ɔ,
nɛ́,
nŋɩ́nɩ́ gɛ bɩ́nbɩɩzɩ́ bɩlá bɩlɛ́.
Káma,
máásɩ abaalʊ́.»
35 Ngɛ malááyɩ́ka woobúsi yɩ sɩsɩ:
«Kezeŋa Ɖacɩrɩ‑cɩrɩ ńga wɔ́ngɔnɩ́ nyɔ́rɔ́,
na Ɩsɔ́ɔ bílí‑bílí-dʊ́ʊ iyéle ɩdɛ́ɛ yíko ɩbála kifu nyɔ́rɔ́ nyazɩ izotuu.
Bɩlɛ́ bʊrɔ gɛ bú weení sɩ nlʊ́rʊ yɩ nɛ́ kɛ́ɛ ɖacɩrɩ‑cɩrɩ ɩrʊ́,
sɩ bayáa yɩ gɛ sɩsɩ Ɩsɔ́ɔ Biyaalʊ́.
36 Hálɩ bɛɛ́ɛ,
ngoobú Elizabɛ́ɛtɩ ɖʊɖɔ yɛ́ɛ́na fuwá sɩ ɩlʊ́rʊ bú abaalʊ́ ɩdɛ́ɛ ábɔńdɩ-daá.
Ɩdɛ́ɛ irodúu loɖo ńnɩ́-daá gɛ ɩwɛ ɖɔ́,
ɩmʊ́ weení bánvʊnÿaá yɩ sɩsɩ kaalʊrʊya nɛ́.
37 Káma,
nabʊ́rʊ fɛ́yɩ́ Ɩsɔ́ɔ tánbɩɩzɩ ɩlá nɛ́.»
38 Ngɛ Marɩyáma woobúsi yɩ sɩsɩ:
«Ɖádʊ́ʊ Ɩsɔ́ɔ-dɛ́ɛ bɔwʊtá-dʊ́ʊ gɛ mɛ́gɛ́ɛ,
bɩ́la ma ńŋɩnáa nyɔ́ɔ́dɔ́ nɛ́.»
Ngɛ malááyɩ́ka wɛɛɖɛ́ɛ iyéle yɩ.
Marɩyáma woobó ɩkɛ́zɛɛ igoobú Elizabɛ́ɛtɩ
39 Wɛ́ amʊ́ adaá nɛ́,
Marɩyáma waagʊrʊ́ ɩkpɔ́ɔ nɩ́bááwʊ itoózi ɩɖɛ́ɛ bʊ́ʊ́nɩ fáráńdɩ́ Yudée laadɔ́ɔ-dɛ́ɛ tɛ́ɛ́dɩ natɩ́rɩ-daá.
40 Waadála nɛ́,
waazʊ́ʊ Sákarɩ-dɛ́ɛ ɖaána,
ngɛ wɛɛzɛ́ɛ Elizabɛ́ɛtɩ.
41 Sáátɩ wenkí Elizabɛ́ɛtɩ waanɩ́ɩ Marɩyáma-dɛ́ɛ sɛ́ɛ́dɩ nɛ́,
bú waalʊwɔ́ɔ ilóódi-daá.
Ngɛ Kezeŋa Ɖacɩrɩ‑cɩrɩ ńga woozuná Elizabɛ́ɛtɩ.
42 Ńna gɛ woogóo na ɖóni ɩtɔ́ sɩsɩ:
«Ɩsɔ́ɔ waaɖʊ nya alɩbáráka aláa-daá,
ɩɖʊ bú weení nyɛ́yɛ́ɛ́na ivuwá nɛ́ ɖʊɖɔ alɩbáráka.
43 Kʊjʊʊ́ niíni wenkí gɛ móóyúú bɩlɛ́ ngɛ hálɩ Mádʊ́ʊ ɩgɔɔ wɔɔgɔ́nɩ mɔ́jɔ́.
44 Káma,
bɛɛ́ɛ,
sáátɩ wenkí máánɩ́ɩ nyɛ́zɛ́ɛ́dɩ nɛ́,
bú waalʊwɔ́ɔ na avaara mádáá.
45 Wenbi‑niíni-dʊ́ʊ gɛ nyɛ́gɛ́ɛ,
káma,
nyáává toovonúm sɩsɩ wentí Ɖádʊ́ʊ Ɩsɔ́ɔ weegédíri befééri nya nɛ́ tɩ́nlám.»
Yéńdi Marɩyáma weedée ɩsá Ɩsɔ́ɔ nɛ́
46 Waaŋmátɩ bɩlɛ́ nɛ́,
ngɛ Marɩyáma wɔɔjɔ yɩ sɩsɩ:
«Mɔ́nɖɔɔzɩ́ Mádʊ́ʊ Ɩsɔ́ɔ!
47 Bɩɩbá bɩjɔɔ́ɔ ma niíni ɖabata Ɩsɔ́ɔ Mɛ́lɛ́ɛ́rʊ́-rɔɔzɩ́.
48 Káma,
waabɩsɩná ɩlaakáarɩ mɔ́ɔ́ ɩdɛ́ɛ bɔwʊtá-dʊ́ʊ mɔ́rɔ́,
mɔ́ɔ́ weení mɛ́dɛkɛ́ɛ nabʊ́rʊ nɛ́.
Ɩɩ́n,
kpɔɔ lɛlɛɛɖɔ́ hálɩ nbó bíya-bíya-jɔ́ nɛ́,
sɩ bayáa ma gɛ sɩsɩ wenbi‑niíni-dʊ́ʊ.
49 Káma,
Ɖóni-rɩ́ŋa-dʊ́ʊ waalá ma wenbí nɛ́,
bɩɩbá bɩɖɔ́ɔ.
Ɖacɩrɩ‑cɩrɩ-dʊ́ʊ gɛ ɩgɛ́ɛ.
50 Wánnɩɩ́ wenbá bɛ́nnyɛ́m yɩ nɛ́
bagʊnyɔmɩ́nɩ báa ngbeére.
51 Waawɩ́lɩ ɩdɛ́ɛ ɖóni rɩ́ŋa
ɩɖɔ́ɔ wenbá bángbaazɩ́ badɩ nɛ́.
52 Wɛɛvɛdɩ́ ɖóni-dɩnáa bɛdɛ́ɛ kowuro-gbelásɩ-rɔ,
bɩka ɩkpáázɩ wenbá baavʊ́ʊ́zɩ badɩ nɛ́.
53 Waava nyɔɔ-dɩnáa ɖɔ́ɔ́lɛ kʊ́bɔńɖɛ,
bɩka ɩɖɔ́ɔ liideé-dɩnáa bɛɖɛ́ɛ banʊ́ʊ́zɩ riké.
54 Wɔɔdɔ́ɔ́zɩ ɩdɛ́ɛ kʊnyɔnnɩɩrɛ́-rɔɔzɩ́,
ngɛ wɔɔɖɔ́kɩ Israyɛ́ɛlɩ ɩzamɔ́ɔ kɩ́nlám yɩ bɔwʊtá nɛ́,
55 ńŋɩnáa wenbí waavʊ́ńɖuuná ɖájaájaanáa sɩsɩ wánbanáa Ibrahím na ibíya-bíya ɩlá bʊrɔ báa ngbeére hálɩ bɩ́dɛ́ndɛŋ́ nɛ́.»
56 Marɩyáma wɔɔjɔ́ɔ Elizabɛ́ɛtɩ-jɔ́ nyazɩ irodunáa noódoozo bɩlɛ́ naanɩ́ ɩlɔ́ɔ ɩbɩ́sɩ ɩdɛ́ɛ.
Yaayá-dɛ́ɛ lʊrʊ́ʊ-dɛ́ɛ tɔ́m
57 Sáátɩ wenkí Elizabɛ́ɛtɩ-dɛ́ɛ lʊrʊ́ʊ waadála nɛ́,
waalʊ́rʊ bú abaalʊ́.
58 Igoobíya na ɩdɛ́ɛ fáráńdɩ́-daá ńba waanɩ́ɩ bɩlɛ́ sɩsɩ Ɖádʊ́ʊ Ɩsɔ́ɔ waabá ɩnɩ́ɩ ɩgʊnyɔḿ nɛ́,
bɩɩlá wɛ niíni bána yɩ bánvaarɩ́.
59 Bú waalá wɛ́ lutoozo sɩ bɛbɛlɩ́ yɩ nɛ́,
ngɛ bɔɔgɔ́nɩ.
Bɔɔzɔ́ɔ́lɩ sɩsɩ bafa yɩ yɩ́ɖɛ sɩsɩ Sákarɩ,
ńŋɩnáa bánÿaá ɩjaa nɛ́.
60 Amá,
kɔɔ́wʊ wɔɔjɔ wɛ sɩsɩ:
«Aayɩ́,
sɩ bayáa yɩ gɛ sɩsɩ Yaayá.»
61 Ńna gɛ bɛlɛ́ boobúsi yɩ sɩsɩ:
«Naárʊ fɛ́yɩ́ nyɛ́dɛ́ɛ koobíre-daá bánÿaá yɩ bɩlɛ́!»
62 Ngɛ baavaná caáwʊ ɩzá bɔ́nbɔɔzɩnáa yɩ na níízi na batɩlɩ́ sɩsɩ wé gɛ ɩzɔɔlɛ́ɛ bayáa bú.
63 Ńna gɛ wɔɔbɔ́ɔ́zɩ becéle yɩ kpálɩfɔ́ɔ,
ngɛ waaŋmáa kɔrɔ sɩsɩ:
«Ɩdɛ́ɛ yɩ́ɖɛ gɛ Yaayá.»
Ngɛ bɩɩlá barɩ́ŋa bítí.
64 Nɔɔ́ kʊ́ɖʊḿ nɛ́,
wanzʊlʊmʊ́ʊ woobóɖi ɩbáázɩ ŋmatɩrɛ wánzám Ɩsɔ́ɔ.
65 Ńna gɛ bɩɩlá fáráńdɩ́-daá ńba rɩ́ŋa nɩdáárɛ,
bɩka Yudée laadɔ́ɔ-dɛ́ɛ tɛ́ɛ́dɩwá tɩwɛ bʊ́ʊ́nɩ-daá nɛ́ tɩdaá ɩráa wɛ́ngɛɛzɩ́ wenbí bɩrɩ́ŋa bɩɩlá nɛ́.
66 Ngɛ wenbá barɩ́ŋa bánnɩɩ́ tɩ nɛ́ bánmaazɩ́ tɩrɔ bɩka bɔ́nbɔɔzɩ́ badɩ sɩsɩ:
«We gɛ bú ceení sɩ ɩkɔ́nɩ ɩbɩ́sɩ bɩlɛ́.»
Káma,
Ɖádʊ́ʊ Ɩsɔ́ɔ sɩ́ŋɛ́ɛ ɩwɔ́rɔ́ gɛ na toovonúm.
Yéńdi Sákarɩ weedée ɩsá Ɩsɔ́ɔ nɛ́
67 Kezeŋa Ɖacɩrɩ‑cɩrɩ ńga woozuná bú ɩjaa Sákarɩ,
ngɛ waabáázɩ ŋmatɩrɛ na Ɩsɔ́ɔ nɔɔ́ wɔ́ndɔ́m sɩsɩ:
68 «Sám mɔɔ́na Ɖádʊ́ʊ,
Israyɛ́ɛlɩ-dɛ́ɛ Ɩsɔ́ɔ,
káma,
waagábɩ́sɩ́ná ɩlaakáarɩ ɩzamɔ́ɔ-rɔ ɩlɛ́ɛ kɩ.
69 Weegédíri ɖáa Lɛɛrʊ́ yíko-dʊ́ʊ
ɩdɛ́ɛ bɔwʊtá-dʊ́ʊ wúro Ɖáwʊɖa-dɛ́ɛ kutoluú-dɛ bíya-daá.
70 Bɩlɛ́ gɛ waavʊ́ńbaná ɩdɛ́ɛ anɖébiwá ɖacɩrɩ‑cɩrɩ ńba ɖoo nɛ́ ɩŋmátɩ.
71 Waabaná wɛ ɩŋmátɩ sɩsɩ wɛ́nlɛɛ́ ɖáa ɖábáɖaanáa ndɛ́,
bɩka ɩlɩzɩ́ ɖáa wenbá bádánjaa ɖɛ́dɛ́ɛ kazɔ́ɔ nɛ́ banʊ́ʊ́zɩ-daá.
72 Bɩlɛ́ gɛ waalá ɩwɩ́lɩ ɖájaájaanáa ɩdɛ́ɛ kʊnyɔnnɩɩrɛ́,
bɩka ɩtɔ́ɔ́zɩ ɩdɛ́ɛ keɖiyá ɖacɩrɩ‑cɩrɩ ńga-rɔɔzɩ́.
73 Wɔɔdɔ́ɔ́zɩ wentí waavʊ́ńɖuuná ɖájaájaa Ibrahím nɛ́ bʊrɔ.
74 Tɩlɛ́ gɛ sɩsɩ ɩmʊ́ wánlɩzɩ́ɩ ɖáa ɖábáɖaanáa nʊ́ʊ́zɩ-daá,
na iyéle ɖɩlá yɩ bɔwʊtá nɩdáárɛ fɛ́yɩ́,
75 bɩka ɖɩbɩ́sɩ ɩráa ɖacɩrɩ‑cɩrɩ ńba
na wenbá bɔjɔwʊrɛ sɩɩzɛ́ɛ ɩmʊ́ waazá-daá ɖéweezuú rɩ́ŋa-daá nɛ́.
76 Bɩɩga nyɔ́ɔ́ móbú nɛ́,
sɩ bɔkɔ́nɩ gɛ bayáa nya sɩsɩ Ɩsɔ́ɔ bílí‑bílí-dʊ́ʊ-dɛ́ɛ anɖébi.
Káma,
nyɛ́ndɛ́ɛ Ɖádʊ́ʊ nɩ́bááwʊ ngbɩ́ɩ́rɩ ɩnɩ́báánɩ,
77 bɩka nÿéle ɩdɛ́ɛ zamɔ́ɔ ɩtɩlɩ́ sɩsɩ Ɩsɔ́ɔ wɔ́ngɔnɩ́ sɩ ɩlɛ́ɛ kɩ,
ngɛ na kɩdɛ́ɛ alaháácɩ́wá cɛ́m gɛ sɩ ɩlɛɛná kɩ.
78 Ɩsɔ́ɔ-dɛ́ɛ kʊnyɔnnɩɩrɛ́ kʊ́bɔńɖɛ wánlʊrʊ́ʊ wenbí nɛ́ nbɩlɛ́.
Kɩdɩɩná gɛ weeyéle ɩsɔ́ɔ́dáá ɖɛnyɛm ikédi ɖɔ́rɔ́ ńŋɩnáa wɩ́sɩ wángayáa nɛ́,
79 na ɖɛnyɛm kɩḿ kɩna wenbá bɔwɛ temenuú na sɩ́m nɩ́bááwʊ-daá nɛ́,
bɩka kikéti ɖáa ɖɩnʊ́ŋ fɛɛzɩrɛ-dɛ́ɛ nɩ́bááwʊ-daá.»
80 Bú ɩlɛ́ ɩwɛ ɩbamáa bɩɩ́,
bɩka ɩdɛ́ɛ áséńsí bamáa ɖɔɔmɩ́nɩ Ɩsɔ́ɔ-dɛ́ɛ nɩ́bááwʊ-daá.
Fáráńdɩ́wá lé ɩráa fɛ́yɩ́ nɛ́ tɩdaá gɛ wɔ́njɔwʊ́ʊ hálɩ bɩkɔ́nɩ bɩtála ɩlɩzɩ́ ɩdɩ ɩwɩ́lɩ Israyɛ́ɛlɩ zamɔ́ɔ.